“Hi Fanele Ku Yingisa Xikwembu Tanihi Mufumi Ku Tlula Vanhu”

Ku Kutsuriwa Hi “Ngati Ya Risima”

YEHOVHA u kombise rirhandzu lerikulu hi ku rhumela N’wana wa yena la tswariweke a ri swakwe leswaku a ta nyikela hi vutomi bya yena lebyi hetisekeke byi va nkutsulo. Tanihi vanhu lava nga ni vudyoho, ha swi lava swinene ku kutsuriwa tanihi leswi a nga riki kona exikarhi ka hina “la nga kutsulaka makwavo, hambi ku ri ku nyika Xikwembu nkutsulo wakwe . . . leswaku . . . a hanya hi masiku.” (Pisalema 49:6-9) Ha swi tlangela swinene leswi Xikwembu xi “nyikel[eke] hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki”!—Yohane 3:16.

Xana nkutsulo wu hi kutsula njhani? A hi kambisiseni tindlela ta mune leti hi ntshunxiwaka ha tona hikwalaho ka xiendlo lexi lexikulu xa rirhandzu xa Yehovha Xikwembu.

Ku Ntshunxiwa Hi Nkutsulo

Xo sungula, gandzelo ra Yesu ri nga hi kutsula eka xidyoho lexi hi tswariweke na xona. Hinkwerhu ka hina hi tswariwe hi ri ni xidyoho. Ina, hi ni xidyoho hambiloko hi nga si swi tiva leswaku ku tlula nawu wa Yehovha i yini. Njhani? Varhoma 5:12 yi ri: “Xidyoho xi nghen[e] emisaveni hi munhu un’we [Adamu], ni rifu hikwalaho ka xidyoho.” Tanihi vana va Adamu la dyoheke, hi kume ku nga hetiseki ka yena tanihi ndzhaka. Hambiswiritano, hakelo ya nkutsulo yi endla leswaku hi ntshunxiwa evuhlongeni bya xidyoho lexi hi xi kumeke tanihi ndzhaka. (Varhoma 5:16) Yesu u “nantsw[e] rifu hikwalaho ka vanhu hinkwavo,” a ponisa vana va Adamu eka vuyelo bya xidyoho.—Vaheveru 2:9; 2 Vakorinto 5:21; 1 Petro 2:24.

Xa vumbirhi, nkutsulo wu nga hi ntshunxa eka vuyelo lebyi dlayaka bya xidyoho. “Hakelo leyi tisiwaka hi xidyoho i rifu.” (Varhoma 6:23) Nxupulo wa xidyoho i rifu. Hikwalaho ka rifu ra yena ra xitlhavelo, N’wana wa Xikwembu u endle leswaku vanhu lava yingisaka va kota ku kuma vutomi lebyi nga heriki. Hakunene, “un’wana ni un’wana loyi a kombisaka ripfumelo eka N’wana u ni vutomi lebyi nga heriki; loyi a nga yingisiki N’wana a nge byi kumi vutomi.”—Yohane 3:36.

Xiya leswaku hi nga kutsuriwa eka vuyelo bya xidyoho loko ntsena hi kombisa ripfumelo eka N’wana wa Xikwembu. Leswi swi katsa ku endla mindzulamiso evuton’wini bya hina kutani hi hanya hi ku pfumelelana ni ku rhandza ka Xikwembu. Hi fanele hi tshika ndlela yin’wana ni yin’wana leyi hoxeke leyi swi nga endlekaka a hi hanya ha yona kutani hi teka goza ro endla leswi tsakisaka Xikwembu. Muapostola Petro u vule leswaku hi fanele hi ‘tisola, hi hundzuka leswaku ku hlanguriwa swidyoho swa hina.’—Mintirho 3:19.

Xa vunharhu, xitlhavelo lexi nyikeriweke hi Yesu xa hi ntshunxa eka ripfalo leri tivonaka nandzu. Vanhu hinkwavo lava tinyiketelaka eka Yehovha kutani va va vadyondzisiwa lava khuvuriweke va N’wana wa yena va kuma nchavelelo. (Matewu 11:28-30) Hambileswi hi nga hetisekangiki, hi kuma ntsako lowukulu hileswi hi tirhelaka Xikwembu hi ripfalo leri baseke. (1 Timotiya 3:9; 1 Petro 3:21) Loko hi tivula swidyoho swa hina kutani hi swi tshika, hi kombisiwa musa naswona a ha ha kingindziwi hi ripfalo.—Swivuriso 28:13.

Nkutsulo Wa Hi Pfuna Wu Tlhela Wu Hi Nyika Ntshembo

Xo hetelela, loko hi kombisa ripfumelo eka nkutsulo, se ha swi tiva leswaku Xikwembu xi hi languta njhani. Muapostola Yohane u tsarile: “Loko mani na mani a endla xidyoho, hi ni mupfuni eka Tatana, a nga Yesu Kreste, loyi a lulameke.” (1 Yohane  2:1) Malunghana ni xiphemu lexi endliwaka hi Yesu tanihi mupfuni, muapostola Pawulo u tsarile: “Wa swi kota ku va ponisa hi ku helela lava tshinelelaka Xikwembu ha yena, hikuva nkarhi hinkwawo wa hanya leswaku a va kombelela.” (Vaheveru 7:25) Loko ha ha ri ni xidyoho, hi ta tama hi lava ku pfuniwa hi Muprista Lonkulu Yesu Kreste leswaku Xikwembu xi ta hi languta hi ndlela leyinene. Xana Yesu u hi tirhela tanihi muprista lonkulu hi ndlela yihi?

Endzhaku ka masiku ya 40 a pfuxiwile hi 33 C.E., Yesu u tlhandlukele etilweni, laha a fikeke a nyikela nkoka wa “ngati ya risima” ya yena eka Xikwembu. Hikwalaho, ku nga ri khale Yesu u ta ntshunxa vanhu lava yingisaka eka xidyoho ni rifu. * (1 Petro 1:18, 19) Kutani, swa fanela leswaku hi rhandza Yesu Kreste hi tlhela hi n’wi yingisa.

Ku engetela kwalaho, hi fanele hi rhandza Yehovha Xikwembu hi tlhela hi n’wi yingisa. Hi rirhandzu u endle leswaku swi koteka leswaku hi “ntshunxiwa hi nkutsulo.” (1 Vakorinto 1:30) Hi n’wi kolota vutomi bya hina bya sweswi swin’we ni ntshembo lowu hi nga na wona wo hanya vutomi lebyi nga heriki. Hikwalaho, hi ni xivangelo lexi twalaka xo “yingisa Xikwembu tanihi mufumi ku tlula vanhu.”—Mintirho 5:29.

[Nhlamuselo ya le hansi]

[Bokisi/Swifaniso leswi nga eka tluka 9]

XANA A WU SWI TIVA?

• Loko Yesu a tlhandlukela etilweni a a ri eNtshaveni ya Mitlhwari.—Mintirho 1:9, 12.

• I vaapostola va Yesu vo tshembeka ntsena lava n’wi voneke loko a tlhandluka.—Mintirho 1:2, 11-13.