Va Pfuna Vakreste-kulobye Va Le Matikweni Man’wana

XANA u tshama u ma twa marito lama nge “vamakwerhu lava tirhaka ku aka ematikweni man’wana” ni lama nge “vamakwerhu lava pfunetaka ku aka ematikweni man’wana”? Timbhoni ta Yehovha leti vumbaka mintlawa leyi ti nyikela nkarhi ni vutshila bya tona ti pfuneta eku akeni ka miako leyi ku kandziyiseriwaka eka yona rungula ra Mfumo leri humaka eBibeleni ivi ri hangalasiwa. Vamakwerhu volavo va tlhela va pfuneta eku akeni ka Tiholo ta Tinhlengeletano ni Tiholo ta Mfumo, ku nga tindhawu leti ku kumiwaka ndzetelo lowu humaka eBibeleni. Vamakwerhu lava, sweswi va pfuneta eka matsima yo aka ematikweni ya 34, lawa hakanyingi ma nga evuswetini. Hi swihi swiphiqo ni swilo leswi tsakisaka leswi vamakwerhu lava va langutanaka na swona loko va ri karhi va pfuna Vakreste-kulobye ematikweni man’wana? Xana va titwa njhani hi “ntirho wo kwetsima” lowu va wu endlaka? (Nhlavutelo 7:9, 15) Leswaku hi kuma tinhlamulo, a hi tweni vamakwerhu van’wana lava pfuneteke entirhweni wo aka le Mexico.

Vamakwerhu lava humaka ematikweni man’wana va sungule ku fika eMexico hi May 1992. Endzhakunyana ka kwalaho, va tirhe swinene eku kurisiweni ka rhavi, leri langutelaka ntirho wa Timbhoni ta Yehovha eMexico. Leswi swi katse ku akiwa ka miako leyintshwa ya 14, swin’we ni tindhawu to tshama eka tona ta vamakwerhu lava tirhaka ehofisini ya rhavi, ku tlhela ku akiwa ni ndhawu yo kandziyisela eka yona ni muako wa hofisi.

Leswaku va pfuneta entirhweni lowu wo aka, vamakwerhu vo tlula 730 lava humaka eCanada, Great Britain, United States ni le matikweni man’wana va tirhe swin’we ni vamakwerhu va madzana va le Mexico. Ku engetela kwalaho, Timbhoni to tlula 28 000 leti hlanganyelaka emavandlheni ya kwalomu ka 1 600 lama nga ekusuhi ni rhavi ti pfunetile entirhweni lowu wo aka hi mahelo-vhiki. Hinkwavo ka vona va tirhe hi moya wo tirhandzela va nga langutelanga ku hakeriwa. Va swi teke swi ri lunghelo ku tirhela Yehovha hi ndlela leyi. Eka ntirho lowu wo aka hinkwawo, a va tshama va ri karhi va tsundzuka marito lama huhuteriweke ya Pisalema 127:1: “Loko Yehovha a nga yi aki yindlu, i swa hava leswi vaaki va yona va tirheke hi matimba eka yona.”

Mintlhontlho Leyi Va Langutanaka Na Yona

Hi yihi mintlhontlho leyi vamakwerhu lava va langutanaka na yona loko va ri eswiavelweni swa  vona? Titwele swin’wana swa leswi va swi vuleke. Curtis na Sally, ku nga mpatswa lowu humaka eUnited States, va pfunete entirhweni wo aka le Indiya, Jarimani, Mexico, Paraguay, Romania, Rhaxiya, Senegal ni le Zambia. Curtis u ri: “Ntlhontlho wo sungula a ku ri ku siya n’wana wa hina wa nhwanyana, loyi a a ri phayona [mutirheli wa nkarhi hinkwawo], swin’we ni ku sukela vandlha ra ka hina ra le Minnesota. Mina na nsati wa mina se a hi ri ni malembe ya 24 hi hlanganyela ni vandlha leri, naswona a hi titwa hi ri ekaya.”

Sally u ri: “I ntlhontlho ku hanya ehansi ka swiyimo leswi u nga swi tolovelangiki, naswona swi tikomba swi tikela ngopfu vavasati ku tlula vavanuna, kambe ndzi dyondze leswaku u nga swi kota ku titwananisa ni swiyimo swo tano. Ndzi kale ndzi dyondza ni ku tiyiselela switsotswana leswi a swi leme ndhawu hinkwayo!” Wa engetela: “Etikweni rin’wana, a hi tshama hi ri khume endlwini leyi nga riki na khixi, leyi a yi ri ni makamara mambirhi ntsena yo hlambela eka wona. Sweswo swi ndzi dyondzise ku lehisa mbilu.”

Ku dyondza ririmi lerintshwa i ntlhontlho wun’wana lowu lavaka matshalatshala ni ku titsongahata. Sharon, loyi a tirheke na nuna wa yena ematikweni yo hambana-hambana u ri: “Ku nga tivi ririmi ra le tikweni leri u tirhaka eka rona i ntlhontlho. Eku sunguleni, swa tika ku va ni vuxaka lebyinene ni vamakwerhu va moya loko u nga swi koti ku tiphofula. Swi heta matimba. Kambe vamakwerhu lava hi hlanganaka na vona eswiavelweni swa hina va hi lehisela mbilu swinene naswona va khathala swinene hi hina. Swi nga si ya kule hi sungula ku vulavurisana ku nga khathariseki xiphiqo xa ririmi.”

Swi Lava Xivindzi Leswaku U Ya eNsin’wini

Hambileswi vamakwerhu volavo va pfunaka swinene entirhweni wo aka, va swi xiya leswaku ntirho wa vona lowukulu i ku chumayela mahungu lamanene ya Mfumo wa Xikwembu. Hikwalaho, va wu seketela swinene ntirho wo chumayela lowu endliwaka hi mavandlha lawa va hlanganyelaka na wona. Åke na Ing-Mari, ku nga mpatswa lowu pfuneteke entirhweni wo aka  le Guadeloupe, Malawi, Mexico ni le Nigeria, va pfumela leswaku swi lava xivindzi ku chumayela hi ririmi rin’wana etikweni rimbe.

Ing-Mari u ri: “Eku sunguleni a hi nga chumayeli kahle tanihi leswi minkarhi hinkwayo a hi famba ni Timbhoni ta kwalaho naswona hi ku chava ku khomisiwa tingana, hakanyingi a hi tshika tona ntsena ti vulavula. Hambiswiritano, siku rin’wana hi anakanye ku ya ensin’wini hi ri hexe. Loko hi suka a hi chuhe ngopfu. Hi kume wansati un’wana loyi a yingiseleke xingheniso lexi a ndzi xi lunghiselerile. Ndzi hlaye tsalwa kutani ndzi n’wi fambisela tibuku. Kutani wansati loyi a ku: ‘Wa nga ndzi byela. Ndzi ni xaka leri dyondzaka Bibele ni Timbhoni ta Yehovha. Ndzi fanele ndzi endla yini leswaku na mina ndzi dyondzeriwa?’ Ndzi sale ndzi hlamele. Hiloko ndzi ku hefu, kutani ndzi n’wi byela leswaku ndzi ta n’wi dyondzela Bibele.”

Ing-Mari wa engetela: “Anakanya ndlela leyi a ndzi tsake ha yona ndzi tlhela ndzi nkhensa Yehovha hi leswi a katekiseke goza leri hi ri tekeke ni ku navela ka hina ku byela van’wana ntiyiso.” Wansati loyi u endle nhluvuko lowunene kutani a khuvuriwa a va Mbhoni entsombanweni wa muganga le Dorobeni ra Mexico. Åke na Ing-Mari va katsakanya vutirheli bya vona hi ndlela leyi: “Ha swi tlangela swinene swiavelo swa hina swa ku hlanganyela eka matsima yo hambana-hambana yo aka, kambe u va ni ntsako lowukulu ni ku eneriseka loko u pfuna munhu leswaku a amukela ntiyiso.”

Moya Wa Ku Tinyikela

I ntiyiso leswaku vamakwerhu lava siyaka mindyangu ya ka vona ni vanghana va titsona swo karhi leswaku va ta pfuna vamakwavo va le matikweni man’wana, kambe va tlhela va kuma ntsako lowukulu. Hi wihi ntsako wa kona?

Howard, loyi a tirheke na nsati wa yena Pamela, le Angola, Colombia, Ecuador, El Salvador, Guyana, Mexico ni le Puerto Rico u ri: “I lunghelo ku hlangana ni vamakwerhu ematikweni yo hambana-hambana ni ku tivonela rirhandzu leri vamakwerhu va le matikweni hinkwawo va kombisanaka rona. Hakanyingi hi dyondza hi swona, kambe loko u tshama ni vamakwerhu va mindhavuko yo hambana-hambana u tlhela u tirha na vona, u byi tlangela swinene vun’we bya risima lebyi hi nga na byona tanihi vamakwerhu.”

Gary, loyi a pfuneteke eka matsima yo aka le Colombia, Costa Rica, Ecuador, Mexico ni le Zambia na yena u vula leswaku tsima leri ri n’wi pfune ngopfu. U ri: “Ndzetelo lowu ndzi wu kumeke eka malembe lawa ndzi ma heteke ndzi ri ni vamakwerhu lava wupfeke lava tirhaka emarhavini ematikweni lawa ndzi averiweke eka wona, wu ndzi pfunile leswaku ndzi lunghekela ku langutana ni mintlhontlho eswiavelweni swa mina. Swi tiyisa ripfumelo hikuva swi ku nyika nkarhi wo vona vun’we lebyi funghaka nhlengeletano ya Yehovha ya misava hinkwayo—ku nga vun’we lebyi vaka kona hambiloko vanhu va vulavula tindzimi to hambana, va ri va tinxaka to hambana naswona va nga kulanga hi ndlela leyi fanaka.”

Sweswi ntirho wo aka le Mexico wu hetiwile, naswona miako ya rhavi leyi kurisiweke yi nyiketeriwe nan’waka. Hi ku susumetiwa hi rirhandzu ra vona eka Xikwembu, vamakwerhu lava tirhaka ku aka ematikweni man’wana ni lava pfunetaka entirhweni lowu va hoxe xandla swinene eku ndlandlamuxiweni ka vugandzeri bya ntiyiso le Mexico ni le matikweni man’wana. Moya wa vona wa ku tinyiketela ku ya pfuna Vakreste-kulobye ematikweni man’wana wa tlangeriwa swinene hi Timbhoni ta Yehovha emisaveni hinkwayo.

[Xifaniso lexi nga eka tluka 25]

Ecuador

[Xifaniso lexi nga eka tluka 25]

Colombia

[Xifaniso lexi nga eka tluka 25]

Angola

[Xifaniso lexi nga eka tluka 26]

Ku sunguriwa ka miako leyintshwa le rhavini ra le Mexico

[Xifaniso lexi nga eka tluka 26]

Ntanga wa le rhavini

[Xifaniso lexi nga eka tluka 26]

Ehansi: Swirho swin’wana swa Ndzawulo yo Aka emahlweni ka xiphemu xa miako leyintshwa

[Xifaniso lexi nga eka tluka 27]

Vamakwerhu lava pfunetaka ku aka va tsakela ku chumayela ni mavandlha ya laha va nga kona