Swivutiso Swa Vahlayi

Xana Yesu a a vula yini loko a byela Nikodema a ku: “A ku na munhu loyi a tlhandlukeleke etilweni handle ka loyi a xikeke hi le tilweni, ku nga N’wana wa munhu”?—Yohane 3:13.

Hi nkarhi wolowo Yesu a a ri emisaveni, naswona a a nga si tlhandlukela kumbe ku tlhelela etilweni. Hambiswiritano, leswi hi swi tivaka malunghana na Yesu swin’we ni mongo wa marito yakwe swi nga hi pfuna ku twisisa nhlamuselo yakwe.

Yesu u “[xike] hi le tilweni” hikuva enkarhini lowu hundzeke a a tshama exivandleni xa moya ni Tata wakwe, kambe hi nkarhi lowu vekiweke, vutomi bya N’wana loyi byi hundziseriwe embelekweni wa Mariya, kutani Yesu a velekiwa tanihi munhu wa nyama. (Luka 1:30-35; Vagalatiya 4:4; Vaheveru 2:9, 14, 17) Endzhaku ka rifu rakwe, Yesu a a ta pfuxiwa tanihi xivumbiwa xa moya kutani a tlhela a ya tshama na Yehovha. Xisweswo, emahlweninyana ka ku dlayiwa ka yena, Yesu u khongerile a ku: “Tatana, ndzi vangamise etlhelo ka wena hi ku vangama loku ndzi veke na kona etlhelo ka wena misava yi nga si va kona.”—Yohane 17:5; Varhoma 6:4, 9; Vaheveru 9:24; 1 Petro 3:18.

Loko Yesu a vulavula na Nikodema lowa Mufarisi tlhelo mudyondzisi wa le Israyele, A a nga si tlhelela etilweni. Ina, a a nga ri kona munhu un’wana la tshameke a fa kutani a tlhandlukela exivandleni xa moya, etilweni. Yesu hi byakwe u vule leswaku Yohane Mukhuvuri a a ri muprofeta wa Xikwembu la nga ringaniki na munhu, kambe “munhu lontsongo emfun’weni wa matilo u nkulu eka yena.” (Matewu 11:11) Nakambe muapostola Petro u hlamusele leswaku hambi ku ri Hosi Davhida lowo tshembeka u file naswona a a ha ri eka sirha-bako rakwe; Davhida a nga tlhandlukelanga etilweni. (Mintirho 2:29, 34) A ku ri ni xivangelo lexi endleke leswaku vanhu vo tanihi Davhida, Yohane Mukhuvuri ni van’wana vavanuna va ripfumelo lava feke emahlweni ka Yesu va nga tlhandlukeli etilweni. Va fe emahlweni ko va Yesu a pfula ndlela ya leswaku vanhu va pfuxeriwa evuton’wini bya le tilweni. Muapostola Pawulo u tsale leswaku Yesu, ku fana ni murhangeri, u ‘khangule ndlela leyintshwa leyi hanyaka’ yo ya etilweni.—Vaheveru 6:19, 20; 9:24; 10:19, 20.

Leswi Yesu a a nga si fa kutani a pfuxiwa, xana a a vula yini loko a byela Nikodema a ku: “A ku na munhu loyi a tlhandlukeleke etilweni handle ka loyi a xikeke hi le tilweni, ku nga N’wana wa munhu”? (Yohane 3:13) Kambisisa mongo, kumbe leswi Yesu a a vulavula ha swona na Nikodema.

Loko mufumi loyi wa Muyuda a ye eka Yesu nivusiku, Yesu u n’wi byerile a ku: “Hakunene ndzi tiyisile ndzi ri eka wena, Loko munhu a nga velekiwanga ra vumbirhi, a nge wu voni mfumo wa Xikwembu.” (Yohane 3:3) Nikodema u vutisile a ku: ‘Swi nga kotekisa ku yini sweswo? Xana munhu a nga velekiwa njhani ra vumbirhi?’ A a nga yi twisisi dyondzo leyi ya le Bibeleni ya ku nghena eMfun’weni wa Xikwembu. Xana a yi ri kona ndlela yin’wana yo dyondza hi swilo leswi? Doo, a a nga ta dyondza hi swilo leswi hi ku hlamuseriwa hi munhu wa nyama; a nga kona munhu un’wana loyi a a ta n’wi dyondzisa hi mhaka leyi hikuva a nga kona la tshameke a ya etilweni, xisweswo a swi fanelekela swinene ku hlamusela xin’wana ni xin’wana malunghana ni ku nghena eMfun’weni. Munhu un’we ntsena loyi a a ta swi kota a ku ri Yesu. A a ta dyondzisa Nikodema ni van’wana hikuva Yena u xike hi le tilweni naswona a a faneleka ku dyondzisa vanhu malunghana ni swilo swo tano.

Xisweswo xivutiso lexi nga eka ndzimana leyi xi wu veka erivaleni nkoka wa ku dyondza Rito ra Xikwembu. Munhu a nga fanelanga a khunguvanyisiwa hi tsalwa hileswi ri tikombaka ri tika ku ri twisisa. Leswi Bibele yi swi vulaka endhawini yo karhi swi nga twisisiwa hi ku pfuniwa hi tindzimana tin’wana leti vulavulaka hi mhaka leyi fanaka. Ku tlula kwalaho, hakanyingi mongo—xiyimo lexi a va ri eka xona kumbe mhaka leyi a ku vulavuriwa ha yona—swi nga hi pfuna leswaku hi kuma nhlamuselo leyi twisisekaka ya ndzimana yo tika.