Wa Rhambiwa Hi Malwandla

XILALELO xa Hosi, lexi Hosi Yesu Kreste a xi simekeke eka malembe ya kwalomu ka 2 000 lama hundzeke, i xa nkoka swinene ku tlula swiendlakalo hinkwaswo leswi nga tshama swi tlangeriwa. Xi va khumbe swinene vanhu ku sukela loko xi simekiwile. Leswi vo tala va khumbiweke hi leswi va swi hlayeke eka Tievhangeli malunghana ni leswi endlekeke vusiku byebyo, va tikarhatele ku tlangela Xilalelo xa Hosi hi tindlela to hambana-hambana.

Leswi hinkwaswo swa twisiseka, tanihi leswi Yesu Kreste hi byakwe a leriseke leswaku valandzeri vakwe va hambeta va tlangela xiendlakalo lexi. U va byele hi ku kongoma a ku: “Tshamani mi ri karhi mi endla leswi leswaku mi ndzi tsundzuka.”—Luka 22:19; 1 Vakorinto 11:23-25.

Ina, leswaku nkhuvo lowu wu vuyerisa hakunene, munhu u fanele a va ni vutivi lebyi kongomeke bya leswi wu vulaka swona, hilaha swi hlamuseriweke hakona eRitweni ra Xikwembu, ku nga Bibele. Ku engetela kwalaho, i swa nkoka ku tiva leswi Bibele yi swi vulaka malunghana ni siku ni nkarhi swin’we ni ndlela leyi xiendlakalo lexi xi faneleke xi tlangeriwa ha yona.

Hikwalaho ko yingisa xileriso xa Yesu, Timbhoni ta Yehovha emisaveni hinkwayo ti ta hlengeletana swin’we nimadyambu hi Ravunharhu, April 16, 2003, leswaku ti tlangela rifu ra Yesu. Ku ta va ku ri nkhuvo lowu eka wona ti nga ta kambisisa Matsalwa ni ku pfuxeta ripfumelo ra tona ni ndlela leyi ti rhandzaka Hosi Yesu Kreste ha yona, loyi a nga te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Wa rhambiwa hi malwandla leswaku u ta hlengeletana na tona madyambu wolawo leswaku na wena u ta tiyisa ripfumelo ra wena ni ndlela leyi u rhandzaka ha yona Yesu Kreste na Yehovha Xikwembu, Tatana la nge matilweni.