Ntirho Wo Chumayela Lowu Nga Rivalekiki

“Dyambu a ri dlaya ni vusokoti. Budula leri a hi famba ha rona entshaveni a ri lehe ngopfu. Endzhaku ko hlangana ni swihinga swo tala, hi hetelele hi fike laha a hi ya kona: ku nga ximutana xa le kule swinene. Mafidzula ya ku karhala ma hundzuke ntsako loko hi fika hi amukeriwa hi malwandla endlwini yo sungula. Loko dyambu ri ya pela, se a hi fambise minkandziyiso hinkwayo leyi hi teke na yona hi tlhela hi sungula tidyondzo ta Bibele to hlayanyana. Vanhu a va swi rhandza hi mbilu hinkwayo ku dyondza. Nkarhi wa ku tlhelela endzhaku wu fikile, hiloko hi va tshembisa leswaku hi ta tlhela hi vuya.”

NTLAWA wun’wana wa maphayona ya le Mexico wu swi toloverile swilo swo tano. Xikongomelo xa wona i ku xi hetisisa hi xitalo xileriso lexi Yesu Kreste a xi nyikeke vadyondzisiwa vakwe, lexi nge: “Mi ta va timbhoni ta mina . . . ku ya fika endhawini ya le kule swinene ya misava.” (Mintirho 1:8) Le Mexico, ku hleriwe ntirho wo hlawuleka wo chumayela—lowu vitaniwaka matsima ya vuphayona—leswaku ku fikeleriwa nsimu leyi ku nga riki na vandlha leri averiweke eka yona, hikwalaho vanhu va kwalaho a va chumayeriwi mahungu lamanene ya Mfumo wa Xikwembu nkarhi na nkarhi. Hi ntolovelo, nsimu yi le kule kumbe a swi olovi ku yi fikelela. Mavandlha ya le kule lama nga ni nsimu leyikulu leyi ma nga swi kotiki ku yi hlanganisa, na wona ma pfuniwa.

Rhavi ra Timbhoni ta Yehovha ri kambela swilaveko swa nsimu leswaku ri kumisisa tindhawu ta tiko rero leti faneleke ti tirhiwa hi maphayona lawa. * Endzhaku ka sweswo, ku rhumeriwa mintlawa ya maphayona yo hlawuleka leswaku yi ya tirha etindhawini to tano. Maphayona lawa ma nyikiwa mimovha leyi nga kotaka ku famba emapatwini ya rikhwarha. Mimovha leyi yi tlhela yi va vuhlayiselo bya tibuku ni ndhawu yo etlela eka yona loko ku ri ni xilaveko.

N’wangulo Wa Xihatla

Ku sukela hi October 1996, ku khutaziwe vachumayeri van’wana va mahungu lamanene leswaku va hlanganyela entirhweni lowu, va famba ni maphayona yo hlawuleka. Maphayona ya nkarhi hinkwawo swin’we ni vahuweleri va Mfumo lava swi tsakelaka ku ya tirha laha ku nga ni xilaveko lexikulu, va ye eswiavelweni swa vona hi ku siyana. Van’wana va averiwa emavandlheni lama katsiweke eka tsima rero leswaku va langutela nsimu ni ku sala va dyondza ni lava tsakelaka. Vahuweleri vo tala lava ha riki vantshwa swin’we ni maphayona va amukele xirhambo lexi naswona va ve ni mintokoto leyi khutazaka swinene.

Hi xikombiso, Abimael, muntshwa la nga Mukreste loyi a a tirha ntirho lowu hakelaka efemeni ya tiselfoni, u endle xiboho xo hlanganyela entirhweni wo chumayela etindhawini toleto ta le kule. Loko vathori va yena va twa leswaku a a lava ku tshika ntirho, va n’wi tshembise ku n’wi tlakusa entirhweni ni ku engetela muholo wa yena. Vatirhi-kulobye va n’wi tikisele vutomi, va vula leswaku swilo swo fana na leswi a swi humeleli mani na mani naswona loko o swi ala u ta va a ri xiphukuphuku. Hambiswiritano, Abimael a a tiyimiserile ku seketela ntirho lowu wo hlawuleka wo chumayela ku ringana tin’hweti tinharhu. Loko nkarhi wa tsima leri wu herile, Abimael a a tiyimisele ku tshama evandlheni rolero ra le kule laha a ku ri ni xilaveko lexikulu xa vahuweleri va Mfumo. Sweswi u tirha ntirho lowunene naswona u dyondze ku hanya vutomi byo olova.

 Julissa yena a a fanele a famba tiawara ta 22 hi bazi loko a ya exiavelweni xa yena. U siyiwe hi bazi ro hetelela leri a ri ta n’wi fikisa exiavelweni xa yena. Hambiswiritano, a ku ri ni xibebe lexi a xi tleketla vatirhi. Julissa u kanye mbilu a kombela ku famba hi xona. Kahle-kahle, a a chava ku famba hi xona hileswi a ko va yena ntsena wansati exikarhi ka vavanuna vo tala swinene. Loko a sungula ku chumayela jaha rin’wana, u swi xiyile leswaku a ri ri Mbhoni ya Yehovha. Julissa u ri: “Phela ni muchayeri wa xibebe xexo a a ri nkulu wa vandlha leri a ndzi ya eka rona!”

Vanhu Lavakulu Na Vona Va Hoxa Xandla

Hambiswiritano, ntirho lowu a hi wa vantshwa ntsena. Adela loyi a nga makwerhu wa xisati la kuleke, i khale a lava ku tirha tiawara leti engetelekeke entirhweni wo chumayela. Lunghelo rero u ri kume loko a ta va a rhambiwile ku hlanganyela entirhweni lowu wo hlawuleka wo chumayela. U ri: “Nsimu yoleyo ndzi yi tsakele swinene lerova ndzi kombela vakulu va vandlha leswaku va nga ndzi yisi kun’wana. Ndzi tsakile hikuva hambileswi ndzi dyuhaleke, ndza ha tirhisiwa hi Yehovha.”

Martha wa malembe ya 60 na yena u susumetiwe hi ku tlangela Yehovha na hi ku rhandza ka yena vanhu, kutani a hlanganyela eka tsima leri. Loko a xiye leswaku ntlawa wa yena a wu swi koti ku fikelela vanhu van’wana hileswi va tshamaka ekule nileswi tindlela ta kona a ti nga fambeki, u xave movha leswaku maphayona ma wu tirhisa. Movha lowu wu endle leswaku va kota ku fika etindhawini leti engetelekeke ni ku ya chumayela ntiyiso wa Bibele eka vanhu vo tala.

N’wangulo Lowu Khutazaka

Pakani ya lava hlanganyelaka eka ntirho lowu wo hlawuleka wo chumayela i ku ‘endla vadyondzisiwa.’ Leswi swi ve ni vuyelo lebyinene. Vanhu lava tshamaka etindhawini ta le kule va kume ntiyiso lowu ponisaka vutomi lowu humaka eBibeleni. (Matewu 28:19, 20) Ku sunguriwe tidyondzo ta Bibele ni vanhu vo tala. Sweswi va dyondzeriwa hi vahuweleri va kwalaho kumbe hi vavuri va evhangeli lava nga sala kwalaho. Etindhawini tin’wana ku simekiwe mintlawa ya vahuweleri, kasi eka tin’wana ku simekiwe mavandlha lamatsongo.

Magdaleno ni vanakulobye va yena va tirhise xo famba xa mani na mani loko va ya ensin’wini leyi a va averiwe eka yona. Loko va ri endleleni va chumayele muchayeri. “Wanuna loyi u hi byele leswaku eka vhiki leri hundzeke, a ku te Timbhoni tin’wana ekaya ka yena kambe yena a a nga ri kona. Loko a vuya, ndyangu wakwe wu n’wi ambele leswi wu nga swi twa. Hi n’wi byele leswaku a hi nga humi kona kwalaho kambe  hi huma eswifundzheni swo hambana-hambana swa tiko naswona xikongomelo xa hina i ku ta pfuneta entirhweni wo hlawuleka wo chumayela naswona hi lo tihakelela eriendzweni ra hina. Muchayeri u khumbekile kutani a vula leswaku u ta sungula ku dyondza Bibele swin’we ni ndyangu wa yena vhiki rero. U tlhele a nyikela entirhweni lowu hi ku ka a nga hi hakerisi.”

Magdaleno u khumbiwe na hi ndlela leyi vaaka-tiko va le tintshaveni ta Chiapas va anguleke ha yona. “Mina ni nsati wa mina hi chumayele rungula ra Mfumo eka ntlawa wa vantshwa va 26 lava a va nghena Kereke ya Presbyterian. Hinkwavo ka vona va yingiserisisile ku ringana timinete ta 30. Va humese Tibibele ta vona naswona hi kote ku va chumayela kahle hi swikongomelo swa Yehovha. Vunyingi bya vantshwa lava a va ri ni Tibibele ta vona ta Xitzeltal.” Ku sunguriwe tidyondzo to hlayanyana ta Bibele leti endleke nhluvuko.

Ku Hunguteka Ka Nkaneto

Endhawini yin’wana ya le Chiapas ku hetiwe malembe yo tlula mambirhi ku nga chumayeriwi rungula ra Bibele hileswi vanhu van’wana a va kaneta. Teresa, loyi a nga muvuri wa evhangeli wa nkarhi hinkwawo, u xiye leswaku Timbhoni tin’wana a ti chava ku chumayela endhawini yoleyo. “Hinkwerhu hi hlamarile loko hi kuma leswaku vanhu hinkwavo va tiyimisele ku yingisela. Loko hi heta ku chumayela, mpfula yi sungule ku na hi matimba. Loko hi ri karhi hi lava ndhawu leyi hi nga tumbelaka eka yona, hi fike ekaya ra wanuna un’wana wa malwandla loyi a vuriwaka Sebastián, loyi a hi pfumeleleke ku nghena leswaku hi nga neriwi hi mpfula. Loko hi nghenile ndzi n’wi vutisile loko ku ve ni vanhu lava n’wi endzeleke. Loko a vula leswaku a va n’wi endzelanga, ndzi sungule ku n’wi chumayela ivi ndzi dyondza Bibele na yena hi ku tirhisa buku leyi nge Vutivi Lebyi Yisaka eVuton’wini Lebyi Nga Heriki. * Loko hi heta, Sebastián u hi komberile a ri karhi a khavaxela ni mihloti leswaku hi tlhela hi vuya hi ta dyondza na yena.”

Ntlawa wun’wana wa maphayona lama endzeleke eChiapas wu ri: “Yehovha u hi pfunile leswaku hi kuma vuyelo lebyinene. Eka vhiki ro sungula, hi sungule ku dyondza ni vanhu va 27; eka ra vumbirhi, hi rhambe vanhu leswaku va ta hlalela vhidiyo leyi nge The Bible—Its Power in Your Life. Ku te 60 wa vona. Hinkwavo va yi rhandzile. Endzhaku ka vhidiyo leyi, hi ringanyete leswaku hi simeka ntlawa wa dyondzo ya Bibele. Lexi hi hlamariseke, ku sunguriwe mintlawa yimbirhi endhawini leyi.

“Loko hi heta ku tirha nsimu leyi hi averiweke yona, hi tlhelele endhawini yoleyo hi ya tiyisa vanhu lava tsakelaka ni ku vona nhluvuko wa mintlawa ya dyondzo ya Bibele leyi simekiweke. Hi va rhambile leswaku va ta yingisela nkulumo ya le rivaleni ni Dyondzo ya Xihondzo xo Rindza. Kambe  a ku nga ri na ndhawu leyikulu leyi a ku ta khomeriwa minhlangano eka yona. Munhu loyi a hi pfumeleleke ku tirhisa kaya rakwe leswaku hi khomela nhlangano wa ntlawa eka rona u kombetele endzhaku ka yindlu yakwe kutani a ku: ‘Minhlangano yi nga khomeriwa hala ndzhaku ka yindlu.’”

Hi mahelo-vhiki wolawo, maphayona lama endzeke ni vanhu lava tsakelaka va te hi nkhinkhi va ta lunghisa ndhawu yoleyo leswaku ku khomeriwa eka yona minhlangano. Eka nhlangano wo sungula ku ve ni vanhu va 103. Sweswi ku dyondziwa Bibele ni vanhu va 40 endhawini yoleyo.

“Mhaka Yo Tsakisa”

Lava va hlanganyeleke entirhweni lowu wo vula evhangeli va kume vuyelo lebyinene va tlhela va pfuneka hi tindlela tin’wana. Muntshwa un’wana wa phayona la vuriwaka María, loyi a hlanganyeleke eka rin’wana ra matsima lawa, u hlamusela ndlela leyi a titwaka ha yona: “Yi ve mhaka yo tsakisa hi swivangelo swimbirhi. Ndzi ye ndzi wu tsakela swinene ntirho wo chumayela, ndzi tlhela ndzi va ni vuxaka lebyikulu na Yehovha. Siku rin’wana hi titwe hi karhele loko hi ri karhi hi gonya ntshava. Hi kombele Yehovha leswaku a hi pfuna, kutani hi humeleriwa hi leswi Esaya 40:29-31 yi vulaka swona: ‘Lava tshembaka Yehovha va ta tlhela va kuma matimba.’ Kutani hi fike lomu a hi kongome kona, hi dyondza ni vanhu lava hi amukeleke hi malwandla.”

Muntshwa wa malembe ya 17 loyi a nga phayona, la vuriwaka Claudia, u hi byela leswi: “Ndzi vuyeriwile swinene. Ndzi antswise vuswikoti bya mina ensin’wini, leswi ndzi nyikeke ntsako lowukulu lowu ndzi susumeteleke ku tivekela tipakani ta swilo swa moya. Ndzi tlhele ndzi tiya swinene emoyeni. Loko ndza ha ri ekaya, Manana a a ndzi tirhela ndzi lo tshama. Kambe sweswi ndzi kota ku tiendlela swilo hi ndzexe, tanihi leswi ndzi nga ni ntokoto. Hi xikombiso, khale a ndzi ri ni manyunyu yo hlawula-hlawula swakudya. Kambe sweswi ndzi boheka ku pfumelelana ni swiyimo, kutani manyunyu ndzi ma phele ehansi. Ntirho lowu wu ndzi pfune ku va ni vuxaka lebyinene ni van’wana. Hinkwaswo leswi hi nga na swona ha pambulelana naswona ha pfunana.”

Ntshovelo Lowu Tsakisaka

Xana matshalatshala wolawo ma ve ni vuyelo byihi? Loko lembe ra 2002 ra ha ku sungula, lava va hlanganyeleke eka matsima lawa ya vuphayona a va ri kwalomu ka 28 300. Va fambise tidyondzo ta Bibele to tlula 140 000, va heta tiawara to tlula timiliyoni timbirhi entirhweni wo chumayela. Leswaku va pfuna vanhu ku dyondza ntiyiso wa Bibele, va fambise tibuku ta kwalomu ka 121 000 ni timagazini leti lavaka ku va 730 000. A hi mhaka yo hlamarisa ku va maphayona man’wana ma fambisa tidyondzo ta Bibele ta 20 kumbe ku tlula.

Lava va chumayeriweke va ma tlangela swinene matshalatshala lamakulu lama endliweke leswaku va kuma rungula ra Bibele. Vo tala va sindzisa vahuweleri leswaku va amukela minyikelo ya vona, hambiloko va swerile. Mukhegula un’wana la pfumalaka wa malembe ya 70 minkarhi hinkwayo u ma nyika swo karhi maphayona lama n’wi endzeleke. Loko ma nga swi teki, wa rila. Ndyangu wun’wana lowu sweleke wu byela vavuri va evhangeli va nkarhi hinkwawo leswaku mandza lama tshikeriweke hi mbhaha i ya vona, kutani wu va kombela leswaku va ma teka.

Mhaka ya nkoka hileswaku vanhu lava va timbilu letinene va swi tlangela swinene swilo swa moya. Hi xikombiso, nhwanyana un’wana u famba tiawara tinharhu na hafu a ri yexe loko a ya eminhlanganweni ya Vukreste naswona a nga xwi. Hambileswi matsolo ya yena a ma vava, mukhegula un’wana la tsakelaka u fambe tiawara timbirhi leswaku a ya kuma ndzetelo wa le Bibeleni loko ku endze mulanguteri la famba-fambaka. Vanhu van’wana lava a a va nga koti ku hlaya ni ku tsala va lave ku swi dyondza leswaku va ta vuyeriwa swinene edyondzweni ya Bibele. Ku tikarhata ka vona ku katekisiwe swinene.

Ebukwini ya Mintirho, Luka u vulavule hi xivono lexi muapostola Pawulo a xi voneke, a ku: “Wanuna un’wana wa Mukedoniya a a yimile a n’wi kombela a ku: ‘Pelela eMakedoniya u ta hi pfuna.’” Pawulo u amukele xirhambo xexo hi mbilu hinkwayo. Namuntlha, etindhawini ta le kule ta le Mexico, vo tala va angule hi ndlela leyi fanaka, va tinyiketela ku chumayela mahungu lamanene “ku ya fika endhawini ya le kule swinene ya misava.”—Mintirho 1:8; 16:9, 10.

[Tinhlamuselo ta le hansi]

[Xifaniso lexi nga eka tluka 9]

Timbhoni to tala ta le Mexico ti hlanganyele eka ntirho wo hlawuleka wo chumayela