Ku Chavelela Lava Lavaka Mpfuno

BIBELE a hi buku ya vutshunguri bya mianakanyo. Hambiswiritano, ya hi chavelela ni ku hi pfuna leswaku hi tiphina hi vutomi ku nga khathariseki maxangu lawa hi langutanaka na wona. Entiyisweni, Matsalwa ma ri: “Munhu la velekiweke hi wansati, u hanya nkarhi wo koma naswona u taleriwe hi ku karhateka.” (Yobo 14:1) Yin’wana ya miringo ya hina yi vangiwa hi leswi hi nga hetisekangiki. Kambe, xana i mani la endlaka leswaku vanhu va xaniseka?

Bibele yi vula leswaku i moya wo homboloka lowu vuriwaka Diyavulosi na Sathana. U ‘xisa misava hinkwayo leyi akiweke’ ni ku vanga swiphiqo leswi hlaselaka vanhu. Kambe, Bibele yi tlhela yi hi byela leswaku nkarhi wa yena wu le kusuhi ni ku hela. (Nhlavutelo 12:9, 12) Ku nga ri khale, Xikwembu xi ta herisa nhlomulo hinkwawo lowu Sathana a wu tiseleke vanhu emisaveni. Hi ku ya hi Bibele, misava leyintshwa yo lulama leyi Xikwembu xi yi tshembiseke, yi ta herisa ku heleriwa hi ntshembo ni gome.—2 Petro 3:13.

Hakunene swa chavelela ku tiva leswaku ku xaniseka ka vanhu i ka xinkarhana! Vuhomboloki ni ku xaniseka swi ta herisiwa loko ku fuma Yesu Kreste hosi ya Mfumo wa Xikwembu wa le tilweni. Malunghana ni Hosi leyi vekiweke hi Xikwembu, Matsalwa ma ri: “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana. Yi ta kutsula moya-xiviri wa vona eku tshikileriweni ni le madzolongeni, ni ngati ya vona yi ta va ya risima ematihlweni ya yona.”—Pisalema 72:12-14.

Nkarhi wa ku hetiseka ka marito lawa ya vuprofeta wu le kusuhi swinene. Hi ta tiphina hi vutomi lebyi nga heriki emisaveni leyi nga paradeyisi hi nkarhi lowu swiyimo swi nga ta va swi ri leswi tsakisaka. (Luka 23:43; Yohane 17:3) Ku tiva switshembiso leswi chavelelaka swa Matsalwa, swi nyika ntshembo ni ku chavelela eka lava lavaka mpfuno.

[Laha Xifaniso Xi Humaka Kona eka tluka 32]

Depressed girl: Photo ILO/J. Maillard