Xana Wa Yi Navela Misava Leyi Ku Nga Ta Hanyiwa Handle Ko Chava Eka Yona?

“Hi ‘tshama hi khome timbilu naswona . . . a hi xi tivi ni lexi hi nga xi endlaka,’ hikwalaho ka ‘khombo . . . ra nsele leri nga hi welaka nkarhi wihi ni wihi ri nga rhanganga ri ndzawuta.’”

MARITO lawa lama tshahiweke n’wexemu eka magazini wa Newsweek, ma kombisa ndlela leyi vanhu vo tala lava hanyaka emisaveni leyi, leyi nga ni mpfilumpfilu va titwaka ha yona. Yesu Kreste u kombise leswaku mintlhaveko yo tano yi ta nyanya ku nga ri khale. U vulavule ka ha ri emahlweni hi nkarhi lowu matiko a ma ta kayakaya ma nga tivi leswaku ma ta endla yini, naswona a ma nga ta kota ku tikutsula naswona vanhu a va ta titivala hikwalaho ko chava ni ku langutela swilo leswi taka ehenhla ka misava. Kambe hina a hi boheki ku chava kumbe hi titwa hi nga ri na vuyo, hikuva Yesu u engeterile: “Loko swilo leswi swi sungula ku humelela, yimani mi ololoka ivi mi tlakusa tinhloko ta n’wina, hikuva ku kutsuriwa ka n’wina ka tshinela.”—Luka 21:25-28.

Loko a hlamusela ndlela leyi vanhu va yena va nga ta va va hanya ha yona emisaveni endzhaku ka ku kutsuriwa koloko, Yehovha Xikwembu u te: “Vanhu va mina va ta tshama endhawini yo rhula ni le ka vutshamo lebyi tshembiwaka hi ku helela ni le tindhawini to wisela leti nga kavanyetiwiki.” (Esaya 32:18) Yehovha u vule leswi hi ku tirhisa muprofeta Mikiya: “Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka.”—Mikiya 4:4.

Xiyimo lexi xi hambanile swinene ni vutomi bya namuntlha! A ku na khombo leri nga tivekiki leri nga ta xungeta vanhu. Ematshan’weni yo tshama hi khome timbilu naswona hi nga tivi lexi hi nga xi endlaka, ku ta va ni ku rhula ni ntsako leswi nga heriki.