Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

• Ha yini Mesiya a a fanele a fa?

Rifu ra Yesu ri kombise leswaku munhu la hetisekeke a nga tshama a tshembekile eka Xikwembu hambiloko a langutane ni miringo leyikulu swinene. Nakambe u hakele xigwevo xa xidyoho lexi vana va Adamu va tswariweke na xona, a endla leswaku vanhu va ta kota ku kuma vutomi lebyi nga heriki.—12/15, matluka 22-23.

• I yini lexi nga pfunaka munhu leswaku a nga nwi byala ku tlula mpimo?

Ku khongela ni ku va ni dyondzo ya Bibele swi nga pfuna. Ku hlakulela ku tikhoma, ku endla leswi u tiyimiseleke swona swin’we ni ku hlawula vanghana lavanene i swa nkoka. Munhu la hlawulaka ku nwa byala u fanele a tivekela xiringaniso a tlhela a tikarhatela ku xi namarhela.—1/1, matluka 7-9.

• Xana ku vulavurisana lokunene ni vana ku katsa yini?

A swi vuli ntsena ku vulavurisana na vona kambe swi katsa ni ku va vutisa swivutiso ni ku va lehisela mbilu u yingisa tinhlamulo ta vona. Vanhu vo tala va kume leswaku nkarhi wa swakudya i nkarhi lowunene lowu nga tirhiseriwaka ku vulavurisana.—1/15, matluka 18-19.

• Yehovha u hetisekile, kutani swi tisa ku yini leswaku a nga tisola?

Minkarhi yin’wana, Xikwembu xi cinca ndlela leyi xi va tekaka ha yona vanhu. Hi xikombiso, minkarhi yo hlayanyana Vaisrayele va khale va fularhele Yehovha kutani va gandzela swikwembu swin’wana. Hikwalaho, Yehovha u tshike ku va sirhelela. Hambiswiritano, loko vanhu va tisola hikwalaho ka swihoxo swa vona kutani va kombela mpfuno eka Xikwembu, xi cince ndlela leyi a xi titwa ha yona hi vona kumbe ‘xi tisorile.’ (Vaav. 2:18)—2/1, tluka 21.

• I swiyimo swihi leswi nga ha endlaka leswaku munhu a vona onge u fanele a khuvuriwa nakambe?

Munhu a nga ha vona onge u fanele a khuvuriwa nakambe loko ku ri leswaku loko a khuvuriwa, a ka ha ri ni swilo leswi a a swi endla exihundleni, leswi loko se a a khuvuriwile a swi ta endla leswaku a susiwa eku hlanganyeleni.—2/15, tluka 22.

• Hi swihi swilo swinharhu leswi van’wana va tiyimelelaka ha swona loko va dyohile?

Van’wana va vona swi nga bihanga ku yiva loko va ri swisiwana. Van’wana va tiyimelela hi ku vula va ku, “Vanhu hinkwavo va swi endla.” Naswona van’wana lava thumbeke swilo swa risima ivi va tshama na swona va te, “loko u thumbe nchumu wo karhi u nga ha titekela wona.” Bibele a yi swi seketeli nikatsongo swivangelo sweswo swo tiyimelela.—3/1, matluka 12-14.

• Eka xifaniso xa Yesu xa koroni ni mfava, ku byala mbewu leyinene swi yimela yini?

N’wana wa munhu ku nga Yesu, u rime nsimu hi nkarhi wa vutirheli bya yena bya laha misaveni. Ku sukela hi Pentekosta ya 33 C.E. ku ya emahlweni, mbewu leyinene yi byariwe loko Vakreste va totiwa leswaku va va vana va Xikwembu, vana va Mfumo.—3/15, tluka 20.

• Koroni yo fanekisela ya le xifanisweni xa Yesu yi nghenisiwa njhani exitlatini xa Yehovha? (Mat. 13:30)

Xifaniso xexo xi hetiseka ni le nkarhini wa makumu ya mafambiselo ya swilo. Vana va Mfumo lava totiweke, ku nga koroni yo fanekisela, va nghenisiwa exitlatini xa Yehovha loko va nghenisiwa evandlheni ra Vukreste leri vuyeteriweke kumbe loko va kuma hakelo ya vona ya le tilweni.—3/15, tluka 22.

• I mani la hleleke nxaxamelo wa tibuku leti vumbaka Matsalwa ya Vukreste ya Xigriki?

A ku nga ri huvo yo karhi ya kereke kumbe varhangeri va vukhongeri. Ku ri na sweswo, Vakreste va ntiyiso a va tiva matsalwa lawa a ma huhuteriwile hakunene va kongomisiwa hi moya lowo kwetsima wa Xikwembu. Sweswo swi fambisana kahle ni mhaka ya leswaku yin’wana ya tinyiko to endla masingita ta moya leti nyikiweke vanhu eka malembe yo sungula ya vandlha ra Vukreste a ku ri “ku twisisa marito lama huhuteriweke.” (1 Kor. 12:4, 10)—4/1, tluka 28.