Mpfuno Wo Lawula Ndlela Leyi Hi Titwaka Ha Yona

XANA minkarhi yin’wana u tikuma u lawuriwa hi ndlela leyi u titwaka ha yona? Xana u hlundzuka, u nyangatseka kumbe ku pfilunganyeka hi ku olova? Xana mivilelo ya vutomi yi ku khomisa gome? I yini lexi nga ku pfunaka?

Munhu un’wana ni un’wana u ni mintlhaveko. Loko yi lawuriwa kahle, yi endla vutomi byi tsakisa. Nilokoswiritano, Bibele ya pfumela leswaku “ku tshikileriwa ku nga hlanganisa nhloko ya lowo tlhariha.” (Eklesiasta 7:7) Emisaveni leyi, leyi teleke madzolonga ni timhangu, xana u kona la nga khumbiwiki hi swilo leswi humelelaka? Hambiswiritano, Matsalwa ma tlhela ma ku: “A ku na nchumu lowu antswaka ku tlula leswaku munhu a tsaka emintirhweni yakwe.” (Eklesiasta 3:22) Leswaku vutomi byi tsakisa swinene, hi fanele hi dyondza ku tsaka, hi ku hlakulela ku va ni mintlhaveko leyinene. Hi nga swi kotisa ku yini ku hlakulela mintlhaveko leyinene ni ku lwisana ni mintlhaveko yo biha?

Hakanyingi ku teka magoza yo lulamisa xiyimo swa n’wi pfuna munhu leswaku a lwisana ni ku karhateka ku tlula mpimo. Hi xikombiso, loko hi vilela hi timhaka to karhi leti hi nga kotiki ku ti lawula, xana a swi antswi hi cinca ndlela ya hina yo endla swilo ya siku ni siku kumbe hi cinca ndhawu, ematshan’weni yo tshama hi ri karhi hi vilela? Ku famba-famba u tiolola, ku yingisela vuyimbeleri lebyi phyuphyisaka, ku endla vutiolori lebyi lavaka matimba swinene kumbe ku endla xo karhi u xi endlela munhu la pfumalaka, swi nga hi nyika ku rhula ni ku hi tisela ntsako.—Mintirho 20:35.

Hambiswiritano, ndlela leyinene ya ku hlongola mianakanyo yo biha, i ku veka ntshembo wa hina eka Muvumbi. Loko mianakanyo yo biha yi phikelela, hi fanele hi ‘lahlela ku vilela ka hina hinkwako eka Xikwembu’ hi xikhongelo. (1 Petro 5:6, 7) Bibele ya hi tiyisekisa: “Yehovha u le kusuhi ni lava va tshovekeke mbilu . . . Makhombo ya lowo lulama ma tele, kambe Yehovha wa n’wi kutsula eka wona hinkwawo.” (Pisalema 34:18, 19) Hi nga tiyiseka njhani leswaku Xikwembu xi nga va “mupfuni wa hina ni Muponisi wa [hi]na”? (Pisalema 40:17) Hi nga endla leswi hi ku dyondza Bibele ni ku anakanyisisa hi swikombiso swa yona leswi kombisaka ndlela leyi Xikwembu xi khathalaka ha yona hi vuhlayiseki bya malandza ya xona.