Hi Fanele Hi Va Languta Njhani Vanhu Tanihi Leswi Siku Ra Yehovha Ri Tshinelaka?

“Yehovha a nga nonoki malunghana ni xitshembiso xa yena, . . . kambe u mi lehisela mbilu hikuva a nga naveli leswaku ku lova ni un’we kambe u navela leswaku hinkwenu mi hundzuka.”—2 PETRO 3:9.

1, 2. (a) Yehovha u va languta njhani vanhu namuntlha? (b) Hi swihi swivutiso leswi hi nga tivutisaka swona?

MALANDZA ya Yehovha ma lerisiwe ku “endla vanhu va matiko hinkwawo va va vadyondzisiwa.” (Matewu 28:19) Loko hi ri karhi hi hetisisa xiavelo lexi naswona hi rindzele “siku lerikulu ra Yehovha,” hi fanele hi languta vanhu hilaha a va langutaka hakona. (Sofaniya 1:14) Xana u va languta njhani? Muapostola Petro u ri: “Yehovha a nga nonoki malunghana ni xitshembiso xa yena, hilaha vanhu van’wana va ehleketaka hakona leswaku i ku nonoka, kambe u mi lehisela mbilu hikuva a nga naveli leswaku ku lova ni un’we kambe u navela leswaku hinkwenu mi hundzuka.” (2 Petro 3:9) Xikwembu xi languta vanhu tanihi lava nga ha hundzukaka. Xi “[rhandza] leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:4) Phela, Yehovha wa tsaka loko “lowo homboloka a tlhela endleleni yakwe, a ya emahlweni a hanya”!—Ezekiyele 33:11.

² Xana na hina hi languta vanhu hilaha Yehovha a va langutaka hakona? Xana hi teka vanhu va tinxaka hinkwato ni va matiko hinkwawo tanihi lava nga ha vaka “tinyimpfu ta madyelo yakwe,” hilaha yena a endlaka hakona? (Pisalema  100:3; Mintirho 10:34, 35) A hi kambisiseni swikombiso swimbirhi leswi kombisaka nkoka wa ku va ni langutelo ra Xikwembu. Eka swikombiso haswimbirhi, a ku ta va ni ndzoviso ku nga ri khale, naswona malandza ya Yehovha a ma byeriwe hi mhaka leyi ka ha ri emahlweni. Swikombiso leswi i swa nkoka swinene tanihi leswi hi rindzeleke siku lerikulu ra Yehovha.

Abrahama A A Ri Ni Langutelo Ra Yehovha

3. Xana Yehovha a a va languta njhani vaaki va le mutini wa Sodoma ni wa Gomora?

³ Xikombiso xo sungula i xa kokwa wa hina wo tshembeka Abrahama ni miti mimbirhi yo homboloka ya Sodoma na Gomora. Loko Yehovha a twe “xirilo xa ku vilela hi Sodoma na Gomora,” a nga hatlisanga a lovisa miti yoleyo ni vaaki va yona hinkwavo. U rhange a kambisisa xiyimo. (Genesa 18:20, 21) Ku rhumeriwe tintsumi timbirhi eSodoma, leti nga fika ti tshama endlwini ya wanuna wo lulama Lota. Hi vusiku lebyi tintsumi ti fikeke ha byona, “vanhu va muti . . . va rhendzela yindlu, ku sukela eka mufana ku ya eka munhu la kuleke, vanhu hinkwavo va ri ntshungu wun’we,” va lava ku endla vusodoma ni tintsumi. Swi le rivaleni leswaku ku onhaka ka vaaki va muti wolowo ku kombise leswaku a swi fanela leswaku va lovisiwa. Kambe, tintsumi ti byele Lota ti ku: “Xana wa ha ri ni van’wana laha? Humesa endhawini leyi, mukon’wana ni vana va majaha ni va vanhwanyana ni hinkwavo lava nga va wena emutini lowu!” Yehovha a a pfule ndlela yo ponisa vaaki van’wana va muti wolowo, kambe ku lo hetelela ku pone Lota ni vana va yena vambirhi va vanhwanyana.—Genesa 19:4, 5, 12, 16, 23-26.

4, 5. Ha yini Abrahama a kombelele vaaki va le Sodoma, naswona xana langutelo ra yena hi vanhu volavo a ri fambisana ni ra Yehovha?

⁴ Sweswi a hi anakanyisiseni hi nkarhi lowu Yehovha a vuleke xikongomelo xa yena xo kambela muti wa Sodoma ni wa Gomora. Hi nkarhi wolowo Abrahama u vutisile a ku: “A hi nge ku ni vanhu va 50 lava lulameke exikarhi ka muti. Xana u ta va kukula u nga yi rivaleli ndhawu leyi hikwalaho ka vanhu va 50 lava kumekaka endzeni ka yona? A hi swinene hi wena leswaku u endla hi ndlela leyi u dlaya munhu wo lulama swin’we ni wo homboloka lerova swi endleka hilaha ku fanaka hi wo lulama ni wo homboloka! A hi swinene hi wena. Xana Muavanyisi wa misava hinkwayo a nge endli leswi lulameke?” Abrahama u xi tirhise kambirhi xiga lexi nge “a hi swinene hi wena.” Abrahama se a a swi tiva leswaku Yehovha a nge lovisi vanhu lavanene swin’we ni lavo homboloka. Loko Yehovha a vule leswaku a a nga ta wu lovisa muti wa Sodoma loko ku ri ni “vanhu va 50 lava lulameke exikarhi ka muti,” Abrahama u hambete a hunguta nhlayo yoleyo ku kondza yi fika eka khume ntsena.—Genesa 18:22-33.

 ⁵ Xana Yehovha a a ta va a swi yingisile swikombelo swa Abrahama loko a swi nga fambisani ni langutelo ra yena? A a ta va a nga swi yingisanga. Swi le rivaleni leswaku leswi Abrahama a a ri “nakulobye wa Yehovha,” a a ri tiva langutelo ra Yena naswona na yena a a ri ni langutelo leri fanaka. (Yakobo 2:23) Loko Yehovha a yise nyingiso wa yena emutini wa Sodoma ni wa Gomora, a a tiyimiserile ku yingisa swikombelo swa Abrahama. Ha yini? Hikuva Tata wa hina wa le tilweni “a nga naveli leswaku ku lova ni un’we kambe u navela leswaku [hinkwerhu hi] hundzuka.”

Yonasi A A Ri Ni Langutelo Leri Hambaneke Swinene Hi Vanhu

6. Vanhu va le Ninivha va angurise ku yini eka leswi Yonasi a swi twariseke?

⁶ Anakanya hi xikombiso xa vumbirhi—ku nga xa Yonasi. Muti lowu a wu ta lovisiwa sweswi a ku ri wa Ninivha. Muprofeta Yonasi a a byeriwe leswaku a twarisa leswaku vubihi bya muti wolowo ‘byi fikile emahlweni ka Yehovha.’ (Yonasi 1:2) Ninivha a wu ri muti lowukulu loko ku hlanganisiwa ni madoroba ya wona, tanihi leswi a wu hlanganisa “mpfhuka wo famba hi milenge wa masiku manharhu.” Loko Yonasi a hetelele a yingisile kutani a nghena eNinivha, u hambete a twarisa mhaka leyi nge: “Ku lo sala masiku ya 40 ntsena, kutani Ninivha wu ta herisiwa.” Loko va twa sweswo, “vanhu va Ninivha va sungula ku pfumela eka Xikwembu, va twarisa ku titsona swakudya, va ambala nguvu yo khwaxa.” Ni hosi ya le Ninivha yi hundzukile.—Yonasi 3:1-6.

7. Xana Yehovha u va langute njhani Vaninivha lava hundzukeke?

⁷ Vanhu volavo va angule hi ndlela leyi hambaneke swinene ni ya va le Sodoma! Xana Yehovha u va langute njhani Vaninivha lava hundzukeke? Yonasi 3:10 yi ri: “Xikwembu xa ntiyiso xi tisola hikwalaho ka khombo leri xi vuleke leswaku xi ta va tisela rona; hikwalaho a xi ri tisanga.” Yehovha u ‘tisorile’ hikuva u cince mianakanyo ya yena hi vanhu va le Ninivha hileswi va hundzukeke. Mimpimanyeto ya Xikwembu a yi hundzukanga, kambe Yehovha u hundzule xiboho xa yena loko a vone leswaku Vaninivha va hundzukile.—Malakiya 3:6.

8. Ha yini Yonasi a hlundzukile?

⁸ Loko Yonasi a xiye leswaku muti wa Ninivha a wu nge lovisiwi, xana u ve ni langutelo leri fanaka ni ra Yehovha? A nga vanga na rona, hikuva hi byeriwa leswi: “Kambe, Yonasi a swi nga n’wi tsakisi nikatsongo, kutani a hlundzuka ngopfu.” Yonasi u endle yini swin’wana? Rungula ri ri: “A khongela Yehovha, a ku: ‘Oho Yehovha, xana leyi a ku nga ri mhaka leyi ndzi yi vuleke, loko ndza ha ri emisaveni ya rikwerhu? Hi yona mhaka leyi ndzi balekeleke eTaraxixi; hikuva a ndzi swi tiva leswaku wena u Xikwembu lexi nga ni nsovo ni tintswalo, lexi hlwelaka ku hlundzuka ni lexi teleke musa wa rirhandzu, lexi tisolaka hikwalaho ka khombo.’” (Yonasi 4:1, 2) Yonasi a a ti tiva timfanelo ta Yehovha. Hambiswiritano, enkarhini wolowo muprofeta loyi u hlundzukile naswona a a nga languti vaaki lava hundzukeke va le Ninivha hi ndlela leyi Xikwembu a xi va languta ha yona.

9, 10. (a) Yehovha u n’wi dyondzise yini Yonasi? (b) Ha yini hi nga ehleketaka leswaku Yonasi u hetelele a ve ni langutelo leri fanaka ni ra Yehovha malunghana ni Vaninivha?

⁹ Yonasi u ye ehandle ka muti wa Ninivha, a aka ntsonga, kutani a tshama endzhutini wa wona “a kondza a vona leswi swi nga ta endleka  emutini.” Hi xa mundzuku wa kona, Yehovha u mirisele Yonasi ximila xa xikutsu leswaku xi n’wi endlela ndzhuti. Hambiswiritano, hi siku leri landzelaka ximila lexi xi omile. Loko Yonasi a hlundzukisiwe hi sweswo, Yehovha u te: “Loko ku ri wena, u ve ni nsovo eka ximila xa xikutsu . . . Loko ku ri mina, xana a ndzi fanelanga ndzi va ni nsovo eka muti lowukulu wa Ninivha, lowu wu nga ni vanhu vo tlula 120 000, lava va nga ku tiviki nikatsongo ku hambana exikarhi ka voko ra vona ra xinene ni ra ximatsi, ku nga hlayiwi swifuwo swo tala?” (Yonasi 4:5-11) Yonasi a a fanele a dyondze swo karhi malunghana ni ndlela leyi Yehovha a va langutaka ha yona vanhu!

¹⁰ Leswaku Yonasi u angurise ku yini loko Xikwembu xi ta va xi kombise ntwela-vusiwana eka vanhu va le Ninivha a swi vuriwanga. Kambe, swi le rivaleni leswaku muprofeta loyi u lulamise langutelo ra yena hi Vaninivha lava hundzukeke. Lexi endlaka hi anakanya hi ndlela yoleyo hileswi Yehovha a n’wi tirhiseke ku tsala rungula leri ri huhuteriweke.

Xana U Ni Langutelo Rihi?

11. Xana Abrahama a a ta va languta njhani vanhu lava hanyaka namuntlha?

¹¹ Namuntlha hi langutane ni ndzoviso wun’wana—ku nga ku lovisiwa ka mafambiselo lawa yo homboloka ya swilo hi siku lerikulu ra Yehovha. (Luka 17:26-30; Vagalatiya 1:4; 2 Petro 3:10) Xana Abrahama a a ta va languta njhani vanhu lava hanyaka emisaveni leyi yi nga ta lovisiwa ku nga ri khale? A swi kanakanisi leswaku a a ta karhateka swinene hi lava va nga si ma twaka “mahungu lamanene lawa ya mfumo.” (Matewu 24:14) Abrahama u kombele Xikwembu hi ku phindha-phindha malunghana ni vanhu lavanene lava nga ha kumekaka eSodoma. Xana ha karhateka hi vanhu lava nga ha tshikaka tindlela ta misava leyi yi lawuriwaka hi Sathana loko vo nyikiwa nkarhi wa ku hundzuka kutani va tirhela Xikwembu?—1 Yohane 5:19; Nhlavutelo 18:2-4.

12. Ha yini swi olova ku va ni langutelo leri fanaka ni ra Yonasi malunghana ni vanhu lava hi hlanganaka na vona evutirhelini bya hina, naswona hi nga endla yini hi sweswo?

¹² Swi fanerile ku navela leswaku vuhomboloki byi herisiwa. (Habakuku 1:2, 3) Kambe, swa olova ku va ni langutelo leri fanaka ni ra Yonasi, ra ku nga khathali hi vuhlayiseki bya vanhu lava nga ha hundzukaka. Leswi swi nga ha nyanyisiwa swinene hi loko hi hambeta hi hlangana ni vanhu lava nga tsakeliki, lava hi vengaka kumbe lava hlundzukaka loko hi va endzela emakaya ya vona hi ta va byela rungula ra Mfumo. Hi nga ha honisa vanhu lava Yehovha a ha ta va hlengeletaka emafambiselweni lawa yo homboloka ya swilo. (Varhoma 2:4) Loko hi tikambisisa swinene kutani hi kuma leswaku hi ni langutelo ritsongo leri fanaka ni leri Yonasi a tshameke a va na rona malunghana ni Vaninivha, hi nga khongela eka Yehovha leswaku a hi pfuna ku endla leswaku langutelo ra hina ri fana ni ra yena.

13. Ha yini hi nga vulaka leswaku Yehovha wa khathala hi vanhu namuntlha?

 ¹³ Yehovha wa khathala hi vanhu lava nga si n’wi tirhelaka, naswona wa swi yingisa swikombelo swa vanhu va yena lava tinyiketeleke. (Matewu 10:11) Hi xikombiso, ‘u ta endla leswaku ku endliwa vululami,’ xisweswo a hlamula swikhongelo swa vona. (Luka 18:7, 8) Ku tlula kwalaho, Yehovha u ta hetisisa switshembiso ni swikongomelo swa yena hinkwaswo hi nkarhi wa yena n’wini. (Habakuku 2:3) Leswi swi ta katsa ku herisa vubihi hinkwabyo emisaveni, hilaha a wu loviseke hakona muti wa Ninivha endzhaku ka loko vaaki va wona va tlhele va endla vuhomboloki.—Nahume 3:5-7.

14. Hi fanele hi endla yini loko ha ha rindzele siku lerikulu ra Yehovha?

¹⁴ Xana hi ta rindza siku lerikulu ra Yehovha hi ku lehisa mbilu, hi khomekile hi ku endla ku rhandza ka yena ku kondza mafambiselo lawa yo biha ya swilo ma herisiwa? A hi swi tivi leswaku ntirho wo chumayela lowu wa ha faneleke wu endliwa loko siku ra Yehovha ri nga si fika wu kule ku fikela kwihi, kambe ha swi tiva leswaku mahungu lamanene ya Mfumo ma ta chumayeriwa emisaveni hinkwayo leyi akiweke makumu ma nga si fika, ku kondza Xikwembu xi eneriseka. Entiyisweni hi fanele hi khathala hi “swilo leswi navelekaka” leswa ha ta tisiwaka loko Yehovha a hambeta a tata yindlu ya yena hi ku vangama.—Hagayi 2:7.

Langutelo Ra Hina Ri Kombisiwa Hi Swiendlo Swa Hina

15. I yini lexi nga antswisaka ku tlangela ka hina ntirho wo chumayela?

¹⁵ Kumbexana hi tshama endhawini leyi ntirho wo chumayela wu nga tsakeriwiki kahle, naswona swiyimo swa hina a swi nge hi pfumeleli leswaku hi rhurhela laha ku nga ni xilaveko lexikulu xa vahuweleri va Mfumo. A hi nge ku nga kumeka vanhu va khume ensin’wini ya hina makumu ma nga si fika. Xana hi vona swi fanerile ku lava vanhu volavo va khume? Yesu u yi ‘twele vusiwana’ mintshungu “hikuva a yi vavisiwile ni ku tsalangana ku fana ni tinyimpfu leti nga riki na murisi.” (Matewu 9:36) Loko hi dyondza Bibele hi tlhela hi hlaya swihloko leswi nga eka Xihondzo xo Rindza na Xalamuka! hi vukheta, hi nga xi twisisa kahle xiyimo xa misava leyi. Kutani sweswo swi nga antswisa ku tlangela ka hina xilaveko xa ku chumayela mahungu lamanene. Ku tlula kwalaho, loko hi tirhisa tibuku leti sekeriweke eBibeleni leti lunghiseleriweke hi “hlonga ro tshembeka ni ro tlhariha” hi ta vulavula hi xivindzi swinene loko hi chumayela ensin’wini leyi tirhiwaka nkarhi na nkarhi.—Matewu 24:45-47; 2 Timotiya 3:14-17.

16. Xana hi nga ku antswisa njhani ku humelela ka hina evutirhelini bya hina?

¹⁶ Ku khathala ka hina hi lava nga ha amukelaka rungula leri humaka eBibeleni leri ponisaka vutomi ku nga hi susumetela ku cinca nkarhi ni tindlela to chumayela ha tona. Xana loko hi ri ensin’wini hi kuma makaya yo tala ma nga ri na vanhu? Loko swi ri tano, hi nga antswisa ku humelela ka hina evutirhelini hi ku ya chumayela hi minkarhi leyi hambaneke ni le tindhawini leti hambaneke. Vaphasi va tinhlampfi va ti phasa hi nkarhi lowu ti kumekaka ha wona. Xana na hina hi nga endla hilaha ku fanaka entirhweni wa hina wo phasa tinhlampfi hi tlhelo ra moya? (Marka 1:16-18) Ha yini u nga ringeti ku chumayela nimadyambu na hi riqingho laha swi pfumeleriwaka kona? Van’wana va kume leswaku ‘tindhawu leti nga ni tinhlampfi to tala’ hi laha ku pakiwaka kona mimovha ni tilori, etirhenkeni, etigaraji ni le switolo. Loko hi ri ni langutelo ro fana ni ra Abrahama hi ta ri kombisa ni hi ku nyikela vumbhoni hi xitshuketa loko swiyimo swi pfumela.

17. Hi nga va khutaza njhani varhumiwa ni van’wana lava tirhelaka ematikweni mambe?

¹⁷ Vanhu va timiliyoni a va si ri twa rungula ra Mfumo. Ku engetela eku chumayeleni ka hina, xana hi nga kombisa ku khathala hi vanhu vo tano hambiloko hi ri emakaya ya hina? Xana hi tiva varhumiwa kumbe vatirheli va nkarhi hinkwawo lava tirhaka ematikweni mambe? Loko swi ri tano, hi nga ha va tsalela mapapila lama kombisaka leswaku ha wu tlangela ntirho wa vona. Xana sweswo swi nga ku kombisa njhani ku khathala ka hina hi vanhu van’wana? Mapapila ya hina yo khutaza ni yo bumabumela ma nga tiyisa varhumiwa leswaku va tshama eswiavelweni swa vona, xisweswo va pfuna vanhu vo tala swinene leswaku va tiva ntiyiso. (Vaavanyisi 11:40) Hi nga tlhela hi khongelela varhumiwa kun’we ni lava va nga ni torha ra ntiyiso  ematikweni man’wana. (Vaefesa 6:18-20) Ndlela yin’wana yo kombisa ku khathala i ku nyikela hi mali entirhweni wa misava hinkwayo wa Timbhoni ta Yehovha.—2 Vakorinto 8:13, 14; 9:6, 7.

Xana U Nga Swi Kota Ku Rhurha?

18. Vakreste van’wana va endle yini leswaku va yisa timhaka ta Mfumo emahlweni etikweni leri va tshamaka eka rona?

¹⁸ Lava va rhurheleke etindhawini leti ku nga ni xilaveko lexikulu xa vachumayeri va Mfumo va katekisiwile hikwalaho ka ku tinyikela ka vona. Hambiswiritano, Timbhoni tin’wana ta Yehovha ti dyondze ririmi rin’wana ti ri etikweni ra rikwavo leswaku ti ta pfuna vahlapfa hi tlhelo ra moya. Matshalatshala yo tano ma vuyerisa hakunene. Hi xikombiso, Timbhoni ta nkombo leti a ti pfuna vanhu lava vulavulaka Xichayina edorobeni rin’wana ra le Texas, le U.S.A., ti tlangele Xilalelo xa Hosi xa 2001 ti ri ni vanhu va 114. Vanhu lava pfunaka mintlawa yo tano va kume leswaku masimu ya vona ma lunghekele ku tshoveriwa.—Matewu 9:37, 38.

19. I yini leswi u khutaziwaka ku swi endla loko u anakanya hi ku rhurhela etikweni rimbe leswaku u ya yisa ntirho wo chumayela hi Mfumo emahlweni?

¹⁹ Kumbexana wena ni ndyangu wa wena mi vona mi ta swi kota ku rhurhela laha ku nga ni xilaveko lexikulu xa vahuweleri va Mfumo. Ina, mi fanele mi rhanga mi “tshama ehansi [mi] hlayela ntsengo.” (Luka 14:28) Leswi i swa nkoka ngopfu-ngopfu loko munhu a anakanya ku rhurhela etikweni rimbe. Un’wana ni un’wana loyi a anakanyaka hi mhaka yoleyo u fanele a tivutisa swivutiso swo tanihi leswi: ‘Xana ndzi ta swi kota ku khathalela ndyangu wa mina? Xana ndzi nga swi kota ku kuma vhisa leyi nga enawini? Xana se ndzi tiva ririmi leri vulavuriwaka kwalaho, kumbe ndzi tiyimisele ku ri dyondza? Xana ndzi anakanyile hi mhaka ya maxelo ni ndhavuko? Xana ndzi ta va “mpfuno lowu tiyisaka” hakunene, ematshan’weni ya ku va ndzhwalo eka vapfumeri-kulorhi etikweni rero?’ (Vakolosa 4:10, 11) Leswaku u kumisisa leswaku ku laveka mpfuno wo tanihi kwihi etikweni leri u anakanyaka ku rhurhela eka rona, minkarhi hinkwayo u fanele u tsalela ehofisini ya rhavi ya Timbhoni ta Yehovha leyi langutelaka ntirho wo chumayela endhawini yoleyo. *

20. Muntshwa un’wana la nga Mukreste u tinyikele njhani leswaku a pfuna vapfumeri-kulobye ni van’wana etikweni rimbe?

²⁰ Mukreste un’wana loyi a a tirha ku aka Tiholo ta Mfumo le Japani u twe leswaku a ku ri ni xilaveko xa vatirhi lava nga ni vutshila lava nga ta aka ndhawu ya vugandzeri le Paraguay. Leswi a a nga si teka naswona a ha ri ni matimba ya vuntshwa, u rhurhele etikweni rero kutani a tirha a ri yexe tin’hweti ta nhungu tanihi mutirhi wa nkarhi hinkwawo emuakweni wolowo. Loko a ri kwalaho, u dyondze Xipaniya a tlhela a fambisa tidyondzo ta Bibele ta le kaya. U swi xiyile leswaku ku ni xilaveko xa vahuweleri va Mfumo etikweni rero. Hambileswi a tlheleleke eJapani, u hatle a vuyela le Paraguay kutani a pfuneta eku hlengeleteni ka vanhu lava a va ta tirhisa Holo yoleyo ya Mfumo.

21. I yini lexi hi faneleke hi khathala swinene ha xona naswona hi fanele hi va ni langutelo rihi loko hi rindzele siku lerikulu ra Yehovha?

²¹ Xikwembu xi ta endla leswaku ntirho wo chumayela wu endliwa hi ku hetiseka, hi ku pfumelelana ni ku rhandza ka xona. Namuntlha xi hatlisisa ntshovelo wo hetelela wa moya. (Esaya 60:22) Kutani, loko ha ha rindzele siku ra Yehovha, a hi hlanganyeleni hi ku hiseka entirhweni wo tshovela kutani hi languta vanhu hilaha Xikwembu xa hina xa rirhandzu xi va langutaka hakona.

[Nhlamuselo ya le hansi]

Wa Tsundzuka Xana?

• Hi fanele hi va languta njhani vanhu loko ha ha rindzele siku ra Yehovha?

• Abrahama a a va languta njhani vanhu vo lulama lava va nga ha vaka va ve kona le Sodoma?

• Xana Yonasi u va langute njhani vanhu lava hundzukeke va le Ninivha?

• Hi nga swi kombisa njhani leswaku hi ni langutelo leri fanaka ni ra Yehovha malunghana ni vanhu lava nga si ma twaka mahungu lamanene?

[Swivutiso Swa Dyondzo]

[Xifaniso lexi nga eka tluka 16]

Abrahama a a languta vanhu hilaha Yehovha a va langutaka hakona

[Xifaniso lexi nga eka tluka 17]

Yonasi u ve ni langutelo ra Yehovha malunghana ni Vaninivha lava hundzukeke

[Swifaniso leswi nga eka tluka 18]

Ku khathala hi vanhu swi hi susumetela ku cinca minkarhi ni tindlela to chumayela ha tona mahungu lamanene