Xinhwanyatana Lexi Hananaka

XINHWANYATANA xin’wana xa le Brazil lexi nga ni malembe ya kaye, xa ha ku hambanisa mali leyi a xi tihlayisele yona yi va mintlawa yimbirhi xi nga sindzisiwanga hi munhu—yin’wana a yi ri 150 wa tirhandi kasi leyin’wana a yi ri 210 wa tirhandi. Xi teke 150 wa tirhandi xi ti hoxa eka bokisi ra munyikelo eHolweni ya Mfumo ya le ndhawini ya ka vona leswaku yi pfuna eku hakeleriweni ka swilo swa vandlha. Kutani xi teka 210 wa tirhandi xi ti rhumela ehofisini ya rhavi ya Timbhoni ta Yehovha, xi tlhela xi tsala xipapilana. Xi te: “Ndzi lava ku nyikela mali leyi eka ntirho wa misava hinkwayo. Ndzi lava ku pfuna vamakwerhu vo tala emisaveni hinkwayo leswaku va chumayela mahungu lamanene. Ndzi yi nyikela hileswi ndzi rhandzaka Yehovha swinene.”

Vatswari va xinhwanyatana lexi va xi dyondzise leswaku i swa nkoka ku endla leswi xi nga swi kotaka leswaku xi hlanganyela entirhweni wo chumayela hi Mfumo. Nakambe va xi dyondzise leswaku xi vona xilaveko xa ku ‘xixima Yehovha hi swilo swa xona swa nkoka.’ (Swiv. 3:9) Ku fana ni xinhwanyatana lexi, onge hinkwerhu hi nga hisekela ku seketela swilaveko swa Mfumo endhawini leyi hi tshamaka eka yona ni le misaveni hinkwayo!