Xana U Ni “Moya Wo Rindza”?
Xana U Ni “Moya Wo Rindza”?
“N’wina mi fanele mi va vanhu va muxaka muni hi tlhelo ra swiendlo swo kwetsima swa ku tikhoma ni swiendlo swa ku tinyiketela loku nga ni vukwembu, mi ri karhi mi rindzela ni ku hamba mi tsundzuka vukona bya siku ra Yehovha!”—2 PETRO 3:11, 12.
1, 2. Ku va ni “moya wo rindza” siku ra Yehovha hi nga ku fanisa na yini?
ANAKANYA hi ndyangu lowu languteleke ku va ni vaendzi eka swakudya swo hlawuleka swa siku. Nkarhi lowu va nga ta fika ha wona wu tshinela hi ku hatlisa. Manana wa muti u endla malunghiselelo yo hetelela. Nuna wa yena ni vana va karhi va pfuneta eku lunghiseleleni ka swilo hi ndlela ya kona. Hinkwavo ka vona a va khomeki. Ina, ndyangu hinkwawo wu rindzele vaendzi lava hi mapfundza naswona wu swi langutele hi mahlo-ngati swakudya swo xawula ni vunakulobye lebyinene.
2 Hina Vakreste hi rindzele nchumu wun’wana wa nkoka swinene. Hi rindzele yini? Ina, hinkwerhu ka hina hi rindzele “siku ra Yehovha”! Loko ha ha ri rindzile, hi fanele hi fana na muprofeta Mikiya, loyi a nga te: “Loko ku ri mina, ndzi ta tshama ndzi rindzele Yehovha. Ndzi ta kombisa moya wo rindza eka Xikwembu lexi xi ndzi ponisaka.” (Mikiya 7:7) Xana marito wolawo ma vula leswaku hi fanele hi khondla mavoko? Doo! Ku ni ntirho wo tala lowu faneleke wu endliwa.
3. Hi ku ya hi 2 Petro 3:11, 12, hi rihi langutelo leri Vakreste va faneleke va va na rona?
3 Muapostola Petro u hi pfuna leswaku hi va ni langutelo leri faneleke loko ha ha rindzile. U ri: “N’wina mi fanele mi va vanhu va muxaka muni hi tlhelo ra swiendlo swo kwetsima swa ku tikhoma ni swiendlo swa ku tinyiketela loku nga ni vukwembu, mi ri karhi mi rindzela ni ku hamba mi tsundzuka vukona bya siku ra Yehovha!” (2 Petro 3:11, 12) Xiya leswaku lexi i xivulwa ntsena. Petro a a nga vutisi xivutiso. Eka mapapila ya yena mambirhi lama huhuteriweke hi Xikwembu, u hlamusele ndlela leyi Vakreste va faneleke va hanya ha yona. U tlhele a va tsundzuxa ku hambeta va endla “swiendlo swo kwetsima swa ku tikhoma ni swiendlo swa ku tinyiketela loku nga ni vukwembu.” Hambileswi se a ku hundze malembe ya kwalomu ka 30 Yesu Kreste a nyikele xikombiso xa “makumu ya mafambiselo ya swilo,” Vakreste a va nga fanelanga va tshika ku rindza. (Matewu 24:3) A va fanele va ‘rindzela ni ku hamba va tsundzuka’ vukona bya siku ra Yehovha.
4. I yini leswi katsekaka ‘eku tsundzukeni ka vukona bya siku ra Yehovha’?
4 Rito ra Xigriki leri hundzuluxeriweke laha va ku “tsundzuka” hi ku kongoma ri vula “ku hatlisisa.” Ina, a hi nge ri ‘hatlisisi’ siku ra Yehovha hi ku kongoma. Phela, ‘a hi ri tivi siku hambi ku ri nkarhi’ lowu Yesu Kreste a nga ta avanyisa valala va Tata wa yena ha wona. (Matewu 24:36; 25:13) Buku yin’wana yi hlamusela leswaku rimitsu ra riendli ra rito leri nge “hatlisisa” laha ri vula “‘ku hatlisa’ naswona ri fambisana swinene ni ‘ku hiseka, ku chivirika ni ku khathala hi nchumu wo karhi.’” Hikwalaho Petro a a khutaza vapfumeri-kulobye ku byi navela swinene vukona bya siku ra Yehovha. Sweswo a va ta swi endla hi ku hambeta va ri tsundzuka. (2 Petro 3:12) Leswi “siku lerikulu ni leri chavisaka ra Yehovha” ri nga kwala nyongeni, na hina hi fanele hi hambeta hi ri tsundzuka.—Yuwele 2:31.
Ku Ri Rindza Hi “Swiendlo Swo Kwetsima Swa Ku Tikhoma”
5. Hi nga swi kombisa njhani leswaku hi swi navela swinene ku vona “siku ra Yehovha”?
5 Loko hi swi navela swinene ku pona siku ra Yehovha, hi ta swi kombisa hi “swiendlo [swa hina] swo kwetsima swa ku tikhoma ni swiendlo swa ku tinyiketela loku nga ni vukwembu.” Xiga lexi nge “swiendlo swo kwetsima swa ku tikhoma” xi nga ha hi endla hi tsundzuka xitsundzuxo xa Petro lexi nge: “Tanihi vana lava yingisaka, tshikani ku hanya hi ku ya hi ku navela loku a mi ri na kona eku sunguleni hi ku pfumala ka n’wina vutivi, kambe, hi ku landza Mukwetsimi loyi a mi vitaneke, kwetsimani na n’wina eku tikhomeni ka n’wina hinkwako, hikuva ku tsariwile: ‘Mi fanele mi kwetsima, hikuva mina ndza kwetsima.’”—1 Petro 1:14-16.
6. Hi fanele hi endla yini leswaku hi kwetsima?
6 Leswaku hi kwetsima hi fanele hi tshama hi basile emirini, emianakanyweni, emahanyelweni ni le moyeni. Xana hi tilunghisela “siku ra Yehovha” hi ku tshama hi kwetsima tanihi vanhu lava byarhaka vito ra Yehovha? Namuntlha a swi olovi ku hlayisa ku tenga ko tano hikuva mimpimanyeto ya mahanyelo ya misava leyi ya hohloka hakatsongo-tsongo. (1 Vakorinto 7:31; 2 Timotiya 3:13) Xana hi vona ku ri ni ku hambana lokukulu exikarhi ka mimpimanyeto ya hina ya mahanyelo ni ya misava? Loko swi nga ri tano hi fanele hi karhateka. Xana swi nga ha va swi vangiwa hileswi mimpimanyeto ya hina se yi hohlokaka hambileswi ya hina yi tlakukeke swinene ku tlula ya misava? Loko swi ri tano, hi fanele hi teka magoza lamanene yo lulamisa timhaka leti leswaku hi tsakisa Xikwembu.
7, 8. (a) Xana hi nga sungula ku debyisa voko eku kombiseni ka “swiendlo swo kwetsima swa ku tikhoma” hi ndlela yihi? (b) Hi swihi swilo leswi nga ha lavaka ku lulamisiwa?
7 Dokodela un’wana wa swa vutshunguri u vula leswaku leswi se ku nga ni swilo swo naveta rimbewu eka Internet nileswi munhu a nga kotaka ku tivonela swona exihundleni, van’wana lava a va nga swi koti ku hlalela swilo swo tano leswi thyakeke se va kuma “rungula ro tala ra swilo swo naveta rimbewu.” Loko ho ya lava rungula rolero leri thyakeke leri nga eka Internet, hi ta va hi honisa xileriso xa le Bibeleni xa leswaku hi nga “khumbi nchumu lexi nga basangiki.” (Esaya 52:11) Xana hi ta va hi “tsundzuka vukona bya siku ra Yehovha” hakunene? Kumbe, xana hi nga ha va hi tlherisela siku rolero endzhaku emianakanyweni ya hina, hi tibyela leswaku hambiloko ho thyakisa mianakanyo ya hina hi rungula leri thyakeke, ha ha ri na nkarhi wo yi basisa? Loko hi ri na xiphiqo emhakeni yoleyo, hi fanele hi hatla hi kombela Yehovha leswaku a ‘endla leswaku mahlo ya hina ma hundza ma nga swi voni swilo leswi nga pfuniki nchumu, a hi londzovota hi hanya endleleni ya yena’!—Pisalema 119:37.
8 Timbhoni ta Yehovha to tala, ku nga vantshwa ni vanhu lavakulu va namarhela mimpimanyeto ya Xikwembu leyi tlakukeke ya mahanyelo naswona va papalata swilo swa misava leyi leswi thyakeke leswi yengaka. Hi ku xiya leswaku minkarhi ya hina a hi ya ku debyisa voko, va hambeta va endla “swiendlo swo kwetsima swa ku tikhoma,” va yingisa xitsundzuxo xa Petro xa leswaku “siku ra Yehovha ri ta ta ku fana ni khamba.” (2 Petro 3:10) Swiendlo swa vona swi kombisa leswaku va ‘rindzele vukona bya siku ra Yehovha naswona va hamba va byi tsundzuka.’ *
Ku Ri Rindza Hi “Swiendlo Swa Ku Tinyiketela Loku Nga Ni Vukwembu”
9. Ku tinyiketela loku nga ni vukwembu ku fanele ku hi susumetela ku endla yini?
9 “Swiendlo swa ku tinyiketela loku nga ni vukwembu” na swona i swa nkoka leswaku hi tshama hi ri karhi hi tsundzuka siku ra Yehovha. “Ku tinyiketela loku nga ni vukwembu” ku katsa ku chava Xikwembu loku hi susumetelaka ku endla leswi xi tsakisaka. Ku namarhela Yehovha hi ku tshembeka hi swona swi kondletelaka swiendlo swo tano swa ku tinyiketela loku nga ni vukwembu. U rhandza leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:4) Xikwembu ‘a xi naveli leswaku ku lova ni un’we kambe xi navela leswaku hinkwerhu hi hundzuka.’ (2 Petro 3:9) Kutani, xana ku tinyiketela ka hina loku nga ni vukwembu a ku fanelanga ku hi susumetela ku antswisa matshalatshala ya hina yo pfuna vanhu leswaku va dyondza hi Yehovha va tlhela va n’wi tekelela?—Vaefesa 5:1.
10. Ha yini hi fanele hi tivonela eka “matimba ya vuxisi bya rifuwo”?
10 Loko hi lava Mfumo wa Xikwembu ku sungula hi ta hanya hi ku endla swiendlo leswi kombisaka ku tinyiketela loku nga ni vukwembu. (Matewu 6:33) Sweswo swi lava leswaku hi va ni langutelo leri faneleke hi swilo leswi vonakaka. Yesu u tsundzuxile: “Tshamani mi pfule mahlo ya n’wina naswona mi tivonela eka muxaka wun’wana ni wun’wana wa ku navela, hikuva hambiloko munhu a ri ni swo tala, vutomi byakwe a byi humi eka swilo leswi a nga na swona.” (Luka 12:15) Hambileswi hi nga tibyelaka leswaku a hi rhandzi mali ngopfu, hi fanele hi xiya leswaku “ku vilela ka mafambiselo lawa ya swilo ni matimba ya vuxisi bya rifuwo” swi nga “kamanyeta rito” ra Xikwembu. (Matewu 13:22) Swi nga ha tika ku kuma swo tihanyisa ha swona. Hikwalaho, ematikweni man’wana vo tala va anakanya leswaku loko va ta hanya vutomi lebyinene va fanele va rhurhela ematikweni lama yimeke kahle, kumbexana va siya mindyangu ya vona malembe ma nga ri mangani. Ni vanhu van’wana va Xikwembu va tshame va anakanya tano. Loko va rhurhela etikweni rin’wana va nga ha kota ku khathalela mindyangu ya vona kahle. Hambiswiritano, ku nga ha endleka yini hi vumoya bya varhandziwa va vona le kaya? Loko ku nga ri na vunhloko lebyinene ekaya, xana va ta hambeta va tiyile emoyeni leswaku va kota ku pona siku ra Yehovha?
11. Wanuna un’wana loyi a a ye etikweni rin’wana a ya lava ntirho u swi kombise njhani leswaku swiendlo swa ku tinyiketela loku nga ni vukwembu i swa nkoka swinene ku ri ni rifuwo?
11 Wanuna wa le tikweni ra Philippine loyi a yeke eJapani a ya lava ntirho u fike a dyondza ntiyiso wa Bibele eka Timbhoni ta Yehovha etikweni rero. Loko a dyondze hi vutihlamuleri bya le Matsalweni bya nhloko ya ndyangu, u swi xiyile leswaku a a fanele a ya pfuna ndyangu wa yena leswaku na wona wu gandzela Yehovha. (1 Vakorinto 11:3) Nsati wa yena le kaya a a nga lavi no twa hi vukhongeri lebyintshwa bya nuna wakwe naswona a a lava leswaku a hambeta a rhumela mali ematshan’weni yo vuya ekaya a ta dyondzisa ndyangu wa yena tidyondzo leti sekeriweke eBibeleni. Hambiswiritano, leswi a a swi xiya leswaku lowu a ku nga ri nkarhi wo debyisa voko nileswi a karhateka hi varhandziwa va yena, u tlhelele ekaya. Ku lehisela swirho swa ndyangu wa yena mbilu swi n’wi vuyerisile. Hi ku famba ka nkarhi, ndyangu wa yena wu ve evugandzerini bya ntiyiso naswona nsati wa yena u nghenele vutirheli bya nkarhi hinkwawo.
12. Ha yini hi fanele hi rhangisa timhaka ta moya evuton’wini?
12 Xiyimo xa hina xi nga fanisiwa ni xa vanhu lava nga emuakweni lowu tshwaka. Xana ku nga va ku ri vutlhari ku ringeta ku humesa nhundzu leyi nga endzeni ka muako lowu tshwaka lowu nga kusuhi ni ku wa? Ku ri na sweswo, xana a swi nga ta antswa ku ponisa vutomi—bya hina ni bya ndyangu wa hina ni bya van’wana lava tshamaka emuakweni wolowo? Mafambiselo lawa yo biha ya swilo ma le kusuhi ni ku hela naswona vutomi byi le khombyeni. Entiyisweni loko hi swi xiya leswi, hi fanele hi rhangisa timhaka ta moya naswona hi tinyiketela swinene entirhweni wo chumayela hi Mfumo lowu ponisaka vutomi.—1 Timotiya 4:16.
Hi Fanele Hi ‘Pfumala Xivati’
13. Hi fanele hi lava ku va exiyin’weni xihi loko siku ra Yehovha ri fika?
13 Loko a kandziyisa nkoka wa ku hambeta hi ri ni moya wo rindza, Petro u ri: “Varhandziwa, leswi mi rindzeleke swilo leswi, endlani hinkwaswo leswi mi nga swi kotaka leswaku emakumu [Xikwembu xi] mi kuma mi ri lava pfumalaka xivati, lava nga solekiki ni lava nga ni ku rhula.” (2 Petro 3:14) Loko a engetela eka xitsundzuxo xa yena xo endla swiendlo swo kwetsima swa ku tikhoma ni swiendlo swa ku tinyiketela loku nga ni vukwembu, Petro u kandziyisa nkoka wa leswaku emakumu Yehovha a hi kuma hi ri vanhu lava basisiweke hi ngati ya risima ya Yesu. (Nhlavutelo 7:9, 14) Sweswo swi lava leswaku munhu a kombisa ripfumelo egandzelweni ra Yesu kutani a va nandza wa Yehovha la tinyiketeleke a thela a khuvuriwa.
14. Ku ‘pfumala xivati’ swi katsa yini?
14 Petro u hi khutaza ku endla leswi hi nga swi kotaka leswaku hi kumiwa hi ‘pfumala xisandzu.’ Xana hi hlayisa ku tikhoma ka hina ka Vukreste ni vumunhu bya kona swi pfumala xisandzu, swi nga thyakisiwi hi misava? Loko hi vona xivati eswiambalweni swa hina, hi hatla hi ringeta ku xi susa. Loko xivati xa kona xi ri exiambalweni lexi hi xi rhandzaka swinene, hi xi susa hi vurhon’wana. Xana hi endla leswi fanaka loko vumunhu bya hina kumbe ku tikhoma ka hina ka Vukreste ku thyakisiwa hi ndlela yo fanekisela?
15. (a) Ha yini Vaisrayele a va fanele va endla madziva emakumu ka tinguvu ta vona? (b) Ha yini malandza ya Yehovha ya manguva lawa ma hlawulekile?
15 Vaisrayele a va fanele va tiendlela “madziva emakumu ka tinguvu ta vona” va tlhela va “veka ngoti ya wasi emakumu ka dziva.” Ha yini? Leswaku va ta tsundzuka swileriso swa Yehovha, va swi yingisa va tlhela va va “lava kwetsimaka” eka Xikwembu xa vona. (Tinhlayo 15:38-40) Leswi hi nga malandza ya Yehovha ya manguva lawa, a hi fani ni misava hikuva hi yingisa milawu ni misinya ya milawu ya Xikwembu. Hi xikombiso, hi tshama hi basile emahanyelweni, hi xixima ku kwetsima ka ngati naswona hi papalata mixaka hinkwayo ya vugandzeri bya swifaniso. (Mintirho 15:28, 29) Vo tala va hi xixima hileswi hi lwaka hi matimba leswaku hi nga nyamisiwi.—Yakobo 1:27.
Hi Fanele Ku Va “Lava Nga Solekiki”
16. Ku tshama hi ri “lava nga solekiki” swi katsa yini?
16 Petro u tlhela a vula leswaku hi fanele hi kumiwa hi ri “lava nga solekiki.” Hi nga swi endlisa ku yini sweswo? Xivati xi nga ha susiwa kumbe xi hlantswiwa kambe ku va la solekaka i mhaka yikulu. Ku va la solekaka swi vula leswaku ku ni leswi nga fambiki kahle eka wena. Muapostola Pawulo u tsundzuxe Vakreste-kulobye eFilipiya a ku: “Hambetani mi endla swilo hinkwaswo mi nga gunguli ni ku phikisana, leswaku mi pfumala xisandzu ni ku kala nandzu, mi va vana va Xikwembu lava nga riki na xisolo exikarhi ka xitukulwana xo homboloka ni lexi gombonyokeke, lexi mi voningaka exikarhi ka xona kukota mavoningo emisaveni.” (Vafilipiya 2:14, 15) Loko hi yingisa ndzayo yoleyo, hi ta papalata ku gungula ni ku phikisana naswona hi ta tirhela Xikwembu hi nsusumeto lowunene. Hi ta susumetiwa hi ku rhandza Yehovha ni vaakelani va hina loko hi ri karhi hi chumayela “mahungu lamanene lawa ya mfumo.” (Matewu 22:35-40; 24:14) Ku tlula kwalaho, hi ta hambeta hi twarisa mahungu lamanene hambileswi vanhu vo tala va nga ta ka va nga swi twisisi leswaku ha yini hi nyikela hi nkarhi wa hina leswaku hi pfuna van’wana va dyondza hi Xikwembu ni hi Rito ra xona ku nga Bibele.
17. Loko hi tikarhatela ku fanelekela malunghelo evandlheni ra Vukreste, nsusumeto wa hina wu fanele wu va wihi?
17 Leswi hi navelaka ku kumiwa hi ri “lava nga solekiki,” hi fanele hi kambisisa minsusumeto ya hina eka hinkwaswo leswi hi swi endlaka. A ha ha endli swilo hi ndlela ya misava ya vutianakanyi, yo tanihi ku tikarhatela ku kuma rifuwo kumbe xikhundlha. Loko hi tikarhatela ku fanelekela malunghelo yo karhi evandlheni ra Vukreste, onge minsusumeto ya hina yi nga va leyi tengeke naswona minkarhi hinkwayo hi susumetiwa hi ku rhandza Yehovha ni van’wana. Swa phyuphyisa ku vona vavanuna lava wupfeke hi tlhelo ra moya va “lwela ku fikelela ntirho wa ku va mulanguteri” hi ntsako naswona va navela ku tirhela Yehovha ni vapfumeri-kulobye hi ku titsongahata. (1 Timotiya 3:1; 2 Vakorinto 1:24) Kunene, lava fanekelaka ku va vakulu va “[risa] ntlhambi wa Xikwembu . . . hi ku swi rhandza; ku nga ri hi ku rhandza mpindzulo wa vukanganyisi, kambe hi mapfundza; ku nga ri ku tikisela lava nga ndzhaka ya Xikwembu, kambe [va] va swikombiso entlhambini.”—1 Petro 5:1-4.
Hi Fanele Hi Va “Ni Ku Rhula”
18. Timbhoni ta Yehovha ti tiviwa ti ri ni timfanelo tihi?
18 Xo hetelela, Petro u hi byela leswaku hi fanele hi kumeka hi ri “ni ku rhula.” Leswaku hi kota ku hanya hi ku pfumelelana ni xilaveko lexi, hi fanele hi va ni ku rhula na Yehovha ni vaakelani va hina. Petro u kandziyisa nkoka wa ku ‘rhandzana hi rirhandzu ro enta’ ni wa ku hlayisa ku rhula ni Vakreste-kulorhi. (1 Petro 2:17; 3:10, 11; 4:8; 2 Petro 1:5-7) Leswaku hi hlayisa ku rhula ka hina, hi fanele hi rhandzana. (Yohane 13:34, 35; Vaefesa 4:1, 2) Rirhandzu ni ku rhula ka hina swi vonaka swinene loko ku ri ni mintsombano ya matiko hinkwawo. Entsombanweni wa le Costa Rica hi 1999, munhu la xavisaka erivaleni ra swihaha-mpfhuka u hlundzukisiwe hileswi Timbhoni ta kwalaho leti a ti amukela vapfhumba ti sirheke ndhawu leyi a a xavisela eka yona ti nga swi xiyi. Hambiswiritano, hi siku ra vumbirhi u xiye ndlela leyi vapfhumba a va amukeriwa hi rirhandzu ni ku rhula ha yona, hambileswi Timbhoni ta kwalaho a to sungula ku va vona vapfhumba lava. Hi siku ro hetelela muxavisi loyi na yena u hlanganyerile eku amukeleni ka vapfhumba lava a tlhela a kombela dyondzo ya Bibele.
19. Ha yini swi ri swa nkoka ku lava ku va ni ku rhula ni vapfumeri-kulorhi?
19 Ku tiyimisela ka hina ku va ni ku rhula ni vamakwerhu va moya ku nga ha yi khumba ndlela leyi hi rindzelaka siku ra Yehovha ha yona swin’we ni misava ya yena leyintshwa leyi a yi tshembiseke. (Pisalema 37:11; 2 Petro 3:13) A hi nge swa hi tikela ku va ni ku rhula ni mupfumeri-kulorhi un’wana. Xana hi nga tianakanya hi ri karhi hi tshama hi ku rhula na yena eParadeyisini? Loko makwerhu wo karhi a hi dyoherile, hi fanele hi hatla hi ya ‘endla ku rhula na yena.’ (Matewu 5:23, 24) Ku endla tano i swa nkoka loko hi lava ku va ni ku rhula na Yehovha.—Pisalema 35:27; 1 Yohane 4:20.
20. “Moya wo rindza” wu fanele wu kombisiwa hi tindlela tihi?
20 Xana hi ‘rindzele vukona bya siku ra Yehovha ni ku hamba hi byi tsundzuka’? Leswaku ha swi navela ku vona ku herisiwa ka vuhomboloki swi kombisiwa hi ku tshama ka hina hi kwetsima emisaveni leyi yo biha. Ku tlula kwalaho, loko hi swi navela hi mbilu hinkwayo leswaku siku ra Yehovha ri fika naswona hi swi navela ku hanya eMfun’weni wa yena, hi ta swi kombisa hi swiendlo swa hina swa ku tinyiketela loku nga ni vukwembu. Naswona ku navela ka hina ku hanya emisaveni leyintshwa leyi rhuleke swi ta kombisiwa hi ku tiyimisela ka hina ku va ni ku rhula ni vapfumeri-kulorhi sweswi. Loko hi endla tano, hi ta va hi kombisa leswaku hi ni “moya wo rindza” naswona hi “tsundzuka vukona bya siku ra Yehovha.”
[Nhlamuselo ya le hansi]
^ par. 8 Leswaku u kuma swikombiso, vona Xihondzo xo Rindza xa January 1, 2000, tluka 16 na Buku Ya Lembe Ya Timbhoni Ta Yehovha Ya 1997 (ya Xinghezi), tluka 51.
Wa Tsundzuka Xana?
• Swi vula yini ku hambeta u “tsundzuka vukona bya siku ra Yehovha”?
• Hi nga swi kombisa njhani leswaku hi ni “moya wo rindza” eku tikhomeni ka hina?
• Ha yini “swiendlo swa ku tinyiketela loku nga ni vukwembu” swi ri swa nkoka?
• Hi fanele hi endla yini leswaku Yehovha a hi kuma hi ‘pfumala xivati, hi ri lava nga solekiki ni lava nga ni ku rhula’?
[Swivutiso Swa Dyondzo]
[Xifaniso lexi nga eka tluka 11]
“Moya wo rindza” wu kombisiwa hi swiendlo swo kwetsima swa ku tikhoma
[Swifaniso leswi nga eka tluka 12]
Ntirho wo chumayela hi Mfumo wu ponisa vutomi
[Xifaniso lexi nga eka tluka 14]
Loko ha ha rindzele siku ra Yehovha, a hi lweleni ku va ni ku rhula ni van’wana