Vukulu Bya Yehovha A Byi Lavisiseki

“Yehovha hi lonkulu naswona u fanele a dzunisiwa swinene, naswona vukulu byakwe a byi lavisiseki.”—PISALEMA 145:3.

1, 2. Davhida a a ri munhu wa muxaka muni, naswona a a tilanguta njhani emahlweni ka Xikwembu?

MUTSARI wa Pisalema 145 hi un’wana wa vanhu lava a va dume ngopfu enkarhini lowu hundzeke. Loko a ha ri mufana u jamelane ni xihontlovila lexi hlomeke ivi a xi dlaya. Naswona loko a ri nhenha tlhelo hosi, mupisalema loyi u hlule valala vo tala. Vito rakwe a ku ri Davhida, hosi ya vumbirhi ya tiko ra khale ra Israyele. Davhida u sale a dumile niloko se a file, lerova ni namuntlha vanhu va timiliyoni va tiva swo karhi hi yena.

² Ku nga khathariseki swilo hinkwaswo leswi Davhida a swi endleke, a a ri munhu wo titsongahata. U yimbelele malunghana na Yehovha a ku: “Loko ndzi vona matilo ya wena, mintirho ya tintiho ta wena, n’weti ni tinyeleti leswi u swi lunghiseleleke, xana munhu wa nyama wo va yini lerova u nga n’wi anakanya, ni n’wana wa munhu wa nyama leswaku u n’wi khathalela?” (Pisalema 8:3, 4) Ematshan’weni yo tivona a ri munhu la tlakukeke, Davhida u vule leswaku Yehovha hi yena a n’wi kutsuleke eka valala va yena hinkwavo, kutani a vula leswi landzelaka hi Xikwembu: “U ta ndzi nyika xitlhangu xa wena xa ku ponisa, ku titsongahata ka wena ku ndzi endla ndzi va lonkulu.” (2 Samuwele 22:1, 2, 36) Ku titsongahata ka Yehovha ku kombisiwa hi ku rivalela ka yena vadyohi, naswona Davhida a a tlangela musa lowukulu ngopfu wa Xikwembu.

‘Ndzi Ta Tlakusa Xikwembu Hosi’

3. (a) Hi rihi langutelo leri Davhida a a ri na rona hi vuhosi bya Israyele? (b) Davhida a a swi navela ku fikela kwihi ku dzunisa Yehovha?

³ Hambileswi Davhida a a ri hosi leyi vekiweke hi Xikwembu, a a teka Yehovha a ri yena Hosi ya xiviri ya Israyele. Davhida u te: “Mfumo i wa wena, Wena Yehovha, Wena la tlakukeke la nga murhangeri wa hinkwavo.” (1 Tikronika 29:11) Nakambe Davhida a a swi tlangela swinene ku va Xikwembu xi ri xona Mufumi! U yimbelerile a ku: “Ndzi ta ku tlakusa, Wena Xikwembu xanga lexi nga Hosi, ndzi ta dzunisa vito ra wena hilaha ku nga riki na makumu, hi masiku. Ndzi ta ku dzunisa siku hinkwaro, ndzi ta dzunisa vito ra wena hilaha ku nga riki na makumu, hi masiku.” (Pisalema 145:1, 2) Davhida a a swi navela hi mbilu hinkwayo ku dzunisa Yehovha Xikwembu siku hinkwaro, hilaha ku nga heriki.

4. Hi swihi swihehlo swa mavunwa leswi Pisalema 145 yi swi paluxaka?

⁴ Pisalema 145 yi nyikela nhlamulo ya matimba eka ntlhontlho wa Sathana wa leswaku Xikwembu i mufumi la nga ni vutianakanyi, loyi a tsonaka swivumbiwa swakwe ntshunxeko.  (Genesa 3:1-5) Pisalema leyi yi tlhela yi paluxa vunwa bya Sathana bya leswaku lava va yingisaka Xikwembu va xi yingisa hi xikongomelo xo lava ku kuma swilo leswi va swi lavaka, kambe a va yingisi Xikwembu hi ku va va xi rhandza. (Yobo 1:9-11; 2:4, 5) Ku fana na Davhida, Vakreste va ntiyiso namuntlha va nyikela nhlamulo eka swihehlo swa mavunwa swa Diyavulosi. Va tlangela ntshembo lowu va nga na wona wo hanya hi masiku ehansi ka vulawuri bya Mfumo tanihi leswi va navelaka ku dzunisa Yehovha hilaha ku nga heriki. Ana se vanhu va timiliyoni va sungule ku endla tano hi ku kombisa ripfumelo egandzelweni ra Yesu ra nkutsulo ni hi ku tirhela Yehovha hileswi va n’wi rhandzaka hi mbilu hinkwayo tanihi vagandzeri va yena lava tinyiketeleke ni ku khuvuriwa.—Varhoma 5:8; 1 Yohane 5:3.

5, 6. Hi tihi tindlela leti hi pfulekeleke ta ku dzunisa Yehovha?

⁵ Anakanya hi tindlela to tala leti hi pfulekeleke ta ku dzunisa Yehovha tanihi malandza ya yena. Sweswo hi nga swi endla hi ku khongela loko hi khumbiwe ngopfu hi mhaka leyi hi yi dyondzeke eRitweni ra yena, Bibele. Nakambe hi nga dzunisa Xikwembu ni ku xi nkhensa loko hi khumbiwa hi ndlela leyi xi khomaka vanhu va xona ha yona kumbe loko hi tsakisiwa hi nchumu wo karhi eka ntumbuluko wa xona lowu hlamarisaka. Nakambe hi dzunisa Yehovha Xikwembu loko hi vulavula hi swikongomelo swa yena ni vapfumeri-kulorhi eminhlanganweni ya Vukreste kumbe loko hi tidyela mabulo na vona. Entiyisweni, ‘mintirho hinkwayo leyinene’ leyi hi yi endlelaka ku yisa timhaka ta Mfumo wa Xikwembu emahlweni yi yisa ku dzuneka eka Yehovha.—Matewu 5:16.

⁶ Swikombiso swa manguva lawa swa mintirho yo tano leyinene swi katsa ku akiwa ka tindhawu to tala ta vugandzeri hi vanhu va Yehovha ematikweni lama sweleke. To tala ta tona ti akiwe hi mpfuno wa timali wa vapfumeri-kulorhi va le matikweni man’wana. Vakreste van’wana va hoxe xandla hi ku ya etindhawini to tano hi ku tirhandzela leswaku va ya hlanganyela eku akeni ka Tiholo ta Mfumo. Naswona ntirho lowunene wa nkoka ku tlula hinkwayo i ku dzunisa Yehovha hi ku chumayela mahungu lamanene ya Mfumo wakwe. (Matewu 24:14) Hilaha tindzimana ta le ndzhaku ta Pisalema 145 ti kombisaka hakona, Davhida a a tlangela vulawuri bya Xikwembu, kutani a twarisa vuhosi bya xona. (Pisalema 145:11, 12) Xana na wena u ma tlangela hi ndlela leyi fanaka mafumelo ya Xikwembu ya rirhandzu? Naswona xana u vulavula nkarhi na nkarhi ni van’wana hi Mfumo wa xona?

Swikombiso Swa Vukulu Bya Xikwembu

7. Nyikela xivangelo-nkulu xa ku dzunisa Yehovha.

⁷ Pisalema 145:3 yi hi nyika xivangelo-nkulu xa ku dzunisa Yehovha. Davhida wa yimbelela a ku: “Yehovha hi lonkulu naswona u fanele a dzunisiwa swinene, naswona vukulu byakwe a byi lavisiseki.” Vukulu bya Yehovha a byi na mindzilikana. Vanhu a va nge swi koti ku byi kumisisa kahle, ku byi twisisa hi vuenti kumbe ku byi pima. Kambe ku sukela sweswi hi ta vuyeriwa swinene hi ku kambisisa swikombiso swa vukulu bya Yehovha lebyi nga lavisisekiki.

8. Vuako byi paluxa yini malunghana ni vukulu bya Yehovha ni matimba ya yena?

⁸ Ringeta ku anakanya hi siku leri u tshameke u ya endhawini leyi nga riki na mavoni ya gezi kutani u languta ehenhla exibakabakeni lexi nga riki na mapapa nivusiku. Xana a wu hlamarisiwanga hi vunyingi bya tinyeleti leti u ti voneke exibakabakeni xo dzwihala? Xana sweswo a swi ku susumetelanga ku dzunisa Yehovha hikwalaho ka vukulu lebyi a byi kombiseke hi ku vumba tinyeleti teto hinkwato ta le xibakabakeni? Kambe u va u vone xiphemu xitsongo swinene xa nhlayo ya tinyeleti ta xirimela lexi misava yi nga xiphemu xa xona. Ku tlula kwalaho, ku ringanyetiwa leswaku ku ni swirimela swo tlula dzana ra tibiliyoni, kasi leswi u kotaka ku swi vona u nga tirhisi theleskopu i swinharhu ntsena. Ina, tinyeleti leti nga hlayekiki kun’we ni swirimela leswi endlaka vuako lebyikulu i vumbhoni bya matimba ya Yehovha ya ku vumba ni ya vukulu byakwe lebyi nga lavisisekiki.—Esaya 40:26.

9, 10. (a) Hi tihi timhaka ta vukulu bya Yehovha leti kombisiweke malunghana na Yesu Kreste? (b) Ku pfuxiwa ka Yesu ku fanele ku ri khumba njhani ripfumelo ra hina?

⁹ Anakanya hi timhaka tin’wana leti kombisaka vukulu bya Yehovha—mayelana na Yesu Kreste. Xikwembu xi kombise vukulu bya xona loko xi vumba N’wana wa xona kutani xi n’wi tirhisa nkarhi wo leha tanihi “mutirhi [wa xona] la nga ni vuswikoti.” (Swivuriso 8:22-31) Yehovha u kombise vukulu bya rirhandzu ra yena loko a nyikela N’wana  wa yena la nga yexe leswaku a va gandzelo ro kutsula vanhu. (Matewu 20:28; Yohane 3:16; 1 Yohane 2:1, 2) Nchumu lowu vanhu va nga kotiki ku wu twisisa i miri wa moya lowu hlawulekeke ni lowu nga fiki lowu Yehovha a wu nyikeke Yesu loko a pfuxiwa.—1 Petro 3:18.

¹⁰ Ku pfuxiwa ka Yesu ku katse timhaka tin’wana to tala leti hlamarisaka ta vukulu bya Yehovha lebyi nga lavisisekiki. A swi kanakanisi leswaku Xikwembu xi endle leswaku Yesu a tsundzuka ntirho lowu katsekeke loko ku vumbiwa swilo leswi nga vonakiki ni leswi vonakaka. (Vakolosa 1:15, 16) Sweswo swi katsa swivumbiwa swin’wana swa moya, vuako, misava leyi humesaka swakudya ni swilo hinkwaswo leswi hanyaka emisaveni. Handle ko endla leswaku N’wana wakwe a tsundzuka matimu hinkwawo ya swivumbiwa swa le tilweni ni swa laha misaveni leswi veke kona loko N’wana loyi a nga si va munhu wa nyama, Yehovha u tlhele a endla leswaku Yesu a tsundzuka leswi swi humeleleke loko a ri munhu wa nyama la hetisekeke. Ina, vukulu bya Yehovha lebyi nga lavisisekiki byi vonaka eku pfuxiweni ka Yesu. Ku tlula kwalaho, xiendlo xexo lexikulu i xitiyisekiso xa leswaku swa koteka ku pfuxa ni vanhu van’wana. Xi fanele xi tiyisa ripfumelo leri hi nga na rona emhakeni ya leswaku Xikwembu xi ni matimba yo pfuxa vanhu va timiliyoni lava feke, lava xi nga na vona emianakanyweni ya xona leyi hetisekeke.—Yohane 5:28, 29; Mintirho 17:31.

Mintirho Yo Hlamarisa Ni Swiendlo Leswikulu

11. Hi wihi ntirho lowukulu wa Yehovha lowu sunguleke hi Pentekosta ya 33 C.E.?

¹¹ Endzhaku ka ku pfuxiwa ka Yesu, Yehovha u endle mintirho yo tala leyikulu ni leyi hlamarisaka. (Pisalema 40:5) Hi Pentekosta ya 33 C.E., Yehovha u endle leswaku ku humelela tiko lerintshwa, “Israyele wa Xikwembu,” leri vumbiweke hi vadyondzisiwa va Kreste lava totiweke hi moya lowo kwetsima. (Vagalatiya 6:16) Tiko rero lerintshwa ra moya ri kule hi matimba ri hlanganisa misava hinkwayo ya nkarhi wolowo. Hambileswi ku veke ni vugwinehi lebyi tswaleke Vujagana endzhaku ka rifu ra vaapostola va Yesu, Yehovha u ye emahlweni a endla mintirho yo hlamarisa leswaku a hetisisa xikongomelo xakwe.

12. Ku kumeka ka Bibele hi tindzimi hinkwato letikulu emisaveni i vumbhoni bya yini?

¹² Hi xikombiso, ku tsariwe Bibele ivi eku heteleleni yi hundzuluxeriwa hi tindzimi hinkwato letikulu ta le misaveni namuntlha. Hakanyingi Bibele a yi hundzuluxeriwa ehansi ka swiyimo swo tika swinene naswona a ku ri ni khombo ra ku dlayiwa hi vayimeri va Sathana. Entiyisweni, ntirho wo hundzuluxela Bibele hi tindzimi to tlula 2 000 ingi wu yimile loko ku ri leswaku a wu nga fambisani ni ku rhandza ka Yehovha Xikwembu lexi nga lavisisekiki!

13. Ku sukela hi 1914, vukulu bya Yehovha byi kombisiwe njhani malunghana ni swikongomelo swa Mfumo wakwe?

¹³ Vukulu bya Yehovha byi kombisiwe emhakeni ya swikongomelo swa Mfumo wa yena. Hi xikombiso, hi lembe ra 1914 u veke N’wana wakwe Yesu Kreste leswaku a va Hosi ya le tilweni. Endzhakunyana ka sweswo, Yesu u teke goza ro lwisana na Sathana ni madimona yakwe. Va hume va nga lelanga etilweni, va hlongoleriwa laha misaveni, laha sweswi va rindzeleke ku lahleriwa ekheleni. (Nhlavutelo 12:9-12; 20:1-3) Ku sukela enkarhini wolowo, valandzeri va Yesu lava totiweke va cinisiwe gija swinene. Kambe Yehovha u va tiyisile enkarhini wolowo wa vukona bya Kreste lebyi nga vonakiki.—Matewu 24:3; Nhlavutelo 12:17.

14. Hi wihi ntirho wo hlamarisa lowu Yehovha a wu endleke hi 1919, naswona sweswo swi hetisise yini?

¹⁴ Hi lembe ra 1919, Yehovha u endle ntirho wun’wana wo hlamarisa lowu kombiseke vukulu bya yena. Valandzeri va Yesu lava totiweke, lava vumoya  bya vona a byi ri ehansi swinene, va hlakarherile. (Nhlavutelo 11:3-11) Emalembeni lama landzeleke, vatotiwa va hiseke swinene eku chumayeleni ka mahungu lamanene ya Mfumo lowu simekiweke etilweni. Ku hlengeletiwe vatotiwa lava engetelekeke leswaku ku tatisiwa nhlayo leyi vekiweke ya 144 000. (Nhlavutelo 14:1-3) Nakambe, hi ku tirhisa valandzeri lava totiweke va Kreste, Yehovha u veke xisekelo xa “misava leyintshwa,” ku nga vanhu lavo lulama. (Nhlavutelo 21:1) Kambe xana ku ta endleka yini hi “misava leyintshwa” loko vatotiwa vo tshembeka va ye etilweni hinkwavo?

15. Hi wihi ntirho lowu kongomisiwaka hi Vakreste lava totiweke, naswona vuyelo byi ve byihi?

¹⁵ Hi 1935 nkandziyiso (wa Xinghezi) wa August 1 ni wa August 15 wa magazini lowu a wu ri ni swihloko swo hlawuleka leswi a swi vulavula hi “ntshungu lowukulu,” lowu boxiweke eka Nhlavutelo ndzima 7. Vakreste lava totiweke va kulule va n’watseka, va sungula ku lavisisa vagandzeri-kulobye volavo lava humaka ematikweni hinkwawo, va tinyimba, tinxaka ni tindzimi hinkwato, kutani va tihlanganisa na vona. “Ntshungu [wolowo] lowukulu” wu ta pona ‘nhlomulo lowukulu’ lowu tshinelaka, wu ri ni ntshembo wa ku hanya hi masiku eParadeyisini tanihi swirho swa hilaha ku nga heriki swa “misava leyintshwa.” (Nhlavutelo 7:9-14) Hikwalaho ka ntirho wo chumayela hi ta Mfumo ni wa ku endla vadyondzisiwa lowu kongomisiwaka hi Vakreste lava totiweke, sweswi ku ni vanhu vo tlula timiliyoni ta tsevu lava nga ni ntshembo wa ku hanya hi masiku eparadeyisini laha misaveni. I mani loyi a faneleke a dzunisiwa hikwalaho ka ku andza loku veke kona, hambi leswi Sathana a lwaka hi matimba a ri karhi a pfuniwa hi misava yakwe yo homboloka? (1 Yohane 5:19) I Yehovha ntsena loyi a endleke leswi hinkwaswo, a tirhisa moya wakwe lowo kwetsima.—Esaya 60:22; Zakariya 4:6.

Ku Vangama Lokukulu Ka Yehovha Ni Ku Xiximeka Kakwe

16. Ha yini vanhu va nga ta ka va nga swi koti ku ku vona hi mahlo ya nyama ‘ku vangama lokukulu ka xindzhuti xa Yehovha’?

¹⁶ ‘Mintirho yo hlamarisa’ ni ‘swiendlo swa matimba’ swa Yehovha a swi nge rivariwi, ku nga khathariseki leswaku i swa muxaka muni. Davhida u tsarile a ku: “Xitukulwana ni xitukulwana xi ta bumabumela mintirho ya wena, naswona xi ta vulavula hi swiendlo swa wena swa matimba. Ku vangama lokukulu ka xindzhuti xa wena naswona ndzi ta anakanyisisa hi timhaka leti hlamarisaka ta mintirho ya wena. Va ta vulavula hi ntamu wa swilo swa wena leswi chavisekaka; loko ku ri vukulu bya wena, ndzi ta byi twarisa.” (Pisalema 145:4-6) Kambe, xana Davhida a a ta va ni vutivi byo tanihi kwihi malunghana ni ku vangama lokukulu ka Yehovha, tanihi leswi vanhu va nga kotiki ku n’wi vona hileswi a nga ‘Xikwembu xa Moya’?—Yohane 1:18; 4:24.

17, 18. Ku tlangela ka Davhida emhakeni ya ‘ku vangama lokukulu ka xindzhuti xa Yehovha’ a ku ta kurisa ku yini?

 ¹⁷ Hambileswi Davhida a a nga swi koti ku vona Xikwembu, a ku ri ni tindlela leti a ti ta n’wi pfuna leswaku a tlangela xindzhuti xa Yehovha. Hi xikombiso, a a nga ha hlaya rungula ra le Matsalweni leri vulavulaka hi swiendlo swa Xikwembu swa matimba, swo tanihi ku lovisiwa ka misava yo homboloka hi ndhambi ya misava hinkwayo. A swi kanakanisi leswaku Davhida a a tiva ndlela leyi swikwembu swa mavunwa swa le Egipta swi khomisiweke tingana ha yona loko Xikwembu xi kutsula Vaisrayele evuhlongeni le Egipta. Swiendlakalo swo tano i vumbhoni bya xindzhuti ni vukulu bya Yehovha.

¹⁸ Handle ko kanakana ku tlangela ka Davhida emhakeni ya xindzhuti xa Xikwembu ku kurile loko a ri karhi a hlaya Matsalwa a tlhela a anakanyisisa ha wona. Hi xikombiso, a nga ha va a anakanyisise hi leswi swi endlekeke loko Yehovha a nyika Vaisrayele Nawu. Ku ve ni ku dzindza ka tilo, tindlati, papa lerikulu ni mpfumawulo lowu mbvungulaka swinene wa nanga. Ntshava ya Sinayi yi tsekatsekile yi tlhela yi tuvika musi. Vaisrayele lava hlengeletaneke emahlweni ka ntshava leyi va twe ni “Marito ya Khume” ma huma exikarhi ka ndzilo ni papa loko Yehovha a vulavula na vona hi ku tirhisa ntsumi. (Deteronoma 4:32-36; 5:22-24; 10:4; Eksoda 19:16-20; Mintirho 7:38, 53) Vona swikombiso swonghasi swa vukulu bya Yehovha! Varhandzi va Rito ra Xikwembu lava anakanyisisaka hi timhaka leti va khumbiwa hi ‘ku vangama lokukulu ka xindzhuti xa Yehovha.’ Kunene, namuntlha hi ni Bibele leyi heleleke, leyi tameleke swivono swo hambana-hambana swo hlawuleka leswi hi kombaka vukulu bya Yehovha.—Ezekiyele 1:26-28; Daniyele 7:9, 10; Nhlavutelo, ndzima 4.

19. I yini lexi nga ta kurisa ndlela leyi hi xi tlangelaka ha yona xindzhuti xa Yehovha?

¹⁹ Ndlela yin’wana leyi Davhida a a ta khumbeka ha yona hi vukulu bya Xikwembu a ku ri ku dyondza milawu leyi Xikwembu xi yi nyikeke Vaisrayele. (Deteronoma 17:18-20; Pisalema 19:7-11) Ku yingisa milawu ya Yehovha a swi endla leswaku tiko ra Israyele ri va ni xindzhuti swi tlhela swi ri hlawulekisa eka matiko laman’wana hinkwawo. (Deteronoma 4:6-8) Hilaha a swi ri hakona eka Davhida, ku hlaya Matsalwa nkarhi ni nkarhi, ku anakanyisisa swinene ha wona ni ku tinyiketela ku ma dyondza swi ta endla leswaku hi xi tlangela swinene xindzhuti xa Yehovha.

Timfanelo Ta Xikwembu I Tikulu Hakunene!

20, 21. (a) Pisalema 145:7-9 yi kandziyisa vukulu bya Yehovha mayelana ni timfanelo tihi? (b) Vanhu hinkwavo lava rhandzaka Xikwembu va khumbiwa njhani hi timfanelo ta xona leti boxiweke laha?

²⁰ Hilaha hi voneke hakona, tindzimana to sungula ta tsevu eka Pisalema 145 ti hi nyika swivangelo leswi twalaka swa ku dzunisa Yehovha hikwalaho ka swilo leswi fambisanaka ni vukulu byakwe lebyi nga lavisisekiki. Tindzimana 7 ku ya ka 9 ti kandziyisa vukulu bya Xikwembu hi ku hlamusela timfanelo ta xona. Davhida u yimbelerile a ku: “Va ta vulavula hi vunene bya wena byo tala, naswona va ta huwelela hi ku tsaka hikwalaho ka ku lulama ka wena. Yehovha u ni nsovo ni tintswalo, wa hlwela ku hlundzuka naswona u ni musa lowukulu wa rirhandzu. Yehovha hi lonene eka hinkwavo, naswona tintswalo takwe ti le henhla ka mintirho yakwe hinkwayo.”

²¹ Laha Davhida u sungula hi ku kandziyisa vunene bya Yehovha ni ku lulama ka yena—ku nga timfanelo leti Sathana Diyavulosi a ti tlhontlheke. Xana timfanelo leti ti va khumba njhani vanhu hinkwavo lava rhandzaka Xikwembu, lava tivekaka ehansi ka vulawuri bya xona? Entiyisweni vunene bya Yehovha ni mafumelo yakwe yo lulama swi tisa ntsako lowukulu eka vagandzeri va yena lerova a swi nge koteki leswaku va tshika ku n’wi dzunisa. Ku tlula kwalaho, Yehovha u komba vunene byakwe “eka hinkwavo.” Ha tshemba leswaku sweswo swi ta pfuna vo tala leswaku va hundzuka kutani va  va vagandzeri va Xikwembu xa ntiyiso, nkarhi wu nga si va helela.—Mintirho 14:15-17.

22. Yehovha u ma khoma njhani malandza yakwe?

²² Nakambe Davhida a a tlangela timfanelo leti Xikwembu xi ti kandziyiseke loko xi “hundza emahlweni ka xikandza [xa Muxe, xi] ku: ‘Yehovha, Yehovha, Xikwembu xa tintswalo ni nsovo, la hlwelaka ku hlundzuka, la teleke musa wa rirhandzu ni ntiyiso.’” (Eksoda 34:6) Hikwalaho, Davhida u te: “Yehovha u ni nsovo ni tintswalo, wa hlwela ku hlundzuka naswona u ni musa lowukulu wa rirhandzu.” Hambileswi Yehovha a nga lavisisekiki, u fundzha malandza yakwe ya laha misaveni hi ku ma kombisa nsovo. U tele tintswalo, u tiyimisele ku rivalela vadyohi lava hundzukaka hi ku tirhisa gandzelo ra nkutsulo ra Yesu. Nakambe Yehovha u hlwela ku kariha, hikuva u nyika malandza yakwe nkarhi wa ku hlula ku tsana loku nga va sivelaka ku nghena emisaveni yakwe leyintshwa yo lulama.—2 Petro 3:9, 13, 14.

23. Hi yihi mfanelo ya risima leyi hi nga ta yi kambisisa eka xihloko lexi landzelaka?

²³ Davhida u twarise musa wa rirhandzu wa Xikwembu, kumbe rirhandzu leri nga tsekatsekiki. Kahle-kahle, xiphemu xo hetelela xa Pisalema 145 xi kombisa ndlela leyi Yehovha a kombisaka mfanelo leyi ha yona, xi tlhela xi kombisa ndlela leyi malandza yakwe yo tshembeka ma angulaka ha yona malunghana ni musa wakwe wa rirhandzu. Timhaka leti ti ta hlamuseriwa eka xihloko lexi landzelaka.

A Wu Ta Hlamurisa Ku Yini?

• Hi tihi tindlela leti hi pfulekeleke ta ku dzunisa Yehovha “siku hinkwaro”?

• I yini leswi kombisaka leswaku vukulu bya Yehovha a byi lavisiseki?

• Xana ku tlangela ka hina xindzhuti lexikulu xa Yehovha ku nga kurisa ku yini?

[Swivutiso Swa Dyondzo]

[Xifaniso lexi nga eka tluka 10]

Swirimela swa vuako swi tiyisekisa vukulu bya Yehovha

[Xihlovo Xa Kona]

Courtesy of Anglo-Australian Observatory, photograph by David Malin

[Xifaniso lexi nga eka tluka 12]

Xana vukulu bya Yehovha byi kombisiwe njhani emhakeni ya Yesu Kreste?

[Xifaniso lexi nga eka tluka 13]

Loko Vaisrayele va nyikiwa Nawu eNtshaveni ya Sinayi, va vone vumbhoni bya xindzhuti lexikulu xa Yehovha