A A Rhandza Musa

MILTON G. HENSCHEL, loyi se a a ri ni malembe yo tala a ri xirho xa Huvo leyi Fumaka ya Timbhoni ta Yehovha, u hete pfhumba ra yena ra laha misaveni hi Mugqivela, March 22, 2003. A a ri ni malembe ya 82 hi vukhale.

Milton Henschel u sungule ku tirha eyindlu-nkulu ya Timbhoni ta Yehovha a ha ri jaha naswona u tirhe hi ku tshembeka malembe yo tlula 60. U hatle a tiviwa hikwalaho ka vuswikoti bya yena byo endla swiboho swa vutlhari ni leswi a a wu rhandza hi mbilu hinkwayo ntirho wo chumayela hi Mfumo. Hi 1939 u ve matsalana wa N. H. Knorr, loyi hi nkarhi wolowo a a ri mulanguteri wa vugandliselo bya le Brooklyn bya Timbhoni ta Yehovha. Loko Makwerhu Knorr a sungule ku rhangela Timbhoni emisaveni hinkwayo hi 1942, Makwerhu Henschel u hambete a ri mupfuni wa yena. Makwerhu Henschel u tekane na Lucille Bennett hi 1956, naswona havambirhi ka vona va tiphine hi swilo leswi tsakisaka ni ku langutana ni swilo leswi nonon’hwaka evuton’wini.

Makwerhu Henschel u tirhisane swinene na Makwerhu Knorr ku kondza Knorr a fa hi 1977. Makwerhu Henschel u endzele matiko yo tlula 150 hakanyingi a famba na Makwerhu Knorr, va khutaza Timbhoni ta Yehovha emisaveni hinkwayo, ngopfu-ngopfu varhumiwa ni vatirhi va le tihofisini ta rhavi. Minkarhi yin’wana maendzo wolawo a ma nonon’hwa ma tlhela ma va ni khombo. Hi 1963 Makwerhu Henschel u xanisiwe hi ndlela ya tihanyi hikwalaho ka leswi a aleke ku hlanganyela enkhubyeni wa ku tlangela xiendlakalo xo karhi xa le tikweni, loko a endzile entsombanweni wa le Liberia. * Makwerhu Henschel u tlhelele eLiberia handle ko chava endzhaku ka tin’hweti ti nga ri tingani leswaku a ya hlangana ni muungameri wa tiko rero ni ku kuma mpfumelelo wa leswaku Timbhoni ta Yehovha ti gandzela ti ntshunxekile etikweni rero.

Makwerhu Henschel a a dume hi ku va ni mianakanyo leyi hlutekeke, a pfumelelana ni swiyimo a tlhela a anakanyela, loko swi ta emhakeni yo tamela swiphiqo swo nonon’hwa ni mintlhontlho. Vatirhi-kulobye a va ku tlangela swinene ku hleleka ka yena, ku titsongahata ka yena ni ku va ni misavu ka yena. Leswi a a ri ni vuswikoti lebyikulu byo tsundzuka, a a tsakisa varhumiwa vo tala emisaveni hinkwayo hikwalaho ka leswi a a hatla a tsundzuka mavito ya vona, a tlhela a vula xivulwa xin’we kumbe swimbirhi hi ririmi ra kwalaho swin’we ni swilo swo hlekisa leswi a a swi vula a ri karhi a tsopeta tihlo.

Mikiya 6:8 yi hi tsundzuxa leswaku Yehovha Xikwembu u lava leswaku hi “rhandza musa.” Milton Henschel u ta tsundzukiwa hi ku veka xikombiso lexinene emhakeni yoleyo. Hambileswi a a ri ni vutihlamuleri lebyikulu swinene, a a tshineleleka, a rhurile naswona a ri ni musa. A a rhandza ku vula leswaku, “Loko u kanakana, tsundzuka leswaku nchumu lowunene hi wona lowu faneleke.” Hambiloko hi rila ku lahlekeriwa hi makwerhu loyi a rhandzekaka, ha tsaka leswi a tiyiseleke hi ku tshembeka ku fika emakumu, a tiyiseka hi ku kuma hakelo ya yena, “harhi ya vutomi.”—Nhlavutelo 2:10.

[Nhlamuselo ya le hansi]

[Xifaniso lexi nga eka tluka 31]

M. G. Henschel na N. H. Knorr

[Xifaniso lexi nga eka tluka 31]

A ri na nsati wa yena Lucille