U Vulavurisana Njhani Ni Nkataku?

“PAPILA Ro Kombisa Rirhandzu Leri Tsariweke Hi Munhu Wa Malembe Ya 60 Hi Vukhale.” Yoleyo a ku ri nhloko-mhaka ya mphikizano wo gembula lowu a wu endliwa hi banki ya le Japani malembe ma nga ri mangani lama hundzeke. Wu khutaze vanhu va le Japani lava nga ni malembe ya va-50 na va-60 leswaku va phofula “ndlela leyi va titwaka ha yona hakunene” hi vanghana va vona va vukati. Munhu un’wana loyi a ngheneleke mphikizano wolowo u tsalele nsati wa yena a ku: “Swi nga ha ku hlekisa, kambe ndzi ta tisola loko ndzo ka ndzi nga swi vuli, ndzi vula swi huma embilwini ndzi ri: Ndza nkhensa leswi u tekaneke na mina.”

Eka mindhavuko yo hambana-hambana, ku katsa ni yin’wana ya le Vuxeni, ku phofula ndlela leyi munhu a titwaka ha yona a swi khutaziwi. Kambe, vanhu vo tlula 15 000 va wu nghenerile mphikizano wolowo wo tsala mapapila yo kombisa rirhandzu. Wu tsakeriwe swinene lerova ku endliwe wun’wana, naswona ku tsariwe ni tibuku leti sekeriweke eka mapapila lawa. Leswi swi vula leswaku le ndzeni-ndzeni, vo tala va swi navela ku phofula ndlela leyi va titwaka ha yona hi vanghana va vona va vukati lava va rhandzaka. Kambe van’wana a va swi lavi ku phofula ndlela leyi va titwaka ha yona. Ha yini? Swi nga ha endleka swi vangiwa hi leswi swi lavaka matshalatshala ni vuswikoti leswaku va endla van’wana—vo tanihi vanghana va vona va vukati—va twisisa ndlela leyi va titwaka ha yona.

Hitoshi Kato, loyi a tsaleke buku leyi vulavulaka hi ku huma penceni, u vula leswaku exikarhi ka mimpatswa leyi dyuhaleke eJapani, hakanyingi mhaka yo dlaya vukati yi sunguriwa hi vavasati hikwalaho ka xikhomela lexi se ku nga hundza malembe yo tala va ri na xona. U ri: “Kambe ku tlhela ku vangiwa hileswi mpatswa wu nga phofuliki ndlela leyi wu titwaka ha yona loko wu ri ni swiphiqo leswikulu.”

Loko a huma penceni, wanuna a nga ha hlamala loko nsati wa yena a ku, swa mina ni swa wena swi herile. Mpatswa lowu wu nga ha va wu hete malembe yo tala wu nga buli malunghana ni  ndlela leyi wu titwaka ha yona. Nuna na nsati va nga ha va va ringetile ku phofula ndlela leyi va titwaka ha yona, kambe va tsandzeka ku vulavula hi swilo leswi akaka. Ematshan’weni yo va ni vuxaka lebyikulu, va tshamela ku holova.

Xana nuna na nsati va nga ti lulamisa njhani timholovo ta vona hi ndlela yo rhula va tlhela va phofula ndlela leyi va titwaka ha yona, hi ndlela leyi tsakisaka? Swi nga ha ku tsakisa ku tiva leswaku swiringanyeto leswi tirhaka swa kumeka ebukwini ya khale, leyi se yi nga ni malembe-xidzana yi tekiwa yi ri ya nkoka—ku nga Bibele, ku nga ri ebukwini yo karhi ya sweswinyana leyi tsariweke hi mutsundzuxi wa ta vukati.