Swivutiso Swa Vahlayi

Eka Vaheveru 2:14, ha yini Sathana a vuriwa “la nga ni tindlela to vanga rifu”?

Hi ku komisa, Pawulo a a vula leswaku Sathana hi byakwe kumbe hi ku tirhisa malandza yakwe, a nga endla leswaku vanhu va fa. Ku pfumelelana ni sweswo, Yesu u vule leswaku Sathana i “mudlayi wa vanhu ku sukela eku sunguleni.”—Yohane 8:44.

Ndzimana ya Vaheveru 2:14 yi nga tshuka yi nga twisiseki kahle, hikwalaho ka ndlela leyi vuhundzuluxeri byin’wana byi yi hundzuluxelaka ha yona, byi vula leswaku Sathana u ni “matimba ya rifu” kumbe u ni “matimba ehenhla ka rifu.” (Bibele Ya Xitsonga; Bibele—Mahungu Lamanene; New International Version; Jerusalem Bible) Vuhundzuluxeri byo tano byi nga endla swi vonaka onge Sathana a nga na swipimelo, u ni ntshunxeko wo dlaya un’wana ni un’wana loyi a n’wi hlawulaka. Kambe a swi tano. Loko a swi ri tano, handle ko kanakana a a ta va se a dlaye malandza ya Yehovha hinkwawo emisaveni.—Genesa 3:15.

Xiga xa Xigriki lexi hundzuluxeriweke va ku “matimba ehenhla ka rifu” eka vuhundzuluxeri byin’wana, ni lexi nge “tindlela to vanga rifu” eka Vuhundzuluxeri Bya Misava Leyintshwa, i “kraʹtos tou tha·naʹtou.” Xivulwa lexi nge Tou tha·naʹtou i xiphemu xa xiga lexi, naswona xi vula “rifu.” Kahle-kahle, rito leri nge kraʹtos ri vula “matimba, ntamu.” Hi ku ya hi Theological Dictionary of the New Testament, ri vula “vukona bya matimba kumbe ntamu, ku nga ri ku tirhisiwa ka wona.” Hikwalaho, eka Vaheveru 2:14, Pawulo a a nga vuli swona leswaku Sathana u ni matimba lama heleleke ehenhla ka rifu. Kambe a a vula leswaku Sathana u ni vuswikoti byo vanga rifu.

Xana Sathana u ti tirhisa njhani “tindlela to vanga rifu”? Eka buku ya Yobo, hi dyondza hi xiendlakalo xin’wana xo hlawuleka. Buku leyi yi kombisa leswaku Sathana u tirhise xidzedze leswaku a ‘dlaya’ vana va Yobo. Hambiswiritano, xiya leswaku Sathana u endle sweswo hileswi Xikwembu xi n’wi nyikeke mpfumelelo, hikwalaho ka leswi a ku ri ni mphikamakaneta yo karhi. (Yobo 1:12, 18, 19) Ina, Sathana a nga swi kotanga ku dlaya Yobo. A nga pfumeleriwanga ku n’wi dlaya. (Yobo 2:6) Leswi swi kombisa leswaku hambiloko minkarhi yin’wana Sathana a swi kotile ku endla leswaku vanhu vo lulama va fa, a hi fanelanga hi chava, hi ku anakanya leswaku a nga hi dlaya nkarhi wun’wana ni wun’wana loko a swi lava.

Nakambe, Sathana u dlaye vanhu hi ku tirhisa vanhu van’wana. Xisweswo, Vakreste vo tala va file va fela ripfumelo ra vona, van’wana va dlayiwe hi ntshungu lowu kariheke kumbe va dlayiwa swi nga fanelanga hikwalaho ka swileriso swo huma eka vafumi kumbe swo huma eka vaavanyisi vo homboloka.—Nhlavutelo 2:13.

Ku tlula kwalaho, minkarhi yin’wana Sathana u tirhise ku tsana ka vanhu leswaku a vanga rifu. Khale, eminkarhini ya Vaisrayele, muprofeta Balama u kucetele Vamowabu leswaku va yenga Vaisrayele “ku endla hi ku pfumala vutshembeki eka Yehovha.” (Tinhlayo 31:16) Sweswo swi endle leswaku ku fa Vaisrayele vo tlula 23 000. (Tinhlayo 25:9; 1 Tikronika 10:8) Ni namuntlha, van’wana va phasiwa hi “marhengu” ya Sathana naswona va yengiwa leswaku va tikhoma hi ndlela yo biha kumbe leswaku va endla swiendlo swo karhi swo biha. (Vaefesa 6:11) Entiyisweni, vanhu vo tano, a hi kanyingi va lahlekeriwaka hi vutomi bya vona hi nkarhi wolowo. Kambe va tiveka ekhombyeni ro lahlekeriwa hi vutomi lebyi nga heriki, kutani hi ndlela yoleyo Sathana u va a endle leswaku va fa.

Hambiloko hi swi tiva leswaku Sathana u na wona matimba yo hi vavisa, a hi fanelanga hi n’wi chava ku tlula mpimo. Loko Pawulo a vula leswaku Sathana u ni tindlela to vanga rifu, u tlhele a vula leswaku Kreste u file leswaku “a ta herisa [Sathana] . . . ni leswaku a ta ntshunxa hinkwavo lava hikwalaho ko chava rifu a va ri evuhlongeni vutomi bya vona hinkwabyo.” (Vaheveru 2:14, 15) Ina, Yesu u hakele nkutsulo kutani hi ndlela yoleyo a ntshunxa vanhu lava nga ni ripfumelo, evuhlongeni bya xidyoho ni rifu.—2 Timotiya 1:10.

Ina, swa vavisa ku tiva leswaku Sathana u ni tindlela to vanga rifu, kambe ha tiyiseka leswaku Yehovha u ta ti herisa timbanga leti vangiwaka hi Sathana ni malandza ya yena. Yehovha wa hi tiyisekisa leswaku Yesu la pfuxiweke u “ta herisa mintirho ya Diyavulosi.” (1 Yohane 3:8) Hi matimba ya Yehovha, Yesu u ta pfuxa lava feke kutani a herisa rifu. (Yohane 5:28, 29) Eku heteleleni, Yesu u ta swi paluxa hi ndlela leyi xiyekaka leswaku matimba ya Sathana a ma nyawuli, loko a n’wi hoxa ekheleni. Eku heteleleni, Sathana u ta loviseriwa makumu.—Nhlavutelo 20:1-10.