“Mpfuno Wa Mina Wu Huma Eka Yehovha”

Ku Titshamela Wexe Kambe U Enerisekile eNtirhweni Wa Yehovha

WANSATI la nga Mukreste wa le Spain u te: “Vo tala va hina hi tsakile swinene hambileswi hi nga tekiwangiki.” I yini lexi endlaka a eneriseka? “Ha tsaka hileswi hi nga riki na mivilelo yo tala leswaku hi ta kota ku n’wi tirhela hi xitalo Yehovha, Xikwembu xa hina.”

Ndlela leyi va titwaka ha yona yi pfumelelana ni leswi Rito ra Xikwembu ri swi vulaka malunghana ni ku nga ngheneli vukati. Loko muapostola Pawulo a vulavula hi timhaka leti khumbaka vukati, u vule mhaka leyi, leyi huhuteriweke: “Vanhu lava nga nghenelangiki vukati ni tinoni ndzi ri eka vona, i swinene leswaku va tshama va fana na mina.” Pawulo na yena a a nga ri na nsati. Kambe hi xihi xivangelo lexi a xi nyikeleke loko a bumabumela ku nga ngheneli vukati? U vule leswaku munhu la ngheneleke vukati u avanile, kasi munhu la nga nghenelangiki vukati u “vilela hi swilo swa Hosi.” (1 Vakorinto 7:8, 32-34) Ku tirhela Yehovha hi wona nchumu wa nkoka lowu endlaka munhu la nga nghenelangiki vukati a tsaka a tlhela a eneriseka.

Ku Nga Ngheneli Vukati Hi Xikongomelo Lexi Xiximekaka

Marito ya Pawulo ma nga ha va hlamarisa vanhu va ndhavuko lowu tekaka ku nghenela vukati ni ku va ni ndyangu tanihi nchumu wa nkoka swinene. Hambiswiritano, Yesu Kreste—loyi a a nga ri na nsati kambe a a tsakile a tlhela a eneriseka—u boxe xikongomelo lexi xiximekaka xa Vakreste lava nga byi nghenelangiki vukati. U te: “Ku ni vatsheniwa lava nga tiendla vatsheniwa hikwalaho ka mfumo wa matilo. Loyi a nga swi amukelaka a a swi amukele.”—Matewu 19:12.

Hi ku pfumelelana ni marito lawa, vo tala va kume leswaku loko va nga byi nghenelanga vukati va va ni nkarhi wa ku tirhela Xikwembu handle ko kavanyetiwa hi swilo leswi tolovelekeke eka vanhu lava tekaneke. (1 Vakorinto 7:35) Magidi ya Vakreste va gandzela Yehovha va tsakile va nga ri na munghana wa vukati, naswona va tsaka hileswi va pfunaka van’wana hi ku hiseka. *

Vakreste vo tala lava nga nghenelangiki vukati va swi xiya leswaku a hi vanhu lava ngheneleke vukati ntsena lava tsakeke ni leswaku a hi vanhu hinkwavo lava nga nghenelangiki vukati lava nga tsakangiki. Vanhu lava hinkwavo, minkarhi yin’wana va tsaka va tlhela va va ni gome. Entiyisweni, Bibele yi vula mhaka leyi twalaka ya leswaku vukati hi byoxe byi ‘vanga nhlomulo enyameni.’—1 Vakorinto 7:28.

Ku Titshamela Wexe Hikwalaho Ka Swiyimo Swo Karhi

Vo tala a va titshamelanga voxe hikwalaho ka leswi va swi tsakelaka kambe va bohiwa hi swiyimo. Va nga ha va va swi navela ku kombisiwa rirhandzu ni vunakulobye lebyi nga kona elunghiselelweni ra vukati. Hambiswiritano, van’wana va nga ha va va tsandzeka ku nghenela vukati swa sweswi hikwalaho ka xiphiqo xa timali kumbe swivangelo swin’wana. Vakreste van’wana—lava vo tala va vona ku nga vamakwerhu va moya va xisati lava rhandzekaka—va titshamele voxe hikwalaho ka leswi va tiyimiseleke ku yingisa ndzayo ya le Bibeleni yo teka “eHosini ntsena.” (1 Vakorinto 7:39) Hi ku tshembeka va lava munghana wa vukati exikarhi ka vagandzeri va Yehovha lava tinyiketeleke va tlhela va khuvuriwa.

 Minkarhi yin’wana, van’wana va vanhu lava va ni xivundza. Endzhaku ko pfumela leswaku u titwa hi ndlela leyi, Mukreste un’wana la titshameleke yexe u te: “Ha wu tiva nawu wa Yehovha naswona a hi lavi ku hlundzukisa Yehovha hambi ku ri hi ndlela yihi. Hi nga ha va hi byi lava vunakulobye bya munghana wa vukati, kambe hambiloko vanhu va misava vo ringeta ko tala ku ‘hi hlanganisa ni vanhu vo karhi,’ hi tiyimiserile ku titshamela hexe. A hi swi lavi hambi ku ri ku va exikarhi ka vavanuna ni vavasati lava nga riki vapfumeri.” Vakreste volavo va fanele va bumabumeriwa hikwalaho ko tirhisa ndzayo ya le Bibeleni ni ku hlayisa mimpimanyeto leyi tlakukeke ya mahanyelo, leswaku va ta tsakisa Yehovha ku nga khathariseki ntshikilelo wihi na wihi wa mintlhaveko lowu va nga ha vaka va ri na wona.

Xikwembu Xi Nyikela Mpfuno Wo Tala

Yehovha wa tshembeka eka lava va tshembekaka eka yena etimhakeni to tanihi ku tekana ni vanhu lava nga n’wi tirheliki. Hosi Davhida u swi tiyisekisile hi ku pfumelelana ni leswi n’wi humeleleke: “[Yehovha] u ta n’wi endla hi vutshembeki loyi a tshembekeke.” (Pisalema 18:25) Naswona lava va xi yingisaka hi ku tshembeka, Xikwembu xa tshembisa: “Ndzi nga ka ndzi nga ku tshiki naswona ndzi nga ka ndzi nga ku fularheli.” (Vaheveru 13:5) Hi nga tekelela Yehovha hi ku va bumabumela swinene Vakreste lava titshameleke voxe va malembe hinkwawo, lava namarhelaka Rito ra Xikwembu hi ku tshembeka. Hi nga tlhela hi khongelela leswaku Yehovha a va tiyisa va langutana ni mintlhontlho ya vona.—Vaavanyisi 11:30-40.

Vakreste vo tala lava titshameleke voxe va kuma leswaku ku hlanganyela hi xitalo entirhweni wo dyondzisa hi Bibele swi endla leswaku vutomi bya vona byi va ni xikongomelo. Hi xikombiso, anakanya hi Patricia, wansati la nga tekiwangiki loyi a nga emalembeni ya va-30 loyi a nga phayona, kumbe muvuri wa evhangheli wa nkarhi hinkwawo. U ri: “Hambileswi loko u titshamele wexe u weriwaka hi miringo yo tala, swi ndzi endle ndzi kota ku va phayona ra nkarhi hinkwawo. Leswi ndzi nga tekiwangiki, xiyimiso xa mina xi pfumelelana ni swiyimo, naswona sweswo swi endla ndzi va ni nkarhi wo tala wa ku hlaya. Ndzi tlhele ndzi dyondza ku titshega swinene hi Yehovha, ngopfu-ngopfu loko ndzi ringiwa.”

Marito wolawo ma sekeriwe exitshembisweni xa Bibele lexi chavelelaka: “Andlala ndlela ya wena eka Yehovha, u n’wi tshemba, yena u ta teka goza.” (Pisalema 37:5) Hakunene, vagandzeri hinkwavo lava tshembekaka va Yehovha, lava ngheneleke vukati kumbe lava nga byi nghenelangiki, va nga chaveleleka va tlhela va kuma matimba eka marito lawa ma huhuteriweke: “Mpfuno wa mina wu huma eka Yehovha.”—Pisalema 121:2.

[Nhlamuselo ya le hansi]

[Marito lama tshahiweke exihlokweni lama nga eka tluka 9]

“Wanuna la nga tekangiki u vilela hi swilo swa Hosi, hi ndlela leyi a nga amukelekaka ha yona eka Hosi.”—1 VAKORINTO 7:32

[Bokisi leri nga eka tluka 8]

KU ENDLA KU TITSHAMELA WEXE LESWAKU KU VUYERISA

Yesu, loyi a nga kalangiki a teka nsati, u te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.”—Yohane 4:34.

Vana va xisati va mune va Filipi lava a va nga tekiwanga va tshame va khomekile hi ku “profeta.”—Mintirho 21:8, 9.

Vamakwerhu va xisati lava nga Vakreste lava chumayelaka rungula ra Mfumo i xiphemu xa ‘vuthu lerikulu ra vavasati lava vulaka mahungu lamanene.’—Pisalema 68:11.