Nkarhi Wo Tirhela Xikwembu Wa Ha Ri Kona

Le Málaga, edzongeni wa Spain, manana ni n’wana wakwe wa nhwanyana, lava havumbirhi bya vona va vitaniwaka va-Ana, va khuvuriwe hi December 19, 2009. A va ri van’wana va lava 2 352 lava khuvuriweke hi 2009 le Spain. Kambe nchumu lowu a wu hlawulekile hi manana loyi ni n’wana wakwe a ku ri malembe ya vona. Manana loyi a a ri ni malembe ya 107 kasi n’wana wakwe a a ri ni malembe ya 83!

I yini leswi va susumeteleke ku khuvuriwa leswaku va kombisa ku tinyiketela ka vona eka Yehovha? Eku sunguleni ka va-1970, muakelani la nga Mbhoni a a tolovele ku rhambela Ana lontsongo eka Dyondzo ya Buku ya Vandlha leyi a yi khomeriwa ekaya ra Mbhoni yin’wana. A a nga yi minkarhi hinkwayo. Hambiswiritano, hikwalaho ka ntirho wakwe wo tihanyisa, a nga endlanga nhluvuko.

Endzhaku ka malembe ya kwalomu ka khume, vana van’wana va Ana lontsongo va sungule ku dyondza Bibele naswona hi ku famba ka nkarhi va ve malandza ya Yehovha. Un’wana wa vona, ku nga Mari Carmen, eku heteleleni u endle leswaku mana wakwe a tlhela a tsakela ntiyiso wa Bibele kutani a n’wi pfuna leswaku a amukela dyondzo ya Bibele. Kutani, kokwana wa xisati wa Mari Carmen ku nga Ana lonkulu, na yena u sungule ku tsakela ku dyondza Bibele. Eku heteleleni, ku khuvuriwe swirho swa khume swa ndyangu wolowo.

Hi siku leri va khuvuriweke ha rona, a va nga tikoti hi ntsako. Ana lonkulu u te: “Yehovha u ve lonene ngopfu eka mina, u ndzi pfumelele leswaku ndzi n’wi tiva.” N’wana wakwe u engetele a ku: “Ndzi lava ku tirhela Yehovha Paradeyisi yi nga si fika, ndzi endla ku rhandza ka yena ndzi tlhela ndzi chumayela mahungu lamanene hilaha ndzi nga kotaka hakona.”

Lexi endlaka leswaku tinoni letimbirhi ti va ni ntsako lowu hlawulekeke i ku ya eminhlanganweni. Nkulu un’wana wa le vandlheni leri ti hlanganyelaka eka rona u ri: “A va xwi eminhlanganweni. Minkarhi hinkwayo va tshama va lunghekele ku hlamula eka Dyondzo ya Xihondzo xo Rindza.”

Xikombiso xa vona xa ku tshembeka xi hi tsundzuxa noni leyi vuriwaka Ana, ‘leyi a yi nga kali etempeleni, yi endla ntirho wo kwetsima vusiku ni nhlikanhi yi ri karhi yi titsona swakudya, yi endla ni swikombelo.’ Leswi swi endle leswaku yi va ni lunghelo ro vona Yesu loko a ha ri ricece. (Luka 2:36-38) Loko Ana a ri ni malembe ya 84, a a nga si dyuhala ngopfu lerova a a nga ta swi kota ku tirhela Yehovha, ku fana ni vamavizweni vakwe lava boxiweke laha.

Xana u ni maxaka lama swi lavaka ku yingisela rungula ra le Bibeleni? Kumbe, xana u tshame u hlangana ni munhu la dyuhaleke la tsakelaka ku ku yingisela loko u n’wi endzela ekaya rakwe? Vanhu vo tano va nga fana na va-Ana lava ku vulavuriweke ha vona eka ntokoto lowu, hikuva nkarhi wo tirhela Yehovha Xikwembu xa ntiyiso wa ha ri kona.

[Marito lama tshahiweke exihlokweni lama nga eka tluka 25]

“Yehovha u ve lonene ngopfu eka mina”

[Marito lama tshahiweke exihlokweni lama nga eka tluka 25]

“Ndzi lava ku tirhela Yehovha Paradeyisi yi nga si fika”