Ndzhaka Ya Nkoka Swinene Ku Ti Tlula Hinkwato

LOKO muapostola Yohane la dyuhaleke a ri kusuhi ni ku fa, u tsarile: “Ndzi hava xivangelo lexikulu xa ku nkhensa ku tlula swilo leswi, ku twa leswaku vana va mina va tama va famba entiyisweni.”—3 Yohane 4.

Muapostola loyi wo tshembeka a a vulavula hi vana vakwe va moya. Nilokoswiritano, vatswari vo tala va titwa ku fana na yena muapostola loyi. Va tirhe hi matimba leswaku va kurisa vana va vona “hi ku tshinya ni nkongomiso wa mianakanyo wa Yehovha,” naswona sweswi va tsaka loko va vona vana va vona lava kuleke va “famba entiyisweni.” (Vaefesa 6:4) Kahle-kahle, loko u dyondzisa vana va wena ndlela yo ya evuton’wini lebyi nga heriki u va nyika ndzhaka ya nkoka swinene ku ti tlula hinkwato. Sweswo swi vangiwa hileswi ku tinyiketela eka Xikwembu, loku katsaka ku hanya hi ndlela leyi Yehovha a lavaka leswaku Vakreste va hanya ha yona, “ku nga ni xitshembiso xa vutomi bya sweswi ni lebyi nga ta ta.”—1 Timotiya 4:8.

Yehovha, Tatana la hetisekeke u va xixima swinene vatswari lava n’wi chavaka, lava ringetaka hi matimba ku dyondzisa vana va vona timhaka ta moya. Loko vana va ti amukela timhaka toleto, va kuma ntsako lowukulu hi ku va evugandzerini bya ntiyiso swin’we ni vatswari va vona. Loko se va kurile, a va swi rivali swilo swoleswo leswi tsakisaka. Van’wana a va ri rivali nikatsongo siku leri va sunguleke ha rona ku nyikela nkulumo eXikolweni xa Vutirheli bya le Tilweni. * Kumbexana va ha anakanya hi nkarhi lowu va koteke ku yi hlaya ro sungula ndzimana ya le Bibeleni evutirhelini bya yindlu ni yindlu va ri ni vatswari va vona. A va nge wu rivali nkarhi lowu a va hamba va yingisela vatswari va vona loko va va hlayela Buku Yanga Ya Timhaka Ta Bibele kumbe buku leyi nge Listening to the Great Teacher. * Gabriel a nga swi rivali swilo swin’wana leswi a a swi rhandza ngopfu: “Loko ndzi ri ni malembe ya mune ntsena, siku ni siku Manana a a ndzi yimbelelela tinsimu loko a ri karhi a sweka. Ku ni risimu rin’wana ra Mfumo leri ndzi nga ri rivaliki. Endzhakunyana, ri ndzi pfunile leswaku ndzi vona nkoka wa ku tirhela Yehovha.” Kumbexana na wena wa ri tsundzuka risimu ro nandziha leri Gabriyele a vulavulaka hi rona. I risimu ra vu-157 ebukwini ya tinsimu leyi nge Yimbelelelani Yehovha Swidzuniso, naswona ri ni nhloko-mhaka leyi nge “Gandzela Yehovha eVuntshweni Bya Wena.”

Risimu leri ri sungula hi marito lawa: “Vantshwa va khensa Yehovha swin’we;/Ni n’wana wakwe va n’wi dzunisa.” Entiyisweni, a ku ri ni vana lava veke ni lunghelo ro va na Yesu, naswona  a swi kanakanisi leswaku va n’wi tsakisile hi swiendlo swa vona leswinene ni hi ku tshembeka ka vona. Nakambe Yesu u tirhise ku tiyimisela ka vana ku dyondzisiwa tanihi xikombiso lexi valandzeri vakwe a va fanele va xi tekelela. (Matewu 18:3, 4) Hikwalaho vana va ni ndhawu leyi faneleke evugandzerini bya Yehovha. Entiyisweni, marito ya risimu leri ma ya emahlweni ma ku: “Ina ni vana va nga n’wi nkhensa.”

Vana vo tala va yise ku dzuneka eka Xikwembu ni le mindyangwini ya ka vona hikwalaho ka ku tikhoma ka vona lokunene—ekaya, exikolweni ni le tindhawini tin’wana. Ku ve nkateko eka vona ku va ni “vatswari lava rhandzaka Hosi.” (Deteronoma 6:7) Vatswari lava chavaka Xikwembu va endla leswi xi swi vulaka, tanihi leswi xi dyondzisaka swivumbiwa swa xona ku famba endleleni leyi swi faneleke swi famba eka yona, tanihi Tatana la nga ni rirhandzu. Kutani va kuma nkateko hakunene! Loko vatswari na vona va dyondzisa vana va vona, va tsaka swinene ku va ni vana lava “va va yingisa[ka], va va tsakisa”! (Esaya 48:17, 18) Angélica, loyi sweswi a tirhaka ehofisini ya rhavi ya Timbhoni ta Yehovha ya le Mexico, u ri: “Minkarhi hinkwayo vatswari va mina a va ringeta ku hanya hi misinya ya milawu ya le Bibeleni. Sweswo swi endle ndzi tsakela vuhlangi bya mina. A ndzi tsakile.”

Vakreste volavo va pfumela leswaku i swa nkoka ku yi khoma kahle ndzhaka ya wena ya moya. Kumbexana u muntshwa loyi a kurisiwaka endyangwini lowu hanyaka hi misinya ya milawu ya Vukreste bya ntiyiso. Loko swi ri tano, risimu leri ra ku khutaza: “Vantshwa lwelani ku va vo tenga.” Wu ta fika nkarhi lowu mi faneleke mi tiendlela swiboho, kutani sweswi “dyondzani ku tshemba Hosi./Kambe mi nga lweli ku tiviwa.”

Loko hi xihoxo u rhangisa ndhuma evuton’wini bya wena, swilo hinkwaswo leswi u dyondzisiweke swona swi ta va swi ri swa hava naswona u nga onha ntshembo wa wena wa vumundzuku. Ku navela ku va ni ndhuma swi nga endla leswaku u tikuma u nga ha hiseki. Van’wana va hetelele va va ni xinghana ni vanhu lava, hambiloko va tikomba va ri ni vumunhu va tlhela va languteka, va nga riki na mhaka ni minkongomiso ya Vukreste. Sweswo swi kombisiwe hi Tara, loyi a nga mutlangi-nkulu eka vhidiyo leyi nge Young People Ask—How Can I Make Real Friends? Ku fana na Tara, muntshwa wihi na wihi la nga Mukreste loyi a endlaka xinghana ni vanhu lava nga riki na mhaka ni vugandzeri bya ntiyiso u ta hetelela a swi xiyile leswaku “vanghana vo biha va onhana,” hilaha risimu leri ri vulaka hakona. Swi teka malembe ku hlakulela mikhuva leyinene, kambe yi nga onhiwa hi ku hatlisa.

Ina, ku hanya hi ku chava Xikwembu a swi olovi. Hambiswiritano, hilaha risimu leri ri yaka emahlweni ri vula hakona, “mi nga rivali Yehovha sweswi,/N’wi tirheleni hi ku tshembeka,”  kutani mi ta aka masungulo lama tiyeke ya ku humelela ka xiviri. Naswona “loko mi kula mi ta tiphina.” U ta sungula ku swi xiya swinene leswaku loko u ri ehansi ka nkhathalelo wa rirhandzu wa Yehovha, a xi kona lexi nga ku sivelaka ku endla leswinene emahlweni ka yena. Yoleyo i ndlela ya ku va munhu la wupfeke la chavaka Xikwembu. Ku engetela kwalaho, ku yi tirhisa hi vutlhari dyondzo ya Vukreste leyi u nga leteriwa ha yona, swi ku nyika nkarhi wa ku “tsakisa mbilu ya [Xikwembu].” A ku na lunghelo leri tlulaka rolero leri vanhu va nga ri kumaka.—Swivuriso 27:11.

Hikwalaho, vantshwa minkarhi hinkwayo tsundzukani ndlela leyi dyondzo leyi humaka eka Yehovha ni le ka vatswari va n’wina lava nga Vakreste yi nga ya nkoka ha yona. Onge rirhandzu ra vona lerikulu ri nga mi susumetela ku endla leswi tsakisaka Yehovha. Ku fana na Yesu Kreste na jaha ro tshembeka Timotiya, mi ta tsakisa Tata wa n’wina wa le tilweni kun’we ni vatswari va n’wina. Naswona loko wo tshuka u ve mutswari, a swi kanakanisi leswaku u ta pfumelelana na Angélica la boxiweke eku sunguleni, loyi a nge: “Loko ndzo tshuka ndzi ve ni n’wana, ndzi ta ringeta hi matimba ku dzikisa ku rhandza Yehovha embilwini yakwe ku sukela loko a ha ri ntsongo, ndzi endla leswaku a kongomisiwa hi rirhandzu rolero.” Hakunene, ndlela yo lulama leyi yisaka evuton’wini lebyi nga heriki i ndzhaka ya nkoka swinene ku ti tlula hinkwato!

[Tinhlamuselo ta le hansi]