Xana U ‘Fuwile Eka Xikwembu’?

EKA swifaniso swo tala leswi tlhontlhaka miehleketo leswi Yesu Kreste a swi tirhiseke, ku ni lexi vulavulaka hi murimi loyi a a fuwile. Murimi loyi a a lava ku aka switlati leswikulu leswaku a tilunghiselela vumundzuku lebyinene. Hambiswiritano, eka xifaniso xa Yesu, murimi loyi u vuriwa “loyi a nga anakanyiki.” (Luka 12:16-21) Vuhundzuluxeri byo hlayanyana bya Bibele byi tirhisa rito leri nge “xiphukuphuku.” Hikwalaho ka yini a vitaniwe hi ndlela leyi yo biha?

Swi tikomba onge a a nga ri na mhaka ni Xikwembu loko a lunghiselela vumundzuku byakwe; nakambe a nga xi nkhensanga Xikwembu hi ndzalo leyi a a yi kuma emasin’wini. (Matewu 5:45) Kambe, u tibumile a ku: “Wena moya-xiviri, u ni swilo swo tala leswinene leswi hlayisiweke malembe yo tala; humula, u dya, u nwa, u tiphina.” Ina, a a anakanya leswaku ndzalo yakwe yi ta “fana ni rirhangu leri sirhelelaka.”—Swivuriso 18:11.

Loko mudyondzisiwa Yakobo a lemukisa hi moya wo tano wo tikurisa, u te: “Rhiyani ndleve, sweswi, n’wina mi nge: ‘Namuntlha kumbe mundzuku hi ta endzela muti wo karhi ivi hi heta lembe kona, naswona hi ta endla bindzu hi bindzula,’ kasi a mi swi tivi leswaku vutomi bya n’wina byi ta va yini mundzuku. Hikuva mi hunguva leyi humelelaka nkarhinyana kutani yi nyamalala.”—Yakobo 4:13, 14.

Hakunene swi ve tano hi murimi la fuweke wa xifaniso xa Yesu hikuva u byeriwe leswi: “Wena loyi a nga anakanyiki, vusiku byolebyi va lava moya-xiviri wa wena eka wena. Kutani, i mani loyi a nga ta kuma swilo leswi u swi hlayiseke?” Ku fana ni hunguva leyi nyamalalaka loko yi twa masana ya dyambu, murimi loyi la fuweke a a ta fa a nga si vona ku hetiseka ka milorho yakwe. Xana ha swi twisisa leswi xifaniso lexi xi hi dyondzisaka swona? Yesu u te: “Swi tano hi munhu loyi a tihlengeletelaka xuma kambe a nga fuwanga eka Xikwembu.” Xana wena u ‘fuwile eka Xikwembu’?