Xana Wa Wu Amukela Mpfuno Wa Yehovha?
Xana Wa Wu Amukela Mpfuno Wa Yehovha?
“Yehovha i mupfuni wa mina; ndzi nga ka ndzi nga chavi.”—VAHEVERU 13:6.
1, 2. Ha yini swi ri swa nkoka leswaku hi amukela mpfuno ni nkongomiso wa Yehovha evuton’wini bya hina?
A HI nge u famba hi xindledyana entshaveni. Kambe a wu swaku, hikuva un’wana la tivaka ndhawu yoleyo ku tlula mani na mani u kombele ku ku heleketa. U ni ntokoto lowukulu ni matimba ku ku tlula, kambe u famba na wena khwatsi. U xiya leswaku wa khugunyeka minkarhi yin’wana. Leswi a karhatekeke hi vuhlayiseki bya wena, u tshambuluta voko rakwe leswaku a ku pfuna endhawini yin’wana leyi nga khombo swinene. Xana u ta bakanya mpfuno wakwe? Doo! U nga ha vaviseka.
2 Tanihi Vakreste hi famba egondzweni leri nga ni khombo. Xana hi fanele hi famba hi ri swerhu egondzweni rero ro lala? (Matewu 7:14) Doo, Bibele yi kombisa leswaku Mukongomisi lonkulu ku tlula hinkwavo loyi hi nga n’wi kumaka, Yehovha Xikwembu, u pfumelela vanhu leswaku va famba na yena. (Genesa 5:24; 6:9) Xana Yehovha wa ma pfuna malandza yakwe loko ma ri karhi ma famba? U ri: “Mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’” (Esaya 41:13) Ku fana ni muvalangisi wa le xifanisweni xa hina, Yehovha hi musa u tshambuluta voko rakwe a kombisa vunghana eka lava va lavaka ku famba na yena. Entiyisweni, a nga kona eka hina la lavaka ku bakanya mpfuno wakwe!
3. Hi swihi swivutiso leswi hi nga ta swi tlhuvutsa ebulwini ra hina?
3 Exihlokweni lexi hundzeke, hi bule hi tindlela ta mune leti Yehovha a pfuneke vanhu vakwe va khale ha tona. Xana u pfuna vanhu vakwe hi tindlela leti fanaka namuntlha? Naswona hi nga endla yini leswaku hi kuma mpfuno wo tano? A hi tlhuvutseni swivutiso leswi. Hi ku endla tano, hi nga tiyiseka swinene leswaku Yehovha i Mupfuni wa hina hakunene.—Vaheveru 13:6.
Ku Pfuniwa Hi Tintsumi
4. Ha yini malandza ya Xikwembu namuntlha ma nga tiyisekaka leswaku tintsumi ta ma seketela?
4 Xana tintsumi ta ma pfuna malandza ya Yehovha ya sweswi? Ina, ta ma pfuna. I ntiyiso leswaku namuntlha a ti humeleli hi xiviri leswaku ti ta kutsula vagandzeri va ntiyiso ekhombyeni. Hambi ku ri eminkarhini ya Bibele, tintsumi a ti nga tali ku humelela hi xiviri. Hakanyingi vanhu a va nga ti voni loko ti endla swo karhi, hilaha swi nga hakona namuntlha. Nilokoswiritano, malandza ya Xikwembu ma khutazeke ngopfu loko ma lemuka leswaku tintsumi a ti lunghekele ku ma seketela. (2 Tihosi 6:14-17) Hi ni xivangelo lexinene xo titwa hi ndlela leyi fanaka.
5. Bibele yi swi kombisa njhani leswaku tintsumi ta hlanganyela entirhweni wo chumayela namuntlha?
5 Tintsumi ta Yehovha ti tsakela ngopfu ntirho wo hlawuleka lowu hi hlanganyelaka eka wona. Hi wihi ntirho wolowo? Hi nga kuma nhlamulo eka Nhlavutelo 14:6: “Ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo.” “Mahungu lamanene lama nga heriki” ma fambisana kahle ni “mahungu lamanene . . . ya mfumo,” lawa, hilaha Yesu a profeteke hakona, a “ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo” mafambiselo lawa ya swilo ma nga si hela. (Matewu 24:14) I ntiyiso leswaku tintsumi a ti chumayeli hi ku kongoma. Yesu u nyike vanhu vutihlamuleri lebyi lebyikulu. (Matewu 28:19, 20) Xana a swi khutazi ku tiva leswaku loko hi ri karhi hi endla ntirho lowu, hi pfuniwa hi tintsumi to kwetsima, ku nga swivumbiwa swa moya swo tlhariha, leswi nga ni matimba?
6, 7. (a) I yini lexi kombisaka leswaku tintsumi ti seketela ntirho wa hina wo chumayela? (b) Hi nga endla yini leswaku tintsumi ta Yehovha ti hi pfuna?
6 Ku ni vumbhoni byo tala lebyi kombisaka leswaku tintsumi ta wu seketela ntirho wa hina. Hi xikombiso, hakanyingi hi twa leswaku loko Timbhoni ta Yehovha ti ri karhi ti endla ntirho wa tona wo chumayela, ti hlangana ni vanhu lava a va ha ku heta ku khongela eka Xikwembu va kombela leswaku xi va komba ntiyiso. Sweswo swi endleka ko tala lerova a hi nge swi teki swi ri swa xiwelo ntsena. Hikwalaho ko pfuniwa hi tintsumi, vanhu vo tala va dyondza ku endla hilaha ‘ntsumi leyi hahaka empfhukeni’ yi vulaka hakona: “Chavani Xikwembu mi xi vangamisa.”—Nhlavutelo 14:7.
7 Xana wa swi navela ku seketeriwa hi tintsumi ta Yehovha leta matimba? Loko swi ri tano, gingiriteka evutirhelini bya wena. (1 Vakorinto 15:58) Loko hi tinyiketela hi ku tirhandzela entirhweni lowu wo hlawuleka lowu humaka eka Yehovha, hi nga tiyiseka leswaku tintsumi takwe ti ta hi pfuna.
Ku Pfuniwa Hi Hosi Ya Tintsumi
8. Xana Yesu u tamele xikhundlha xihi lexi tlakukeke etilweni, naswona ha yini sweswo swi ri xikhutazo eka hina?
8 Yehovha u tlhela a hi pfuna hi ku tirhisa ntsumi yin’wana. Nhlavutelo 10:1 yi hlamusela hi ta ‘ntsumi ya matimba’ lamakulu ngopfu leyi “xikandza xa yona a xi fana ni dyambu.” Handle ko kanakana ntsumi leyi yi voniweke exivonweni a yi fanekisela Yesu Kreste la kwetsimisiweke emfun’weni wa le tilweni. (Nhlavutelo 1:13, 16) Xana Yesu i ntsumi hakunene? I ntsumi hi ndlela yo karhi, hikuva u vuriwa ntsumi leyikulu. (1 Vatesalonika 4:16) Yesu i n’wana wa Yehovha wa moya la nga ni matimba ku tlula vana lavan’wana hinkwavo va moya. Yehovha u n’wi nyike vulawuri ehenhla ka tintsumi Takwe hinkwato. Ntsumi leyi leyikulu i xihlovo lexikulu ngopfu xa mpfuno. Hi tindlela tihi?
9, 10. (a) Xana Yesu u va “mupfuni” wa hina hi ndlela yihi loko hi dyoha? (b) Xana hi nga pfuneka njhani exikombisweni xa Yesu?
9 Muapostola Yohane la dyuhaleke u tsale a ku: “Loko mani na mani a endla xidyoho, hi ni mupfuni eka Tatana, a nga Yesu Kreste, loyi a lulameke.” (1 Yohane 2:1) Ha yini Yohane a ringanyete leswaku Yesu i “mupfuni” wa hina ngopfu-ngopfu loko hi “endla xidyoho”? Phela, ha dyoha siku ni siku, naswona xidyoho xi vanga rifu. (Eklesiasta 7:20; Varhoma 6:23) Kambe, Yesu u nyikele hi vutomi byakwe leswaku byi va xitlhavelo xa swidyoho swa hina. Naswona u le tlhelo ka Tata wa hina wa tintswalo leswaku a ta hi kombelela mpfuno eka yena. Un’wana ni un’wana wa hina wa wu lava mpfuno wo tano. Xana hi nga wu kuma njhani? Hi fanele hi hundzuka eswidyohweni swa hina kutani hi kombela ndzivalelo exisekelweni xa xitlhavelo xa Yesu. Nakambe hi fanele hi papalata ku phindha swidyoho swa hina.
10 Yesu u hi ferile a tlhela a hi vekela xikombiso lexi hetisekeke. (1 Petro 2:21) Xikombiso xakwe xa hi kongomisa, xa hi pfuna leswaku hi lulamisa tindlela ta hina leswaku hi ta papalata xidyoho lexikulu naswona hi tsakisa Yehovha Xikwembu. Xana a hi tsaki hi ku va ni mpfuno wo tano? Yesu u tshembise valandzeri vakwe leswaku a ku ta ta mupfuni un’wana.
Ku Pfuniwa Hi Moya Lowo Kwetsima
11, 12. I yini moya wa Yehovha, wu ni matimba ku fikela kwihi naswona ha yini hi wu lava namuntlha?
11 Yesu u tshembise a ku: “Ndzi ta kombela Tatana kutani u ta mi nyika mupfuni un’wana leswaku a va na n’wina hi masiku, moya wa ntiyiso, lowu misava yi nga ta ka yi nga wu amukeli.” (Yohane 14:16, 17) “Moya wa ntiyiso,” kumbe moya lowo kwetsima, a hi munhu, kambe i matimba—matimba lama tirhaka ya Yehovha. I matimba lama nga pimekiki. I matimba lawa Yehovha a ma tirhiseke loko a vumba vuako, loko a endla masingita layo hlamarisa swinene niloko a nyikela swivono leswi paluxaka ku rhandza kakwe. Leswi Yehovha a nga ha wu tirhisiki hi ndlela yoleyo moya wakwe, xana sweswo swi vula leswaku a hi wu lavi?
12 Doo! ‘Eminkarhini leyi ya mangava leyi swi nonon’hwaka ku langutana na yona,’ hi wu lava ngopfu moya wa Yehovha ku tlula hambi ku ri rini eku sunguleni. (2 Timotiya 3:1) Wa hi tiyisa leswaku hi tiyiselela miringo. Wa hi pfuna leswaku hi hlakulela timfanelo letinene ngopfu leti hi tshinetaka ekusuhi na Yehovha ni vamakwerhu va moya. (Vagalatiya 5:22, 23) Kutani, hi nga wu kuma njhani mpfuno lowunene swonghasi lowu humaka eka Yehovha?
13, 14. (a) Hi nga tiyiseka njhani leswaku Yehovha u nyika vanhu vakwe moya lowo kwetsima hi ku tirhandzela? (b) Xana hi nga swi kombisa njhani leswaku a hi yi amukeli nyiko ya moya lowo kwetsima?
13 Xo sungula, hi fanele hi khongela hi kombela moya lowo kwetsima. Yesu u te: “Loko n’wina, hambiloko mi hombolokile mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!” (Luka 11:13) Ina, Yehovha i Tatana lonene ku tlula hinkwavo. Loko hi ripfumelo, hi kombela leswaku a hi nyika moya lowo kwetsima, a swi nge endleki leswaku a hi tsona nyiko leyi. Kutani, xivutiso xa tlakuka, Xana ha wu kombela ke? Hi ni xivangelo lexi twalaka xo wu kombela eswikhongelweni swa hina siku ni siku.
14 Xa vumbirhi, hi amukela nyiko yoleyo hi ku hanya hi ku pfumelelana na yona. Hi xikombiso: A hi nge Mukreste u lwa ni mboyamelo wo rhandza ku hlalela swilo swo naveta rimbewu. U khongele a kombela moya lowo kwetsima leswaku wu n’wi pfuna ku lwa ni mukhuva lowu wo bola. U kombele ndzayo eka vakulu lava nga Vakreste, naswona va n’wi nyike xitsundzuxo xo teka goza ra vukarhi, a ala hambi ku ri ku tshinela ekusuhi ni rungula ro tano leri thyakeke. (Matewu 5:29) Ku vuriwa yini hiloko a honisa ndzayo yoleyo kutani a tihoxa endzingweni wo hambeta a hlalela swilo swo tano? Xana u hanya hi ku pfumelelana ni xikhongelo xakwe xo kombela moya lowo kwetsima leswaku wu n’wi pfuna? Kumbe, xana u tihoxa ekhombyeni ro hlunamisa moya wa Xikwembu, leswi nga ta endla leswaku a nga wu kumi? (Vaefesa 4:30) Entiyisweni, hinkwerhu hi fanele hi endla hinkwaswo leswi hi nga swi kotaka leswaku hi ta ya emahlweni hi kuma nyiko leyi leyinene swonghasi leyi humaka eka Yehovha.
Ku Pfuniwa Hi Rito Ra Xikwembu
15. Hi nga swi kombisa njhani leswaku Bibele a hi yi tekeli ehansi?
15 Se ku hundze malembe-xidzana yo tala Bibele yi ri xihlovo xa mpfuno eka malandza ya Yehovha layo tshembeka. Kambe, ematshan’weni yo ma tekela ehansi Matsalwa yo Kwetsima, hi fanele hi tsundzuka leswaku i xihlovo lexikulu xa mpfuno. Ku amukela mpfuno wolowo swi lava matshalatshala. Hi fanele hi hlaya Bibele nkarhi ni nkarhi.
16, 17. (a) Xana Pisalema 1:2, 3 yi byi hlamusela njhani vuyelo bya ku hlaya nawu wa Xikwembu? (b) Xana Pisalema 1:3 yi kombisa njhani leswaku hi fanele hi tirha hi matimba?
16 Pisalema 1:2, 3 yi vula leswi hi munhu la chavaka Xikwembu: “U tsakela nawu wa Yehovha, naswona nawu wakwe u wu hlaya hi rito ra le hansi vusiku ni nhlikanhi. Kunene u ta fana ni murhi lowu byariweke etlhelo ka swinambyana swa mati, lowu humesaka mbhandzu wa wona hi nguva ya kona, lowu switluka swa wona swi nga vuniki, hinkwaswo leswi a swi endlaka swi ta humelela.” Xana wa yi kuma yinhla leyi boxiwaka hi tindzimana leti? Swa olova ku hlaya marito lawa kutani hi gimeta hileswaku ma vulavula hi ndhawu ya kahle leyi nga ni ku rhula—murhi wa le tlhelo ka nambu lowu tisaka ndzhuti. Mawaku ndlela leyi swi nga tsakisaka ha yona ku rhongelanyana nindzhenga endhawini yo tano! Kambe pisalema leyi a yi hi byeli leswaku hi ehleketa hi ku wisa. Yi hi byela swin’wana, leswi vulaka leswaku hi fanele hi tirha hi matimba. Njhani?
17 Xiya leswaku murhi lowu a ko va murhi wa ndzhuti ntsena lowu timileleke ekusuhi ni nambu. I murhi lowu vekaka mihandzu, lowu “byariweke” hi xikongomelo endhawini leyi hlawuriweke—“etlhelo ka swinambyana swa mati.” Xana murhi wu nga mila njhani etlhelo ka swinambyana swo hlayanyana? Phela, ensin’wini ya mirhi ya mihandzu, n’wini wa nsimu a nga ha cela migerho leyi nga ta tisa mati etimitswini ta mirhi yakwe ya risima. Ina, sweswi yinhla yi lo dlaa! Loko vumoya bya hina byi ri lebyi humelelaka ku fana ni murhi lowuya, swi vula leswaku ku tirhiwe swi vava. Hi tihlanganisa ni nhlengeletano leyi hi tiselaka mati yo tenga ya ntiyiso, kambe na hina hi fanele hi endla matshalatshala. Hi fanele hi tswonga mati lawa ya risima, hi anakanyisisa ni ku endla vulavisisi lebyi lavekaka leswaku hi kota ku dzikisa mintiyiso ya Rito ra Xikwembu emianakanyweni ni le timbilwini ta hina. Hi ndlela yoleyo, na hina hi ta tswala mihandzu leyinene.
18. Ku laveka yini leswaku hi kuma tinhlamulo ta swivutiso swa hina eBibeleni?
18 Bibele a yi hi pfuni nchumu loko hi tshama hi yi vekile lahaya vuhirhini. A yi na masalamusi—kutani a hi nge pfali matihlo, kutani hi yi tshika yi tipfulekela kun’wana ni kun’wana, hi ehleketa ku kuma nhlamulo ya xivutiso xa hina eka tluka rero ri tipfulekeleke. Loko hi fanele hi endla swiboho, hi fanele hi cela hi lava “vutivi bya Xikwembu” onge hiloko byi ri xuma lexi fuhlekiweke. (Swivuriso 2:1-5) Hakanyingi swi lava munhu a endla vulavisisi hi vurhon’wana leswaku a kuma ndzayo ya Matsalwa ya malunghana ni swilo swo karhi leswi hi karhataka. Hi ni minkandziyiso yo tala leyi sekeriweke eBibeleni leyi hi pfunaka eka vulavisisi bya hina. Loko hi yi tirhisa ku cela tindzalama ta vutlhari lebyi kumekaka eRitweni ra Xikwembu, entiyisweni hi va hi tirhisa mpfuno wa Yehovha.
Ku Pfuniwa Hi Vapfumeri-kulorhi
19. (a) Ha yini swihloko swa Xihondzo xo Rindza ni Xalamuka! swi nga ha tekiwaka tanihi mpfuno lowu hi wu kumaka eka vapfumeri-kulorhi? (b) Xana xihloko xo karhi eka timagazini ta hina xi ku pfune njhani?
19 Minkarhi hinkwayo malandza ya Yehovha ma pfunanile. Xana Yehovha sweswi u cincile? Doo! Handle ko kanakana un’wana ni un’wana wa hina wa ri tsundzuka siku leri a tshameke a kuma mpfuno lowu lavekaka hi nkarhi lowu faneleke eka vapfumeri-kulobye. Hi xikombiso, xana wa xi tsundzuka xihloko lexi a xi ri eka Xihondzo xo Rindza kumbe Xalamuka! lexi ku chaveleleke hi nkarhi lowu a wu xi lava ha wona kumbe xi ku pfuneke ku tlhantlha xiphiqo kumbe ku langutana ni ntlhontlho wa ripfumelo ra wena? Yehovha u ku tisele mpfuno wolowo hi ku tirhisa “hlonga ro tshembeka ni ro tlhariha” leri nyikiweke ntirho wo ku phamela “swakudya . . . hi nkarhi lowu faneleke.”—Matewu 24:45-47.
20. Vakulu lava nga Vakreste i “tinyiko leti nga vanhu” hi tindlela tihi?
20 Kambe, hakanyingi vapfumeri-kulorhi va hi pfuna hi ku kongoma. Nkulu la nga Mukreste u nyikela nkulumo leyi khumbaka timbilu ta hina hi ku kongoma kumbe a endla riendzo ra vurisi leri hi pfunaka hi nkarhi lowu hi langutaneke ni xiyimo xo tika kumbe a hi nyika ndzayo ya rirhandzu leyi hi pfunaka ku vona ni ku hlula ku tsana ka hina. Mukreste un’wana la tlangelaka u tsale leswi malunghana ni mpfuno lowu a wu kumeke eka nkulu: “Ensin’wini, u tinyike nkarhi wo ndzi khutaza leswaku ndzi boxa ndlela leyi ndzi titwaka ha yona. Tolo wa kona nivusiku a ndza ha ku khongela eka Yehovha, ndzi kombela leswaku a ndzi tisela munhu loyi ndzi nga vulavulaka na yena. Hi siku leri tlhandlamaka, makwerhu loyi u vulavule na mina hi ndlela ya musa. U ndzi pfune leswaku ndzi vona ndlela leyi Yehovha a ndzi pfuneke ha yona nkarhi wo leha. Ndza n’wi nkhensa Yehovha hi ku ndzi rhumela nkulu loyi.” Hi tindlela leti hinkwato, vakulu lava nga Vakreste va kombisa leswaku i “tinyiko leti nga vanhu,” leti hi nyikiweke tona hi Yehovha hi ku tirhisa Yesu Kreste ku hi pfuna leswaku hi tiyisela endleleni leyi yaka evuton’wini.—Vaefesa 4:8.
21, 22. (a) Xana ku humelela yini loko lava va nga evandlheni va tirhisa ndzayo leyi kumekaka eka Vafilipiya 2:4? (b) Ha yini hambi ku ri swiendlo leswitsongo swa musa swi ri swa nkoka?
21 Ku tlhandlekela eka vakulu, Mukreste ha un’we la tshembekaka u lava ku tirhisa xileriso lexi huhuteriweke xa leswaku a “nga veki tihlo etimhakeni ta [yena] ntsena, kambe ni le timhakeni ta van’wana.” (Vafilipiya 2:4) Loko lava nga evandlheni ra Vukreste va tirhisa ndzayo leyi, va swi kota ku kombisana musa hi mpimo lowukulu. Hi xikombiso, ndyangu wun’wana wu weriwe hi makhombo yo hlayanyana hi nkarhi wun’we. Tatana a a fambe ni n’wana wakwe wa nhwanyana exitolo. Loko va vuya, va kume mhangu ya movha. N’wana loyi u file; tatana a vaviseka ngopfu. Loko a huma exibedlhele, eku sunguleni a a lamale ngopfu lerova a a nga koti ku tiendlela nchumu. Nsati wakwe na yena a a ri ni gome lerikulu lerova a a nga ta swi kota ku n’wi khathalela a ri swakwe. Kutani mpatswa wun’wana evandlheni wu teke mpatswa lowu a wu ri ni nhlomulo wu ya tshama na wona kutani wu wu khathalela mavhiki yo hlayanyana.
22 I ntiyiso leswaku a hi swiendlo hinkwaswo swa musa leswi fambisanaka ni makhombo yo tano naswona swi lavaka ku tinyiketela ko tano. Mpfuno wun’wana lowu hi wu kumaka i wutsongo swinene. Kambe, ku nga khathariseki leswaku musa wa kona i wutsongo ku fikela kwihi, ha wu tlangela, a hi swona ke? Xana u tsundzuka nkarhi lowu rito ra musa kumbe xiendlo xa tintswalo lexi endliweke hi makwerhu wo karhi xi ku nyikeke mpfuno lowu a wu wu lava? Hakanyingi Yehovha u hi khathalela hi tindlela teto.—Swivuriso 17:17; 18:24.
23. Xana Yehovha u swi teka njhani loko hi tikarhatela ku pfunana?
23 Xana u nga swi tsakela leswaku Yehovha a ku tirhisa ku pfuna van’wana? Yehovha a nga ku nyika lunghelo rero. Entiyisweni, Yehovha wa ma tlangela matshalatshala lawa u ma endlaka emhakeni leyi. Rito rakwe ri ri: “Loyi a kombisaka xisiwana tintswalo u lomba Yehovha, naswona ndlela leyi a xi khomaka ha yona U ta yi tlherisela eka yena.” (Swivuriso 19:17) Hi kuma ntsako lowukulu loko hi tinyiketela ku pfuna vamakwerhu. (Mintirho 20:35) Lava va tiendlaka nconge yin’we, a va wu kumi ntsako lowu munhu a vaka na wona loko a pfunile kumbe loko a kume mpfuno. (Swivuriso 18:1) Hikwalaho, a hi veni kona hi ku tshembeka eminhlanganweni ya Vukreste leswaku hi ta khutazana.—Vaheveru 10:24, 25.
24. Ha yini hi nga fanelanga hi titwa hi kayela hikwalaho ka leswi hina hi nga ma voniki masingita yo hlamarisa lawa Yehovha a ma endleke enkarhini lowu hundzeke?
24 Ku ve mhaka leyi tsakisaka ku kambisisa tindlela leti Yehovha a hi pfunaka ha tona! Hambileswi hi nga hanyiki enkarhini lowu Yehovha a endlaka masingita yo hlamarisa leswaku a hetisisa swikongomelo swakwe, a hi fanelanga hi titwa hi kayela. Lexi nga xa nkoka ngopfu, Yehovha u hi nyika mpfuno hinkwawo lowu hi wu lavaka leswaku hi ta tshama hi tshembekile. Naswona loko hi tiyisela swin’we eripfumelweni, hi ta vona swiendlo swo hlamarisa ni swo kwetsima swinene swa Yehovha leswi nga si tshamaka swi voniwa ematin’wini hinkwawo! A hi tiyimiseleni ku amukela mpfuno wa rirhandzu lowu Yehovha a hi nyikaka wona, kutani hi wu tirhisa hi ku helela leswaku na hina hi ta vula marito ya tsalwa ra hina ra lembe ra 2005 leri nge: “Mpfuno wa mina wu huma eka Yehovha.”—Pisalema 121:2.
U Ehleketa Yini?
Yehovha u hi nyika njhani mpfuno lowu hi wu lavaka namuntlha—
• hi ku tirhisa tintsumi?
• hi ku tirhisa moya lowo kwetsima?
• hi ku tirhisa Rito rakwe leri huhuteriweke?
• hi ku tirhisa vapfumeri-kulorhi?
[Swivutiso Swa Dyondzo]
[Xifaniso lexi nga eka tluka 18]
Swa khutaza ku tiva leswaku tintsumi ti seketela ntirho wo chumayela
[Xifaniso lexi nga eka tluka 21]
Yehovha a nga ha tirhisa un’wana wa vapfumeri-kulorhi leswaku a hi nyika nchavelelo lowu hi wu lavaka