Ku Kutsuriwa Hi Mfumo Wa Xikwembu Ku Le Kusuhi!
Ku Kutsuriwa Hi Mfumo Wa Xikwembu Ku Le Kusuhi!
“Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—MAT. 6:10.
1. A yi ri yihi dyondzo-nkulu ya Yesu?
LOKO Yesu Kreste a nyikela Dyondzo ya yena ya le Ntshaveni, u katse ni xikhongelo xa xikombiso lexi katsakanyeke dyondzo yakwe leyikulu. U dyondzise valandzeri vakwe leswaku va khongela eka Xikwembu va ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Mat. 6:9-13) Yesu u “[fambe] hi muti ni muti ni hi ximutana ni ximutana, a chumayela ni ku vula mahungu lamanene ya mfumo wa Xikwembu.” (Luka 8:1) Kreste u khutaze valandzeri vakwe a ku: ‘Hambetani mi lava mfumo ni ku lulama ka Xikwembu ku sungula.’ (Mat. 6:33) Loko u ri karhi u hlaya xihloko lexi, lava tindlela leti u nga swi tirhisaka ha yona ensin’wini swilo leswi u swi hlayeke. Hi xikombiso, xiya ndlela leyi u nga swi hlamulaka ha yona swivutiso leswi: Xana rungula ra Mfumo i ra nkoka ku fikela kwihi? Xana vanhu va fanele va kutsuriwa eka yini? Naswona Mfumo wa Xikwembu wu ta wu tisa njhani nkutsulo?
2. Xana rungula ra Mfumo i ra nkoka ku fikela kwihi?
2 Yesu u profetile a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Mat. 24:14) Mahungu lamanene ya Mfumo wa Xikwembu i ya nkoka swinene. Kunene, i rungula ra nkoka swinene emisaveni! Emavandlheni yo tlula 100 000 ya Timbhoni ta Yehovha emisaveni hinkwayo, malandza ya Xikwembu ya kwalomu ka timiliyoni ta nkombo ma khomekile eka ntirho lowu nga ringanisiwiki na nchumu wo chumayela, ma byela van’wana leswaku Mfumo se wu simekiwile. Ku simekiwa ka wona i mahungu lamanene hikuva swi vula leswaku Xikwembu xi simeke hulumendhe etilweni leswaku yi ta lawula misava hi ku helela. Ehansi ka Mfumo wolowo, ku rhandza ka Yehovha ku ta endliwa emisaveni hilaha ku endlekaka hakona etilweni.
3, 4. Ku ta va ni vuyelo byihi loko ku rhandza ka Xikwembu ku endleka emisaveni?
3 Ku ta humelela yini hi vanhu loko ku rhandza ka Xikwembu ku ta va se ku endliwa emisaveni? Yehovha u ta “sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” (Nhlav. 21:4) Vanhu a va nge he vabyi kumbe ku fa hikwalaho ka xidyoho lexi va tswariweke na xona ni ku nga hetiseki. Vanhu lava feke lava nga emianakanyweni ya Xikwembu va ta hanya hilaha ku nga heriki, hikuva Bibele ya tshembisa yi ku: “Ku ta va ni ku pfuxiwa ka lava lulameke ni ka lava nga lulamangiki.” (Mint. 24:15) A ku nge he vi na nyimpi, vuvabyi kumbe ndlala, naswona misava yi ta hundzuriwa yi va paradeyisi. Hambi ku ri swiharhi leswi nga ni khombo sweswi, a swi nge he hlaseli vanhu na swona swi nge hlaselani.—Ps. 46:9; 72:16; Esa. 11:6-9; 33:24; Luka 23:43.
4 Leswi ku nga ta va ni mikateko leyi hlamarisaka ehansi ka Mfumo wolowo, a swi hlamarisi leswi vuprofeta bya Bibele byi vulavulaka hi vutomi bya nkarhi wolowo hi marito lawa lama chavelelaka yi ku: “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” Kambe, xana ku ta humelela yini hi lava va vangaka madzolonga? Matsalwa ma profetile ma ku: “Hi nkarhinyana, lowo homboloka a nge he vi kona.” Hambiswiritano, “lava tshembaka Yehovha hi vona lava nga ta dya ndzhaka ya misava.”—Ps. 37:9-11.
5. Ku ta humelela yini hi mafambiselo ya sweswi ya swilo?
5 Leswaku swilo leswi hinkwaswo swi humelela, mafambiselo ya sweswi ya swilo ni tihulumendhe ta wona leti kwetlembetanaka, vukhongeri ni mafambiselo ya mabindzu swi fanele swi susiwa. Kutani sweswo hileswi hulumendhe ya le tilweni yi nga ta swi endla. Muprofeta Daniyele u huhuteriwe ku profeta a ku: “Emasikwini ya tihosi teto [leti nga kona sweswi] Xikwembu xa le tilweni xi ta veka mfumo [etilweni] lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo [leyi nga kona sweswi], kambe wona wu ta tshama hilaha ku nga riki na makumu.” (Dan. 2:44) Mfumo wa Xikwembu—ku nga hulumendhe leyintshwa ya le tilweni—wu ta fuma vanhu hinkwavo lavantshwa emisaveni. Ku ta va ni “matilo lamantshwa ni misava leyintshwa . . . , naswona ku ta va ni ku lulama eka swona.”—2 Pet. 3:13.
Ku Ni Xilaveko Lexikulu Xa Ku Kutsuriwa Sweswi
6. Bibele yi byi hlamusela njhani vubihi bya misava leyi yo homboloka?
6 Loko Sathana, Adamu na Evha va xandzukele Xikwembu, va lava ku tiendlela xiboho hi voxe xa ku tiva leswinene ni leswo biha, wolawo ku ve masungulo ya matimu lama nga ni khombo. Loko ku nga si fika Ndhambi emisaveni hinkwayo, endzhaku ka malembe yo tlula 1 600, “vubihi bya munhu [a] byi andzile emisaveni [naswona] mboyamelo hinkwawo wa miehleketo ya mbilu yakwe [a] wu bihile nkarhi hinkwawo.” (Gen. 6:5) Endzhaku ka malembe ya kwalomu ka 1 300, Solomoni u vone swiyimo swi bihe ngopfu lerova u tsale a ku: “Ndzi nkhensise lava feke lava ana se va feke ku ri ni lava va hanyaka lava a va ha hanya. Loyi a antswaka ku tlula lava vambirhi hi loyi a nga si vaka kona, loyi a nga wu vonangiki ntirho lowu nga ni khombo lowu endliwaka ehansi ka dyambu.” (Ekl. 4:2, 3) Malembe ya 3 000 lama landzeleke ma hi fikisa enkarhini wa hina, laha vubihi bya ha yaka emahlweni byi nyanya.
7. Ha yini ku ri ni xilaveko lexikulu sweswi xo kutsuriwa hi Xikwembu?
7 Hambileswi swi nga ntiyiso leswaku vubihi se i khale byi ri kona, ku ni xilaveko lexikulu xa ku kutsuriwa hi Mfumo wa Xikwembu ku tlula rini na rini. Swiyimo a swi nyanye ngopfu eka malembe ya dzana lama hundzeke ku tlula rini na rini, naswona swi hambeta swi nyanya ku biha. Hi xikombiso, Worldwatch Institute yi ri: “Nhlayo ya vanhu lava feke enyimpini hi lembe-xidzana [ra vu-20] yi phindhiwa kanharhu loko yi ringanisiwa ni ya lava feke eka tinyimpi hinkwato leti veke kona ku sukela hi lembe-xidzana ro sungula AD ku ya eka 1899.” Ku sukela hi 1914 ku fe vanhu vo tlula 100 wa timiliyoni etinyimpini! Nsonga-vutivi wun’wana wu ringanyeta leswaku vanhu va 60 wa timiliyoni va file eka Nyimpi ya Vumbirhi ya Misava. Leswi matiko man’wana sweswi ma endlaka matlhari ya nyutliya, vanhu va nga swi kota ku yayarhela vaaki vo tala swinene va laha misaveni. Naswona hambileswi ku endliweke nhluvuko eka sayense ni vutshunguri, lembe ni lembe ndlala ya ha dlaya vana va kwalomu ka ntlhanu wa timiliyoni.—Vona ndzima 9 ya buku leyi nge Xana Bibele Yi Dyondzisa Yini Hakunene?
8. Xana malembe ya magidi lawa vanhu va ma heteke va ri eku fumeni ma kombise yini?
8 Matshalatshala ya vanhu yo herisa vubihi ma tsandzekile. Tipolitiki ta misava leyi, mabindzu ni minhlangano ya vukhongeri a swi xi enerisanga xilaveko xa vanhu xa ku rhula, ku va ni rifuwo ni rihanyo lerinene. Ematshan’weni yo tlhantlha swiphiqo leswikulu swa vanhu, minhlangano leyi yo swi nyanyisa. Kunene, magidi ya malembe lawa vanhu va fumeke ha wona ma kombise ntiyiso wa marito lawa: “Ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yer. 10:23) Ina, ‘munhu u fuma munhu ku n’wi endla swo biha.’ (Ekl. 8:9) Ku engetela kwalaho, “ntumbuluko hinkwawo wu hambeta wu konya ni ku vaviseka swin’we.”—Rhom. 8:22.
9. Hi swihi swiyimo leswi Vakreste va ntiyiso va languteleke ku swi vona eka “masiku [lawa] yo hetelela”?
9 Malunghana ni nkarhi wa hina, Bibele yi profetile yi ku: “Emasikwini yo hetelela ku ta fika minkarhi ya mangava leyi swi nonon’hwaka ku langutana na yona.” Endzhaku ko hlamusela swiyimo swa masiku yo hetelela ya ku fuma ka vanhu, vuprofeta lebyi byi ri: “Vanhu vo homboloka ni vaxisi va ta ya emahlweni va nyanya evubihini bya vona.” (Hlaya 2 Timotiya 3:1-5, 13.) Sweswo hileswi Vakreste va swi languteleke, hikuva “misava hinkwayo yi le hansi ka matimba ya lowo homboloka,” Sathana. (1 Yoh. 5:19) Hambiswiritano, mhaka leyi tsakisaka hileswaku ku nga ri khale Xikwembu xi ta kutsula lava va xi rhandzaka. Va ta kutsuriwa eka misava leyi, leyi nyanyaka evubihini bya yona.
Xihlovo Xin’we Ntsena Lexi Tshembekaka Xa Nkutsulo
10. Ha yini ku ri Yehovha ntsena Xihlovo lexi tshembekaka xa nkutsulo?
10 Loko u ri karhi u chumayela mahungu lamanene, byela vayingiseri va wena leswaku Yehovha hi yena ntsena Xihlovo lexi tshembekaka xa nkutsulo. Hi yena ntsena loyi a nga ni matimba naswona u tiyimiserile ku kutsula malandza yakwe eka swiyimo swihi na swihi swo biha. (Mint. 4:24, 31; Nhlav. 4:11) Hi nga tiyiseka leswaku Yehovha minkarhi hinkwayo u ta kutsula vanhu va yena naswona u ta hetisisa switshembiso swakwe, hikuva u tiyisekisile a ku: “Kunene ndlela leyi ndzi lavaka swi endleka ha yona, swi fanele swi endleka ha yona.” Rito ra yena “a ri nge tlheleli eka [yena] ri nga ri na vuyelo.”—Hlaya Esaya 14:24, 25; 55:10, 11.
11, 12. Hi xihi xitiyisekiso lexi Xikwembu xi xi nyikaka malandza ya xona?
11 Yehovha u tiyisekisile leswaku u ta kutsula malandza yakwe loko a lovisa lavo homboloka. Loko Xikwembu xi rhumela muprofeta Yeremiya leswaku a ya vulavula hi xivindzi ni vadyohi lavakulu, xi te: ‘U nga chavi.’ Ha yini? “Ndzi na wena leswaku ndzi ku kutsula.” (Yer. 1:8) Hilaha ku fanaka, loko Yehovha a lava ku lovisa tiko ra Sodoma ni ra Gomora, lawa a ma hombolokile, u rhumele tintsumi timbirhi leswaku ti heleketa Lota ni ndyangu wakwe va huma endhawini yoleyo va sirhelelekile. ‘Kutani Yehovha u nise xivavula ni ndzilo ehenhla ka Sodoma na Gomora.’—Gen. 19:15, 24, 25.
12 Yehovha a nga kutsula lava endlaka ku rhandza ka yena hambi ku ri emisaveni hinkwayo. Loko a lovisa misava ya khale yo homboloka hi Ndhambi, u ‘hlayise Nowa, muchumayeri wa leswo lulama, ni van’wana va nkombo.’ (2 Pet. 2:5) Nakambe Yehovha u ta kutsula lavo lulama loko a lovisa misava leyi yo homboloka. Hikwalaho Rito ra yena ri ri: “Lavani Yehovha, n’wina hinkwenu lavo rhula va misava . . . Lavani ku lulama, lavani ku rhula. Kumbexana mi nga tumbetiwa esikwini ra ku hlundzuka ka Yehovha.” (Sof. 2:3) Eka ndzoviso wolowo lowu nga ta endleka emisaveni hinkwayo, ‘lavo lulama va ta tshama emisaveni, kambe lavo homboloka, va ta dlayiwa eka yona.’—Swiv. 2:21, 22.
13. Xana malandza ya Yehovha lama feke ma ta kutsuriwa njhani?
13 Hambiswiritano, malandza ya Xikwembu yo tala se ma file hikwalaho ka mavabyi, ku xanisiwa, ni swin’wana. (Mat. 24:9) Kutani, xana vanhu lava hinkwavo va ta kutsuriwa njhani? Hilaha swi hlamuseriweke hakona eku sunguleni, “ku ta va ni ku pfuxiwa ka lava lulameke.” (Mint. 24:15) Mawaku ndlela leyi swi chavelelaka ha yona ku tiva leswaku a xi kona lexi nga sivelaka Yehovha leswaku a kutsula malandza yakwe!
Hulumendhe Yo Lulama
14. Ha yini hi tiyiseka leswaku Mfumo wa Xikwembu i hulumendhe yo lulama?
14 Loko u ri ensin’wini, u nga hlamusela leswaku Mfumo wa Yehovha wa le tilweni i hulumendhe yo lulama. Sweswo swi tano hikuva wu kombisa timfanelo ta Xikwembu leti hlamarisaka to tanihi vululami ni rirhandzu. (Det. 32:4; 1 Yoh. 4:8) Xikwembu xi teke Mfumo xi wu nyika Yesu Kreste, loyi a fanelekaka kahle ku fuma misava. Nakambe Yehovha u tshembise leswaku Vakreste lava totiweke va 144 000, va ta tekiwa emisaveni naswona va ta pfuxeriwa ku ya hanya etilweni tanihi vadyandzhaka swin’we na Kreste va hlanganyela na yena eku fumeni ka misava.—Nhlav. 14:1-5.
15. Hlamusela ku hambana exikarhi ka Mfumo wa Xikwembu ni mimfumo ya vanhu.
15 Kunene mfumo wa Yesu swin’we ni lava 144 000 wu ta hambana swinene ni mimfumo ya vanhu lava nga hetisekangiki! Vafumi va mafambiselo lawa ya swilo hakanyingi va va ni tihanyi naswona va endle leswaku vanhu lava fumiwaka hi vona va ya etinyimpini, laha ku hetelelaka ku fe vanhu va timiliyoni. A swi hlamarisi leswi Matsalwa ma hi tsundzuxaka leswaku hi nga tshembeli eka munhu, “loyi a tsandzekaka ku ponisa”! (Ps. 146:3) Kambe, Kreste u ta fuma hi ku pfumelelana ni langutelo ra yena lerinene. Yesu u te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya. Hikuva joko ra mina ra olova ni ndzhwalo wa mina wa vevuka.”—Mat. 11:28-30.
Ku Hela Ka Masiku Yo Hetelela Ku Kwala Nyongeni!
16. Xana masiku lawa yo hetelela ma ta hela njhani?
16 Ku sukela hi lembe ra 1914, misava leyi yi le masikwini yo hetelela, kumbe “makumu ya mafambiselo ya swilo.” (Mat. 24:3) Ku nga ri khale, ku ta fika “nhlomulo lowukulu” lowu Yesu a vulavuleke ha wona. (Hlaya Matewu 24:21.) Nhlomulo wolowo lowu nga si tshamaka wu va kona wu ta lovisa misava hinkwayo ya Sathana. Kambe, xana nhlomulo lowukulu wu ta sungula njhani? Naswona, wu ta hela njhani?
17. Bibele yi kombisa yini malunghana ni ku sungula ka nhlomulo lowukulu?
17 Nhlomulo lowukulu wu ta sungula hi xitshuketa. Ina, “siku ra Yehovha” ri ta fika ri nga languteriwanga “loko va ku: ‘Ku rhula ni nsirhelelo!’” (Hlaya 1 Vatesalonika 5:2, 3.) Nhlomulo lowu ku vulavuriweke ha wona wu ta sungula loko matiko ma ehleketa leswaku ma le kusuhi ni ku tlhantlha swin’wana swa swiphiqo swa wona leswikulu. Ku lovisiwa hi xitshuketa ka “Babilona Lonkulu,” mfumo wa misava wa vukhongeri bya mavunwa ku ta hlamarisa misava. Tihosi ni van’wana va ta hlamala loko ku avanyisiwa Babilona Lonkulu.—Nhlav. 17:1-6, 18; 18:9, 10, 15, 16, 19.
18. Xana Yehovha u ta endla yini loko Sathana a hlasela vanhu va Yena?
18 Hi nkarhi wolowo wo tika, ku ta va ni “swikombiso edyambyini ni le n’wetini ni le tinyeletini,” naswona “xikombiso xa N’wana wa munhu xi ta humelela etilweni.” Kutani hi nga ‘tlakusa tinhloko ta hina, hikuva ku kutsuriwa ka hina ka tshinela.’ (Luka 21:25-28; Mat. 24:29, 30) Sathana kumbe Gogo, u ta hlundzukela vanhu va Xikwembu. Kambe malunghana ni lava hlaselaka malandza yakwe yo tshembeka, Yehovha u ri: “Loyi a mi khumbaka u khumba ndzololo ya tihlo ranga.” (Zak. 2:8) Hikwalaho, matshalatshala ya Sathana yo va herisa a ma nge tirhi. Ha yini? Hikuva Yehovha Hosi Leyi Lawulaka u ta teka goza hi ku hatlisa a kutsula malandza ya yena.—Ezek. 38:9, 18.
19. Ha yini hi nga tiyisekaka leswaku mavuthu ya vuavanyisi ya Xikwembu ma ta herisa mafambiselo ya Sathana?
19 Loko Xikwembu xi teka goza xi lwa ni matiko, ‘ma ta tiva leswaku hi xona Yehovha.’ (Ezek. 36:23) Xi ta rhumela mavuthu ya xona ya vuavanyisi—swivumbiwa swa moya swa makume ya magidi leswi rhangeriwaka hi Kreste Yesu—leswaku ma ta lovisa mafambiselo hinkwawo ya Sathana ya laha misaveni. (Nhlav. 19:11-19) Loko hi tsundzuka leswaku eka xiendlakalo xin’wana ntsumi yin’we ‘yi dlaye vanhu va 185 000’ lava a va ri valala va Xikwembu hi vusiku byin’we ntsena, hi nga tiyiseka leswaku vuthu ra le tilweni ri ta wu herisa hi ku olova nchumu wihi na wihi wa mafambiselo ya Sathana ya laha misaveni loko nhlomulo lowukulu wu fika emakumu eArmagedoni. (2 Tih. 19:35; Nhlav. 16:14, 16) Sathana ni madimona yakwe va ta hoxiwa ekheleni ro enta ku ringana malembe ya gidi. Eku heteleleni, va ta lovisiwa.—Nhlav. 20:1-3.
20. Xana Yehovha u ta hetisisa yini hi ku tirhisa Mfumo wa yena?
20 Emisaveni ku ta va ku nga ha ri na vuhomboloki, naswona vanhu vo lulama va ta hanya hilaha ku nga heriki emisaveni leyi. Yehovha u ta va a tikombise a ri Mukutsuri Lonkulu. (Ps. 145:20) U ta vangamisa vuhosi bya yena, a kwetsimisa vito ra yena leri hlawulekeke, ni ku hetisisa xitshembiso xa yena lexikulu hi misava hi ku tirhisa Mfumo wa yena. Onge u nga kuma ntsako lowukulu evutirhelini bya wena loko u ri karhi u twarisa mahungu lamanene ni ku pfuna lava nga ni “mboyamelo lowunene eka vutomi lebyi nga heriki,” leswaku va swi xiya leswaku ku kutsuriwa hi Mfumo wa Xikwembu ku kwala nyongeni!—Mint. 13:48.
Wa Tsundzuka Xana?
• Xana Yesu u swi kandziyise njhani leswaku Mfumo i wa nkoka?
• Ha yini ku ri ni xilaveko lexikulu xa ku kutsuriwa sweswi ku tlula rini na rini?
• I swiendlakalo swihi leswi hi nga swi langutelaka hi nkarhi wa nhlomulo lowukulu?
• Xana Yehovha u tikombisa a ri Mukutsuri Lonkulu hi ndlela yihi?
[Swivutiso Swa Dyondzo]
[Swifaniso eka tluka 12, 13]
Rito ra Xikwembu ri profete hi ta ntirho wo chumayela emisaveni hinkwayo wa le nkarhini wa hina
[Xifaniso eka tluka 15]
Leswi Yehovha a kutsuleke Nowa ni ndyangu wa yena, A nga hi kutsula na hina
[Xifaniso eka tluka 16]
Yehovha ‘u ta sula mihloti hinkwayo naswona rifu a ri nge he vi kona.’—Nhlav. 21:4