“Yi Enerise Xilaveko Xa Mbilu Ya Mina”

“NDZI mi nkhensa ndzi vuyelela hikwalaho ka nyiko yo xonga ya buku leyi nge Tshinela Eka Yehovha. Yi enerise xilaveko xa mbilu ya mina—xa ku titwa ndzi rhandziwa ni ku tlangeriwa hi Yehovha. Sweswi ndzi titwa ndzi ri kusuhi swinene na Yehovha ni N’wana wakwe la rhandzekaka. Ndzi lava ku tivisa un’wana ni un’wana hi buku leyi, ndzi yi nyika varhandziwa va mina hinkwavo.” Leyi i ndlela leyi un’wana wa Timbhoni ta Yehovha a titweke ha yona hi buku leyintshwa ya matluka ya 320 leyi humesiweke eMintsombanweni ya Muganga ya “Vachumayeri Va Mfumo Lava Hisekaka,” leyi khomiweke hi lembe ra 2002/03. A hi kambisiseni swin’wana mayelana ni buku leyi leyintshwa hi tlhela hi vona xikongomelo xa ku humesiwa ka yona.

Swin’wana Mayelana Ni Buku Leyi Leyintshwa

Xana buku leyi leyintshwa yi tamele yini? Yi tamele rungula hinkwaro leri nga eka swihloko swimbirhi leswi dyondziwaka swa nkandziyiso lowu—ni swin’wana swo tala! Buku leyi yi ni tindzima ta 31, laha ndzima yin’wana ni yin’wana yi nga leha ku ringana ni xihloko lexi dyondziwaka xa Xihondzo xo Rindza. Endzhaku ka xingheniso ni tindzima tinharhu to sungula, buku leyi yi avanyisiwe hi swiyenge swa mune, laha xin’wana ni xin’wana xa swona xi vulavulaka hi yin’wana ya timfanelo letikulu ta Yehovha. Xiyenge xin’wana ni xin’wana xi sungula hi nkatsakanyo wa mfanelo ya kona. Tindzima ti nga ri tingani leti landzelaka ti hlamusela ndlela leyi Yehovha a kombisaka mfanelo yoleyo ha yona. Xiyenge ha xin’we xi tamele ndzima leyi vulavulaka hi Yesu. Hikwalaho ka yini? Hikuva Yesu u te: “Loyi a ndzi voneke u vone na Tatana.” (Yohane 14:9) Tanihi leswi a tekeleleke Yehovha hi ku helela, Yesu u hi kombisa ndlela leyi timfanelo ta Xikwembu ti tirhaka ha yona hakunene. Xiyenge xin’wana ni xin’wana xi gimeta hi ndzima leyi hi dyondzisaka ku tekelela Yehovha hi ku kombisa mfanelo leyi hlamuseriwaka. Loko yi hlamusela timfanelo ta Yehovha, buku leyi leyintshwa yi tshaha tibuku hinkwato ta Bibele.

Buku leyi nge Tshinela Eka Yehovha yi tamele ni swilo swin’wana swo hlawuleka. Ku sukela eka ndzima 2, ndzima yin’wana ni yin’wana yi ni bokisi leri nge “Swivutiso Swo Gayela Ha Swona.” Matsalwa ni swivutiso swa kona a swi hleleriwanga ku pfuxeta ndzima leyi u yi hlayaka. Ematshan’weni ya sweswo, xikongomelo xa swona i ku ku pfuna leswaku u gayela swinene hi mhaka ya kona hi ku tirhisa Bibele. U khutaziwa ku hlaya tindzimana hinkwato ta Matsalwa hi vukheta. Endzhaku anakanyisisa hi xivutiso kutani u vona leswaku xi ku khumba njhani. Ku anakanyisisa ko tano ku nga khumba mbilu ya wena, ku ku pfuna ku tshinela swinene eka Yehovha.—Pisalema 19:14.

Swifaniso leswi nga ebukwini leyi nge Tshinela Eka Yehovha swi lavisisiwe kahle kutani swi lunghiseleriwa leswaku swi dyondzisa ni ku khutaza. Tindzima ta 17 ti ni swifaniso swo saseka swa timhaka ta Bibele leswi tataka tluka hinkwaro.

Yi Endleriwe Yini?

Buku leyi nge Tshinela Eka Yehovha yi endleriwe yini? Xikongomelo-nkulu xa buku leyi leyintshwa i ku hi pfuna leswaku hi tiva Yehovha ku antswa, leswaku hi aka vuxaka lebyi tiyeke na Xikwembu xa hina.

Xana u kona loyi u n’wi anakanyaka loyi a nga pfuniwaka hi buku leyi nge Tshinela Eka Yehovha, ku nga ha va xichudeni xa Bibele kumbe Mukreste la holeke? Xana wena u sungurile ku yi hlaya buku leyi leyintshwa? Loko u nga si sungula, ha yini u nga tivekeli nkarhi wa ku sungula ku yi hlaya hi ku hatlisa hilaha u nga kotaka hakona? Tinyike nkarhi wa ku anakanyisisa hi leswi u swi hlayaka. Onge buku leyi leyintshwa yi nga ku pfuna leswaku u tshinela swinene eka Yehovha Xikwembu, leswaku u ta kota ku chumayela mahungu lamanene ya Mfumo wa yena hi ntsako ni hi ku hiseka lokukulu!