Xiviko Xa Vahuweleri Va Mfumo

Ku Kuma Vanhu Laha Va Tirhaka Kona

HI XIHI xiendlakalo lexi fanaka lexi humeleleke Matewu, Petro, Andriya, Yakobo na Yohane? Hinkwavo ka vona va rhambiwe hi Yesu loko va ri emintirhweni ya ku tihanyisa. Petro, Andriya, Yakobo na Yohane a va ri entirhweni wa vona wa ku phasa tinhlampfi loko Yesu a va rhamba a ku: “Ndzi landzeleni.” Matewu a a ri ehofisini yo hakerisa xibalo loko a rhambiwa leswaku a va mudyondzisiwa wa Yesu.—Matewu 4:18-21; 9:9.

Ku chumayela vanhu laha va tirhaka kona swi nga vuyerisa. Hi ku xiya mhaka leyi, Timbhoni ta Yehovha ta le Japani ta ha ku endla tsima ro chumayela etindhawini to tano. Xana vuyelo byi ve byihi? Hi tin’hweti ti nga ri tingani, ku endliwe maendzo yo vuyela lama hlayiwaka hi magidi, naswona ku sunguriwe tidyondzo ta Bibele ta kwalomu ka 250. Xiya mintokoto leyi landzelaka.

Mutirheli wa nkarhi hinkwawo wa le Tokyo u vulavurisane ni mufambisi wa khefi yin’wana loyi a tshameke a vulavula ni Mbhoni malembe ya kwalomu ka 30 emahlweni ka kwalaho, loko yena a ha ri n’wana wa xikolo. Hambileswi mufambisi loyi a a nga swi twisisanga leswi a byeriweke swona enkarhini wolowo, u sungule ku tsakela Bibele. Kutani leswi ku tsakela ka yena ku pfuxetiweke, u hatlise a pfumela ku dyondzeriwa Bibele hi ku tirhisa buku leyi nge Vutivi Lebyi Yisaka eVuton’wini Lebyi Nga Heriki. * Ku tlula kwalaho, u tiendlele xiyimiso xa ku hlaya Bibele madyambu man’wana ni man’wana a nga si ya eku etleleni.

Makwerhu un’wana loyi a nga phayona ro hlawuleka u ye endhawini yo amukela vaendzi ya le hofisini yin’wana laha a nga fika a kombela ku vulavula ni mulawuri. Hambileswi mulawuri a a nga ri kona, wansati loyi a n’wi hlamuleleke riqingho u vutisile a ku, “Xana u nga rhandza ku vulavula na mina?” Endzhaku ko vulavulanyana hi riqingho, wansati loyi u tile kutani a vula leswaku a nga swi tsakela ku dyondza Bibele. Phayona leri ro hlawuleka ri endle malunghiselelo ya ku tlhela ri vuya ni Bibele kutani ri sungula dyondzo ya Bibele ni wansati loyi, va dyondza ni mixo ephakeni ya le kusuhi, emahlweni ka ku va wansati loyi a ya entirhweni.

Ehofisini yin’wana, wanuna un’wana u vone mutirhi-kulobye a amukela timagazini ta Xihondzo xo Rindza ni Xalamuka! kambe endzhakunyana a ti cukumeta loko Mbhoni yi fambile. Loko wanuna loyi a voneke xiendlakalo lexi a fika ekaya, u vike mhaka leyi eka nsati wakwe loyi a nga Mbhoni kutani a vula leswaku loko timagazini letiya a ti lo nyikiwa yena ingi a yingiserile. N’wana wakwe wa xisati loyi a n’wi tweke loko a ri karhi a vulavula, u teke mhaka leyi a yi hundzisela eka Mbhoni leyi tirhaka nsimu yoleyo ya mabindzu. Mbhoni ya kona yi hatle yi endzela wanuna loyi ehofisini kutani yi sungula ku dyondza Bibele na yena. Endzhakunyana wanuna loyi u sungule ku hamba a ya eminhlanganweni ya Sonto.

Ku chumayela vanhu laha va tirhaka kona swi tise ni vuyelo byin’wana. Vahuweleri vo tala eJapani va ve ni vutshila byo endla maendzo yo vuyela emavhengeleni, etifemeni ni le tihofisini. Ku tlula kwalaho, ku chumayela hi ndlela yoleyo swi endle leswaku ku kumiwa vanhu vo tala lava holeke emoyeni, ivi ku dyondziwa na vona. Ku ve ni vuyelo byo hlawuleka. Vandlha rin’wana ra le xivindzini xa Tokyo ra ha ku vika tidyondzo ta le kaya ta Bibele ta 108, ku nga nhlayo leyi andzisiweke kambirhi loko yi ringanisiwa ni leyi vikiweke n’wexemu.

[Nhlamuselo ya le hansi]