Xana U Veke Mianakanyo Ya Wena Eka Hakelo?

VUVABYI bya kona byi hlasela hakatsongo-tsongo. Byi sungula hi ku vanga papa etlhelo ka ndzololo. Loko byi nga tshunguriwi, byi nga tlulela eka ndzololo hi yoxe. Eku heteleleni byi nga siya munhu a ri bofu. Hi byihi vuvabyi lebyi? I xinyeku—vuvabyi lebyi fambaka emahlweni hi ku vanga vubofu.

Tanihi leswi hi nga lahlekeriwaka hi mahlo ya xiviri hakatsongo-tsongo ni ku swi xiya hi nga swi xiyi, nakambe hi nga lahlekeriwa hi mahlo ya nkoka swinene—mahlo ya moya. Hikwalaho, i swa nkoka leswaku hi rhangisa timhaka ta moya minkarhi hinkwayo evuton’wini bya hina.

Ku Tshama Hi Ri Karhi Hi Anakanya Hi Hakelo

Eka “swilo leswi nga voniwiki” hi mahlo ya hina ya xiviri ku ni hakelo leyi hlamarisaka ya vutomi lebyi nga heriki, leyi Yehovha a yi hlayiseleke vanhu vakwe lava tshembekaka. (2 Vakorinto 4:18) Kunene, xivangelo-nkulu xa ku va Vakreste va tirhela Xikwembu hileswi va xi rhandzaka. (Matewu 22:37) Hambiswiritano, Yehovha u lava leswaku hi tshama hi langutele hakelo ya hina hi mahlo-ngati. U lava leswaku hi n’wi teka a ri Tatana wa malwandla loyi a nga “muhakeri wa lava va [n’wi] lavaka hi mbilu hinkwayo.” (Vaheveru 11:6) Hikwalaho, lava va tivaka Xikwembu va tlhela va xi rhandza hakunene va tlangela mikateko leyi xi yi tshembiseke naswona va swi langutele hi mahlo-ngati ku hetiseka ka yona.—Varhoma 8:19, 24, 25.

Vahlayi vo tala va magazini lowu kun’we ni Xalamuka! leyi fambisanaka na wona va tsakela swifaniso leswi kombisaka misava leyi taka ya Paradeyisi. Kunene, a hi swi tivi kahle leswaku misava ya Paradeyisi yi ta va yi langutekisa ku yini, naswona mumpfampfarhuti u endla swifaniso swo tano hi ku ya hi matsalwa ya Bibele yo tanihi Esaya 11:6-9. Kambe wansati un’wana la nga Mukreste u te: “Loko ndzi vona swifaniso swa Paradeyisi leyi taka eka Xihondzo xo Rindza ni Xalamuka!, ndzi swi nyanga hi vukheta onge hi loko ndzi kambisisa broxara ya tindhawu ta vuvalangi. Ndzi ringeta ku tivona hi mahlo ya mianakanyo ndzi ri kwalaho, hikuva hi laha ndzi languteleke ku va kona hakunene hi nkarhi lowu faneleke wa Xikwembu.”

Muapostola Pawulo u titwe hi ndlela leyi fanaka malunghana ni “ku vitaneriwa [ka yena] ehenhla.” A a nga anakanyi leswaku ana se u yi fikelerile, hikuva a a fanele a tikombisa a tshembekile ku fikela emakumu. Kambe u hambete a “nava [a] ya emahlweni eka swilo swa le mahlweni.” (Vafilipiya 3:13, 14) Hilaha ku fanaka, Yesu u tiyisele a kondza a fa emhandzini ya nxaniso “hikwalaho ka ntsako lowu a wu vekiwe emahlweni ka yena.”—Vaheveru 12:2.

Xana u tshama u titwa u ri ni ku kanakana leswaku u ta nghena emisaveni leyintshwa? I swinene leswaku hi nga titshembi ku tlula mpimo, hikuva ku kuma ka hina hakelo ya vutomi swi titshege hi ku tshama ka hina hi tshembekile ku fikela emakumu. (Matewu 24:13) Kambe loko hi ringeta hi matimba leswaku hi fikelela swilaveko swa Xikwembu, hi ni xivangelo lexi twalaka xa ku tiyiseka hi ku kuma hakelo yo tano. Tsundzuka leswaku Yehovha “a nga naveli leswaku ku lova ni un’we kambe u navela leswaku [vanhu hinkwavo va] hundzuka.” (2 Petro 3:9) Loko hi tshemba Yehovha, u ta hi pfuna leswaku hi fikelela pakani ya hina. Phela, a nga na yona nikatsongo mianakanyo ya ku lava swivangelo  swo bakanya lava va ringetaka hi matimba ku n’wi tsakisa.—Pisalema 103:8-11; 130:3, 4; Ezekiyele 18:32.

Ku tiva ndlela leyi Yehovha a titwaka ha yona hi vanhu vakwe swi hi nyika ntshembo—mfanelo leyi nga ya nkoka ku fana ni ripfumelo. (1 Vakorinto 13:13) Rito ra Xigriki leri hundzuluxeriweke ri va “ntshembo” eBibeleni ri vula “ku langutela leswinene” hi mahika. Malunghana ni ntshembo wo tano, muapostola Pawulo u tsarile a ku: “Hi navela leswaku un’wana ni un’wana wa n’wina a kombisa ku chivirika loku fanaka leswaku a va ni ku tiyiseka loku heleleke ka ntshembo ku fika emakumu, leswaku mi nga vi na vulolo, kambe mi tekelela lava dyaka ndzhaka ya switshembiso hikwalaho ka ripfumelo ni ku lehisa mbilu.” (Vaheveru 6:11, 12) Xiya leswaku loko hi hambeta hi tirhela Yehovha hi ku tshembeka, hi nga tiyiseka leswaku ntshembo wa hina wu ta hetiseka. Ku hambana ni mintshembo yo tala ya misava, ntshembo lowu “a wu endli leswaku munhu a khomiwa hi tingana.” (Varhoma 5:5) Kutani, xana hi nga endla yini leswaku ntshembo wa hina wu tshama wu hanyile naswona wu tiyile?

Ndlela Yo Antswisa Vonelo Ra Hina Ra Timhaka Ta Moya

Mahlo ya hina ya xiviri a ma swi koti ku nyanga swilo swimbirhi hi nkarhi wun’we. Swi tano ni hi mahlo ya hina ya moya. Ku veka mianakanyo ya hina eka swilo swa mafambiselo ya namuntlha swi ta endla leswaku hi nga ha khathali ngopfu hi misava leyintshwa leyi Xikwembu xi hi tshembiseke yona. Hi ku famba ka nkarhi, riphume leri ra moya ri nga hi siya hi rivale hi ku helela hi yona. Sweswo ku nga va khombo lerikulu! (Luka 21:34) Hikwalaho, i swa nkoka leswaku hi tshama hi ri ni ‘tihlo ro olova’—leri tshamaka ri langute Mfumo wa Xikwembu ni hakelo ya vutomi lebyi nga heriki!—Matewu 6:22.

Ku tshama u ri ni tihlo ro olova a hi mhaka ya matlangwana. Hi tshama hi langutane ni swiphiqo siku ni siku, naswona ku ni swikavanyeti ni miringo yo tala. Ehansi ka swiyimo sweswo, xana hi nga endla yini leswaku hi tshama hi ri karhi hi anakanya hi Mfumo ni misava leyintshwa leyi Xikwembu xi hi tshembiseke yona, kambe hi nga honisi swilo swin’wana leswi lavekaka evuton’wini? A hi anakanyeni hi tindlela leti tinharhu.

Dyondza Rito ra Xikwembu siku ni siku. Ku hlaya Bibele ni ku dyondza minkandziyiso leyi sekeriweke eBibeleni nkarhi ni nkarhi swi endla leswaku mianakanyo ya hina yi tshama yi khomeke hi timhaka ta moya. Ina, kumbexana hi ni malembe hi ri karhi hi dyondza Rito ra Xikwembu, kambe hi fanele hi hambeta hi ri dyondza, tanihi leswi hi faneleke ku hambeta hi dya swakudya swa nyama leswaku hi hanya. Ku va hi dye ko tala evuton’wini a swi endli leswaku hi fika laha hi tshikaka ku dya. Kutani, ku nga khathariseki leswaku hi tiva Bibele ku fikela kwihi, hi fanele hi ya emahlweni hi dya swakudya swa moya leswi yi hi nyikaka swona, leswaku hi va ni ntshembo lowu hanyaka, ripfumelo leri tiyeke ni rirhandzu leri kulaka.—Pisalema 1:1-3.

Anakanyisisa hi Rito ra Xikwembu hi moya wo tlangela. Ha yini ku gayela hi mhaka swi ri swa nkoka? Ku ni swivangelo swimbirhi. Xo sungula, ku anakanyisisa swi hi pfuna ku dzikisa mhaka leyi hi yi hlayeke, naswona hi kota ku yi tlangela hi mbilu hinkwayo. Xa vumbirhi, ku anakanyisisa swa hi pfuna leswaku hi  nga rivali Yehovha, mintirho yakwe yo hlamarisa ni ntshembo lowu a wu vekeke emahlweni ka hina. Hi xikombiso: Vaisrayele lava humeke aEgipta va ri na Muxe va vone swikombiso swa matimba lama chavisaka ya Yehovha, hi mahlo ya vona. Va tlhele va vona nsirhelelo wakwe wa rirhandzu loko a va kongomisa etikweni leri veke ndzhaka ya vona. Kambe loko Vaisrayele va ha ri eriendzweni ro ya eTikweni leri Tshembisiweke, va sungule ku dzumadzuma emananga, leswi kombiseke leswaku ripfumelo ra vona a ri kayivela swinene. (Pisalema 78:11-17) A xi ri xihi xiphiqo xa vona?

Tiko leri ri vekele Yehovha etlhelo kun’we ni ntshembo lowu hlamarisaka lowu a ri nyikeke wona, kutani ri lava vutomi bya ku titlonya ri tlhela ri khathala hi swilo swa nyama. Ku nga khathariseki masingita lawa va ma voneke, Vaisrayele vo tala va dzumadzume hi ndlela leyi kombisaka leswaku a va kayivela ripfumelo. Pisalema 106:13 yi ri: “Va rivala mintirho [ya Yehovha] hi ku hatlisa.” Xiendlo xo tano xa ku honisa swilo hi ndlela leyi nga yimelelekiki xi sivele rixaka rero ku nghena eTikweni leri Tshembisiweke.

Kutani loko u hlaya Matsalwa kumbe minkandziyiso leyi pfunaka ku dyondza Bibele, tinyike nkarhi wa ku anakanyisisa hi leswi u swi hlayeke. Sweswo swi ta ku pfuna leswaku u tshama u hanyile ni ku tiya emoyeni. Hi xikombiso, loko u hlaya Pisalema 106, leyi tshahiweke laha henhla, anakanyisisa hi timfanelo ta Yehovha. Xiyisisa ndlela leyi ha yona a lehiseleke Vaisrayele mbilu ni ku va tsetselela. Vona ndlela leyi a tikarhateke swinene ha yona leswaku a va pfuna ku fika eTikweni leri Tshembisiweke. Lemuka ndlela leyi va hambeteke va n’wi xandzukela ha yona. Vona ndlela leyi Yehovha a vavisekeke ha yona loko vanhu volavo lava pfumalaka moya wo tlangela va n’wi sindzisa leswaku a tshika ku va tsetselela ni ku va lehisela mbilu. Ku tlula kwalaho, loko hi anakanyisisa hi tindzimana 30 na 31, leti hlamuselaka ku tinyiketela ni xivindzi lexi Finiyasi a veke na xona loko a lwela vululami, ha tiyiseka leswaku Yehovha a nga va rivali vanhu vakwe lava tshembekaka naswona u va hakela hi ndlela leyi fuweke.

Tirhisa misinya ya milawu ya Bibele evuton’wini bya wena. Loko hi landzela misinya ya milawu ya Bibele, ha swi vona leswaku ndzayo ya Yehovha ya tirha. Swivuriso 3:5, 6 yi ri: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” Anakanya hi swiphiqo leswi mahanyelo ya vudlakuta ya vanhu vo tala ma va vangeleke swona emianakanyweni, emintlhavekweni ni le mirini. Hi ku lava ku titsakisa swa xinkarhana, endzhaku vanhu vo tano va heta malembe kumbe vutomi bya vona hinkwabyo va ri karhi va cangayila. Ku hambana ni sweswo, lava va fambaka ‘egondzweni ro lala’ va nantswa vutomi bya le mafambiselweni lamantshwa, naswona sweswo swi va khutaza ku hambeta va famba egondzweni leri yaka evuton’wini.—Matewu 7:13, 14; Pisalema 34:8.

Ku tirhisa misinya ya milawu ya Bibele swi nga va ntlhontlho. Minkarhi yin’wana ku tlhantlha xiphiqo hi ndlela leyi nga amukelekiki eMatsalweni swi nga tikomba ku ri xiboho lexi nga hatlaka xi ku humesa exiyin’weni xo nonon’hwa lexi u nga eka xona. Hi xikombiso, loko u langutane ni xiphiqo xa timali, u nga tikuma u bakanyele timhaka ta Mfumo etlhelo. Kambe lava va kombisaka ripfumelo ni ku tshama va ri karhi va anakanya hi timhaka ta moya va tiyisekisiwa leswaku eku heteleleni  “swi ta va fambela kahle lava chavaka Xikwembu xa ntiyiso.” (Eklesiasta 8:12) Mukreste a nga boheka ku pfa a tirha nkarhi lowu engetelekeke, kambe a nga fanelanga a fana na Esawu, loyi a tsan’weke swilo swa moya, a swi teka swi nga ri swa nkoka.—Genesa 25:34; Vaheveru 12:16.

Yesu u byi hlamusele kahle vutihlamuleri bya hina tanihi Vakreste. Hi fanele hi ‘hambeta hi lava mfumo ni ku lulama ka Xikwembu ku sungula.’ (Matewu 6:33) Loko hi endla tano, Yehovha u ta hi kombisa rirhandzu rakwe ra vutatana hi ku endla leswaku hi kuma swilo swa nyama leswi hi swi pfumalaka. Entiyisweni a nga lavi leswaku hi karhateka ku tlula mpimo hi swilo leswi a vulaka leswaku i vutihlamuleri bya yena ku hi nyika swona. Ku karhateka ku tlula mpimo hi ndlela yo tano swi nga fana ni xinyeku xa moya—loko xi nga tshunguriwi, hakatsongo-tsongo mahlo ya hina ma ta tikuma ma vona swilo swa nyama ntsena ivi eku heteleleni hi hundzuka mabofu ya moya. Loko hi tshama hi ri exiyin’weni xo tano, siku ra Yehovha ri ta hi fikela “ku fana ni ntlhamu.” Sweswo ku ta va khombo lerikulu!—Luka 21:34-36.

Tshama U Ri Ni Vonelo Lerinene Ku Fana Na Yoxuwa

A hi hlayiseni ntshembo wa hina lowu hlawulekeke wa Mfumo wu ri lowu hanyaka, hi veka timhaka tin’wana ta vutomi endhawini ya tona. Loko hi va ni dyondzo leyi hambetaka, hi anakanyisisa hi leswi hi swi dyondzeke hi tlhela hi tirhisa misinya ya milawu ya Bibele, ntshembo wa hina wu nga tshama wu tiye ku fana ni wa Yoxuwa. Endzhaku ko rhangela Vaisrayele va kala va ya nghena eTikweni leri Tshembisiweke, u te: “Mi swi tiva kahle hi timbilu ta n’wina hinkwato ni mimoya-xiviri ya n’wina hinkwayo leswaku a ri wanga ni rito rin’we eka marito hinkwawo lamanene lawa Yehovha Xikwembu xa n’wina a ma vuleke. Hinkwawo ma hetisekile eka n’wina. A ku wanga ni rito rin’we eka wona.”—Yoxuwa 23:14.

Onge ntshembo wa Mfumo wu nga ku nyika matimba, naswona onge wu nga katekisa masiku ya wena, leswi nga ta kombisiwa hi mianakanyo, mintlhaveko, swiboho ni swiendlo swa wena.—Swivuriso 15:15; Varhoma 12:12.

[Xifaniso lexi nga eka tluka 21]

Xana u tshama u titwa u ri ni ku kanakana leswaku u ta nghena emisaveni leyintshwa?

[Xifaniso lexi nga eka tluka 22]

Ku anakanyisisa i mhaka ya nkoka eka dyondzo ya Bibele

[Swifaniso leswi nga eka tluka 23]

Tshama u veke mianakanyo ya wena etimhakeni ta Mfumo