A A Dyuharile Kambe A A Nga Ri Na Xivundza

LOKO vanhu va dyuhala, vo tala va lamala va tlhela va biwa hi xivundza. Kambe a swi nga ri tano eka Fernand Rivarol, loyi a feke a ri ni malembe ya 95 eGeneva le Switzerland. A a tshama a ri yexe hikuva a a feriwe hi nsati naswona n’wana wakwe wa xisati la tekiweke a a ri ni muti wa yena. Hambileswi nkarhi wo tala a a wu heta a ri endlwini yakwe, a a nga ri na xivundza. Hakanyingi a a tshama ekamareni ro wisela ka rona a khome riqingho, kutani a bela vanhu tinqingho a bula na vona hi timhaka ta moya.

Evuton’wini bya yena lebyi tsakisaka, ku tshame ku va ni nkarhi lowu Fernand a a pfaleriwe hi ndlela ya xiviri. Ha yini? Endzhakunyana ka loko Fernand ni nsati wakwe va ve Timbhoni ta Yehovha leti hisekaka hi 1939, ku sungule Nyimpi ya Vumbirhi ya Misava eYuropa. Fernand u namarhele xiboho xa yena lexi sekeriweke eBibeleni xa leswaku a nga vavisi munhu. Hikwalaho ka sweswo u lahlekeriwe hi ntirho wakwe naswona u boheke ku khotsiwa minkarhi yo hlayanyana—malembe ya ntlhanu ni hafu loko ma helerile—naswona hi nkarhi wolowo u hambanisiwe ni nsati wakwe ni xinhwanyatana xakwe.

Loko Fernand a tsundzuka ta nkarhi lowu hundzeke, u te: “Eka vanhu vo tala, a swi tikomba onge ndzi lo tshika ntirho lowunene kutani ndzi siya ndyangu wa mina evusiwaneni. Vanhu a va ndzi sandza naswona va ndzi teka ku fana ni xigevenga. Hambiswiritano, loko ndzi ehleketa hi malembe wolawo yo tika, ndzi yi tsundzuka kahle ndlela leyi Yehovha a hi seketeleke ni ku hi pfuna ha yona. Hambileswi se ku hundzeke malembe yo tala, kambe ripfumelo ra mina eka Yehovha ra ha tiyile hilaha a ri ri hakona hi nkarhi wolowo.”

Ripfumelo leri ri susumetele Fernand leswaku a chumayela van’wana hi ta ntshembo wa yena lowu sekeriweke eMatsalweni hi ku va bela tinqingho. Loko a bule kahle ni munhu wo karhi, a a n’wi rhumelela buku leyi sekeriweke eBibeleni. Endzhakunyana a a tlhela a bela munhu yoloye riqingho leswaku a vutisa loko a yi tsakerile buku leyi a n’wi nyikeke yona. Minkarhi yin’wana vanhu a va n’wi hlamula hi ku n’wi rhumela papila ro tlangela, kutani sweswo a swi n’wi tsakisa swinene.

U nga ha endzeriwa hi munhu loyi a fanaka na Fernand endhawini leyi u tshamaka eka yona. Ha yini u nga n’wi yingiseli leswaku u ta tiva leswi a swi pfumelaka? Minkarhi hinkwayo Timbhoni ta Yehovha ti tiyimiserile ku vulavurisana na wena hi swilo leswi ti swi pfumelaka.