Mufumi La Fuweke A Endla Xiboho Xa Vuhunguki

MUFUMI la fuweke la ha riki muntshwa a a lulamile, a a yingisela nawu naswona a a rhandza vukhongeri. U ye eka Yesu, a khinsama a n’wi vutisa a ku: “Mudyondzisi Lonene, xana ndzi fanele ndzi endla yini leswaku ndzi kuma ndzhaka ya vutomi lebyi nga heriki?”

Loko a hlamula, Yesu u kombise leswaku wanuna loyi a a fanele a hlayisa swileriso swa Xikwembu leswaku a kuma vutomi. Loko a komberiwe leswaku a veka mhaka erivaleni, Yesu u te: “U nga tshuki u dlaya hi vomu, U nga tshuki u endla vuoswi, U nga tshuki u yiva, U nga tshuki u nyikela vumbhoni bya mavunwa, Xixima tata wa wena ni mana wa wena, naswona, U fanele u rhandza warikwenu kukota loko u tirhandza.” Leswi a ku ri swileriso swo sungula leswi kumekaka eNawini lowu nyikiweke Muxe. Hiloko wanuna loyi a ku: “Hinkwaswo leswi ndzi swi hlayisile; i yini xin’wana lexi ndzi xi pfumalaka?”—Matewu 19:16-20.

Yesu u “[titwe] a n’wi rhandza” kutani a ku: “U kayivela xilo xin’we: Famba, u ya xavisa swilo leswi u nga na swona u nyika swisiwana, kutani u ta va ni xuma etilweni, u ta, u va mulandzeri wa mina.”—Marka 10:17-21.

Hi ku hatlisa mufumi la ha riki muntshwa a a langutane ni xiboho xo tika. Xana a a ta endla yini? Xana a ta rhandza ku tshika rifuwo ra swilo leswi vonakaka kutani a va mulandzeri wa Yesu, kumbe, xana a a ta khomelela eka swilo leswi a a ri na swona? Xana a a ta ya emahlweni a lava rifuwo ra laha misaveni, kumbe, xana a a ta lava rifuwo ra le tilweni? Ku fanele ku ve xiboho xo tika eka yena. Swi le rivaleni leswaku a a tsakela swilo swa moya, hikuva a a hlayisa Nawu ni ku vutisa hi swilo leswi engetelekeke leswi a a fanele a swi endla leswaku a ta amukeriwa hi Xikwembu. Xana u endle xiboho xa njhani? U “[fambe] a ri ni gome, hikuva a a ri ni swilo swo tala.”—Marka 10:22.

Xiboho xa mufumi la nga muntshwa a xi nga ri xa vutlhari. Loko a lo va mulandzeri wa Yesu wo tshembeka, a a ta va a kume leswi a a lava swona—vutomi lebyi nga heriki. A hi byeriwi leswaku ku endleke yini hi jaha leri. Hambiswiritano, ha swi tiva leswaku kwalomu ka  mune wa makume wa malembe endzhaku ka sweswo, mavuthu ya Rhoma ma lovise Yerusalema ni miti yin’wana yo tala ya Yudiya. Vayuda vo tala va lahlekeriwe hi rifuwo ra vona swin’we ni vutomi bya vona.

Ku hambana ni jaha ra mufumi, muapostola Petro ni vadyondzisiwa van’wana va endle xiboho xa vutlhari. Va “siye swilo hinkwaswo” va landzela Yesu. Xiboho lexi va xi endleke xi va vuyerisile hakunene! Yesu u va byele leswaku va ta kuma swilo swo tala ku tlula leswi va swi siyeke. Ku tlula kwalaho, va ta dya ndzhaka ya vutomi lebyi nga heriki. A va nga ta tisola hi xiboho lexi va xi endleke.—Matewu 19:27-29.

Hinkwerhu hi langutana ni swiboho leswi hi faneleke ku swi endla evuton’wini—swin’wana swa olova, swin’wana swa tika. Xana Yesu u te yini hi swiboho swo tano? Xana u ta yi amukela ndzayo yakwe? Loko u hlawula ku endla tano, u ta vuyeriwa swinene. Sweswi a hi kambisiseni ndlela leyi hi nga landzelaka Yesu ha yona ni ku vuyeriwa eka leswi a swi vuleke.