Pfumelela Rito Ra Xikwembu Ri Kongomisa Mikondzo Ya Wena

“Rito ra wena i rivoni enengeni wa mina, ni ku vonakala endleleni ya mina.”—PISALEMA 119:105.

1, 2. Ha yini vanhu vo tala va nga kotanga ku kuma ku rhula ka ntiyiso ni ntsako?

XANA u tshama u vutisa munhu ndlela? Kumbexana se a wu fikile laha u yaka kona kambe u nga tiyiseki leswaku u fanele u jika kwihi. Kumbe swi nga endleka a wu lahlekele ekule lerova u boheka ku tlhelela endzhaku. Loko u lahlekele ekusuhi kumbe ekule, xana a ku nge vi vutlhari ku landzelela ndlela leyi u hlamuseriweke yona hi munhu loyi a yi tivaka kahle ndhawu ya kona? Munhu wo tano a nga ku pfuna ku fika laha u yaka kona.

² Eka magidi ya malembe, vanhu hi ku angarhela va ringete ku gugurhuteka va hanya hi ku mbambela, va nga lavi ku pfuniwa hi Xikwembu. Hambiswiritano, vanhu lava nga hetisekangiki a va koti ku ya helo loko va nga pfuniwi. Va tsandzeka ku kuma ndlela yo fikelela ku rhula ka ntiyiso ni ntsako. Ha yini va nga swi koti? Malembe yo tlula 2 500 lama hundzeke, muprofeta Yeremiya u te: “Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Mani na mani loyi a ringetaka ku kongomisa mikondzo yakwe a nga lavi mpfuno lowu faneleke, ti ta n’wi khela matluka. Ina, vanhu va lava nkongomiso!

3. Ha yini Yehovha Xikwembu a faneleka kahle ku nyika vanhu nkongomiso, naswona u tshembisa yini?

³ Yehovha Xikwembu hi yena loyi a fanelekaka kahle ku nyika vanhu nkongomiso wo tano. Ha yini? Hikuva ndlela leyi vanhu va endliweke ha yona u yi tiva swinene ku tlula mani na mani. Naswona u swi tiva kahle leswaku swi tise ku yini leswaku vanhu va hambuka ivi va lahleka. Nakambe u tiva leswi lavekaka leswaku va vuyela endleleni leyi va hambukeke eka yona. Ku tlula kwalaho, leswi a nga Muvumbi, Yehovha minkarhi hinkwayo u tiva leswi nga swinene eka hina. (Esaya 48:17) Kutani hi nga xi tshemba hi ku helela xitshembiso xakwe lexi nga eka Pisalema 32:8: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.” Mhaka yi le rivaleni: Yehovha u nyikela vukongomisi lebyinene ku tlula hinkwabyo. Kambe, xana u hi kongomisa njhani?

4, 5. Xana marito ya Xikwembu ma nga hi kongomisa njhani?

⁴ Mupisalema u vulavule na Yehovha hi xikhongelo a ku: “Rito ra wena i rivoni enengeni wa mina, ni ku vonakala endleleni ya mina.” (Pisalema 119:105) Marito ni switsundzuxo swa Xikwembu swi kumeka eBibeleni, naswona swi nga hi pfuna ku hlula swihinga leswi hi nga hlanganaka na swona evuton’wini bya hina. Phela, loko hi hlaya Bibele ivi hi yi pfumelela leswaku yi hi kongomisa, hi ta vona ku hetiseka ka marito ya Esaya 30:21 lama nge: “Tindleve ta n’wina ti ta twa rito endzhaku ka n’wina ri ku: ‘Ndlela hi leyi. Fambani hi yona.’”

⁵ Kambe xiya leswaku Pisalema 119:105 yi kombisa tindlela timbirhi leti yelanaka leti Rito ra Xikwembu ri tirhaka ha tona. Yo sungula, i rivoni enengeni wa hina. Loko hi langutane ni swiphiqo swa siku na siku, misinya ya milawu leyi kumekaka eBibeleni yi fanele yi kongomisa mikondzo ya hina leswaku hi endla swiboho swa vutlhari kutani hi papalata mintlhamu ya misava leyi. Ya vumbirhi, switsundzuxo swa Xikwembu swi hi voningela ndlela, swi hi pfuna ku endla swiboho leswi fambisanaka ni ntshembo lowu hi nga na wona wa ku hanya hi masiku eParadeyisini leyi Xikwembu xi yi tshembiseke. Loko hi voningeriwe kahle, hi ta kota ku vona loko ndlela yi fambeka kumbe yi nga fambeki.  (Varhoma 14:21; 1 Timotiya 6:9; Nhlavutelo 22:12) A hi kambisiseni ndlela leyi marito ya Xikwembu lama kumekaka eBibeleni ma nga vaka rivoni emilengeni ni le ndleleni ya hina ha yona.

“Rivoni eNengeni Wa Mina”

6. Marito ya Xikwembu ma nga va rivoni emilengeni ya hina ehansi ka swiyimo swihi?

⁶ Siku na siku hi endla swiboho. Swiboho swin’wana swi nga vonaka swi ri switsongo, kambe minkarhi yin’wana hi nga langutana ni swilo leswi ringaka ku tikhoma ka hina, ku tshembeka ka hina kumbe xiboho xa hina xa ku papalata ku hlanganyela eka swa tipolitiki. Leswaku hi kota ku hlula miringo yo tano, hi fanele hi ‘letela matimba ya hina ya ku twisisa leswaku hi hambanisa leswi lulameke ni leswi hoxeke.’ (Vaheveru 5:14) Loko hi kuma vutivi lebyi kongomeke bya Rito ra Xikwembu naswona hi ringeta ku twisisa misinya ya rona ya milawu, hi ta va hi letela ripfalo ra hina leswaku hi endla swiboho leswi tsakisaka Yehovha.—Swivuriso 3:21.

7. Hlamusela xiyimo lexi nga ringaka Mukreste leswaku a dzumba ni vatirhi-kulobye lava nga riki vapfumeri.

⁷ Xiya xikombiso. Xana u munhu la vupfeke, loyi a ringetaka hi matimba ku tsakisa mbilu ya Yehovha? (Swivuriso 27:11) Loko swi ri tano u endla kahle. Kambe a hi nge vatirhi-kuloni va ku nyika thikithi leswaku u famba na vona mi ya hlalela ntlangu wo karhi. Entirhweni va ku tsakela swinene kutani va lava ku hungasa na wena niloko se mi chayisile. U nga vona onge vanhu vo tano va ni timbilu letinene. Nakambe swi nga endleka va tikhome kahle. Xana u ta endla yini? Xana ku amukela xirhambo xa vona swi nga va ni khombo ro karhi? Rito ra Xikwembu ri nga ku pfuna njhani leswaku u endla xiboho lexinene emhakeni leyi?

8. Hi yihi misinya ya milawu ya Matsalwa leyi hi pfunaka ku va ni vonelo leri faneleke hi ku tihlanganisa ni van’wana?

⁸ Xiya misinya yi nga ri yingani ya milawu ya Matsalwa. Nsinya wa nawu wo sungula lowu u nga wu tsundzukaka wu kumeka eka 1 Vakorinto 15:33, leyi nge: “Vunakulobye byo biha byi onha mikhuva leyi pfunaka.” Xana ku namarhela nsinya lowu wa nawu swi vula leswaku u fanele u va papalata hi ku helela vanhu lava nga riki vapfumeri? Matsalwa ma kombisa leswaku a swi tano. Phela, muapostola Pawulo hi byakwe a a khathala hi “vanhu va mixaka hinkwayo,” ku katsa ni lava nga riki vapfumeri. (1 Vakorinto 9:22) Tanihi Vakreste hi languteriwe ku khathala hi van’wana—ku katsa ni lava va nga riki vapfumeri-kulorhi. (Varhoma 10:13-15) Kunene, hi nga xi tirhisa njhani xitsundzuxo xa ku “[endlela] hinkwavo leswi nga swinene,” loko hi papalata vanhu lava nga lavaka mpfuno wa hina?—Vagalatiya 6:10.

9. I xitsundzuxo xihi xa le Bibeleni lexi hi pfunaka ku ringanisela eka vuxaka bya hina ni vatirhi-kulorhi?

⁹ Hambiswiritano, ku va ni xinghana eka mutirhi-kuloni a swi fani ni ku va munghana wa yena lonkulu. Emhakeni leyi ku ni nsinya wun’wana wa nawu wa Matsalwa lowu tirhaka. Muapostola Pawulo u lemukise Vakreste a ku: “Mi nga paniwi ni lava va nga riki vapfumeri.” (2 Vakorinto  6:14) Ma vula yini marito lama nge “mi nga paniwi ni lava va nga riki vapfumeri”? Vuhundzuluxeri byin’wana bya Bibele byi tirhisa marito lama nge “mi nga endli xiseve-seve,” “mi nga ringeti ku va nyandza yin’we” kumbe “tshikani ku va ni xikwelekwele.” Xana ku va ni vuxaka ni mutirhi-kuloni swi va leswi nga fanelangiki loko swi fika kwihi? Vuxaka byo tano byi va lebyi hundzeletiweke loko swi te yini? Rito ra Xikwembu, ku nga Bibele, ri nga kongomisa mikondzo ya wena emhakeni leyi.

10. (a) Xana Yesu u va hlawule njhani vanghana? (b) Hi swihi swivutiso leswi nga pfunaka munhu ku endla swiboho leswinene hi vanghana?

¹⁰ Xiya xikombiso xa Yesu, loyi a rhandzeke vanhu ku sukela loko va vumbiwa. (Swivuriso 8:31) Loko a ri laha misaveni, u ve ni vuxaka lebyikulu ni valandzeri vakwe. (Yohane 13:1) Nakambe ‘u titwe a rhandza’ munhu loyi a a hambukisiwe hi vukhongeri. (Marka 10:17-22) Kambe hi hala tlhelo, Yesu a a hlawula kahle vanhu lava a lavaka ku va ni xinghana lexikulu na vona. A a nga ri na vuxaka lebyikulu ni vanhu lava a va nga swi tsakeli hi mbilu hinkwayo ku endla ku rhandza ka Tata wa yena. Siku rin’wana, Yesu u te: “Mi vanakulorhi va mina loko mi endla leswi ndzi mi lerisaka swona.” (Yohane 15:14) Ina, swi nga endleka u tolovelane ni un’wana wa vatirhi-kuloni. Kambe tivutise: ‘Xana munhu loyi u tiyimisele ku endla leswi Yesu a leriseke swona? Xana wa swi tsakela ku dyondza hi Yehovha, loyi Yesu a hi leriseke leswaku hi gandzela yena? Xana u tikhome hi ndlela leyi mina ndzi tikhomaka ha yona tanihi Mukreste?’ (Matewu 4:10) Loko u vulavula ni vatirhi-kuloni kutani u phikelela eku tirhiseni ka misinya ya milawu ya Bibele, swivutiso leswi swi ta hlamuleka hi ku olova.

11. Nyika swikombiso swa swiyimo leswi marito ya Xikwembu ma faneleke ma kongomisa mikondzo ya hina eka swona.

¹¹ Ku ni swiyimo swin’wana swo tala laha marito ya Xikwembu ma nga fanaka ni rivoni emilengeni ya hina. Hi xikombiso, Mukreste la nga tirhiki a nga kuma ntirho lowu a wu lavaka hi xihatla. Hambiswiritano, entirhweni wa kona a nge wu kumi nkarhi wa ku hefemula, naswona loko a wu amukela, u ta xwa minhlangano yin’wana ya Vukreste naswona a nge koti ku hlanganyela emintirhweni yin’wana ya vugandzeri bya ntiyiso. (Pisalema 37:25) Mukreste un’wana a nga ringeka hi matimba leswaku a hlalela vuhungasi lebyi lwisanaka hi ku kongoma ni misinya ya milawu ya Bibele. (Vaefesa 4:17-19) Kasi  un’wana a nga va ni mboyamelo wa ku hatla a hlundzukisiwa hi swihoxo swa vapfumeri-kulobye. (Vakolosa 3:13) Eka swiyimo sweswo hinkwaswo, hi fanele hi pfumelela Rito ra Xikwembu ri va rivoni emilengeni ya hina. Kunene, loko hi namarhela misinya ya milawu ya Bibele, hi nga swi kota ku langutana ni xiphiqo xihi ni xihi evuton’wini. Rito ra Xikwembu ri “pfuna ku dyondzisa, ku tshinya, ku lulamisa swilo, ku laya eku lulameni.”—2 Timotiya 3:16.

“Ku Vonakala eNdleleni Ya Mina”

12. Marito ya Xikwembu ma hi voningela ndlela loko swi te yini?

¹² Pisalema 119:105 nakambe yi vula leswaku marito ya Xikwembu ma nga hi voningela ndlela. A hi siyiwanga emunyameni malunghana ni swilo swa nkarhi lowu taka, hikuva Bibele yi hlamusela leswi swiyimo leswi dyisaka mbitsi swa misava leyi swi vulaka swona ni leswaku vuyelo bya kona byi ta va byihi. Ina, ha swi vona leswaku hi hanya “emasikwini yo hetelela” ya mafambiselo lawa yo homboloka ya swilo. (2 Timotiya 3:1-5) Ku tiva leswi nga ta endleka enkarhini lowu taka swi fanele swi yi khumba swinene ndlela leyi hi hanyaka ha yona sweswi. Muapostola Petro u tsarile a ku: “Leswi swilo leswi hinkwaswo swi nga ta n’oka, n’wina mi fanele mi va vanhu va muxaka muni hi tlhelo ra swiendlo swo kwetsima swa ku tikhoma ni swiendlo swa ku tinyiketela loku nga ni vukwembu, mi ri karhi mi rindzela ni ku hamba mi tsundzuka vukona bya siku ra Yehovha!”—2 Petro 3:11, 12.

13. Xana xiyimo xa minkarhi ya hina xi fanele xi khumba mianakanyo ni mahanyelo ya hina hi ndlela yihi?

¹³ Mianakanyo ni mahanyelo ya hina swi fanele swi kombisa leswaku ha tiyiseka hakunene leswaku “misava ya hundza ni ku navela ka yona.” (1 Yohane 2:17) Ku tirhisa vukongomisi bya Bibele swi ta hi pfuna ku endla swiboho swa vutlhari malunghana ni tipakani ta hina. Hi xikombiso, Yesu u te: “Kutani, hambetani mi lava mfumo ni ku lulama ka yena ku sungula, xisweswo swilo leswin’wana hinkwaswo mi ta engeteleriwa swona.” (Matewu 6:33) Swa tsakisa swinene ku vona vantshwa vo tala va kombisa ripfumelo emaritweni ya Yesu hi ku nghenela vutirheli bya nkarhi hinkwawo! Van’wana—ku katsa ni mindyangu hi ku helela—va rhurhele ematikweni lawa ma nga ni xilaveko lexikulu xa vachumayeri va Mfumo.

14. Ndyangu wun’wana wa Vakreste wu ndlandlamuxe vutirheli bya wona hi ndlela yihi?

¹⁴ Anakanya hi ndyangu wun’wana wa swirho swa mune leswi nga Vakreste lowu sukeke eUnited States wu rhurhela eDominican Republic wu ya pfuna vandlha ra le dorobeni leri nga ni vaaki va 50 000. Vandlha leri ri ni vahuweleri va Mfumo  va kwalomu ka 130. Kambe hi April 12, 2006, ku ve ni vanhu va kwalomu ka 1 300 eXitsundzuxweni xa rifu ra Kreste! Nsimu ya ndhawu yoleyo yi “basile [swinene] leswaku [yi] tshoveriwa” lerova endzhaku ka tin’hweti ta ntlhanu ntsena, tatana wa ndyangu lowu, manana wa kona, jaha ra vona ni ntombhi ya vona a va fambisa tidyondzo ta Bibele ta 30 loko ti hlanganile. (Yohane 4:35) Tata wa kona wa hlamusela: “Vandlha leri ri ni vamakwerhu va 30 lava rhurheleke kona leswaku va ta pfuna. Vamakwerhu va kwalomu ka 20 va huma eUnited States, kasi lavan’wana va huma eBahamas, Canada, Italy, New Zealand ni le Spain. Va fike va hisekela ntirho wa nsimu kutani sweswo swi endle leswaku ni vamakwerhu va vandlha rero va tirha hi ku hiseka.”

15. Hi yihi mikateko leyi u yi kumeke hikwalaho ka ku rhangisa timhaka ta Mfumo evuton’wini bya wena?

¹⁵ Swi le rivaleni leswaku vo tala a va nge swi koti ku rhurhela etikweni rin’wana va ya pfuneta laha ku nga ni xilaveko lexikulu. Kambe lava va swi kotaka—kumbe lava nga lulamisaka swiyimo swa vona leswaku va ya pfuneta—va ta kuma mikateko yo tala hakunene. Naswona ku nga khathariseki laha u tirhaka kona, tiyiseka leswaku u ta kuma ntsako loko u tirhela Yehovha hi ntamu wa wena hinkwawo. Loko u rhangisa timhaka ta Mfumo evuton’wini bya wena, Yehovha u tshembisa leswaku u ta ku “chululela nkateko, kukondza ku nga ha pfumaleki nchumu.”—Malakiya 3:10.

Ku Pfuneka Eka Vukongomisi Bya Yehovha

16. Hi ta pfuneka njhani loko hi pfumela ku kongomisiwa hi marito ya Xikwembu?

¹⁶ Hilaha hi voneke hakona, marito ya Yehovha ma hi kongomisa hi tindlela timbirhi leti yelanaka. Ma fana ni rivoni emilengeni ya hina, ma hi pfuna ku famba endleleni leyi faneleke ni ku hi kongomisa loko hi fanele hi endla swiboho. Naswona ma hi voningela ndlela, ma hi pfuna ku swi vona kahle leswi nga emahlweni. Kutani sweswo swi hi pfuna ku landzela xitsundzuxo xa Petro lexi nge: “Hlomiselani mianakanyo ya n’wina ntirho, hlayisani mianakanyo ya n’wina yi ri leyi hlutekeke hi ku helela; vekani ntshembo wa n’wina eka musa lowu nga faneriwiki lowu mi nga ta tiseriwa wona eku hlavuteriweni ka Yesu Kreste.”—1 Petro 1:13.

17. Xana dyondzo ya Bibele yi ta hi pfuna njhani leswaku hi landzelela vukongomisi bya Xikwembu?

¹⁷ A swi kanakanisi leswaku Yehovha wa hi kongomisa. Xivutiso hileswaku, Xana wena u ta byi amukela vukongomisi bya yena? Leswaku u twisisa nkongomiso lowu Yehovha a hi nyikaka wona, tinyiketele ku hlaya xiphemu xo karhi eBibeleni siku ni siku. Anakanyisisa hi leswi u swi hlayaka, ringeta ku twisisa ku rhandza ka Yehovha etimhakeni to karhi, naswona anakanya hi tindlela to hambana-hambana leti mhaka leyi u yi hlayeke yi nga tirhaka ha tona evuton’wini bya wena. (1 Timotiya 4:15) Kutani tirhisa “matimba ya [wena] ya ku anakanya” loko u endla swiboho.—Varhoma 12:1.

18. Hi yihi mikateko leyi hi nga ta yi kuma loko hi pfumelela Rito ra Xikwembu ri hi kongomisa?

¹⁸ Loko hi yi pfumelela, misinya ya milawu leyi kumekaka eRitweni ra Xikwembu yi ta hi voningela ni ku hi kongomisa hi ndlela leyi lavekaka loko hi endla swiboho malunghana ni leswi hi faneleke hi swi endla. A hi tiyisekeni leswaku marito lama tsariweke ya Yehovha ma “tlharihisa la nga riki na ntokoto.” (Pisalema 19:7) Loko hi pfumela ku kongomisiwa hi Bibele, hi ta va ni ripfalo lerinene naswona hi ta eneriseka hi ku tiva leswaku hi tsakisa Yehovha. (1 Timotiya 1:18, 19) Loko hi pfumelela marito ya Xikwembu ma kongomisa mikondzo ya hina siku ni siku, Yehovha u ta hi nyika nkateko lowukulu wa ku hanya hi masiku.—Yohane 17:3.

Wa Tsundzuxa Xana?

• Ha yini swi ri swa nkoka ku pfumelela Yehovha Xikwembu a kongomisa mikondzo ya hina?

• Marito ya Xikwembu ma nga va rivoni emilengeni ya hina hi ndlela yihi?

• Xana marito ya Xikwembu ma nga hi voningela ndlela hi mukhuva wihi?

• Dyondzo ya Bibele yi ta hi pfuna njhani ku landzela vukongomisi bya Xikwembu?

[Swivutiso Swa Dyondzo]

[Xifaniso lexi nga eka tluka 15]

Ku endla xinghana ni munhu loyi a nga riki mupfumeri swi biha loko swi te yini?

[Xifaniso lexi nga eka tluka 16]

Vanghana lavakulu va Yesu a ku ri lava a va endla ku rhandza ka Yehovha

[Swifaniso leswi nga eka tluka 17]

Xana mahanyelo ya hina ma kombisa leswaku hi rhangisa timhaka ta Mfumo?