“Ha Yini Hi Ri Laha?”

ELIE WIESEL la kumeke Sagwadi ra Nobel naswona a nga un’wana wa lava poneke hi nkarhi wa ku dlayiwa ka Vayuda va le Yuropa hi Manazi, u tshame a vula leswaku i “xivutiso xa nkoka swinene lexi vanhu va faneleke ku anakanyisisa hi xona.” Hi xihi xivutiso xa kona? Hi lexi nge, “Ha yini hi ri laha?”

Xana u tshame u anakanyisisa hi xivutiso xexo? Vanhu vo tala va anakanyisise hi xona kambe a va yi kumi nhlamulo. Eka matshalatshala ya yena yo kuma xikongomelo xa vutomi, Arnold Toynbee n’wamatimu wa le Britain u tsarile a ku: “Pakani ya xiviri ya munhu i ku dzunisa Xikwembu ni ku kuma ntsako lowu humaka eka xona hilaha ku nga heriki.”

Lexi tsakisaka, malembe lama tlulaka magidi manharhu lama hundzeke, wanuna un’wana la tiviwaka hi ku va mutivi wa vutomi wo tlhariha se a a yi kumile nhlamulo ya xisekelo ya xivutiso xexo. Hosi Solomoni wo tlhariha u te: “Loko hinkwaswo swi twiwile, makumu ya mhaka hi lawa: Chava Xikwembu xa ntiyiso u hlayisa swileriso swa xona. Hikuva leyi hi yona mfanelo hinkwayo ya munhu.”—Eklesiasta 12:13.

Nsinya lowu wa nawu wa xisekelo wu seketeriwe hi N’wana wa Xikwembu, Yesu Kreste. Loko a ha ri emisaveni, Yesu u tikarhate hilaha a nga kotaka hakona leswaku a dzunisa Tata wakwe wa le tilweni. Ku tirhela Muvumbi wa yena swi pfune Yesu swinene evuton’wini. Swi n’wi tiyisile a kala a ku: “Swakudya swa mina i ku endla ku rhandza ka loyi a ndzi rhumeke.”—Yohane 4:34.

Kutani ha yini hi ri laha? Ku fana na Yesu, Solomoni ni malandza man’wana ya Xikwembu yo tala, hi nga xi kuma xikongomelo xa xiviri xa vutomi ni ntsako lowu nga heriki hi ku endla ku rhandza ka Xikwembu. Xana u nga swi tsakela ku tiva leswi engetelekeke malunghana ni ndlela leyi hi nga xi gandzelaka ha yona Xikwembu “hi moya ni ntiyiso”? (Yohane 4:24) Timbhoni ta Yehovha ta le ndhawini ya ka n’wina ti ta swi tsakela ku ku pfuna leswaku u kuma nhlamulo ya xivutiso lexi nge, “Ha yini hi ri laha?”