U Lamarile Kambe U Tiyimisele Ku Tirha

LOKO u vona Leonardo ro sungula, a wu nge ehleketi leswaku u tirha ku aka. U tsemeke swandla enkarhini lowu hundzeke loko a ri karhi a tirha. Hambileswi a lamaleke, Leonardo a a tirha hi matimba loko ku ri karhi ku akiwa eAcajutla, le El Salvador, hilaha u nga swi vonaka hakona laha xifanisweni.

Leswaku na yena a hlanganyela entirhweni wolowo wo aka, Leonardo u tiendlele switirho swa yena. U nghenisa nkono wa yena wa xinene eka xikhomo xa nsimbi lexi khomisiweke emakumu ka foxolo ivi a chefulela thyaka hi vukheta a ri hoxa ebarheni. Eka swikhomo swa bara, u tihoxele swikhomo swa xirhendzevutana leswaku a kota ku ri susumeta hi yexe. I yini lexi n’wi susumeteleke ku hlanganyela entirhweni lowu?

Leonardo a a lava ku hlanganyela eku akiweni ka Holo ya Mfumo, kumbe ndhawu yo gandzela eka yona ya vandlha ra ka vona ra Timbhoni ta Yehovha. A a ri ni swivangelo swo tala leswi a a ta tiyimelela ha swona leswaku a nga hlanganyeli entirhweni lowu wo aka. A a ri ni ntirho wo tihanyisa wa nkarhi hinkwawo, a a lamarile, naswona se a a ri nandza wa vutirheli evandlheni ra ka vona. Kambe, a a lava ku endla leswi a nga swi kotaka leswaku a tirhela Xikwembu ni le ndhawini leyi a ku akiwa eka yona.

Xana na wena u tiyimisele hi ndlela leyi fanaka ku tirhela Xikwembu? Ematshan’weni yo tumbela hi ku lamala ka yena, Leonardo u tirhise vuswikoti bya yena byo anakanya leswaku a tiendlela switirho swa yena n’wini leswaku a ta endla ntirho lowu a a nga ta swi kota ku wu endla. A a tirhela Xikwembu ‘hi mianakanyo ya yena hinkwayo.’ (Matewu 22:37) Ku nga khathariseki leswaku va lamarile kumbe a va lamalanga, vatirhi lava tirhaka ku aka Tiholo ta Mfumo ta Timbhoni ta Yehovha emisaveni hinkwayo va ni moya wo tinyikela. Un’wana ni un’wana wa amukeleka emihlanganweni ya tona.