“Hlayisani Ripfalo Lerinene”

VANHU vo tala va anakanya leswaku va fanele va yingisa leswi ripfalo ra vona ri va byelaka swona loko va endla swiboho. Kambe leswaku ripfalo ra hina ri hi kongomisa hi ndlela leyinene, ri fanele ku dyondzisiwa ku tiva leswinene ni leswo biha naswona hi fanele ku yingisa leswi ri hi byelaka swona.

Xiya mhaka ya wanuna la vuriwaka Zakiya, leyi tsariweke eBibeleni. Zakiya loyi a a tshama eYeriko a a ri muluvisi lonkulu naswona a a fuwile. U pfumerile leswaku u kote ku fuwa hi tindlela ta vukanganyisi—ku nga mukhuva lowu swi nga kanakanisiki leswaku wu vavisa van’wana. Xana Zakiya a a biwa hi ripfalo loko a ri karhi a kanganyisa van’wana? Loko ku ri leswaku a ri n’wi ba, swi le rivaleni leswaku a a ri honisa.—Luka 19:1-7.

Hambiswiritano, ku ve ni swin’wana leswi nga endla leswaku Zakiya a kambisisa mahanyelo ya yena. Yesu u te eYeriko. Zakiya lowo koma a a lava ku n’wi vona kambe a a nga swi koti hikwalaho ko sirhiwa hi ntshungu. Hiloko a tsutsuma a ya khandziya murhi leswaku a ta n’wi vona kahle. Yesu u n’wi byele leswaku u ta n’wi endzela ekaya rakwe hikwalaho ko tsakisiwa hi leswi Zakiya a a swi lava hi mbilu hinkwayo ku n’wi vona. Zakiya u n’wi amukele hi malwandla muendzi wa yena la dumeke.

Leswi Zakiya a swi voneke ni ku swi twa loko a endzeriwe hi Yesu, swi khumbe mbilu ya yena kutani swi n’wi susumetela leswaku a cinca mahanyelo yakwe. U te: “Waswivo! Hafu ya leswi nga swa mina, Hosi, ndzi yi nyika swisiwana, naswona xin’wana ni xin’wana lexi ndzi nga xi tekela munhu hi vukanganyisi ndzi xi vuyisela hi mpimo lowu andzisiweke ka mune.”—Luka 19:8.

Zakiya u letele ripfalo ra yena kutani a ri yingisa a tlhela a endla leswi ri n’wi byelaka swona. Vuyelo bya kona byi vuyerise vo tala. Anakanya ndlela leyi Zakiya a titweke ha yona loko Yesu a ku eka yena: “Namuntlha ku ponisiwa ku tile endlwini leyi!”—Luka 19:9.

Mawaku xikombiso lexi khutazaka swonghasi! Xi kombisa leswaku hi nga ma cinca mahanyelo wahi ni wahi lawa a hi ri na wona. Ku fana na Zakiya, hi nga yingisa marito ya Yesu lama tsariweke eBibeleni kutani hi letela matimba ya hina ya ku twisisa leswaku ma hambanisa leswi lulameke ni leswi hoxeke. Kutani hi ta kota ku ‘hlayisa ripfalo lerinene’ hilaha muapostola Petro a tsundzuxeke hakona. Hi nga yingisa ripfalo ra hina leri leteriweke kutani hi endla leswinene.—1 Petro 3:16.