Xana Wa Swi Tiva Leswaku Ku Nyika Swi Tisa Ntsako Wa Njhani?

MAKWERHU un’wana wa xisati la tshembekaka u hete 50 wa malembe a ri karhi a hiseka entirhweni wa Vukreste. Hambileswi a a tsanile emirini hikwalaho ko dyuhala, a a tiyimisele ku ya eHolweni ya Mfumo leya ha ku akiwaka. U titshege hi voko ra Mukreste-kulobye, a nghena eholweni a ri karhi a famba hi ku nonoka a ya laha a a tiyimisele ku ya kona—ku nga ebokisini ra minyikelo. U fike a humesa munyikelo lowu a a wu hlayisele ku nyikela ha wona. Hambileswi a tsandzekeke ku hlanganyela eku akiweni ka holo hi yoxe, a a lava ku pfuna.

Wansati loyi wa Mukreste a nga ku tsundzuxa wansati un’wana wo tshembeka—ku nga “noni leyi nga xisiwana” leyi Yesu a yi voneke yi hoxa swimalana swimbirhi swa nsimbi ebokisini ra xuma xa tempele. A hi byeriwi nchumu hi xiyimo xa wansati loyi kambe ku pfumala nuna eminkarhini yoleyo hakanyingi a swi siya wansati a ri eka xiphiqo lexikulu xa ku pfumala mali. Yesu u n’wi twele vusiwana swinene, tanihi leswi a a xi twisisa kahle xiyimo xa yena. U n’wi hlamusele tanihi xikombiso lexinene eka vadyondzisiwa vakwe, kutani a vula leswaku nyiko yakwe leyitsongo ‘hi yona ntsena leyi a a ri na yona, leyi a a ta hanya ha yona.’—Marka 12:41-44.

Hikwalaho ka yini wansati la pfumalaka ku fana ni noni leyi nga xisiwana a titsone swilo swa nkoka swonghasi? Swi le rivaleni leswaku xivangelo xa kona hileswi a a tinyiketele swinene eka Yehovha Xikwembu, loyi a a gandzeriwa etempeleni ya le Yerusalema. Hambileswi a a nga swi koti ku endla swo tala, a a lava ku seketela ntirho wo kwetsima. Naswona u fanele a tsakile swinene hi ku nyikela hi leswi nga ematimbeni yakwe.

Ku Nyika Hi Xikongomelo Xo Seketela Ntirho Wa Yehovha

Ku sukela khale, ku nyikela hi swilo leswi vonakaka ni hi mali ku ve nchumu lowu lavekaka evugandzerini lebyi tengeke, naswona minkarhi hinkwayo a swi tisa ntsako lowukulu. (1 Tikronika 29:9) Le Israyele wa khale minyikelo a yi nga tirhiseriwi ku sasekisa tempele ntsena, kambe a yi tlhela yi pfuna emhakeni yin’wana ni yin’wana ya vugandzeri bya Yehovha siku ni siku etempeleni yoleyo. Nawu a wu koxa leswaku vana va Israyele va nyikela vukhume bya ntshovelo wa vona leswaku va seketela Valevhi, lava a va endla mintirho ya le tempeleni. Kambe hambi ku ri Valevhi a va fanele va nyika Yehovha vukhume bya leswi va swi kumeke.—Tinhlayo 18:21-29.

 Hambileswi Vakreste a va nga ha ri ehansi ka swilaveko swa ntwanano wa Nawu, nsinya wa nawu wa leswaku malandza ya Xikwembu ma nyikela hi swilo leswi vonakaka leswaku ma seketela vugandzeri bya ntiyiso a wu cincanga. (Vagalatiya 5:1) Ku tlula kwalaho, Vakreste va lembe-xidzana ro sungula a va swi teka ku ri lunghelo loko va humesa minyikelo yo pfuna vamakwavo lava pfumalaka. (Mintirho 2:45, 46) Muapostola Pawulo u tsundzuxe Vakreste leswaku tanihi leswi Xikwembu xi va kombiseke malwandla hi ku va nyika swilo leswinene, na vona a va fanele va kombisa malwandla eka van’wana. U tsarile: “Lerisa lava fuweke emafambiselweni ya sweswi ya swilo leswaku va nga titekeli ehenhla, naswona va nga veki ntshembo wa vona erifuweni leri nga tiyangiki, kambe va wu veka eka Xikwembu, lexi hi nyikaka swilo hinkwaswo hilaha ku fuweke leswaku hi tiphina; va endla leswinene, va fuwa hi mintirho leyinene, va hanana, va tiyimisela ku avelana ni van’wana, va tivekela hi ku hlayiseka masungulo lamanene ya nkarhi lowu taka, leswaku va ta khomelela swinene evuton’wini bya xiviri.” (1 Timotiya 6:17-19; 2 Vakorinto 9:11) Kunene, Pawulo a a vulavula hi leswi a swi tivaka loko a tiyisekisa marito ya Yesu lama nge: “Ku nyika swi tisa ntsako lowukulu ku tlula ku amukela.”—Mintirho 20:35.

Ku Nyika Ka Vakreste Namuntlha

Namuntlha, malandza ya Yehovha ma hambeta ma tirhisa rifuwo ra wona leswaku ma pfunana hi xiwona ma tlhela ma seketela ntirho wa Xikwembu. Hambi ku ri lava pfumalaka va nyikela leswi va nga swi kotaka. “Hlonga ro tshembeka ni ro tlhariha” ri titwa ri ri ni vutihlamuleri eka Yehovha bya ku tirhisa minyikelo leyi hinkwayo hi mfanelo. (Matewu 24:45) Minyikelo yi tirha ku yisa ntirho wa tihofisi ta marhavi emahlweni, ku hundzuluxela ni ku endla Tibibele ni minkandziyiso leyi sekeriweke eBibeleni, ku hlela tindhawu ta minhlangano leyikulu ya Vukreste, ku letela ni ku rhumela valanguteri lava famba-fambaka ni varhumiwa, ku phalala ni swilo swin’wana swo tala swa nkoka. A hi nyikeleni nyingiso eka xin’wana xa swilo swo tano—ku nga ku nyikela hi timali to aka tindhawu ta vugandzeri.

Timbhoni ta Yehovha ti hlangana ko hlayanyana hi vhiki eTiholweni ta Mfumo leswaku ti vuyeriwa eka dyondzo leyi pfunaka hi tlhelo ra moya ni ku va ni xinakulobye lexinene ni van’wana. Hambiswiritano, ematikweni yo tala, swiyimo swa ikhonomi swi endla leswaku Timbhoni ti nga koti ku aka Tiholo ta Mfumo loko ti nga pfuniwi hi mali. Hikokwalaho, hi 1999 Timbhoni ta Yehovha ti simeke fambiselo ro tirhisa  mali leyi humaka ematikweni lama fuweke, leyi pfunaka entirhweni wo aka Tiholo ta Mfumo ematikweni lama nga evuswetini. Ku engetela kwalaho, vatirhi va ku tirhandzela va magidi va nyikele hi nkarhi ni vutshila bya vona, hakanyingi va tirha etindhawini ta le kule ematikweni wolawo. Hi nkarhi wo aka, Timbhoni ta tindhawu teto ti dyondza ku aka ni ku lunghisa, naswona Nkwama wo Aka Tiholo ta Mfumo wu endla leswaku swi koteka ku xava swilo leswi lavekaka eku akeni. Timbhoni leti sweswi ti tirhisaka tiholo leti letintshwa ta tlangela swinene leswi vapfumeri-kulobye va nyikeleke hi nkarhi wa vona ni hi mali. Timbhoni teto na tona ti nyikela n’hweti ni n’hweti leswaku ti kota ku hlayisa Holo leyintshwa ya Mfumo yi ri exiyin’weni lexinene ni ku pfuneta ku pfala mali leyi tirhisiweke eku akeni, xisweswo ti hoxa xandla eku akiweni ka Tiholo ta Mfumo leti engetelekeke.

Tiholo ta Mfumo ti akiwa hi ku tirhisa maakelo ya ndhawu ni switirhisiwa swa kona. Hambileswi tiholo leti ti nga riki ta manyunyu, ti sasekile, ta pfuna naswona ta tshameka. Loko fambiselo ro aka hi ndlela leyi ri sungula hi 1999, ku katseke matiko ya kwalomu ka 40 lama nga evuswetini. Ku sukela kwalaho, fambiselo leri ri ndlandlamuxiwile ri hlanganisa matiko ya 116 lama nga evuswetini, leswi vulaka leswaku ku pfuniwe mavandlha yo tlula hafu ya ntsengo hinkwawo wa mavandlha ya Timbhoni ta Yehovha emisaveni hinkwayo. Emalembeni ya ntlhanu lama hundzeke, ku akiwe Tiholo ta Mfumo leti tlulaka 9 000 hi ku tirhisa lunghiselelo leri, leswi vulaka leswaku hi xiringaniso a ku akiwa tiholo letintshwa to tlula ntlhanu hi siku! Hambiswiritano, ematikweni lawa ya 116, ka ha ri ni xilaveko xa Tiholo ta Mfumo letintshwa ta 14 500. Hikwalaho ko katekisiwa hi Yehovha kun’we ni hi ku tiyimisela ka Timbhoni leti nga ni moya wa ku hanana emisaveni hinkwayo, ku tshembiwa leswaku swi ta koteka ku kuma mali leyi lavekaka yo enerisa xilaveko lexi.—Pisalema 127:1.

Tiholo Ta Mfumo Ti Endla Leswaku Vahuweleri Va Andza

Xana matshalatshala lawa lamakulu ma ve ni vuyelo byihi eka Timbhoni leti pfuniweke ni le ka ntirho wo chumayela hi Mfumo? Etindhawini to tala, ku va ni ku andza loku hlamarisaka ka nhlayo ya lava taka eminhlanganweni endzhaku ko aka Holo leyintshwa ya Mfumo. Sweswo swi kombisiwa hi xiviko lexi xa le Burundi: “Hi ku hatlisa loko Holo ya Mfumo yi heta ku akiwa, yi namba yi tala. Hi xikombiso, Holo yin’wana ya Mfumo yi akeriwe vandlha leri a ri va ni vanhu va kwalomu ka 100 eminhlanganweni ya rona. Holo ya rona leyintshwa  ya Mfumo yi ringana vanhu va 150. Loko yi heta ku akiwa, se a ku va ni vanhu vo ringana 250 eminhlanganweni.”

Hikwalaho ka yini nhlayo yi andze yi fika kwalaho? Xivangelo xin’wana hileswi mintlawa ya vahuweleri va Mfumo leyi nga riki ni tindhawu ta ximfumo to hlanganyela eka tona, ivi yi boheka ku hlangana ehansi ka murhi kumbe enhoveni, minkarhi yin’wana yi langutiwaka hi tihlo ra le tin’hwembeni. Etikweni rin’wana, nyimpi ya xin’wana-manana yi vangiwe hi mintlawanyana ya vukhongeri, kutani nawu wu lava leswaku minhlangano hinkwayo ya vukhongeri yi khomeriwa endzeni ka muako wa vugandzeri.

Ku va Timbhoni ta Yehovha ti ri ni tiholo ta tona nakambe swi komba vanhu leswaku a hi vadyondzisiwa va mufundhisi wo karhi. Hofisi ya rhavi ra Timbhoni ta Yehovha ya le Zimbabwe yi tsale yi ku: “Enkarhini lowu hundzeke, vamakwerhu va le ndhawini leyi a va hlangana etindlwini, naswona vanhu va ndhawu ya kwalaho a va vitana vandlha hi vito ra n’wini wa muti lowu a va hlangana eka wona. A va vula leswaku vamakwerhu i swirho swa kereke ya Ka Swimani-mani. Hinkwaswo leswi se swa cinca tanihi leswi vanhu va wu vonaka kahle mfungho lowu kombisaka holo yin’wana ni yin’wana yi ri ‘Holo ya Mfumo ya Timbhoni ta Yehovha.’”

 Vanyiki Lava Tsakeke

Muapostola Pawulo u tsale a ku: “Xikwembu xi rhandza munyiki la tsakeke.” (2 Vakorinto 9:7) Hakunene minyikelo leyikulu ya pfuna swinene. Kambe minyikelo yo tala ya ntirho wa Timbhoni ta Yehovha yi huma eka mabokisi ya minyikelo ya le Tiholweni ta Mfumo. Ku nga khathariseki leswaku minyikelo i yikulu kumbe i yitsongo, hinkwayo ka yona i ya nkoka naswona ya tlangeriwa. Tsundzuka leswaku Yesu a a tshame laha a koteke ku vona noni ya xisiwana loko yi nyikela hi swimalana swa yona swimbirhi swa nsimbi. Wansati loyi u voniwe na hi Yehovha swin’we ni tintsumi. Vito ra noni leyi ni ku ri tiva a hi ri tivi, kambe Yehovha u endle leswaku xiendlo xa yona lexi pfumalaka vutianakanyi xi tsariwa eBibeleni.

Handle ko aka Tiholo ta Mfumo, minyikelo ya hina yi seketela mintirho leyin’wana hinkwayo ya nkoka ya Mfumo. Ku tirhisana hi ndlela leyi swi hi nyika xivangelo xa ku tsaka swi tlhela swi hi “[fuwisa] hi marito yo tala ya ku nkhensa Xikwembu.” (2 Vakorinto 9:12) Vakreste-kulorhi va le Benin va vika: “Siku rin’wana ni rin’wana Yehovha wa nkhensiwa hi swikhongelo swo tala hikwalaho ka mpfuno wa timali wa vamakwerhu va le matikweni man’wana.” Hi nkarhi lowu fanaka, hinkwerhu ka hina lava hlanganyelaka eku seketeleni ka ntirho wa Mfumo hi timali hi kuma ntsako lowu tisiwaka hi ku nyika ka Vukreste!

[Bokisi leri nga eka tluka 22, 23]

Tindlela Leti Van’wana Va Hlawulaka Ku Nyikela Ha Tona

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya minyikelo lama funghiweke leswaku “Minyikelo Ya Ntirho Wa Misava Hinkwayo—Matewu 24:14.”

N’hweti na n’hweti mavandlha ma rhumela minyikelo leyi erhavini ra Timbhoni ta Yehovha leri langutelaka ntirho ematikweni ya ka vona. Nakambe minyikelo ya ku tirhandzela yi nga ha rhumeriwa hi ku kongoma eka Watch Tower Bible and Tract Society of Pennsylvania, c/o Accounting Office, Private Bag X2067, Krugersdorp, 1740, South Africa, kumbe ehofisini ya rhavi leyi langutelaka ntirho etikweni ra ka n’wina. Loko u nyikela hi cheke, tsala “Watch Tower” eka cheke ya kona. Swin’wetsin’wetsi kumbe swilo swin’wana swa nkoka na swona swi nga nyikeriwa. Minyikelo yo tano yi fanele ku fambisana ni papila ro koma leri hlamuselaka leswaku leyi i nyiko.

NYIKO LEYI KUNGUHATIWEKE

Ku engetela eka minyikelo leyi kongomeke, ku na tindlela tin’wana ta ku nyikela leti vuyerisaka ntirho wa Mfumo wa misava hinkwayo. Tona ti katsa:

Ndzindza-khombo: Watch Tower yi nga ha tsarisiwa tanihi leyi nga ta vuyeriwa eka fambiselo ra ndzindza-khombo wa vutomi kumbe eka mali ya ku tshika ntirho kumbe ya mudende.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Watch Tower, tanihi nyiko leyi heleleke.

Xitandi Ni Yindlu: Xitandi ni yindlu leswi xavisekaka swi nga ha nyikeriwa hi ku kongoma kumbe loko ku ri yindlu yinene, ku endliwa ntwanano wa leswaku yi ta tekiwa ntsena loko loyi a nyikeleke ha yona a rhurha kumbe a fa. Tivisa hofisi ya rhavi ya le tikweni ra ka n’wina u nga si nyikela hi xitandi ni yindlu.

Swiboho: Nhundzu kumbe mali swi nga ha nyikeriwa eka Watch Tower hi ku tirhisa xileriso xa mufi lexi nga enawini.

Loko u lava rungula leri engetelekeke, u fanele u vutisa Accounting Office hi ku ba riqingho kumbe hi ku tsalela eka adirese leyi nga laha hansi kumbe eka hofisi ya rhavi leyi langutelaka ntirho wo chumayela etikweni ra ka n’wina.

Accounting Office

Watch Tower Bible and Tract Society of Pennsylvania

Private Bag X2067,

Krugersdorp, 1740

South Africa

Riqingho: (011) 761 1000

[Swifaniso leswi nga eka tluka 20, 21]

Tindhawu ta khale ni ta sweswi ta minhlangano ya Timbhoni ta Yehovha

Zambia

Riphabliki ra Afrika Xikarhi