Ha Yini Vanhu Va Xanisiwa Hikwalaho Ka Vukhongeri Bya Vona?

XANA u anakanya leswaku vanhu va fanele va xanisiwa hikwalaho ka vukhongeri bya vona? Kumbexana a va fanelanga va xanisiwa ntsendze loko va nga ngheneleli eka timfanelo ta van’wana. Kambe, i khale vanhu va xanisiwa hikwalaho ka vukhongeri bya vona naswona nisweswi va ha xanisiwa. Hi xikombiso, timfanelo ta Timbhoni ta Yehovha to tala ta le Yuropa ni ta le matikweni man’wana ti tluriwile naswona ti xanisiwe hi ndlela ya tihanyi eka lembe-xidzana ra vu-20 hinkwaro.

Hi nkarhi wolowo, Timbhoni ta Yehovha ti xanisiwe hi ndlela leyi hleriweke ya tihanyi, naswona ti xanisiwe nkarhi wo leha ehansi ka mimfumo mimbirhi leyi tshikilelaka le Yuropa. Xana leswi ti langutaneke na swona swi hi dyondzisa yini hi ku xanisiwa hikwalaho ka vukhongeri? Naswona hi nga dyondza yini eka ndlela leyi ti anguleke ha yona loko ti xanisiwa?

“A Hi Xiphemu Xa Misava”

Timbhoni ta Yehovha ti tikarhatela ku va vanhu lava namarhelaka nawu, lava rhuleke ni lava nga ni mahanyelo lamanene. A ti kanetani ni tihulumendhe kumbe ti lwisana na tona, naswona a ti hlohloteli nxaniso hileswi ti lavaka ku va vadlawela-ripfumelo. Vakreste lava a va hlanganyeli eka tipolitiki. Leswi swi pfumelelana ni marito ya Yesu lama nge: “[Valandzeri va mina] a hi xiphemu xa misava, tanihi leswi mina ndzi nga riki xiphemu xa misava.” (Yohane 17:16) Tihulumendhe to tala a ti na mhaka loko Timbhoni ti ri ni vukala-tlhelo. Kambe valawuri lava tshikilelaka a va swi xiximi swilaveko swa le Bibeleni swa  leswaku Vakreste a va fanelanga va va xiphemu xa misava.

Xivangelo xa leswi xi hlamuseriwe hi nkarhi wa nhlengeletano leyi a yi ri eYunivhesiti ya Heidelberg, eJarimani hi November 2000. Nhlengeletano ya kona a yi ri ni nhloko-mhaka leyi nge, “Ku Tshikileriwa Ni Ku Tibuma Hi Mavonelo Ya Wena: Timbhoni Ta Yehovha eHansi Ka Vusoxalisi Bya Tiko Ni Vulawuri Bya Tihanyi Bya Vukhomunisi.” Dok. Clemens Vollnhals wa Vumbiwa bya Hannah-Arendt lebyi Kambisisaka Vulawuri lebyi Tshikilelaka u te: “Mimfumo leyi tshikilelaka a yi lavi ku lawula vanhu va tipolitiki ntsena. Yi lava leswaku vanhu hinkwavo va tinyiketela hi ku helela.”

Vakreste va ntiyiso a va nge tinyiketeli “hi ku helela” eka hulumendhe ya munhu, tanihi leswi va endleke xiboho xa leswaku va ta tinyiketela eka Yehovha Xikwembu ntsena. Timbhoni leti tshamaka ematikweni lama lawuriwaka hi valawuri va tihanyi ti kume leswaku minkarhi yin’wana leswi laviwaka hi Mfumo ni leswi laviwaka hi vukhongeri bya tona minkarhi yin’wana swa lwisana. Xana ti endle yini loko swi te tano? Eminkarhini leyi hundzeke Timbhoni ta Yehovha ti tirhise nsinya wa nawu lowu vuriweke hi vadyondzisiwa va Yesu Kreste lowu nge: “Hi fanele ku yingisa Xikwembu tanihi mufumi ku tlula vanhu.”—Mintirho 5:29.

Timbhoni ta magidi ti tshame ti tshembekile naswona a ti hlanganyelanga etimhakeni ta tipolitiki, hambiloko ti xanisiwa hi tihanyi letikulu. Xana ti tiyisele njhani? Xana ti ma kume kwihi matimba yo tiyisela? Mi nge ti hlamula hi toxe. Naswona a hi voneni leswaku Timbhoni ni lava nga riki Timbhoni va nga dyondza yini eka leswi.

[Marito lama tshahiweke exihlokweni lama nga eka tluka 4]

Timbhoni ta Yehovha ta le Jarimani ti xanisiwe hi ndlela ya tihanyi ku ringana nkarhi wo leha eka vulawuri byimbirhi lebyi tshikilelaka bya lembe-xidzana ra vu-20

[Marito lama tshahiweke exihlokweni lama nga eka tluka 4]

“Mimfumo leyi tshikilelaka a yi lavi ku lawula vanhu va tipolitiki ntsena. Yi lava leswaku vanhu hinkwavo va tinyiketela eka yona hi ku helela.”—Dok. Clemens Vollnhals

[Xifaniso lexi nga eka tluka 4]

Ndyangu wa ka Kusserow wu tekeriwe ntshunxeko hikwalaho ka leswi wu aleke ku landzula ripfumelo ra wona

[Xifaniso lexi nga eka tluka 4]

Johannes Harms u dlayiwile ekhotsweni ra Manazi hikwalaho ka vukhongeri bya yena