Va Tsakise Timbilu Ta Vatswari Va Vona

“N’WANANGA, loko mbilu ya wena yi tlharihile, mbilu ya mina yi ta tsaka.” (Swivuriso 23:15) Kunene, vatswari lava nga Vakreste va tsaka loko vana va vona va kuma vutlhari bya Xikwembu. Hi Mugqivela, September 10, 2005, ntshungu wo huma ematikweni yo hambana-hambana wa vanhu va 6 859 wu ve kona esikwini ra ku thwasa ka ntlawa wa vu-119 wa Xikolo xa Bibele xa Giliyadi xa Watchtower. Hinkwavo a va nga ha tikoti hi ku tsaka, ngopfu-ngopfu vatswari va mathwasana ya 56.

David Walker, xirho xa khale xa ndyangu wa Bethele wa le United States, u pfule nongonoko hi xikhongelo lexi fikelelaka mbilu. Kutani mutshama-xitulu, David Splane wa Huvo leyi Fumaka ya Timbhoni ta Yehovha, u sungule nongonoko wa ku thwasa hi ku byela vatswari va mathwasana a ku: “Mi tirhile hakunene. Timfanelo leti mi ti byaleke eka vana va n’wina ti va susumetele ku nghenela ntirho wa vurhumiwa.” Kumbexana vatswari volavo a va tivutisa swo tala, tanihi leswi vana va vona a va ri kusuhi ni ku kuma swiavelo swa ku ya ematikweni ya le kule. Hambiswiritano, Makwerhu Splane u va tiyisekisile a ku: “Mi nga vileli hi vana va n’wina. Yehovha a nga va khathalela ku antswa ku tlula leswi n’wina mi nga va khathalerisaka swona.” Hiloko a ku: “Anakanyani hi swilo leswinene leswi vana va n’wina va nga ta swi endla. Vanhu lava xanisekaka, lava heleke matimba, va ta kuma nchavelelo wa xiviri ro sungula evuton’wini bya vona.”

Ndlela Yo Hambeta U Nyika Van’wana Ntsako

Mutshama-xitulu u tivise swivulavuri swa mune. Xo sungula, Ralph Walls loyi a nga xirho xa Komiti ya Rhavi ya le United States u vulavule hi nhloko-mhaka leyi nge “Tshamani Mi Xalamukile.” U kandziyise leswaku vubofu bya moya byi ni khombo swinene ku tlula vubofu bya xiviri. Vandlha ra lembe-xidzana ro sungula ra le Lawodikiya ri weriwe hi vubofu bya moya. Vakreste va le vandlheni rero lava a va ri mabofu emoyeni va pfuniwile, kambe minkarhi hinkwayo swa antswa swinene ku sivela vubofu byo tano hi ku tshama hi xalamukile emoyeni. (Nhlavutelo 3:14-18) Xivulavuri xi te: “Tshamani mi xalamukile, mi languta vanhu lava nga ni vutihlamuleri hilaha Yehovha a va langutaka hakona.” Mathwasana a ma fanelanga ma karhateka ku tlula mpimo loko ku ri ni swiphiqo evandlheni. Hosi Yesu Kreste wa swi vona swilo sweswo hinkwaswo. U ta endla leswaku timhaka to tano ti lunghisiwa hi nkarhi lowu faneleke.

Endzhaku, Samuel Herd wa Huvo leyi Fumaka u hlamule xivutiso lexi nge “Xana U Lunghekile?” Ku fana ni muvalangi la fambaka ni swiambalo leswi a nga ta ambala swona, mathwasana ma fanele ma tshama ma tiambexe timfanelo ta vumunhu lebyintshwa. Va fanele va va ni ntwela-vusiwana ku fana na Yesu. Loko munhu wa nhlokonho a n’wi byela a ku: “Loko u swi lava, u nga ndzi basisa,” Yesu u te: “Ndza swi lava. Basisiwa.” (Marka 1:40-42) Hiloko xivulavuri xi ku: “Loko mi swi tsakela hakunene ku pfuna vanhu, mi ta yi kuma ndlela ya ku va pfuna.” Vafilipiya 2:3 yi byela Vakreste leswaku va teka “van’wana va ri lava tlakukeke.” Makwerhu Herd u te: “Ku va ni mbilu yo titsongahata i swa nkoka ku tlula ku va ni vutivi. Lava mi nga ta hlangana na vona ensin’wini kun’we ni vamakwerhu va le vandlheni va ta vuyeriwa hi vutivi bya n’wina ntsena loko mi titsongahata.” U gimete hi ku vula leswaku  loko mathwasana ma tshama ma tiambexe rirhandzu ra Vukreste, ma ta va ma lunghekele ku ya eswiavelweni swa wona, ma ri karhi ma tiyiseka leswaku ma ta fika ma humelela.—Vakolosa 3:14.

Mark Noumair, un’wana wa valeteri va le Giliyadi, u sungule hi ku tlhontlha mianakanyo ya vayingiseri hi xihloko xa nkulumo yakwe lexi nge, “Xana U Ta Ku Hlakulela?” Laha xiritwana lexi nge “ku” xi yimela ku tlangela ka hina vunene bya Yehovha. Pisalema 103:2 yi ri: “Dzunisa Yehovha, Wena moya-xiviri wa mina, u nga swi rivali swiendlo swakwe hinkwaswo.” Emananga, Vaisrayele va tshike ku tlangela manna lawa a va hanya ha wona, va sungula ku ma vula “xinkwa lexi solekaka.” (Tinhlayo 21:5) Ku hundza ka nkarhi a ku cincanga ntikelo wa manna, kambe moya lowu a va ma tlangela ha wona wu tsanile. Muleteri loyi u te: “Loko mi rivala swiendlo swa Yehovha kutani mi pfumelela xiavelo xa n’wina xa le tikweni rimbe xi va nchumu lowu tolovelekeke ntsena, sweswo swi ta khumba ndlela leyi mi wu langutaka ha wona ntirho lowu Yehovha a mi nyikeke wona.” Pisalema 103:4 yi vula leswaku Yehovha u mi “[tlhandleka] harhi ya musa wa rirhandzu ni tintswalo.” Mathwasana ma ta tivonela musa wa Xikwembu wa rirhandzu emavandlheni lawa ma yaka eka wona.

Muleteri un’wanyana wa le Giliyadi, Lawrence Bowen, u vulavule hi nhloko-mhaka leyi nge “Xana Mi Ta Yi Kuma Mikateko?” U vule leswaku swirho swa ntlawa wa vu-119 wa Giliyadi swi titolovete hi ku gingiriteka leswaku swi va varhumiwa lava humelelaka. Kambe se a swi fanele swi namarhela Yehovha ni ntirho lowu a swi aveleke wona. Eka Nhlavutelo 14:1-4, lava 144 000 va hlamuseriwa va ri “lava hambetaka va landzela Xinyimpfana ku nga khathariseki leswaku xi ya kwihi.” Hinkwavo lava nga entlaweni wolowo va namarhela Yehovha ni N’wana wakwe ku nga khathariseki miringo leyi va langutanaka na yona, naswona va fikelela pakani ya vona. Xivulavuri xi te: “Ku nga khathariseki lexi nga humelelaka, na hina hi n’wi namarhela swinene Yehovha ni ntirho lowu a hi aveleke wona.” Hi ku endla sweswo, mathwasana ma ta “kuma” mikateko ya Yehovha.—Deteronoma 28:2.

Va Kuma Vuyelo Lebyinene eNtirhweni Wa Vona

Eka mahelo-vhiki man’wana ni man’wana ya nkarhi wa xikolo, swichudeni a swi hlanganyela entirhweni wa nsimu. Loko Wallace Liverance, mutsarisi wa swichudeni exikolweni, a vulavula na swona eka nongonoko, swi ve erivaleni leswaku swi humelerile. Swichudeni a swi chumayela mahungu lamanene hi tindzimi ta kwalomu ka khume naswona swi sungule ku dyondza Bibele ni vanhu vo hlayanyana lava se va endlaka nhluvuko. Mpatswa wun’wana lowu a wu ri eGiliyadi wu sungule dyondzo ya Bibele ni jaha rin’wana ra Muchayina. Endzhaku ko ri endzela ra vumbirhi, mpatswa lowu wu ri vutise ndlela leyi ri titwaka ha yona hi ku tiva Yehovha. Jaha leri ri pfule Bibele ivi ri wu kombela leswaku wu hlaya Yohane 17:3. A ri swi vona leswaku ri le ndleleni ya ku ya evuton’wini.

Endzhaku, Anthony Morris wa Huvo leyi Fumaka u vulavurisane ni vamakwerhu vanharhu lava nga swirho swa Tikomiti ta Marhavi le Côte d’Ivoire, Dominican Republic ni le Ecuador. Vamakwerhu lava va tiyisekise mathwasana leswaku Tikomiti ta Marhavi ti ma langutele hi mahlo-ngati naswona ti ta ma pfuna ku tolovelana ni swiyimo swa laha ma averiweke kona.

Hiloko ku landzela Leonard Pearson loyi a nga xirho xa ndyangu wa Bethele ya le United States, kutani a vulavula ni swirho swinharhu swa Tikomiti ta Marhavi ta le Democratic Republic of the Congo, Papua New Guinea na Uganda. Vamakwerhu lava va khutaze mathwasana leswaku ma hlanganyela swinene entirhweni wa nsimu. Mpatswa wun’wana wa varhumiwa lowu heteke malembe yo tlula 21 wu tirha eCongo wu pfune vanhu va kwalomu ka 60 leswaku va tinyiketela ivi va khuvuriwa. Mpatswa lowu sweswi wu dyondza Bibele ni vanhu va 30, naswona 22 wa vona va va kona eminhlanganweni ya vandlha. Tanihi leswi ku nga ni ntshovelo lowukulu swonghasi wa moya, sweswi i nkarhi lowunene wa ku tirha ensin’wini ya vurhumiwa.

Ku Nyikela Vumbhoni Hi Ku Gingiriteka

Gerrit Lösch wa Huvo leyi Fumaka u nyikele nkulumo yo hetelela. Nhloko-mhaka yakwe a yi ku “Ku Vulavula Hi Xikwembu Ni Ku Nyikela Vumbhoni Malunghana Na Yesu eSikwini Ra Hosi.” Marito lama nge “mbhoni,” “timbhoni” na “ku nyikela vumbhoni” ma humelela ka 19 ebukwini ya Nhlavutelo. Hikwalaho, Yehovha u wu hlamusela kahle ntirho lowu a lavaka leswaku vanhu vakwe va wu endla. Xana hi fanele hi byi nyikela rini  vumbhoni byebyo? “Esikwini ra Hosi.” (Nhlavutelo 1:9, 10) Siku rero ri sungule hi 1914, naswona ra ha ya emahlweni enkarhini wa hina, kasi ri ta hundzela ni le nkarhini lowu taka. Hi ku ya hi Nhlavutelo 14:6, 7, ntirho wa ku vulavula hi Xikwembu wu seketeriwa hi tintsumi. Nhlavutelo 22:17 yi kombisa leswaku vutihlamuleri bya ku kongomisa ntirho wa ku nyikela vumbhoni hi Yesu wu byarhisiwe masalela ya Vakreste lava totiweke. Kambe hinkwerhu hi fanele hi tirhisa lunghelo rero sweswi. Eka ndzimana 20, Yesu u ri: “Ndza ta hi ku hatlisa.” Makwerhu Lösch u khutaze hinkwavo lava a va ri kona a ku: “Byelani vanhu mi ku, ‘Tanani, mi nwa mati ya vutomi mahala.’ Yesu wa ta hi ku hatlisa. Xana hina hi lunghekile ke?”

Fred Rusk, loyi a veke muleteri wa le Xikolweni xa Giliyadi malembe ya 11, u gimete nongonoko hi xikhongelo xo nkhensa Yehovha lexi khumbeke timbilu ta hinkwavo lava a va ri kona. A ku ri makumu lamanene ya siku leri a ri tsakisa swinene.

[Bokisi leri nga eka tluka 13]

TINHLAYO TA NTLAWA

Nhlayo ya matiko lama yimeriweke: 10

Nhlayo ya matiko lawa va averiweke eka wona: 25

Nhlayo ya swichudeni: 56

Xiringaniso xa malembe: 32,5

Xiringaniso xa malembe entiyisweni: 16,4

Xiringaniso xa malembe evutirhelini bya nkarhi hinkwawo:12,1

[Xifaniso lexi nga eka tluka 15]

Ntlawa Wa Vu-119 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.