Ku Tirhise Hi Vutlhari Ku Cinca Ka Swiyimo Swa Wena

Pum, Jan, Dries na Otto, vakulu lava nga Vakreste lava tshamaka eNetherlands, va fana hi tindlela to tala. Hi vumune bya vona va tekile naswona va ni vana. Ku engetela kwalaho, a va tirha naswona a va tshama emakaya lamanene. Hambiswiritano, hinkwavo va tshike ntirho kutani va tirhisa nkarhi ni matimba ya vona hinkwawo ku yisa swilaveko swa Mfumo emahlweni. I yini lexi va pfuneke leswaku va endla tano? Hi vumune bya vona va ku tirhise hi vutlhari ku cinca ka swiyimo swa vona.

KU CINCA ka swiyimo ku hetelela ku khumba vo tala va hina. Swilo swo tala swo kota ku nghenela vukati, ku va ni vana kumbe ku khathalela vatswari lava dyuhaleke swi endla leswaku hi va ni vutihlamuleri lebyi engetelekeke. Kambe ku cinca ka swiyimo swin’wana ku endla leswaku hi kuma ntshunxeko lowu engetelekeke wo ndlandlamuxa vutirheli bya hina bya Vukreste. (Matewu 9:37, 38) Hi xikombiso, loko vana va hina se va kurile va nga ha rhurha ekaya kumbe hi nga ha tshika ntirho.

Ku engetela kwalaho, hambileswi hi swi tivaka leswaku swiyimo swa hina swi nga cinca hambiloko hi swi lava kumbe hi nga swi lavi, Vakreste van’wana va swi kotile ku endla leswaku swiyimo swa vona swi va pfumelela ku ndlandlamuxa ndlela leyi va hlanganyelaka ha yona evutirhelini. Sweswo hi leswi endliweke hi Pum, Jan, Dries na Otto. Njhani?

Loko Vana Va Rhurha eKaya

Pum a a tirha tanihi muhlayisi wa tiakhawunti efemeni leyi endlaka mirhi ni tiphilisi. Yena na Anny nsati wakwe, a va hamba va va vatirheli lava nga maphayona ya nkarhinyana ni vana va vona vambirhi va vanhwanyana. Pum na Anny va tlhele va endla malunghiselelo ya ku hungasa ni van’wana lava nga maphayona. Va ri: “Leswi swi hi sirhelerile eka swiphiqo leswi nga vangiwaka hi vuhungasi lebyi nga riki byinene.” Vana va vona havambirhi va susumetiwe hi xikombiso xa vatswari va vona kutani va va maphayona ya nkarhi hinkwawo loko va heta xikolo xa le henhla.

Loko vana va vona va rhurhile ekaya, Pum na Anny va kume leswaku ku cinca loku ka swiyimo swa vona ku endle leswaku va va ni ntshunxeko lowu engetelekeke swin’we ni mali ya leswaku va ya etindhawini leti tsakisaka kumbe va tiphina hi vuhungasi byo karhi. Hambiswiritano, mpatswa lowu wu endle xiboho xa ku tirhisa nkarhi lowu ku ndlandlamuxa vutirheli bya wona bya Vukreste. Kutani Pum u kombele muthori wa yena leswaku a n’wi nyika mpfumelelo wa ku xwa siku rin’we eka lawa a ma tirhaka hi vhiki. Hi ku famba ka nkarhi, Pum u endle malunghiselelo lama n’wi pfumeleleke ku sungula ku tirha hi 7:00 nimixo kutani a chayisa hi 2:00 nindzhenga. Swi le rivaleni leswaku loko a hunguta nkarhi lowu a wu tirhaka a swi ta vula ku hanya hi muholo lowutsongo. Nilokoswiritano, va humelerile kutani hi 1991, Pum u joyine nsati wakwe, na yena a va phayona ra nkarhi hinkwawo.

Endzhaku ka sweswo, Pum u komberiwe ku va mupfuneti wa mulanguteri wa Holo ya Tinhlengeletano ya Timbhoni ta Yehovha. Sweswo a swi vula leswaku mpatswa lowu a wu fanele wu siya  kaya ra wona, leri wu tshameke eka rona malembe ya 30 kutani wu rhurhela endlwini leyitsongo, leyi nga ejarateni ra Holo ya Tinhlengeletano. Wu rhurhele endlwini yoleyo. Xana a swi tika? Anny u vula leswaku rini na rini loko a titwa a kumbuka ekaya, a a tivutisa a ku, ‘Xana ndzi fana ni nsati wa Lota?’ U arile ku ‘anakanya hi ta nkarhi lowu hundzeke.’—Genesa 19:26; Luka 17:32.

Pum na Anny va vona onge xiboho lexi va xi endleke xi va tisele mikateko yo tala. Yin’wana ya yona yi katsa ku tiphina hi ku tirha eHolweni ya Tinhlengeletano, ku lunghiselela mintsombano ya muganga ni ku vonana ni valanguteri va xifundzha (vatirheli lava famba-fambaka), lava nyikelaka tinkulumo eholweni leyi. Minkarhi yin’wana a va endzela mavandlha yo hambana-hambana loko Pum a komberiwe ku va mupfuni wa mulanguteri wa xifundzha.

I yini lexi pfuneke mpatswa lowu leswaku wu humelela eku ndlandlamuxeni ka ntirho wa wona? Pum u ri: “Loko swiyimo swa vutomi bya wena swi cinca hilaha ku heleleke, u fanele ku tiyimisela ku swi tirhisa hi vutlhari swiyimo leswintshwa leswi u nga ta langutana na swona.”

Ku Tiyimisela Ku Hanya Vutomi Byo Olova

Jan na Woth, nsati wakwe, va ni vana vanharhu. Ku fana na Pum ni ndyangu wa yena, Jan u swi tirhise hi vutlhari swiyimo loko swi cinca. Jan u hete malembe yo tala a tirha ntirho lowu holelaka kahle ebanki naswona u pfune ndyangu wa yena leswaku wu hanya vutomi bya vulovolovo. Kambe, minkarhi hinkwayo a a navela onge a nga ndlandlamuxa vutirheli bya yena. U ri: “Loko ndzi ri karhi ndzi kula, ndzi ye ndzi wu tlangela swinene ntiyiso naswona ndzi ye ndzi n’wi rhandza swinene Yehovha.” Hiloko Jan a cinca swiyimo swa yena hi 1986. U ri: “Loko ntirho wu hleriwa hi vuntshwa ehofisini ndzi sungule ku tirha tiawara titsongo. Leswi swi hlamarise vatirhi-kulorhi kutani va ndzi thya vito ra Diwodo hikuva a ndzi tirha hi dinsdag [Ravumbirhi], woensdag [Ravunharhu] na hi donderdag [Ravumune]. Muholo wa mina wu hunguteke hi 40 wa tiphesente. Ndzi xavise yindlu ya hina kutani ndzi xava xikepe lexi nga yindlu leswaku hi ta ya tirha laha ku nga ni xilaveko lexikulu xa vachumayeri va Mfumo. Hi ku famba ka nkarhi, ndzi tshike ntirho; muholo wa mina wu tlhele wu hunguteka hi 20 wa tiphesente, kambe hi 1993 ndzi kote ku sungula vuphayona bya nkarhi hinkwawo.”

Namuntlha, Jan i xirho xa Komiti yo Vulavurisana ni Swibedlhele naswona u ve mulanguteri wa ntsombano ko talanyana. Hambileswi Woth a nga riki na rihanyo lerinene, u pfa a va phayona  ra nkarhinyana minkarhi yin’wana. Vana va vona hi vunharhu bya vona va le mitini ya vona naswona i vachumayeri lava hisekaka va Mfumo, swin’we ni vanghana va vona va vukati.

Jan na Woth va swi kotise ku yini ku tolovela ku hanya vutomi byo olova? Jan u ri: “Loko ha ha hanya vutomi bya vulovolovo, hi titolovete ku ka hi nga swi rhandzi ngopfu swilo leswi vonakaka. Masiku lawa swi nga ha tikanyana ku rindza kukondza u kuma nchumu wo karhi, kambe mikateko ya moya ni malunghelo leswi hi swi kumeke swi endla leswaku swi nga tiki nikatsongo.”

Jenny na yena u endle xiboho xa ku hanya vutomi byo olova, leswaku a ta kuma nkarhi lowu engetelekeke wa ku yisa swilaveko swa Mfumo emahlweni, hilaha Jan na Woth, Dries na Jenny nsati wakwe va endleke hakona. Dries na Jenny va ve maphayona kukondza va kuma n’wana. Leswaku Dries a kota ku hlayisa ndyangu wa yena u kume ntirho wo va mufambisi efemeni yin’wana leyikulu. Muthori wa yena u rhandze migingiriko ya yena kutani a lava ku n’wi nyika xikhundlha lexi tlakukeke. Kambe, Dries u xi arile hikuva loko a lo xi pfumela a swi ta vula leswaku a nge he kumi nkarhi lowu ringaneke wo endla mintirho ya Vukreste.

Ku wundla ndyangu swin’we ni ku khathalela mana wa Jenny, la vabyaka a swi teka nkarhi wo tala wa mpatswa lowu. Nilokoswiritano, wu ye emahlweni wu hlakulela moya wa vuphayona. I yini lexi wu pfuneke ku endla tano? Jenny u ri: “A ku ri ni maphayona lawa a hi tshama na wona naswona a hi rhamba maphayona man’wana leswaku ma ta dya na hina nakambe a hi rhurhela valanguteri va swifundzha.” Dries wa engetela: “A hi hanya vutomi byo olova naswona hi papalata ku va ni swikweleti. Hi endle xiboho xa ku nga tihoxi emabindzwini lamakulu kumbe ku xava yindlu, leswaku swilo leswi swi nga vi xihinga enkarhini lowu taka.”

Xiboho xa Dries na Jenny xa ku tilunghiselela ku va ni nkarhi lowu engetelekeke wo yisa swilaveko swa Mfumo emahlweni xi ve ni vuyelo lebyinene. Majaha ya vona hamambirhi i vakulu naswona un’wana i phayona swin’we ni nsati wakwe. Dries na Jenny va ve maphayona yo hlawuleka naswona hi ku famba ka nkarhi Jenny na Dries va endle ntirho wo endzela mavandlha. Sweswi i vatirheli va ku tirhandzela eBethele, laha Dries a nga xirho xa Komiti ya Rhavi.

Ku Hatla U Tshika Ntirho

Otto ni nsati wakwe, Judy, va sungule ku phayona loko va nga si kuma vana va vona vambirhi va vanhwanyana, hilaha Dries na Jenny va endleke hakona. Loko Judy a ha tike mativula ya vona, Otto u kume ntirho wa ku va mudyondzisi.

Loko vana va ha kula, Otto na Judy a va hamba va rhamba maphayona ekaya ra vona leswaku vana va vona va kota ku vona ntsako lowu Vakreste lava nga entirhweni wa nkarhi hinkwawo va wu kumaka. Hi ku famba ka nkarhi, n’wana wa vona wa mativula u nghenele ntirho  wa vuphayona. Endzhakunyana u ye eXikolweni xa Gilead swin’we ni nuna wakwe kutani sweswi i varhumiwa etikweni rin’wana ra laha Afrika. N’wana lowun’wana u sungule ku phayona hi 1987 naswona Judy u n’wi joyinile.

Loko ku cinca ka swiyimo swa Otto ku n’wi pfumelela ku tirha tiawara tintsongo exikolweni, u tirhise nkarhi lowu engetelekeke leswaku a phayona. Hi ku famba ka nkarhi u tshike ntirho. Namuntlha, Otto u endzela mavandlha naswona u tirhisa vuswikoti bya yena byo va mudyondzisi leswaku a tiyisa mavandlha hi tlhelo ra moya.

Hi xihi xitsundzuxo lexi Otto a xi nyikaka lava tshikaka mintirho va ha tiyerile? U ri: “Loko u tshika ntirho, u nga endli xiboho xo heta lembe kumbe mambirhi u lo mbaa! Loko wo kala u wisa swa tika ku tlhela u endla ‘ntirho.’ Ku nga ri kungani a wu nge he anakanyi hi vuphayona. Ku ri na sweswo, u nga yima-yimi, namba u ba mhunti ya ha ri na mahika.”

Ku Tirhisa Ntokoto Lowu U Nga Na Wona Hi Vutlhari

I ntiyiso leswaku vamakwerhu vo fana na Pum, Jan, Dries na Otto a va ha ri na wona matimba lama a va ri na wona loko va ha ri vatsongo. Kambe va wupfile swinene, va ni ntokoto naswona va ni vutlhari. (Swivuriso 20:29) Va swi tiva leswaku swi njhani ku va tatana naswona leswi va tirheke ni vasati va vona, va swi tiva leswaku i yini leswi katsekaka ku va manana. Va tlhantlhe swiphiqo swa mindyangu ni vasati va vona naswona va vekele vana va vona tipakani ta swilo swa moya. Otto u ri: “Leswi ndzi nga mulanguteri wa xifundzha, loko ndzi nyikela ndzayo etimhakeni leti fambisanaka ni ndyangu, ya tirha hikuva na mina ndzi kurise vana.” Hilaha ku fanaka, leswi Dries a nga ni vana, wa pfuna swinene endyangwini wa Bethele tanihi leswi wu nga ni vatirhi vo tala lava ha riki vantshwa.

Ina, ntokoto lowu vamakwerhu lava va nga na wona wu va pfuna ku khathalela swilaveko swo hambana-hambana emavandlheni. Hi ndlela yo fanekisela, ntokoto lowu va nga na wona wu lote switirho leswi va swi tirhisaka leswaku matimba ya vona va ma tirhisa hi ndlela leyi vuyerisaka swinene. (Eklesiasta 10:10) Entiyisweni, hi nkarhi wo karhi, va nga swi kota ku endla swilo swo tala ku tlula leswi nga endliwaka hi vanhu lava ha tsakamaka kambe va nga ri na ntokoto.

Vamakwerhu lava swin’we ni vasati va vona, i swikombiso leswinene eka vantshwa lava nga kona exikarhi ka vanhu va Yehovha. Vantshwa va swi vona leswaku mimpatswa yo fana ni leyi yi tokote mintlhontlho yo tala ni mikateko leyi ku vulavuriweke ha yona eminkandziyisweni ya hina ya Vukreste. Swa khutaza ku vona vavanuna ni vavasati lava kombisaka moya wo fana ni wa Kalebe loyi hambileswi a a dyuharile, a kombeleke xiavelo lexi tlhontlhaka.—Yoxuwa 14:10-12.

Tekelela Ripfumelo Ra Vona

Xana u nga swi kota ku tekelela ripfumelo ni swiendlo swa mimpatswa leyi boxiweke eka xihloko lexi? Tsundzuka leswaku a a va rhandza ntiyiso. Yi byale moya wa vuphayona eka vana va yona. Hilaha Jan a hlamuselaka hakona, sweswo yi swi endle “hi ku va xikombiso lexinene xa ku rhandza Yehovha ni nhlengeletano ya yena, hi ku endla malunghiselelo ya vunakulobye lebyinene ni hi ku dyondzisa vana va yona leswaku va kota ku tiwundla.” Nakambe a yi tirha ni ku hungasa swin’we tanihi ndyangu. Pum u ri: “Loko hi ye eku wiseni, hi ntolovelo ndyangu hinkwawo a wu ya eku chumayeleni nimixo kutani nindzhenga wu tiphina hi ku hungasa swin’we.”

Ku engetela kwalaho, Vakreste lava a va hlela ka ha ri emahlweni ku endlela leswaku loko swiyimo swa vona swi cinca, va tilunghiselela ku langutana ni xiyimo lexintshwa. A va tivekela tipakani kutani va endla swiboho leswi va pfuneke leswaku va ti fikelela. A va lava tindlela ta ku hunguta nkarhi lowu va wu hetaka va ri entirhweni wa ku tihanyisa naswona a va tiyimiserile ku hanya hi muholo wutsongo. (Vafilipiya 1:10) Vavasati lava va seketele vanuna va vona hi mbilu hinkwayo. Hinkwavo ka vona a va swi navela hi mbilu hinkwayo ku nghena hi “nyangwa leyikulu leyi yisaka entirhweni,” kutani va kuma mikateko yo tala leyi humaka eka Yehovha.—1 Vakorinto 16:9; Swivuriso 10:22.

Xana na wena u navela ku ndlandlamuxa ndlela leyi u hlanganyelaka ha yona evutirhelini? Loko swi ri tano, u ta kota ku endla tano loko u ku tirhisa hi vutlhari ku cinca ka swiyimo swa wena.

[Xifaniso lexi nga eka tluka 20]

Pum na Anny va ri eku khathaleleni ka Holo ya Tinhlengeletano

[Xifaniso lexi nga eka tluka 20]

Jan na Woth va ri eku chumayeleni

[Xifaniso lexi nga eka tluka 21]

Dries na Jenny va ri entirhweni wa le Bethele

[Xifaniso lexi nga eka tluka 21]

Otto na Judy va ri karhi va lunghiselela ku endzela vandlha rin’wana