Hlakulela Moya Wo Hanana

A NGA kona la tswariweke a ri ni moya wo hanana. Hi ntumbuluko, ricece ri lava ku tienerisa hi leswi pfunaka rona ntsena, ri nga tivi nchumu hi ta lava va ri khathalelaka. Kambe, loko ri ri karhi ri kula ri dyondza leswaku a hi rona ntsena ri hanyaka laha misaveni. Ri fanele ri anakanyela ni van’wana, naswona ri fanele ri dyondza ku nyika ni ku avelana ni van’wana, ku nga ri ku amukela ntsena. Moya wo hanana wu fanele wu hlakuleriwa.

A hi vanhu hinkwavo lava nyikaka va nga ni moya wo hanana hambiloko va nyika swo tala. Van’wana va nga ha nyikela eka vandla ro karhi leswaku ku vuyeriwa vona vini. Van’wana va nga ha nyikela leswaku va ta ndhundhuzeriwa hi vanhu. Kambe, ku nyika ka Vakreste va ntiyiso ku hambanile. Kutani ke, hi swihi swikombiso swa ku hanana loku Rito ra Xikwembu ri ku bumabumelaka? Loko hi xiya ndlela leyi Vakreste va lembe-xidzana ro sungula a va hanana ha yona, hi ta kuma nhlamulo ya xivutiso lexi.

Swikombiso Swa Ku Hanana Ka Vakreste

Ku hanana ka Vakreste loku hlamuseriweke eBibeleni hi ntolovelo a ku ri “ku avelana  swilo ni van’wana” lava pfumalaka hakunene. (Vaheveru 13:16; Varhoma 15:26) A ku nga fanelanga ku endliwa hi nsindziso. Muapostola Pawulo u tsarile: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) Nakambe munhu a a nga fanelanga a nyika hi xikongomelo xo lava ku voniwa hi vanhu. Ananiya na Safira va endle tano naswona ku ve ni vuyelo byo biha.—Mintirho 5:1-10.

Ku ve ni xilaveko lexikulu xa ku hanana loko Vayuda ni vaproselita lava humaka etindhawini ta le kule va hlengeletane eYerusalema enkhubyeni wa Pentekosta hi 33 C.E. Hi kona laha valandzeri va Yesu “va [taleke] moya lowo kwetsima, va sungula ku vulavula hi tindzimi to hambana-hambana.” Hiloko ntshungu lowukulu wu va rhendzela wu yingisela nkulumo ya Petro leyi khutazaka leyi a yi vulavula hi Yesu Kreste. Endzhakunyana, vanhu va vone ndlela leyi Petro na Yohane va n’wi hanyiseke ha yona wanuna la lamaleke loyi a a ri enyangweni ya tempele, naswona va twe Petro loko a tlhela a vulavula hi Yesu ni hi xilaveko xa ku hundzuka. Vo tala va hundzukile kutani va khuvuriwa leswaku va va valandzeri va Kreste.—Mintirho, tindzima 2 na 3.

Lava ha ku hundzukaka a va lava ku tshama eYerusalema leswaku va kuma ndzetelo lowu engetelekeke eka vaapostola va Yesu. Kambe, xana vaapostola a va ta va khathalela njhani vaendzi volavo hinkwavo? Bibele ya hi byela: “Hinkwavo lava a va ri ni masimu kumbe tindlu a va swi xavisa kutani va tisa xuma xa swilo leswi xavisiweke [va] xi veka emilengeni ya vaapostola. A xi averiwa un’wana ni un’wana, hi ku ya hi xilaveko xa yena.” (Mintirho 4:33-35) Entiyisweni, vandlha leri a ra ha ku sunguriwa eYerusalema a ri ri ni moya wo hanana!

Endzhakunyana, mavandlha man’wana na wona ma kombise moya lowu fanaka. Hi xikombiso, hambileswi Vakreste va le Makedoniya a va ri swisiwana, va nyikele leswi tlulaka leswi va nga swi kotaka eka vamakwavo va le Yudiya lava pfumalaka. (Varhoma 15:26; 2 Vakorinto 8:1-7) Vandlha ra le Filipiya a ri seketela ntirho wa Pawulo hi ndlela leyi hlamarisaka. (Vafilipiya 4:15, 16) Siku ni siku vandlha ra le Yerusalema a ri avela swakudya eka tinoni leti pfumalaka, naswona vaapostola va veke vavanuna va nkombo lava fanelekaka lava a va ta vona leswaku ku nga vi na tinoni leti pfumalaka leti honisiwaka.—Mintirho 6:1-6.

Mavandlha yo sungula ya Vakreste a ma hatlisa ma pfuna hambiloko minkarhi yo nonon’hwa yi nga si fika. Hi xikombiso, loko muprofeta Agabo a profete hi ta ku ta ka ndlala leyikulu, vadyondzisiwa va le vandlheni ra Antiyoka wa Siriya ‘a va tiyimisele ku rhumela swo phalala vamakwavo lava tshamaka eYudiya.’ (Mintirho 11:28, 29) Mawaku moya lowunene lowu va wu kombiseke hi ku lunghekela ku pfuna van’wana!

I yini lexi susumeteke Vakreste vo sungula leswaku va hanana swonghasi ni ku va ni rirhandzu? Kahle-kahle, xana swi tisa ku yini leswaku munhu a va ni moya wo hanana? Loko hi xiya xikombiso xa Hosi Davhida hi ku komisa hi nga dyondza swo tala.

Davhida A A Hoxa Xandla Swinene Eku Seketeleni Ka Vugandzeri Bya Ntiyiso

Ku ringana malembe ya kwalomu ka 500, areka ya ntwanano—ku nga bokisi ro kwetsima leri a ri yimela vukona bya Yehovha—a yi nga ri na ndhawu leyi a yi tshama eka yona. A yi vekiwa entsongeni, kumbe etabernakeleni, leyi a yi tshamela ku rhwariwa loko Vaisrayele va ri karhi va famba emananga va kongome eTikweni leri Tshembisiweke. Hosi Davhida a a swi navela hi mbilu hinkwayo ku susa areka yo kwetsima entsongeni lowu a yi tshama eka wona, a yi veka endlwini leyi faneleke leyi a a ta yi akela Yehovha. Loko Davhida a vulavula na muprofeta Natani, u te: “Ndzi tshama endlwini ya mikedari, kambe areka ya ntwanano wa Yehovha yi le ntsongeni wa malapi.”—1 Tikronika 17:1.

Kambe Davhida a a ri munhu la lweke tinyimpi. Hikwalaho Yehovha u lerise leswaku Solomoni hi yena a nga ta aka tempele leyi ku nga ta tshama areka ya ntwanano eka yona. (1 Tikronika 22:7-10) Hambiswiritano, xileriso lexi a xi ku cincanga ku hanana ka Davhida. U hlele leswaku ku va ni vanhu vo tala lava nga ta hlengeleta nhundzu yo aka tempele. Endzhakunyana  u byele Solomoni a ku: “Ndzi lunghiselele yindlu ya Yehovha titalenta ta nsuku ta 100 000 ni titalenta ta silivhere ta miliyoni, ni koporo ni nsimbi, a ku na ndlela ya ku swi pima hikuva swi ve mpimo lowukulu ngopfu; ndzi lunghiselele timhandzi ni maribye.” (1 Tikronika 22:14) Leswi Davhida a a nga enerisekanga hi sweswo, u nyikele hi nsuku ni silivhere ya yena leyi namuntlha yi nga vaka mali yo tlula R9 300 000 000. Tlhandlakambirhi, tihosana na tona ti nyikele swinene. (1 Tikronika 29:3-9) A swi kanakanisi leswaku Davhida u kombise moya wo hanana swinene!

I yini lexi susumeteke Davhida leswaku a hanana hi ndlela leyi? U xiye leswaku hinkwaswo leswi a swi kumeke ni leswi a swi hetisiseke swi ve tano hikwalaho ko katekisiwa hi Yehovha. Loko a phofula sweswo hi xikhongelo u te: “Oho Yehovha Xikwembu xa hina, hinkwaswo swilo leswi swo tala leswi hi swi lunghiseleleke leswaku hi ku akela yindlu ha swona yi va ya vito ra wena ro kwetsima, swi huma evokweni ra wena, naswona hinkwaswo i swa wena. Wena Xikwembu xanga, ndzi swi tiva kahle leswaku u mukambisisi wa mbilu, nileswaku u tsakela ku lulama. Loko ku ri mina, ndzi nyikele swilo leswi hinkwaswo hi ku tirhandzela hi ku landza ku lulama ka  mbilu ya mina, kutani ndzi tsakele ku vona vanhu va wena lava va nga kona laha va humesa magandzelo hi ku tirhandzela eka wena.” (1 Tikronika 29:16, 17) Davhida a a byi teka byi ri bya risima vuxaka bya yena na Yehovha. A a xi tiva xilaveko xa ku tirhela Xikwembu “hi moya-xiviri lowu tsakeke,” naswona a a swi tsakela ku endla tano. (1 Tikronika 28:9) Leswi hi swona swi susumeteke Vakreste vo sungula leswaku va kombisa moya wa ku hanana.

Yehovha I Munyiki Lonkulu

Yehovha hi yena xikombiso xa kahle ngopfu xa ku nyika. U ni rirhandzu naswona wa khathalela lerova u “[tsuvukisa] dyambu ra yena eka vanhu vo homboloka ni lavanene naswona [u nisa] mpfula yakwe ehenhla ka vanhu lava lulameke ni lava nga lulamangiki.” (Matewu 5:45) U nyika vanhu hinkwavo “vutomi ni ku hefemula ni swilo hinkwaswo.” (Mintirho 17:25) Kunene, hilaha mudyondzisiwa Yakobo a kombiseke hakona, “nyiko yin’wana ni yin’wana leyinene ni nyiko yin’wana ni yin’wana leyi hetisekeke yi huma ehenhla, hikuva yi xika hi le ka Tata wa mavoningo ya le xibakabakeni.”—Yakobo 1:17.

Yehovha u hi nyike nyiko leyikulu swinene hi ku rhumela “N’wana wa [yena] la tswariweke a ri swakwe, leswaku un’wana ni un’wana loyi a  kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) A nga kona la nga vulaka leswaku wa faneleka ku nyikiwa nyiko yo tano, ‘hikuva hinkwerhu hi dyohile, naswona hi kayivela ku vangama ka Xikwembu.’ (Varhoma 3:23, 24; 1 Yohane 4:9, 10) Nkutsulo wa Kreste i xisekelo ni ndlela yo kuma “nyiko ya [Xikwembu] ya mahala leyi nga hlamuselekiki,” ku nga “musa lowu nga faneriwiki lowukulu wa Xikwembu.” (2 Vakorinto 9:14, 15) Leswi Pawulo a a tlangela nyiko ya Xikwembu, a a hanyela “ku nyikela vumbhoni bya rixaladza hi mahungu lamanene ya musa lowu nga faneriwiki wa Xikwembu.” (Mintirho 20:24) U xiye leswaku a ku ri ku rhandza ka Xikwembu leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.”—1 Timotiya 2:4.

Namuntlha, leswi swi hetisisiwa hi ntirho lowukulu wa ku chumayela ni ku dyondzisa lowu endliwaka ematikweni ya 234 emisaveni hinkwayo. Yesu u profete hi ku andza ka ntirho lowu loko a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Ina, “mahungu lamanene ma fanele ku chumayeriwa ematikweni hinkwawo ku sungula.” (Marka 13:10) N’wexemu vahuweleri va mahungu lamanene vo tlula tsevu wa timiliyoni va hete tiawara ta 1 202 381 302 entirhweni lowu naswona va fambise tidyondzo ta Bibele to tlula 5 300 000. Leswi vutomi byi nga ekhombyeni, ntirho lowu i wa nkoka swinene.—Varhoma 10:13-15; 1 Vakorinto 1:21.

Lembe na lembe ku endliwa minkandziyiso ya timiliyoni—ku katsa ni Tibibele, tibuku ni tibroxara—leswaku ku pfuniwa lava nga ni ndlala ya ntiyiso wa Bibele. Ku engetela kwalaho, ku kandziyisiwa tikopi to tlula biliyoni ta timagazini ta Xihondzo xo Rindza ni Xalamuka! Loko vanhu va ri karhi va amukela mahungu lamanene, ku akiwa miako leyi engetelekeke ya Tiholo ta Mfumo ni Tiholo ta Tinhlengeletano ta Timbhoni ta Yehovha, leti ku dyondzisiwaka Bibele eka tona. Lembe na lembe ku hleriwa tinhlengeletano ta xifundzha, tinhlengeletano to hlawuleka kun’we ni mintsombano ya miganga. Ku leteriwa ka varhumiwa, valanguteri lava famba-fambaka, vakulu ni malandza ya vutirheli i tshamela maxelo. Hi nkhensa Yehovha leswi a hi endleleke malunghiselelo lawa hinkwawo hi ku tirhisa “hlonga ro tshembeka ni ro tlhariha.” (Matewu 24:45-47) Kunene ha swi rhandza ku kombisa leswaku ha N’wi nkhensa!

Ku Kombisa Ku Nkhensa Eka Yehovha

Loko ku akiwa tempele ni loko mavandlha ya Vukreste ma pfuna lava pfumalaka, mali hinkwayo yo hakelela malunghiselelo wolawo a yi ri minyikelo ya ku tirhandzela. Hambiswiritano, ku fanele ku tsundzukiwa leswaku a nga kona la nga fuwisaka Yehovha, N’wini wa swilo hinkwaswo. (1 Tikronika 29:14; Hagayi 2:8) Hikwalaho, minyikelo i vumbhoni bya leswaku hi rhandza Yehovha naswona hi navela ku yisa vugandzeri bya ntiyiso emahlweni. Pawulo u vule leswaku ku hanana hi ndlela leyi swi humesa “marito ya ku nkhensa eka Xikwembu.” (2 Vakorinto 9:8-13) Yehovha u hi khutaza ku hanana hi ndlela yoleyo hikuva sweswo swi kombisa leswaku hi na moya lowunene, naswona hi n’wi rhandza hi mbilu hinkwayo. Lava va nyikaka ni lava va titshegaka ha Yehovha, va ta katekisiwa naswona va ta humelela hi tlhelo ra moya. (Deteronoma 11:13-15; Swivuriso 3:9, 10; 11:25) Yesu u hi tiyisekisile leswaku hi ta kuma ntsako loko a ku: “Ku nyika swi tisa ntsako lowukulu ku tlula ku amukela.”—Mintirho 20:35.

Vakreste lava nga ni moya wo nyika a va yimeli ntsena leswaku ku fika minkarhi yo pfumala. Ku ri na sweswo, va lunghekela “ku [endlela] hinkwavo leswi nga swinene, kambe ngopfu-ngopfu lava nga swin’we na [vona] eripfumelweni.” (Vagalatiya 6:10) Pawulo loko a hi khutaza leswaku hi hanana hi ndlela ya Xikwembu u tsarile: “Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” (Vaheveru 13:16) Loko hi tirhisa rifuwo ra hina—nkarhi, matimba ni mali—leswaku hi pfuna van’wana ni ku seketela vugandzeri byo tenga, Yehovha Xikwembu u tsaka ngopfu. Entiyisweni, u rhandza moya wo hanana.

[Bokisi/Xifaniso lexi nga eka tluka 28, 29]

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya minyikelo lama funghiweke leswaku “Minyikelo Ya Ntirho Wa Misava Hinkwayo—Matewu 24:14.”

N’hweti na n’hweti mavandlha ma rhumela minyikelo leyi erhavini ra Timbhoni ta Yehovha leri langutelaka swilaveko swa moya swa laha ma nga kona. Nakambe minyikelo ya ku tirhandzela yi nga ha rhumeriwa hi ku kongoma eka Watch Tower Bible and Tract Society of Pennsylvania, c/o Accounting Office, Private Bag X2067, Krugersdorp, 1740, South Africa, kumbe ehofisini ya rhavi leyi langutelaka tiko ra ka n’wina. Loko u nyikela hi cheke, tsala “Watch Tower” eka cheke ya kona. Swin’wetsin’wetsi kumbe swilo swin’wana swa nkoka na swona swi nga ha nyikeriwa. Minyikelo yo tano yi fanele ku fambisana ni papila ro koma leri hlamuselaka leswaku leyi i nyiko.

LUNGHISELELO RA MINYIKELO YA KU YA HI SWIYIMO

Mali yi nga nyikeriwa ehansi ka lunghiselelo ro hlawuleka ra leswaku loko swo endleka leswaku munhu wa kona a yi lava, yi tlheriseriwa eka yena. Leswaku u kuma rungula leri engetelekeke, hi kombela u tihlanganisa ni Accounting Office ya hofisi ya rhavi eka adirese leyi nga laha henhla.

NYIKO LEYI KUNGUHATIWEKE

Ku engetela eka minyikelo leyi kongomeke ni minyikelo ya mali ya ku ya hi swiyimo, ku na tindlela tin’wana ta ku nyikela leti vuyerisaka ntirho wa Mfumo wa misava hinkwayo. Tona ti katsa:

Ndzindza-khombo: Sosayiti ya Watch Tower yi nga ha tsarisiwa tanihi leyi nga ta vuyeriwa eka fambiselo ra ndzindza-khombo wa vutomi, eka mali ya ku tshika ntirho kumbe ya mudende.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Sosayiti ya Watch Tower, tanihi nyiko leyi heleleke kumbe ehansi ka ntwanano wa leswaku ntswalo wa yona wu hambeta wu kumiwa hi loyi a yi nyikeleke.

Xitandi Ni Yindlu: Xitandi ni yindlu leswi xavisekaka swi nga ha nyikeriwa hi ku kongoma kumbe loko ku ri yindlu yinene, ku endliwa ntwanano wa leswaku yi ta tekiwa ntsena loko loyi a nyikeleke ha yona a rhurha kumbe a fa. Tivisa hofisi ya rhavi ya le tikweni ra ka n’wina u nga si nyikela hi xitandi ni yindlu.

Swiboho: Nhundzu kumbe mali swi nga ha nyikeriwa eka Sosayiti ya Watch Tower hi ku tirhisa xileriso xa mufi lexi nga enawini.

Loko u lava rungula leri engetelekeke, u fanele u vutisa Accounting Office hi ku ba riqingho kumbe hi ku tsalela eka adirese leyi nga laha hansi kumbe eka hofisi ya rhavi leyi langutelaka ntirho wo chumayela etikweni ra ka n’wina.

Accounting Office

Watch Tower Bible and Tract Society of Pennsylvania

Private Bag X2067,

Krugersdorp, 1740

Riqingho: (011) 761 1000

[Xifaniso lexi nga eka tluka 26]

I yini lexi susumeteke Vakreste vo sungula leswaku va hanana?