Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• Hi tihi tindlela ta mune leti Matsalwa Ya Vukreste Ya Xigriki ma tirhisaka rito “vandlha” ha tona?

Ndlela yo sungula yi kombetela eka ntlawa hinkwawo wa Vakreste lava totiweke (eka tindzimana tin’wana Kreste wa katsiwa). Minkarhi yin’wana, xiga lexi nge “vandlha ra Xikwembu” xi vula Vakreste hinkwavo lava hanyaka enkarhini wo karhi. Ndlela ya vunharhu leyi ri tirhisiwaka ha yona ri vula Vakreste hinkwavo lava nga le ndhawini yo karhi. Ndlela yo hetelela, rito leri ri nga ha tirhisiwa eka lava vumbaka vandlha rin’we ntsena.—4/15, matluka 21-3.

• Ku vitaniwa ka Vakreste lava nga ni ntshembo wo ya hanya etilweni ku ta hela rini?

Bibele a yi na yona nhlamulo leyi kongomeke ya xivutiso lexi. Ku vitaniwa koloko ku sungule hi 33 C.E. naswona ku ye emahlweni ku ta fikela eminkarhini ya manguva lawa. Endzhaku ka 1935 xikongomelo xa ntirho wo endla vadyondzisiwa ku ve ku hlengeleta ntshungu lowukulu. Van’wana lava khuvuriweke endzhaku ka 1935, va tiyisekisiwe hi moya lowo kwetsima leswaku va ni ntshembo wo ya hanya etilweni, hikwalaho a hi nge veki siku leri kongomeke ra ku hela ka nkarhi wa ku vitaniwa koloko. Vatotiwa va xiviri a va na moya lowu engetelekeke wa Xikwembu ku tlula vanghana va vona va tinyimpfu tin’wana, naswona a va langutelanga ku khomiwa hi ndlela yo hlawuleka. Vakreste va fanele va tshembeka naswona va hambeta va endla ku rhandza ka Xikwembu, ku nga khathariseki leswaku ntshembo wa vona hi wihi.—5/1, matluka 30-1.

• Loko Yefta a endla xihlambanyo, xana a a tiyimisele ku nyikela hi n’wana wa yena wa nhwanyana eka Xikwembu leswaku a va gandzelo leri hisiwaka?

Doo! Yefta a a vula leswaku munhu loyi a nga ta n’wi hlangaveta a a ta n’wi nyikela entirhweni wo hlawuleka wa Xikwembu, ku nga lunghiselelo ra Nawu wa Muxe. (1 Samuwele 2:22) Leswaku a hetisisa xihlambanyo xexo, n’wana wa Yefta wa nhwanyana u hambete a tirha etabernakeleni, ku nga ku tinyiketa lokukulu hikuva a swi vula leswaku a a nga ta pfuka a tekiwile.—5/15, matluka 9-10.

• Buku ya xikhale yi pfune njhani eka Vukreste bya khale?

Swi tikomba onge Vakreste va tirhise ngopfu buku-nsongwa ku kondza ku va eku heleni ka lembe-xidzana ro sungula C.E. Hi lembe-xidzana leri landzeleke, ku ve ni nkwetlembetano exikarhi ka lava a va rhandza buku ya xikhale ni lava a va rhandza buku-nsongwa. Vatshila va pfumela leswaku leswi endleke buku ya xikhale yi amukeriwa swinene hileswi Vakreste a va tirhisa yona.—6/1, matluka 14-15.

• Khalendara ya le Gezere i yini?

I xiphepherhele lexitsongo xa ribye lexi kumiweke hi 1908 edorobeni ra Gezere. Vo tala va anakanya leswaku xiphepherhele lexi xi tsariwe hi xifanyetana xa xikolo tanihi xitoloveto. Xiphepherhele lexi xi hlamusela mintirho ya vurimi ya lembe hinkwaro, xi sungula hi ntshovelo hi n’hweti leyi fambisanaka na September/October naswona xi vulavula hi swilo swo hambana-hambana leswi a swi byariwa swin’we ni mintirho ya vurimi.—6/15, tluka 8.

• Swi vula yini ku dyohela moya lowo kwetsima?

Swa koteka ku dyohela moya lowo kwetsima wa Yehovha, ku nga xidyoho lexi nga rivaleriwiki. (Matewu 12:31) Xikwembu hi xona xi endlaka xiboho xa loko hi endle xidyoho lexi nga rivaleriwiki, naswona hi xona xi nga susaka moya wa xona eka hina. (Pisalema 51:11) Loko hi ri ni gome lerikulu hikwalaho ka xidyoho lexi hi xi endleke, swi le rivaleni leswaku hi hundzukile hakunene, hikokwalaho a hi dyohelanga moya.—7/15, matluka 16-17.

• Leswi Hosi Sawulo a tshameke a tirhisana na Davhida, ha yini a vutise leswaku Davhida a a ri n’wana wa mani? (1 Samuwele 16:22; 17:58)

Sawulo a a nga lavi ku tiva vito ra tata wa Davhida ntsena. Leswi a voneke leswaku Davhida a a ri ni ripfumelo ni xivindzi tanihi leswi a a ha ku hlula Goliyadi, Sawulo a a lava ku tiva leswaku i wanuna wa muxaka muni loyi a kuriseke mufana loyi. Swi nga ha endleka leswaku Sawulo a a anakanya ku hoxa Yese, kumbe swirho swin’wana swa ndyangu wa yena eka vuthu ra yena ra nyimpi.—8/1, tluka 31.