Xana Xilalelo Xa Hosi Xi Vula Yini Eka Wena?
Xana Xilalelo Xa Hosi Xi Vula Yini Eka Wena?
“Mani na mani loyi a dyaka xinkwa kumbe ku nwa xinwelo xa Hosi swi nga fanelanga u ta va ni nandzu eka miri ni ngati ya Hosi.”—1 VAKORINTO 11:27.
1. Hi xihi xiendlakalo xa nkoka swinene lexi kunguhateriweke lembe ra 2003, naswona xi sunguriwe rini?
XIENDLAKALO xa nkoka swinene lexi kunguhateriweke lembe ra 2003 xi ta va hi April 16 endzhaku ka ku pela ka dyambu. Timbhoni ta Yehovha ti ta hlengeletana leswaku ti ta tlangela Xitsundzuxo xa rifu ra Yesu Kreste. Hilaha swi hlamuseriweke hakona eka xihloko lexi hundzeke, Yesu u simeke nkhuvo lowu, lowu nakambe wu vitaniwaka Xilalelo xa Hosi, endzhaku ka loko yena ni vaapostola vakwe va tlangele Paseka hi Nisan 14, 33 C.E. Swifanekiselo swa Xitsundzuxo ku nga xinkwa xo kala comela ni vhinyo yo tshwuka swi fanekisela miri wa Kreste lowu nga riki na xidyoho ni ngati ya yena leyi halatiweke—ku nga rona ntsena gandzelo leri nga kutsulaka vanhu eka ndzhaka ya vona ya xidyoho ni rifu.—Varhoma 5:12; 6:23.
2. Hi xihi xitsundzuxo leri tsariweke eka 1 Vakorinto 11:27?
2 Lava dyaka swifanekiselo swa Xitsundzuxo va fanele va swi dya loko swi fanerile. Muapostola Pawulo u swi veke erivaleni sweswo loko a tsalela Vakreste va le Korinto wa khale, laha a va tlangela Xilalelo xa Hosi hi ndlela leyi nga fanelangiki. (1 Vakorinto 11:20-22) Pawulo u tsarile: “Mani na mani loyi a dyaka xinkwa kumbe ku nwa xinwelo xa Hosi swi nga fanelanga u ta va ni nandzu eka miri ni ngati ya Hosi.” (1 Vakorinto 11:27) Xana marito wolawo ma vula yini?
Van’wana Va Xi Tlangele Hi Ndlela Leyi Nga Fanelangiki
3. Xana Vakreste vo tala va le Korinto a va tikhoma njhani loko ku tlangeriwa Xilalelo xa Hosi?
3 Vakreste vo tala va le Korinto a a va tlangela Xitsundzuxo hi ndlela leyi nga fanelangiki. A ku ri ni ku avana exikarhi ka vona, nkarhi wun’wana van’wana a va ta ni swakudya swa vona swo lalela va swi dya loko nhlangano wu nga si sungula kumbe loko wu ri karhi wu ya emahlweni, hakanyingi a va dya va tlhela va nwa ku tlula mpimo. Hikwalaho, a va nga xalamukanga emianakanyweni ni le moyeni. Leswi swi va endle va “va ni nandzu eka miri ni ngati ya Hosi.” Lava a va ta va nga dyanga swakudya swo lalela a va khomiwa hi ndlala kutani va nga koti ku yingisela. Ina, vo tala va dye hi ndlela leyi nga kombisiki xichavo naswona a va nga wu twisisi hi ku hetiseka nkoka wa xiendlakalo lexi. A swi hlamarisi leswi va tivangeleke ku avanyisiwa.—1 Vakorinto 11:27-34.
4, 5. Ha yini swi ri swa nkoka leswaku lava hi ntolovelo va dyaka swifanekiselo swa Xitsundzuxo va tikambisisa?
4 Leswi Xitsundzuxo xi vaka kona lembe rin’wana ni rin’wana, i swa nkoka leswaku lava hi ntolovelo va dyaka swifanekiselo va tikambisisa. Leswaku va dya swakudya leswi swa ntwanano hi ndlela leyi faneleke va fanele va va exiyin’weni lexinene hi tlhelo ra moya. Un’wana ni un’wana loyi a nga kombisiki xichavo hambi ku ri ku sandza gandzelo ra Yesu u ta va ekhombyeni ro ‘dlayiwa eka vanhu va Xikwembu’ ku fana ni Muisrayele loyi a a dya swakudya swa ntwanano a nga basanga.—Levhitika 7:20; Vaheveru 10:28-31.
5 Pawulo u fanise Xitsundzuxo ni swakudya swa ntwanano swa le Israyele wa khale. U vulavule hi lava a va dya swin’we na Kreste, kutani a ku: “A mi nge nwi xinwelo xa Yehovha swin’we ni xinwelo xa madimona; a mi nge dyi ‘etafuleni ra Yehovha’ swin’we ni le tafuleni ra madimona.” (1 Vakorinto 10:16-21) Loko munhu loyi a dyaka swifanekiselo swa Xitsundzuxo nkarhi hinkwawo a endla xidyoho lexikulu, u fanele a xi phofula eka Yehovha a tlhela a lava ku pfuniwa hi tlhelo ra moya eka vakulu evandlheni. (Swivuriso 28:13; Yakobo 5:13-16) Loko a hundzuka swi suka embilwini a tlhela a humesa mihandzu leyi kombisaka leswaku u hundzukile, se u ta va a dya hi ndlela leyi faneleke.—Luka 3:8.
Ku Va Vahlaleri Lava Xiximaka
6. I vamani lava Xikwembu xi va nyikeke lunghelo ro dya Xilalelo xa Hosi?
6 Lava va endlaka leswinene eka masalela ya 144 000 lama nga vamakwavo va Kreste, xana na vona va fanele va dya Xilalelo xa Hosi? (Matewu 25:31-40; Nhlavutelo 14:1) Doo! Xikwembu xi nyike vanhu lava xi va toteke hi moya lowo kwetsima lunghelo ro va “vadyandzhaka-kulobye na Kreste.” (Varhoma 8:14-18; 1 Yohane 2:20) Kutani, hi xihi xiyimo xa lava nga ni ntshembo wo hanya hilaha ku nga heriki emisaveni leyi nga paradeyisi ehansi ka vulawuri bya Mfumo? (Luka 23:43; Nhlavutelo 21:3, 4) Leswi va nga riki vadyandzhaka-kulobye na Yesu naswona va nga riki na ntshembo wa le tilweni, va ya eXitsundzuxweni va ya va vahlaleri lava xiximaka.—Varhoma 6:3-5.
7. Xana Vakreste va lembe-xidzana ro sungula va swi tivise ku yini leswaku va fanele va dya swifanekiselo swa Xitsundzuxo?
7 Vakreste va ntiyiso va lembe-xidzana ro sungula a va totiwe hi moya lowo kwetsima. Vo tala va vona a va swi kota ku tirhisa tinyiko ta singita ta moya, to tanihi ku vulavula hi tindzimi. Hikwalaho, a swi va kanakanisanga vanhu vo tano ku tiva leswaku a va totiwe hi moya nileswaku a va fanele va dya swifanekiselo swa Xitsundzuxo. Hambiswiritano, enkarhini wa hina, leswi swi nga ha tikomba eka xisekelo xa marito yo tano lama huhuteriweke lama fanaka ni lama: “Hikuva hinkwavo lava kongomisiwaka hi moya wa Xikwembu, lava i vana va Xikwembu. Hikuva a mi amukelanga moya wa vuhlonga lowu vangaka nchavo nakambe, kambe mi amukele moya wa ku vekiwa tanihi vana, moya lowu hi huwelelaka ha wona hi ku: ‘Abba, Tatana!’”—Varhoma 8:14, 15.
8. I vamani lava fanekiseriwaka hi “koroni” ni “mfava” leswi boxiweke eka Matewu ndzima 13?
8 Eka malembe-xidzana lama hundzeke, lava va totiweke hi moya va kule tanihi “koroni” ensin’wini ya “mfava,” leyi ku nga Vakreste va mavunwa. (Matewu 13:24-30, 36-43) Ku sukela hi va-1870, “koroni” yi tikombile leswaku ya engeteleka, naswona emalembeni lama landzeleke valanguteri lava nga Vakreste lava totiweke va byeriwe leswi: “Vakulu . . . va fanele hlamusela swiyimo leswi eka lava nga ta hlengeletana [eXitsundzuxweni]—(1) ripfumelo engatini [ya Kreste]; ni (2) ku tinyiketela eka Hosi ni ntirho wa yona, hambi ku ri ku fikela eku feni. Kutani va fanele va rhamba hinkwavo lava pfumelaka leswaku va ya tlangela rifu ra Hosi.”—Studies in the Scriptures, Series VI, The New Creation, tluka 473. *
Ku Lavisisa “Tinyimpfu Tin’wana”
9. Xana “ntshungu lowukulu” wu hlamuseriwe njhani hi 1935, naswona sweswo swi va khumbe njhani van’wana lava a va dya swifanekiselo swa Xitsundzuxo?
9 Hi ku famba ka nkarhi, nhlengeletano ya Yehovha yi sungule ku nyikela nyingiso eka vanhu van’wana handle ka valandzeri va Kreste lava totiweke. Nhluvuko lowukulu emhakeni leyi wu endleke exikarhi ka va-1930. Emahlweni ka sweswo, vanhu va Xikwembu va langute “ntshungu lowukulu” lowu ku vulavuriweke ha wona eka Nhlavutelo 7:9 va ri ntlawa wa vumbirhi wa moya lowu nga ta hlangana ni lava 144 000 lava totiweke lava pfuxeriweke etilweni—ku fana ni tinxangwana kumbe vanghana va mutekiwa wa Kreste. (Pisalema 45:14, 15; Nhlavutelo 7:4; 21:2, 9) Kambe hi May 31, 1935, eka nkulumo leyi nyikeriweke entsombanweni wa Timbhoni ta Yehovha eWashington, D.C., le U.S.A., swi hlamuseriwe hi ku ya hi Bibele leswaku “ntshungu lowukulu” (‘vunyingi lebyikulu,’ Bibele Ya Xitsonga) i “tinyimpfu tin’wana” leti hanyaka enkarhini wa makumu. (Yohane 10:16) Endzhaku ka ntsombano wolowo, van’wana lava eku sunguleni a va dya swifanekiselo swa Xitsundzuxo va tshike ku dya hikwalaho ka leswi va swi xiyeke leswaku ntshembo wa vona i wa laha misaveni, ku nga ri etilweni.
10. Xana u nga wu hlamusela njhani ntshembo ni vutihlamuleri bya “tinyimpfu tin’wana” ta namuntlha?
10 Ngopfu-ngopfu ku sukela hi 1935 ku sungule ku lavisisiwa lava nga ta va “tinyimpfu tin’wana,” lava nga ni ripfumelo eka nkutsulo, lava tinyiketeleke eka Xikwembu ni ku seketela “ntlhambinyana” lowu totiweke entirhweni wo chumayela wa Mfumo. (Luka 12:32) Tinyimpfu leti tin’wana ti ni ntshembo wo hanya emisaveni hilaha ku nga heriki, kambe kahle-kahle ti yimela masalela lama nga kona ya vadyandzhaka va Mfumo. Ku fana ni valuveri va le Israyele wa khale lava a va gandzela Yehovha naswona va titsongahatela Nawu, namuntlha tinyimpfu tin’wana ti amukela vutihlamuleri bya ku va Mukreste, byo fana ni ku chumayela mahungu lamanene swin’we ni swirho swa Israyele wa moya. (Vagalatiya 6:16) Leswi a a nga ri kona muluveri loyi a a ta va hosi tlhelo muprista eIsrayele, kutani ku hava ni un’we wa tinyimpfu tin’wana loyi a nga ta fuma eMfun’weni wa le tilweni kumbe a va un’wana wa vaprista.—Deteronoma 17:15.
11. Ha yini siku leri munhu a khuvuriweke ha rona ri ri ra nkoka eka ntshembo wakwe?
11 Kutani hi va-1930 a swi ya swi vonaka leswaku ntlawa lowu yaka etilweni se wu hlawuriwile. Se ku hundze makume ya malembe ku ri karhi ku lavisisiwa tinyimpfu tin’wana leti nga ni ntshembo wo hanya laha misaveni. Loko un’wana wa vatotiwa a xandzuka, a swi kanakanisi leswaku ku ta hlawuriwa munhu un’wana eka tinyimpfu tin’wana loyi se a nga ni malembe a tirhela Xikwembu hi ku tshembeka leswaku a ta siva ndhawu eka lava 144-000.
Lexi Endlaka Leswaku Van’wana Hi Xihoxo Va Ehleketa Leswaku Va Ya eTilweni
12. Xana munhu u tshika ku dya swifanekiselo swa Xitsundzuxo loko swi te yini?
12 Vakreste lava totiweke va tiyiseka hi ku helela leswaku va ni ntshembo wa le tilweni. Kambe ku vuriwa yini hi lava a va dya swifanekiselo swa Xitsundzuxo kasi a va na wona ntshembo lowu? Leswi se va swi tivaka leswaku a va na ntshembo wo ya hanya etilweni, hakunene ripfalo ra vona ri ta va susumetela ku tshika ku dya swifanekiselo. Xikwembu a xi nge n’wi tsakeli munhu wihi na wihi loyi a titekaka a ri loyi a nga ta va hosi tlhelo muprista etilweni, kasi wa swi tiva leswaku kahle-kahle a nga na wona ntshembo wolowo. (Varhoma 9:16; Nhlavutelo 20:6) Yehovha u dlaye Kora loyi a a ri Mulevhi kambe hikwalaho ko tikukumuxa a a lava vuprista bya ndyangu wa Aroni. (Eksoda 28:1; Tinhlayo 16:4-11, 31-35) Loko Mukreste wihi na wihi a swi xiya leswaku a a dya swifanekiselo swa Xitsundzuxo hi xihoxo, u fanele a tshika ku dya kutani a khongela hi ku titsongahata a kombela Yehovha leswaku a n’wi rivalela.—Pisalema 19:13.
13, 14. Ha yini van’wana hi xihoxo va anakanya leswaku va ni ntshembo wa le tilweni?
13 Ha yini van’wana hi xihoxo va anakanya leswaku va ni ntshembo wa le tilweni? Loko va feriwe hi munghana wa vukati kumbe va humeleriwa hi makhombo man’wana sweswo swi nga ha va vangela leswaku va nga ha swi naveli ku hanya emisaveni. Kumbe va nga ha navela ku ya etilweni laha munghana lonkulu loyi a a vula leswaku i Mukreste la totiweke a yeke kona. Ina, a ku na munhu loyi Xikwembu xi nga n’wi avela leswaku a khutaza van’wana leswaku va va ni ntshembo lowu. Naswona loko xi tota vadyandzhaka va Mfumo a xi va endli va twa marito yo karhi lama va tiyisekisaka leswaku va totiwile.
14 Tidyondzo ta vukhongeri bya mavunwa ta leswaku vanhu hinkwavo lavanene va ya etilweni ti nga ha endla leswaku van’wana va ehleketa leswaku va ni ntshembo wa le tilweni. Hikwalaho, hi fanele hi tivonela leswaku hi nga kuceteriwi hi mavonelo ya khale lama hoxeke kumbe hi timhaka tin’wana. Hi xikombiso, van’wana va nga ha vutisa: ‘Xana vutshunguri lebyi ndzi byi tirhisaka byi khumba mintlhaveko ya mina? Xana ndzi ni mintlhaveko leyi enteke leyi nga ndzi endlaka leswaku ndzi titwa ndzi ri ni ntshembo wa le tilweni?’
15, 16. Ha yini van’wana hi xihoxo va gimeta hileswaku i van’wana va vatotiwa?
15 Van’wana va nga ha tivutisa leswi: ‘Xana ndzi rhandza ku va ni ndhuma? Xana sweswi ndzi navela ku lawula kumbe ndzi navela ku lawula enkarhini lowu taka swin’we na Kreste?’ Loko vadyandzhaka va Mfumo va hlawuriwa eka lembe-xidzana ro sungula, a hi hinkwavo lava a va ri ni malunghelo yo karhi evandlheni. Naswona vanhu lava nga ni ntshembo wa le tilweni a va tilaveli ndhuma kumbe ku tibuma hikwalaho ka leswi va nga vatotiwa. Lava nga ni “mianakanyo ya Kreste” va titsongahata hi ndlela leyi faneleke.—1 Vakorinto 2:16.
16 Van’wana va nga ha gimeta hileswaku va ni ntshembo wa le tilweni hikwalaho ka leswi va nga ni vutivi byo tala bya Bibele. Kambe loko munhu a totiwile hi moya, sweswo a swi n’wi endli leswaku a kota ku twisisa hi ndlela yo hlawuleka, hikuva Pawulo a a fanele a dyondzisa vatotiwa ni ku va nyika ndzayo. (1 Vakorinto 3:1-3; Vaheveru 5:11-14) Xikwembu xi ni lunghiselelo ro phamela vanhu va xona hinkwavo swakudya swa moya. (Matewu 24:45-47) Kutani ke, ku hava ni un’we loyi a faneleke a anakanya leswaku ku va Mukreste la totiweke swi n’wi endla leswaku a va ni vutlharhi lebyi tlulaka bya lava nga ni ntshembo wa laha misaveni. Loko munhu a totiwe hi moya a swi vuli swona leswaku u ni vutshila byo hlamula swivutiso swa Matsalwa, byo chumayela, kumbe byo nyikela tinkulumo. Vakreste lava nga ni ntshembo wa laha misaveni na vona va na byona vuswikoti byebyo.
17. Ku totiwa hi moya swi titshege hi yini, naswona i mani loyi a va totaka hi moya?
17 Loko mupfumeri-kulorhi a vutisa mayelana ni loko a ri ni ntshembo wa le tilweni, nkulu kumbe Mukreste un’wana la wupfeke a nga ha bula na yena hi mhaka leyi. Phela, munhu a a nga endleli munhu un’wana xiboho. Munhu loyi a nga ni ntshembo lowu hakunene, a swi kali swi lava leswaku a vutisa van’wana loko a ri ni ntshembo wolowo. Lava totiweke ‘va velekiwe hi vuntshwa, ku nga ri hi mbewu leyi onhakaka, kambe hi leyi nga onhakiki leyi tswalaka, hi ku tirhisa rito ra Xikwembu lexi hanyaka ni lexi tshamaka hi masiku.’ (1 Petro 1:23) Xikwembu xi byala “mbewu” hi moya ni hi Rito ra xona, leyi endlaka leswaku munhu a “va xivumbiwa lexintshwa,” lexi nga ni ntshembo wa le tilweni. (2 Vakorinto 5:17) Naswona Yehovha hi yena a hlawulaka. Ku totiwa hi moya “a swi titsheganga hi loyi a navelaka hambi ku ri hi loyi a tsutsumaka, kambe swi titshege hi Xikwembu.” (Varhoma 9:16) Kutani ke, xana munhu a nga tiyiseka njhani leswaku u ni ntshembo wa le tilweni?
Lexi Endlaka Leswaku Va Tiyiseka
18. Xana moya wa Xikwembu wu byi nyikela njhani vumbhoni swin’we ni moya wa vatotiwa?
18 Vumbhoni bya moya wa Xikwembu byi khorwisa Vakreste lava totiweke leswaku va ni ntshembo wa le tilweni. Pawulo u tsarile: “Mi amukele moya wa ku vekiwa tanihi vana, moya lowu hi huwelelaka ha wona hi ku: ‘Abba, Tatana!’ Moya hi woxe wu nyikela vumbhoni swin’we ni moya wa hina leswaku hi vana va Xikwembu. Kutani loko hi ri vana, nakambe hi vadyandzhaka: vadyandzhaka hakunene va Xikwembu, kambe vadyandzhaka-kulobye na Kreste, ntsena loko hi xaniseka swin’we leswaku hi ta tlhela hi vangamisiwa swin’we.” (Varhoma 8:15-17) Moya lowo kwetsima kumbe langutelo leri lawulaka vatotiwa ri va susumetela ku endla leswi Matsalwa ma swi vulaka hi vana va Yehovha va moya. (1 Yohane 3:2) Moya wa Xikwembu wu va endla va titwa va ri vana va xona wu tlhela wu va nyika ntshembo wo hlawuleka. (Vagalatiya 4:6, 7) Ina, hambileswi a va ta swi tsakela ku hanya hilaha ku nga heriki emisaveni va ri vanhu lava hetisekeke swin’we ni mindyangu ni vanghana va vona, kambe Xikwembu a xi va nyikanga wona ntshembo wolowo. Hi ku tirhisa moya wa xona, Xikwembu xi va endla va va ni ntshembo lowu tiyeke wo ya hanya etilweni lerova va tiyimisela ku siya hinkwaswo swa laha misaveni.—2 Vakorinto 5:1-5, 8; 2 Petro 1:13, 14.
19. Xana ntwanano lowuntshwa wu n’wi pfuna njhani Mukreste la totiweke?
19 Vakreste lava totiweke va tiyiseka hi ntshembo wa vona wa le tilweni, ni leswaku va nghenisiwe eka ntwanano lowuntshwa. Yesu u vulavule ha wona loko a simeka Xitsundzuxo a ku: “Xinwelo lexi xi vula ntwanano lowuntshwa hikwalaho ka ngati ya mina, leyi nga ta halateriwa n’wina.” (Luka 22:20) Swirho swa ntwanano lowuntshwa i Xikwembu ni vatotiwa. (Yeremiya 31:31-34; Vaheveru 12:22-24) Yesu i muhlanganisi. Leswi ntwanano lowu lowuntshwa wu sunguleke ku tirha hikwalaho ka ngati ya Kreste leyi halatiweke, wu hlawule Vayuda ni vanhu va matiko va vito ra Yehovha wu va endla swirho swa “mbewu” ya Abrahama. (Vagalatiya 3:26-29; Mintirho 15:14) “Ntwanano lowu nga heriki” wu endla Vaisrayele va moya hinkwavo leswaku va pfuxeriwa evuton’wini lebyi nga riki na ku onhaka etilweni.—Vaheveru 13:20.
20. Vatotiwa va nghenisiwa eka ntwanano wihi na Kreste?
20 Vatotiwa va tiyiseka hi ntshembo lowu va nga na wona. Va nghenisiwe eka ntwanano wun’wana, ku nga ntwanano wa Mfumo. Malunghana ni ku fuma swin’we na Kreste, Yesu u te: “Hi n’wina mi khomeleleke swin’we na mina emiringweni ya mina; kutani ndzi endla ntwanano swin’we na n’wina, hilaha Tata wa mina a endleke hakona ntwanano wa mfumo swin’we na mina.” (Luka 22:28-30) Ntwanano lowu, lowu nga exikarhi ka Kreste ni vamakwavo lava nga tihosi wu tirha hilaha ku nga heriki.—Nhlavutelo 22:5.
Nguva Ya Xitsundzuxo—I Nkarhi Lowu Vuyerisaka
21. Xana hi nga vuyeriwa ngopfu hi ndlela yihi eka nguva ya Xitsundzuxo?
21 Hi nga vuyeriwa swinene hi nguva ya Xitsundzuxo. Hi nga vuyeriwa loko hi landzela xiyimiso xa ku hlaya ka Bibele ka nkarhi wolowo. Nakambe i nkarhi lowu faneleke wa xikhongelo, wo anakanyisisa hi vutomi bya Yesu bya laha misaveni ni rifu rakwe ni ku hlanganyela entirhweni wo chumayela hi Mfumo. (Pisalema 77:12; Vafilipiya 4:6, 7) Nkhuvo hi woxe wu hi tsundzuxa hi rirhandzu leri kombisiweke hi Xikwembu na Kreste leri fambisanaka ni gandzelo ra Yesu ra nkutsulo. (Matewu 20:28; Yohane 3:16) Lunghiselelo leri ri hi nyika ntshembo ni nchavelelo naswona ri fanele ri tiyisa xiboho xa hina xo namarhela ndlela ya Kreste. (Eksoda 34:6; Vaheveru 12:3) Xitsundzuxo xi fanele xi tlhela xi hi tiyisa leswaku hi hetisisa ku tinyiketela ka hina tanihi malandza ya Xikwembu ni ku va valandzeri lava tshembekaka va N’wana wa xona la rhandzekaka.
22. Hi yihi nyiko leyikulu leyi Xikwembu xi yi nyikeke vanhu, naswona hi swi kombisa njhani leswaku ha yi tlangela?
22 Wa nga vona tinyiko letinene leti Yehovha a hi nyikaka tona! (Yakobo 1:17) Rito ra yena ra hi kongomisa, moya wa yena wa hi pfuna naswona hi ni ntshembo wa vutomi lebyi nga heriki. Nyiko leyikulu ya Xikwembu i gandzelo ra Yesu ra swidyoho swa vatotiwa ni lavan’wana hinkwavo lava kombisaka ripfumelo. (1 Yohane 2:1, 2) Kutani, xana rifu ra Yesu i ra nkoka ku fikela kwihi eka wena? Xana u ta kombisa ku ri tlangela hi ku va exikarhi ka lava nga ta va va tlangela Xilalelo xa Hosi hi April 16, 2003, endzhaku ka ku pela ka dyambu?
[Nhlamuselo ya le hansi]
^ par. 8 Yi kandziyisiwe hi Timbhoni ta Yehovha kambe sweswi a ya ha kandziyisiwi.
U Nga Hlamurisa Ku Yini?
• I vamani lava faneleke va dya swifanekiselo swa Xitsundzuxo?
• Ha yini “tinyimpfu tin’wana” ti ya eXilalelweni xa Hosi ti ya va vahlaleri lava xiximaka?
• Xana Vakreste lava totiweke va swi tivisa ku yini leswaku va fanele va dya xinkwa ni vhinyo eXitsundzuxweni xa rifu ra Kreste?
• Xana nguva ya Xitsundzuxo i nkarhi lowu faneleke wa yini?
[Swivutiso Swa Dyondzo]
[Grafu/Swifaniso leswi nga eka tluka 18]
(Leswaku u vona rungula leri hleriweke hi ku helela, vona nkandziyiso wa kona)
Nhlayo Ya Lava Veke Kona eXitsundzuxweni
TIMILIYONI
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Xifaniso lexi nga eka tluka 18]
Xana lembe leri u ta va kona eka Xilalelo xa Hosi?
[Swifaniso leswi nga eka tluka 21]
Nguva ya Xitsundzuxo i nkarhi lowu faneleke wo hlaya Bibele swinene ni ku hlanganyela entirhweni wo chumayela hi Mfumo