Xana U Hoxa Xandla Leswaku Minhlangano Ya Vukreste Yi Va Leyi Akaka?

“Loko mi hlengeletana, . . . swilo hinkwaswo a swi endleriwe ku aka.”—1 KOR. 14:26.

1. Hi ku ya hi 1 Vakorinto ndzima 14, hi xihi xikongomelo xa nkoka xa minhlangano ya Vukreste?

‘NHLANGANO lowu a wu aka hakunene!’ Xana u tshame u vula marito wolawo endzhaku ko ya eminhlanganweni eHolweni ya Mfumo? A swi kanakanisi leswaku u tshame u titwa tano! Hakunene minhlangano ya vandlha ya hi khutaza, kambe sweswo a swi hlamarisi. Phela, xikongomelo xa nkoka xa minhlangano ya hina namuntlha i ku tiyisa hinkwavo lava nga kona eminhlanganweni hi tlhelo ra moya hilaha a swi ri hakona enkarhini wa Vakreste vo sungula. Xiya ndlela leyi muapostola Pawulo a xi kandziyisaka ha yona xikongomelo xolexo xa minhlangano ya Vukreste eka papila rakwe ro sungula leri yaka eka Vakorinto. Eka ndzima 14 hinkwayo, u vula hi ku phindha-phindha leswaku xiyenge xin’wana ni xin’wana lexi nyikeriwaka eminhlanganweni ya vandlha xi fanele xi va ni xikongomelo lexi fanaka xo ‘aka vandlha.’—Hlaya 1 Vakorinto 14:3, 12, 26. *

2. (a) I yini lexi endlaka leswaku minhlangano yi va leyi akaka? (b) Hi xihi xivutiso lexi hi nga ta xi kambisisa?

 ² Ha swi xiya leswaku minhlangano yi va leyi akaka kumbe leyi vuyerisaka, hi leswi xo sungula yi lawuriwaka hi moya wa Xikwembu. Hikwalaho, hi sungula nhlangano wun’wana ni wun’wana wa vandlha hi ku khongela eka Yehovha hi mbilu hinkwayo, hi kombela Tata wa hina wa le matilweni leswaku a katekisa minhlangano ya hina hi moya wa yena lowo kwetsima. Nilokoswiritano, ha swi tiva leswaku swirho hinkwaswo swa vandlha swi nga hoxa xandla eku endleni leswaku xiyimiso xa minhlangano xi va lexi akaka hilaha swi nga kotekaka hakona. Hikwalaho, hi wahi magoza lawa un’wana ni un’wana wa hina a nga ma tekaka leswaku a tiyiseka leswaku minhlangano leyi khomiwaka vhiki ni vhiki eHolweni ya hina ya Mfumo ya phyuphyisa hi tlhelo ra moya yi tlhela yi khutaza minkarhi hinkwayo?

3. Minhlangano ya Vukreste i ya nkoka ku fikela kwihi?

³ Leswaku hi kuma nhlamulo, hi ta kambisisa swilo leswi khumbaka minhlangano ya hina leswi vanhu lava yi fambisaka va faneleke va swi tsundzuka. Hi ta tlhela hi kambisisa ndlela leyi vandlha hinkwaro ri nga hoxaka xandla ha yona eku endleni leswaku minhlangano yi va leyi khutazaka eka hinkwavo lava teke eka yona. Mhaka leyi ya hi tsakisa swinene hikuva minhlangano ya hina ya kwetsima. Hakunene, ku va kona eminhlanganweni ni ku hlamula i swa nkoka evugandzerini bya hina eka Yehovha.—Ps. 26:12; 111:1; Esa. 66:22, 23.

Nhlangano Lowu Endleriweke Ku Dyondza Bibele

4, 5. Hi xihi xikongomelo xa Dyondzo ya Xihondzo xo Rindza?

⁴ Hinkwerhu ka hina hi lava ku vuyeriwa hi ku helela eka Dyondzo ya hina ya vhiki ni vhiki ya Xihondzo xo Rindza. Hikwalaho, leswaku hi xi twisisa kahle xikongomelo-nkulu xa nhlangano lowu, a hi kambisiseni ku cinca ko karhi loku endliweke eka magazini wa Xihondzo xo Rindza ni le ka swihloko leswi dyondziwaka evandlheni.

⁵ Ku sukela eka nkandziyiso wo sungula wa vandlha wa Xihondzo xo Rindza, wa January 15, 2008, ku katsiwe mhaka ya nkoka exifunengetweni xa wona. Xana u yi lemukile? Xi langutisise kahle xifunengeto xa magazini lowu u nga wu khoma. Ehansi ka mfungho wa xihondzo, u ta vona Bibele leyi pfulekeke. Bibele yoleyo yi kandziyisa xivangelo xo va ni Dyondzo ya Xihondzo xo Rindza. Xivangelo xa kona i ku dyondza Bibele hi ku pfuniwa hi magazini lowu. Eka Dyondzo ya hina ya vhiki ni vhiki ya Xihondzo xo Rindza, Rito ra Xikwembu ri “endliwa [ri] va erivaleni,” ri tlhela ‘ri hlamuseriwa’ hilaha a swi ri hakona enkarhini wa Nehemiya wa le minkarhini ya khale.—Neh. 8:8; Esa. 54:13.

6. (a) Hi wihi ndzulamiso lowu endliweke eka Dyondzo ya Xihondzo xo Rindza? (b) I yini leswi faneleke swi tsundzukiwa eka matsalwa lama tsariweke leswaku “hlaya”?

⁶ Leswi Bibele ku nga yona buku leyi hi yi tirhisaka ngopfu, ku endliwe ndzulamiso eka Dyondzo ya Xihondzo xo Rindza. Matsalwa yo hlayanyana lama kombisiweke eka swihloko leswi dyondziwaka evandlheni ma tsariwe leswaku “hlaya.” Hinkwerhu hi khutaziwa ku pfula Tibibele ta hina hi hlaya matsalwa lawa loko ma hlayiwa hi nkarhi wa nhlangano. (Mint. 17:11) Ha yini? Loko hi vona ndzayo ya Xikwembu eTibibeleni ta hina ha khumbeka swinene. (Hev. 4:12) Hikwalaho, loko matsalwa wolawo ma nga si hlayiwa, munhu la fambisaka dyondzo yoleyo u fanele a nyika vanhu hinkwavo lava nga kona nkarhi wo pfula matsalwa wolawo ni ku fambisana ni vanhu lava hlayaka tindzimana toleto.

Nkarhi Lowu Engetelekeke Wo Kombisa Ripfumelo Ra Hina

7. Hi kuma nkarhi wo endla yini loko ku fambisiwa Dyondzo ya Xihondzo xo Rindza?

⁷ Nakambe ndzulamiso wun’wana lowu endliweke eka swihloko leswi dyondziwaka evandlheni swa Xihondzo xo Rindza i ku leha ka swona. Emalembeni ya sweswinyana, swi komisiwile. Hikwalaho, hi nkarhi wa Dyondzo ya Xihondzo xo Rindza ku tirhisiwa nkarhi wutsongo ku hlaya tindzimana ivi ku sala nkarhi wo tala wo hlamula. Sweswi vanhu vo tala evandlheni va ni nkarhi wo phofula ripfumelo ra vona hi ku hlamula xivutiso lexi vutisiweke, hi ku hlamusela ndlela leyi tsalwa ro karhi ri tirhaka ha yona, hi ku vula ntokoto wo koma lowu kombisaka vutlhari byo tirhisa milawu  ya Bibele kumbe hi tindlela tin’wana. Nakambe ku fanele ku tirhisiwa nkarhi wun’wana leswaku ku buriwa hi swifaniso.—Hlaya Pisalema 22:22; 35:18; 40:9.

8, 9. Hi wihi ntirho wa mufambisi wa Dyondzo ya Xihondzo xo Rindza?

⁸ Hambiswiritano, nkarhi wolowo lowu engetelekeke wo nyikela tinhlamulo to hambana-hambana wu ta kumeka ntsena loko vanhu lava hlamulaka va komisa, niloko loyi a fambisaka nhlangano wolowo a papalata ku vulavula ngopfu hi nkarhi wa Dyondzo ya Xihondzo xo Rindza. Hikwalaho, i yini lexi nga ha pfunaka mufambisi wa dyondzo yoleyo leswaku a ringanisela eka tinhlamuselo leti a ti nyikelaka ni leti nyikeriwaka hi vandlha leswaku nhlangano wu va lowu akaka eka hinkwavo?

⁹ Leswaku u kuma nhlamulo, anakanya hi xifaniso lexi. Dyondzo ya Xihondzo xo Rindza leyi fambisiwaka kahle, yi fana ni xijumba xa swiluva leswi kokaka mahlo. Tanihi leswi eka xijumba lexikulu xa swiluva ku nga ni swiluva swo hambana-hambana, hikwalaho Dyondzo ya Xihondzo xo Rindza yi vumbiwa hi tinhlamulo to tala to hambana-hambana. Naswona tanihi leswi swiluva leswi nga eka xijumba swi hambanaka hi ku leha ni hi muvala, hikwalaho tinhlamulo leti nyikeriwaka eka dyondzo leyi ta hambana hi  ku leha ni hi ndlela leyi ti nyikeriwaka ha yona. Xana mufambisi u tirha ku endla yini? Tinhlamulo ti nga ri tingani leti a ti nyikelaka ti fana ni swiphemu swi nga ri swingani swa rihlaza leswi tlhomiweke hi vukheta eka xijumba xa swiluva. Swiphemu swoleswo a swi tatiwanga; kambe swi endla leswaku xijumba lexi xi languteka naswona swi vumba xijumba xexo. Hilaha ku fanaka, munhu loyi a fambisaka dyondzo u fanele a tsundzuka leswaku ntirho wakwe a hi ku vulavula ngopfu kambe i ku engetela eka marito yo dzunisa lama vuriweke hi vandlha. Ina, loko tinhlamulo to hambana-hambana leti nyikeriweke hi vandlha ni marito ma nga ri mangani lama vuriwaka hi mufambisi wa dyondzo ma hlanganisiwa kahle, ma vumba marito yo saseka lama nga ta tsakisa hinkwavo lava nga kona eka dyondzo yoleyo.

“A Hi Nyikeleni Eka Xikwembu Xitlhavelo Xa Ku Dzunisa Nkarhi Hinkwawo”

10. Vakreste vo sungula a va yi teka njhani minhlangano ya vandlha?

¹⁰ Nhlamuselo ya Pawulo ya minhlangano ya Vukreste leyi kumekaka eka 1 Vakorinto 14:26-33, yi hi kombisa ndlela leyi minhlangano yoleyo a yi fambisiwa ha yona hi lembe-xidzana ro sungula. Loko xidyondzi xin’wana xa Bibele xi vulavula hi tindzimana toleto xi tsale xi ku: “Nchumu lowu xiyekaka malunghana ni Kereke ya khale hi leswaku munhu un’wana ni un’wana a a ta eka yona a swi tiva leswaku a a ri ni lunghelo ni vutihlamuleri byo hoxa xandla loko yi ri karhi yi fambisiwa. Munhu a a nga ti hi xikongomelo xo yingisela ntsena; a a nga teli ku nyikiwa ntsena kambe a a tlhela a nyika.” Entiyisweni, Vakreste vo sungula a va teka minhlangano ya vandlha tanihi nkarhi lowu va phofulaka ripfumelo ra vona eka yona.—Rhom. 10:10.

11. (a) I yini leswi endlaka leswaku minhlangano yi va leyi akaka, naswona ha yini? (b) Hi swihi swiringanyeto leswi nga hi pfunaka ku antswisa tinhlamulo ta hina eminhlanganweni? (Vona nhlamuselo ya le hansi.)

¹¹ Ku phofula ripfumelo ra hina eminhlanganweni swi hoxa xandla swinene leswaku “vandlha ri ta akeka.” Entiyisweni u ta pfumela leswaku ku nga khathariseki leswaku hi ni malembe mangani hi ri karhi hi ya eminhlanganweni, swa ha tsakisa swinene ku yingisela tinhlamulo leti vamakwerhu va ti nyikelaka. Ha khumbeka hi tinhlamulo leti humaka embilwini leti nyikeriwaka hi mupfumeri-kulorhi la dyuhaleke, la tshembekaka; ha khutazeka hikwalaho ka nhlamulo ya vutlhari leyi vuriweke hi nkulu la khathalaka; naswona ha n’wayitela loko n’wana a nyikela nhlamulo leyi humaka eka yena leyi kombisaka ndlela leyi a rhandzaka Yehovha ha yona hi mbilu hinkwayo. Swi le rivaleni leswaku loko hi hlamula, hinkwerhu hi hoxa xandla eku endleni leswaku minhlangano ya Vukreste yi va leyi akaka. *

12. (a) I yini leswi hi nga swi dyondzaka eka swikombiso swa Muxe na Yeremiya? (b) Xikhongelo xi hi pfuna njhani leswaku hi kota ku hlamula?

¹² Kambe, eka vanhu lava nga ni tingana, swi nga ha va tikela swinene ku hlamula. Loko na wena u ri ni xiphiqo xexo, swi nga ha ku pfuna ku tsundzuka leswaku a wu wexe. Entiyisweni, hambi ku ri malandza yo tshembeka ya Xikwembu yo tanihi Muxe na Yeremiya, na wona ma vule leswaku a ma na byona vuswikoti byo vulavula erivaleni. (Eks. 4:10; Yer. 1:6) Kambe, leswi Yehovha a pfuneke malandza wolawo ya yena ya khale leswaku ma n’wi dzunisa erivaleni, Xikwembu xi ta ku pfuna leswaku u nyikela switlhavelo swa ku dzunisa. (Hlaya Vaheveru 13:15.) U nga wu kuma njhani mpfuno wa Yehovha leswaku u nga chavi ku hlamula? Xo sungula, yi lunghiselele kahle minhlangano. Hikwalaho, loko u nga si ya eHolweni ya Mfumo, khongela eka Yehovha u n’wi kombela  leswaku a ku nyika xivindzi xo hlamula. (Filp. 4:6) U nga tiyiseka leswaku Yehovha u ta hlamula xikhongelo xa wena hileswi u kombelaka nchumu lowu fambisanaka ni ‘ku rhandza ka yena.’—1 Yoh. 5:14; Swiv. 15:29.

Minhlangano Leyi Xikongomelo Xa Yona Ku Nga Ku ‘Aka, Ku Khutaza Ni Ku Chavelela’

13. (a) Minhlangano ya hina yi fanele yi va khumba njhani lava teke eka yona? (b) Hi xihi xivutiso lexi nga xa nkoka swinene eka vakulu?

¹³ Pawulo u vule leswaku xikongomelo xa nkoka xa minhlangano ya vandlha i ku ‘aka, ku khutaza ni ku chavelela’ lava teke eka yona. * (1 Kor. 14:3) Vakulu lava nga Vakreste namuntlha va nga tiyiseka njhani leswaku swiyenge leswi va nga na swona eminhlanganweni swa aka ni ku chavelela vamakwerhu? Leswaku hi kuma nhlamulo, a hi anakanyeni hi nhlangano lowu Yesu a wu fambiseke endzhakunyana ka ku pfuxiwa kakwe.

14. (a) Hi swihi swiendlakalo leswi nga humelela emahlweni ka nhlangano lowu Yesu a wu hleleke? (b) Ha yini vaapostola va fanele va chavelelekile loko “Yesu a tshinela ivi a vulavula na vona”?

¹⁴ Xo sungula, xiya swiendlakalo leswi veke kona emahlweni ka nhlangano wolowo. Emahlweninyana ka ku va Yesu a dlayiwa, vaapostola “va n’wi [siyile] va baleka,” naswona hilaha ku profetiweke hakona va ‘hangalakele etindlwini ta vona.’ (Mar. 14:50; Yoh. 16:32) Kutani endzhaku ka ku pfuxiwa kakwe, Yesu u rhambe vaapostola vakwe lava heleke matimba leswaku va ta eka nhlangano wo hlawuleka. * Hiloko “vadyondzisiwa va 11 va ya entshaveni ya Galeliya laha Yesu a a hlele ku ya hlangana na vona kona.” Loko va fika, “Yesu a tshinela ivi a vulavula na vona.” (Mat. 28:10, 16, 18) Anakanya ndlela leyi vaapostola va faneleke va titwe va ntshunxeke ha yona loko Yesu a vulavula na vona! Xana Yesu u vulavule hi yini?

15. (a) Yesu u vulavule hi yini, kambe i yini leswi a nga vulavulangiki ha swona? (b) Nhlangano wolowo wu va khumbe njhani vaapostola?

¹⁵ Yesu u sungule hi ku endla xitiviso lexi nge: “Ndzi nyikiwe vulawuri hinkwabyo.” Kutani u va nyike ntirho: “Hikokwalaho fambani mi ya endla . . . vadyondzisiwa.” Eku heteleleni u va tiyisekise hi rirhandzu a ku: “Ndzi na n’wina masiku hinkwawo.” (Mat. 28:18-20) Kambe, xana u swi xiyile leswaku i yini leswi Yesu a nga swi endlangiki? A nga va holovelanga vaapostola vakwe; kumbe ku tirhisa nhlangano wolowo leswaku a kanakana swikongomelo swa vona kumbe ku endla leswaku va tivona nandzu ku tlula mpimo hi ku vulavula hi mhaka ya ku va va tsane eripfumelweni swa nkarhinyana. Ematshan’weni ya sweswo, Yesu u va nyike ntirho wa nkoka, xisweswo a va tiyisekisa leswaku yena ni Tata wakwe va va rhandza. Ndlela leyi Yesu a vulavurisaneke ni vaapostola ha yona yi va khumbe njhani vaapostola? Yi va akile swinene, yi va khutaza ni ku va chavelela lerova hi nkarhi wun’wana endzhaku ka nhlangano wolowo va tlhele va “dyondzisa ni ku vula mahungu lamanene.”—Mint. 5:42.

16. Vakulu lava nga Vakreste namuntlha va xi tekelela njhani xikombiso xa Yesu loko va fambisa minhlangano leyi phyuphyisaka?

¹⁶ Namuntlha vakulu va tekelela Yesu hi ku teka minhlangano tanihi nkarhi wo tiyisa vapfumeri-kulobye hi rirhandzu lerikulu leri Yehovha a rhandzaka vanhu vakwe ha rona. (Rhom. 8:38, 39) Hikwalaho, loko vakulu va fambisa minhlangano va dzika eka swilo leswinene leswi vamakwavo va swi endlaka ku nga ri eka leswi va tsandzekaka ku swi endla. A va kanakani swikongomelo swa vamakwavo va vona. Ematshan’weni ya sweswo, marito ya vona ma kombisa leswaku va teka vapfumeri-kulobye tanihi vanhu lava rhandzaka Yehovha ni lava lavaka ku endla swilo leswinene. (1 Tes. 4:1, 9-12) Minkarhi yin’wana vakulu va nga ha boheka ku nyikela ndzayo evandlheni hinkwaro, kambe loko va fanele va nyikela ndzayo eka vamakwerhu va nga ri vangani, i swinene leswaku va va nyika yona exihundleni. (Gal. 6:1; 2 Tim. 2:24-26) Loko vakulu va vulavula ni vandlha hinkwaro, xikongomelo xa vona i ku bumabumela loko swi fanerile. (Esa. 32:2) Va tikarhatela ku vulavula hi ndlela leyi nga ta endla leswaku endzhaku  ka nhlangano, vanhu hinkwavo lava nga kona va titwa va phyuphyile naswona va ri ni matimba.—Mat. 11:28; Mint. 15:32.

Minhlangano Ya Hina I Xihlovo Xa Nchavelelo

17. (a) Ha yini swi ri swa nkoka swinene ku tlula rini na rini leswaku minhlangano ya hina yi va xihlovo xa nchavelelo? (b) I yini leswi wena u nga swi endlaka leswaku minhlangano yi va leyi akaka? (Vona bokisi leri nge, “Tindlela Ta Khume To Endla Leswaku Minhlangano Yi Va Leyi Akaka Eka Wena Ni Le Ka Van’wana.”)

¹⁷ Leswi misava ya Sathana yi yaka yi tshikilela swinene, hi fanele hi tiyiseka leswaku minhlangano ya hina ya Vukreste i xihlovo xa nchavelelo eka hinkwavo. (1 Tes. 5:11) Makwerhu wa xisati loyi a langutaneke ni ndzingo lowukulu swin’we ni nuna wa yena malembe lama hundzeke, u ri: “Ku va eHolweni ya Mfumo a swi fana ni ku va emavokweni ya Yehovha lama khathalelaka. Loko hi ri kwalaho swin’we ni vamakwerhu lava nga Vakreste, a hi swi kota ku lahlela ndzhwalo wa hina eka Yehovha naswona hi titwe hi ri ni ku rhula ka mianakanyo.” (Ps. 55:22) Onge hinkwavo lava taka eminhlanganweni ya hina va nga titwa va khutazeke hi ndlela yoleyo va tlhela va chaveleleka. Leswaku swi va tano, a hi hambeteni hi hoxa xandla eku endleni leswaku minhlangano ya Vukreste yi va leyi akaka.

[Tinhlamuselo ta le hansi]

U Nga Hlamula Njhani?

• Minhlangano ya Vukreste i ya nkoka ku fikela kwihi?

• Ha yini tinhlamulo leti nyikeriwaka eminhlanganweni ti hoxa xandla leswaku “vandlha ri ta akeka”?

• Hi nga dyondza yini eka nhlangano lowu Yesu a wu fambiseke a ri ni valandzeri vakwe?

[Swivutiso Swa Dyondzo]

[Bokisi/Swifaniso leswi nga eka tluka 22, 23]

TINDLELA TA KHUME TO ENDLA LESWAKU MINHLANGANO YI VA LEYI AKAKA EKA WENA NI LE KA VAN’WANA

Lunghiselela ka ha ri emahlweni. Loko u ri kambisisa ka ha ri emahlweni rungula leri ku nga ta buriwa ha rona eHolweni ya Mfumo, u ta yi tsakela swinene minhlangano naswona mianakanyo ya wena yi ta dzika swinene eka rungula rero.

Vana kona nkarhi na nkarhi. Leswi swi khutazaka swinene loko ku ri ni vanhu vo hlayanyana eminhlanganweni, vukona bya wena i bya nkoka.

Fika hi nkarhi. Loko u va u tshamisekile loko minhlangano yi nga si sungula, u nga hlanganyela eka risimu ni xikhongelo xo pfula, leswi nga xiphemu xa vugandzeri bya hina eka Yehovha.

Tana ni leswi u nga ta swi tirhisa. Tana ni Bibele ni (ti-)buku leti nga ta tirhisiwa hi nkarhi wa nhlangano leswaku u ta hlaya leswi ku buriwaka ha swona ni ku swi twisisa kahle.

Papalata swikavanyeto. Hi xikombiso, hlaya marungula lawa u rhumeriwaka wona hi selfoni endzhaku ka minhlangano ku nga ri hi nkarhi wa minhlangano. Loko u endla tano, u ta va u endla timhaka ta munhu hi yexe hi nkarhi lowu faneleke.

Hlanganyela. Loko vanhu vo tala va hlamula, vo tala va khutazeka va tlhela va akiwa hi tinhlamulo to hambana-hambana leti kombisaka ripfumelo.

Komisa tinhlamulo ta wena. Leswi swi endla leswaku vo tala va kuma nkarhi wo hlamula.

Endla swiavelo swa wena. Loko hi ri swichudeni eXikolweni xa Vutirheli bya le Tilweni kumbe hi hlanganyela eka Nhlangano wa Ntirho, hi fanele hi lunghiselela kahle, hi pfuxeta ka ha ri ni nkarhi ni ku tikarhatela ku hetisisa swiavelo swa hina.

Bumabumela lava hlanganyelaka. Byela vanhu lava nga ni swiavelo enhlanganweni kumbe lava hlamulaka leswaku matshalatshala ya vona ma tlangeriwa swinene.

Bula ni vanhu. Ku xewetana hi ndlela ya xinghana ni ku burisana hi ndlela leyi akaka emahlweni ni le ndzhaku ka minhlangano swi engetela ntsako ni vuyelo lebyi munhu a byi kumaka hi ku va kona.