Xana Wa N’wi Pfumelela Yehovha Leswaku A Ku Vutisa Swivutiso?

BIBELE yi ni madzana ya swivutiso leswi nga pfunaka munhu leswaku a kambisisa leswi a nga swona endzeni. Entiyisweni, Yehovha Xikwembu u tirhisa swivutiso leswaku a dyondzisa ntiyiso wa nkoka. Hi xikombiso, Yehovha u tirhise swivutiso swo hlaya loko a tsundzuxa Kayini leswaku a lulamisa mianakanyo yakwe yo homboloka. (Gen. 4:6, 7) Minkarhi yin’wana xivutiso xin’we xa Yehovha a xi endla leswaku munhu a teka goza ro karhi lerinene. Loko a twe Yehovha a vutisa a ku: “Xana ndzi ta rhuma mani, i mani la nga ta hi yela?” muprofeta Esaya u hlamule a ku: “Hi mina loyi! Ndzi rhume.”—Esa. 6:8.

Yesu, Mudyondzisi Lonkulu na yena u tirhise swivutiso hi ndlela leyinene. Eka Tievhangeli ku ni swivutiso leswi tlulaka 280 leswi Yesu a swi vutiseke. Hambileswi minkarhi yin’wana a tirhiseke swivutiso leswaku a miyeta vanhu lava a va n’wi xopaxopa, hakanyingi xikongomelo xa yena a ku ri ku fikelela timbilu ta vayingiseri va yena, a va susumetela ku ehleketa hi vuxaka bya vona ni Xikwembu. (Mat. 22:41-46; Yoh. 14:9, 10) Hilaha ku fanaka, muapostola Pawulo la tsaleke tibuku ta 14 ta Matsalwa ya Vukreste ya Xigriki, u tirhise swivutiso leswaku a khorwisa. (Rhom. 10:13-15) Hi xikombiso, papila ra yena leri a ri tsaleleke Varhoma ri ni swivutiso swo tala. Swivutiso swa Pawulo swi susumetele vahlayi va yena leswaku va tlangela “ku enta ka rifuwo ni vutlhari ni vutivi bya Xikwembu.”—Rhom. 11:33.

Hambileswi swivutiso swin’wana swi lavaka nhlamulo hi ku kongoma, xikongomelo xa swin’wana i ku pfuna munhu leswaku a anakanyisisa. Tievhangeli ti tele hi swivutiso swa Yesu leswi pfunaka munhu ku anakanyisisa. Siku rin’wana Yesu u tsundzuxe vadyondzisiwa va yena a ku: “Tivoneleni comela xa Vafarisi ni comela xa Heroda,” a vulavula hi vukanganyisi bya vona ni tidyondzo ta vona ta mavunwa. (Mar. 8:15; Mat. 16:12) Vadyondzisiwa va Yesu a va swi twisisanga leswi a a swi vula kutani va sungule ku phikizana hi leswi va rivaleke ku ta na xinkwa. Xiya ndlela leyi Yesu a tirhiseke swivutiso ha yona eka bulo ro koma leri landzeleke endzhaku ka sweswo. Yesu “[u te] eka vona: ‘Ha yini mi phikizana hi leswaku a mi na swinkwa? Xana a mi si xiya ni ku kuma nhlamuselo ya kona? Xana timbilu ta n’wina ti tlanyarile a ti twisisi? “Hambileswi mi nga ni mahlo, a mi voni ke; hambileswi mi nga ni tindleve, a mi twi ke?” . . . Xana a mi si yi kuma nhlamuselo ya kona?’” Xikongomelo xa swivutiso swa Yesu a ku ri ku pfuna vadyondzisiwa va yena leswaku va anakanyisisa, va susumeteleka ku anakanyisisa hi leswi marito ya yena a ma vula swona hakunene.—Mar. 8:16-21.

‘Inge Ndzi Ku Vutisa’

Yehovha Xikwembu u tirhise swivutiso leswaku a lulamisa vonelo ra nandza wakwe Yobo. Yehovha u tirhise swivutiso swo tala leswaku a pfuna Yobo ku vona leswaku a hi wa nkoka loko a pimanisiwa ni Muvumbi wakwe. (Yobo, tindzima 38-41) Xana Yehovha a a langutele ku kuma nhlamulo hi ku kongoma eka xivutiso xin’wana ni xin’wana lexi a xi vutiseke? A swi tikombi tano. Swivutiso swo tanihi lexi nge, “A wu ri kwihi loko ndzi simeka misava?” xikongomelo xa swona a ku ri ku pfuna Yobo eka ndlela leyi a a anakanya ni ku titwa ha yona. Endzhaku ka loko Yobo a vutisiwe swivutiso sweswo leswi tlhontlhaka mianakanyo, u sale a nga ri na xo xi vula. U lo vula ntsena a ku: “Xana ndzi ta ku angula yini? Voko ra mina ndzi ri veke enon’wini wa mina.” (Yobo 38:4; 40:4) A xi bele etindleveni naswona Yobo u titsongahatile. Hambiswiritano, Yehovha a a nga dyondzisi Yobo ku titsongahata ntsena. Ndlela leyi Yobo a a anakanya ha yona na yona yi lulamisiwile. Hi ndlela yihi?

Hambileswi Yobo a a ri “munhu la pfumalaka xisandzu, wo lulama,” minkarhi yin’wana leswi a a swi vula a swi kombisa leswaku u ni vonelo leri hoxeke, leri Elihu a ri xiyeke loko a tshinya Yobo hikwalaho “ko vula leswaku moya-xiviri wakwe wu lulamile ematshan’weni ya Xikwembu.” (Yobo  1:8; 32:2; 33:8-12) Hikwalaho, swivutiso swa Yehovha swi tlhele swi pfuna Yobo eka ndlela leyi a a twisisa swilo ha yona. Loko Xikwembu xi vulavula na Yobo exidzedzeni xi te: “I mani loyi, la pfilunganyaka xitsundzuxo hi marito lama nga riki na vutivi? Ndzi kombela u tikhama xisuti, ku fana ni munhu la tiyeke emirini, ndzi ku vutisa, wena u ndzi byela.” (Yobo 38:1-3) Endzhaku ka sweswo, Yehovha u kokele nyingiso eka vutlhari bya yena lebyikulu ngopfu ni matimba ya yena lamakulu swinene lama vonakaka eka mintirho ya yena leyi hlamarisaka. Sweswo swi pfune Yobo leswaku a tshemba vuavanyisi bya Yehovha ni ndlela leyi a endlaka swilo ha yona ku tlula rini na rini. Mayana lunghelo lerikulu leri Yobo a veke na rona ro vutisiwa swivutiso hi Xikwembu xa Matimba Hinkwawo hi ku kongoma!

Ndlela Leyi Hi Nga Pfumelelaka Yehovha Leswaku A Hi Vutisa Swivutiso Ha Yona

Ku vuriwa yini hi hina? Xana na hina hi nga vuyeriwa eka swivutiso leswi kumekaka eBibeleni? Ina, hi nga vuyeriwa! Loko hi pfumelela swivutiso sweswo leswaku swi hi endla hi tikambisisa, hi nga vuyeriwa swinene hi tlhelo ra moya. Swivutiso leswi khumbaka mbilu leswi kumekaka eRitweni ra Xikwembu swi endla leswaku ri va ni matimba swinene. Hakunene, “rito ra Xikwembu . . . ri ni matimba, . . . naswona ra swi kota ku twisisa miehleketo ni makungu ya mbilu.” (Hev. 4:12) Hambiswiritano, leswaku hi vuyeriwa swinene, hi fanele hi tivutisa swivutiso sweswo onge hi loko Yehovha a a vutisa hina hi ku kongoma. (Rhom. 15:4) A hi kambisiseni swikombiso swin’wana.

“Xana Muavanyisi wa misava hinkwayo a nge endli leswi lulameke?” (Gen. 18:25) Abrahama u vutise Yehovha xivutiso lexi nga laviki nhlamulo loko Xikwembu xi avanyise muti wa Sodoma na Gomora. Abrahama u vone swi nga twali leswaku Yehovha a nga endla hi ku kala vululami—a lovisa lavo lulama ni lavo biha. Xivutiso xa Abrahama xi kombise ripfumelo lerikulu leri a a ri na rona eka ku lulama ka Yehovha.

Namuntlha, vanhu van’wana va nga ha mbambela malunghana ni timhaka leti khumbaka vuavanyisi bya Yehovha bya le nkarhini lowu taka, va tivutisa leswaku i vamani lava nga ta pona Armagedoni kumbe i vamani lava nga ta pfuxiwa. Ematshan’weni yo pfumela ku karhatiwa hi mianakanyo yo tano, hi nga tsundzuka xivutiso xa Abrahama. Ku tiva Yehovha tanihi Tatana wa le tilweni la nga ni musa ni ku byi tshemba hi ku helela vululami ni tintswalo ta yena, hilaha Abrahama a endleke hakona, swi hi sivela leswaku hi nga tlangi hi nkarhi ni matimba ya hina hi ri karhi anakanyisisa hi swilo leswi nga riki swa nkoka, hi kanakana hi tlhela hi kanetana hi swilo leswi nga pfuniki nchumu.

“I mani eka n’wina loyi a nga engetelaka xisungunu xin’we eka mpimo wakwe wa vutomi hikwalaho ka ku vilela?” (Mat. 6:27) Loko a ri karhi a vulavula ni ntshungu lowukulu lowu a wu katsa ni vadyondzisiwa vakwe, Yesu u tirhise xivutiso lexi leswaku a kandziyisa ndlela leyi swi nga swa nkoka ha yona ku va va tiveka emavokweni ya Yehovha ya  rirhandzu. Masiku yo hetelela ya mafambiselo lawa yo biha ya swilo ma endla leswaku hi vilela swinene kambe ku dzikisa mianakanyo ya hina eku vileleni ha wona a swi nge engeteli vutomi bya hina kumbe swi antswisa ndlela leyi hi hanyaka ha yona.

Loko hi vilela hi hina vini kumbe hi varhandziwa va hina, ku tsundzuka xivutiso xa Yesu swi nga hi pfuna leswaku hi va ni vonelo leri faneleke malunghana ni swilo leswi hi vilelaka ha swona. Swi nga hi pfuna leswaku hi tshika ku karhateka naswona hi tshika ku va ni mianakanyo leyi hoxeke leyi nga hi karharisaka miehleketo, yi hi siya hi tshikilelekile naswona hi karhele. Yesu u hi tiyisekisile a ku, Tata wa hina wa le tilweni la wundlaka swinyenyana swa tilo a tlhela a ambexa swimila swa nhova, u swi tiva kahle leswi hi swi pfumalaka.—Mat. 6:26-34.

“Xana munhu a nga hlengeleta ndzilo exifuveni xakwe kambe tinguvu takwe ti nga tshwi?” (Swiv. 6:27) Tindzima to sungula ta kaye eka Swivuriso ti katsa tinkulumo to koma laha tatana a hundziselaka rungula ra vutlhari eka n’wana wakwe. Xivutiso lexi tsariweke hala henhla xi vulavula hi vuyelo byo vava bya vuoswi. (Swiv. 6:29) Loko hi xiya leswaku hi le ku tlangeni hi rirhandzu kumbe hi ni ku navela loko biha ka vuxaka bya rimbewu, xivutiso lexi xi fanele xi hi lemuxa eka khombo leri nga ha hi welaka. Entiyisweni, munhu u fanele a tivutisa xivutiso lexi loko a ringeka leswaku a endla nchumu wihi na wihi wo biha. Xi wu kandziyisa kahle nawu lowu tirhaka wa le Bibeleni lowu nge: ‘U tshovela lexi u xi byaleke’!—Gal. 6:7.

“U mani wena leswaku u avanyisa nandza wa yindlu ya un’wana?” (Rhom. 14:4) Eka papila leri Pawulo a ri tsaleleke Varhoma, u vulavule hi swiphiqo leswi veke kona evandlheni ra lembe-xidzana ro sungula. Vakreste van’wana lava a va huma eka mindhavuko yo hambana-hambana, a va rhandza ku avanyisa swiboho ni swiendlo swa vapfumeri-kulobye. Xivutiso xa Pawulo xi va tsundzuxe leswaku va amukelana va tlhela va tshika Yehovha ku va yena loyi a avanyisaka.

Hilaha ku fanaka, ni namuntlha vanhu va Yehovha va huma etindhawini ni le ka swiyimo swo hambana-hambana. Hambiswiritano, Yehovha u hi hlanganisile leswaku hi va ni vun’we bya risima. Xana hi hoxa xandla eka vun’we byebyo? Loko hi rhandza ku hatlisela ku nga tsakeli swiendlo swo karhi swa vamakwerhu, hi ta va hi tlharihile loko hi tivutisa xivutiso xa Pawulo lexi nga laha henhla!

Swivutiso Swi Hi Tshineta Eka Yehovha

Swikombiso leswi swi nga ri swingani swi kombisa ndlela leyi swivutiso leswi nga eRitweni ra Xikwembu swi nga n’wi susumetelaka ha yona munhu. Ku kambisisa mongo wa xivutiso xin’wana ni xin’wana swi nga hi pfuna leswaku hi swi tirhisa eka swiyimo swa hina vini. Naswona loko hi ri karhi hi hlaya Bibele hi ta xiya swivutiso swin’wana swa nkoka leswi engetelekeke.—Vona bokisi leri nga eka tluka 14.

Loko hi pfumelela swivutiso leswi khumbaka mianakanyo leswi kumekaka eRitweni ra Xikwembu leswaku swi fikelela timbilu ta hina, swi ta endla leswaku mianakanyo ni timbilu ta hina swi fambisana ni tindlela ta Yehovha to lulama. Endzhaku ka loko Yehovha a n’wi vutise swivutiso, Yobo u te: “Ndzi twe ha wena hi mahungundlela, kambe sweswi tihlo ra mina ra ku vona.” (Yobo 42:5) Ina, Yehovha a a ri wa xiviri eka Yobo onge hiloko A ri emahlweni kakwe. Endzhaku ka nkarhi mudyondzisiwa Yakobo u te: “Tshinelani eka Xikwembu, kutani xi ta tshinela eka n’wina.” (Yak. 4:8) Onge hi nga pfumelela xiyenge xin’wana ni xin’wana xa Rito ra Xikwembu, ku katsa ni swivutiso swa rona leswaku swi hi pfuna hi kula hi tlhelo ra moya naswona hi ya emahlweni hi “vona” Yehovha tanihi munhu wa xiviri!

[Bokisi leri nga eka tluka 14]

Ku tivutisa swivutiso leswi swi nga ku pfuna njhani leswaku u tekelela ndlela leyi Yehovha a swi langutaka ha yona swilo?

▪ “Xana Yehovha u tsakisiwa hi magandzelo yo hisiwa ni switlhavelo ku fana ni ku yingisa rito ra Yehovha?”—1 Sam. 15:22.

▪ “Loyi a vumbaka tihlo, xana a nge voni?”—Ps. 94:9.

▪ “Vanhu loko va lavisisa ku vangama ka vona, xana i ku vangama?”—Swiv. 25:27.

▪ “Xana u ni xivangelo xo hlundzuka swonghasi?”—Yon. 4:4.

▪ “Swi ta n’wi pfuna yini munhu loko a pindzula misava hinkwayo kambe a lahlekeriwa hi moya-xiviri wakwe?”—Mat. 16:26.

▪ “I mani loyi a nga ta hi hambanisa ni rirhandzu ra Kreste?”—Rhom. 8:35.

▪ “I yini lexi u nga na xona lexi u nga nyikiwangiki?”—1 Kor. 4:7.

▪ “Ku vonakala ni munyama swi hlangana kwihi?”—2 Kor. 6:14.

[Xifaniso lexi nga eka tluka 15]

Yobo u dyondze yini eka swivutiso leswi Yehovha a n’wi vutiseke swona?