Xana Muavanyisi A Nga Lulamisiwa Ke?

SLADJANA, un’wana wa Timbhoni ta Yehovha le Croatia, a a fanele a ya ehubyeni a ya lunghisa timhaka ta timali. U fike hi nkarhi emahlweni ka muavanyisi. Hambiswiritano, un’wana loyi a a katseka emhakeni leyi u hlwele ku fika. Sladjana a a hisekela ku chumayela, kutani loko vanhu hinkwavo va ha rindzile, u ve ni xivindzi xo vulavula ni muavanyisi.

U vutisile a ku: “Nkulukumba, xana a wu swi tiva leswaku ku nga ri khale ku ta va ku ri hava vaavanyisi ni tihuvo emisaveni?” I ntiyiso leswaku a a vulavula hi vaavanyisi va namuntlha.

Hi ku hlamala, muavanyisi u n’wi langutile, a ri hava lexi a ta n’wi byela xona. Hi nkarhi wolowo huvo yi nambe yi sungula. Loko yi hela ivi Sladjana a ya sayina maphepha, muavanyisi u voyamisele nhloko eka yena kutani a n’wi vutisa hi ku hlevetela a ku: “Xana wa tiyiseka hi leswi u nga ndzi byela swona, leswaku ku nga ri khale ku ta va ku nga ha ri na vaavanyisi ni tihuvo emisaveni?”

“Ina, Nkulukumba. Ndza tiyiseka hakunene!” ku hlamula Sladjana.

“I vumbhoni byihi lebyi u nga na byona hi sweswo?” ku vutisa muavanyisi.

“Byi kumeka eBibeleni,” ku hlamula Sladjana.

Muavanyisi u vule leswaku a nga rhandza ku tihlayela vumbhoni lebyi, kambe a a ri hava Bibele. Sladjana u n’wi tshembise leswaku u ta n’wi kumela Bibele yakwe. Timbhoni ti endzele muavanyisi loyi, ti n’wi nyika Bibele, kutani ti n’wi khutaza leswaku a va ni dyondzo ya Bibele ya vhiki na vhiki. Muavanyisi u amukele xikhutazo xexo kutani hi ku hatlisa a va un’wana wa Timbhoni ta Yehovha.

Marito ya vuprofeta ya Pisalema 2:10 ma ri: “Sweswi, N’wina tihosi, twisisani; pfumelani ku lulamisiwa, N’wina vaavanyisi va misava.” Swi tsakisa swinene ku vona vanhu vo tano va kombisa ku titsongahata hi ku amukela nkongomiso wa rirhandzu wa Yehovha!

[Xifaniso lexi nga eka tluka 32]

Sladjana a ri na muavanyisi