Swivutiso Swa Vahlayi

Genesa 6:3 yi ri: “Moya wa mina a wu nge he tirhi hilaha ku nga heriki eka munhu hikuva na yena i nyama. Hikwalaho masiku yakwe ma ta va malembe ya 120.” Xana Yehovha a a hunguta malembe ya vutomi bya vanhu ma va 120? Naswona xana Nowa u chumayele hi ta ku ta ka Ndhambi ku ringana malembe wolawo?

Nhlamulo ya swivutiso sweswo i doo!

Emahlweni ka Ndhambi, vanhu vo tala va hanye madzana ya malembe. Nowa a a ri ni malembe ya 600 loko Ndhambi yi fika naswona u hanye malembe ya 950. (Gen. 7:6; 9:29) Van’wana lava velekiweke endzhaku ka Ndhambi na vona va hanye malembe yo tlula 120. Arifakisada u fe a ri ni malembe ya 438 kasi Xela a a ri ni malembe ya 433. (Gen. 11:10-15) Hambiswiritano, hi ntolovelo vanhu se a va hanya malembe ya 70 kumbe ya 80 enkarhini wa Muxe. (Ps. 90:10) Hikwalaho marito ya Genesa 6:3 a ma nga veki nawu wa leswaku vanhu va ta hanya malembe ya 120 ntsena.

Kutani, xana Xikwembu xi vule marito wolawo leswaku xi byela Nowa leswaku a lemukisa van’wana hi ndzoviso lowu a wu ta fika endzhaku ka malembe ya 120? Doo! I ntiyiso leswaku Xikwembu xi vulavule na Nowa minkarhi yo hlayanyana. Endzhaku ka tindzimana ta khume eka rungula rolero hi hlaya marito lawa: “Xikwembu xi ku eka Nowa: ‘Makumu ya nyama hinkwayo ma fikile emahlweni ka mina, hikuva misava yi tale madzolonga.’” Emalembeni lama landzeleke, Nowa u hete ntirho lowukulu wo aka ngalava naswona hi nkarhi wolowo: “Yehovha a ku eka Nowa: ‘Nghena engalaveni, wena ni hinkwavo vandyangu wa wena.’” (Gen. 6:13; 7:1) Nakambe ku ni minkarhi yin’wana laha Yehovha a byeleke Nowa timhaka to karhi.—Gen. 8:15; 9:1, 8, 17.

 Hambiswiritano, marito ya Genesa 6:3 ma hlayeka hi ndlela leyi hambaneke; a ma vulavuli hi Nowa kumbe ku vula leswaku Xikwembu a xi vulavula na yena. Ma nga tekiwa tanihi mhaka leyi vulaka xikongomelo xa Xikwembu kumbe leswi a xi tiyimisele ku swi endla ntsena. (Ringanisa na Genesa 8:21.) I swa nkoka ku xiya leswaku eka matimu ya swilo leswi humeleleke khale Adamu a nga si va kona, hi kuma swiga swo tanihi lexi nge: “Xikwembu xi ya emahlweni xi ku . . . ” (Gen. 1:6, 9, 14, 20, 24) Swi le rivaleni leswaku Yehovha a a nga vulavuli ni munhu emisaveni, hikuva hi nkarhi wolowo munhu a a nga si vumbiwa.

Hikwalaho, swa twisiseka ku gimeta hileswaku Genesa 6:3 yi vulavula hi xikongomelo xa Xikwembu xo herisa fambiselo ro biha ra swilo emisaveni. Yehovha u vule leswaku u ta herisa mafambiselo wolawo emalembeni ya 120, hambileswi Nowa a a nga si swi tiva sweswo. Kambe ha yini a veke nkarhi wolowo? Ha yini a boheke ku rindza nkarhi wolowo?

Muapostola Petro u nyikela swivangelo swa kona: “Xikwembu [xi] rindzile hi ku lehisa mbilu emasikwini ya Nowa, loko ka ha akiwa ngalava, leyi vanhu va nga ri vangani, ku nga mimoya-xiviri ya nhungu, va ponisiweke ha yona ematini.” (1 Pet. 3:20) Loko Xikwembu xi vule xikongomelo xa xona malunghana ni malembe ya 120, a ka ha ri ni swilo leswi a swa ha fanele swi endliwa. Endzhaku ka malembe ya kwalomu ka 20, Nowa ni nsati wakwe va sungule ku va ni vana. (Gen. 5:32; 7:6) Vana va vona vanharhu va kurile kutani va teka, ivi nhlayo ya ndyangu yi kula yi va “mimoya-xiviri ya nhungu.” Kutani a va fanele va aka ngalava leyi a ku nga ri matlangwana ku yi aka tanihi leswi a yi ri yikulu naswona ndyangu wa Nowa a wu ri wutsongo. Xisweswo, ku lehisa mbilu ka Xikwembu ku ringana malembe ya 120 ku endle leswaku swilo sweswo swi hetiwa naswona vanhu va nhungu vo tshembeka va kota ku ‘ponisiwa ematini.’

Bibele a yi ri boxi lembe leri Yehovha a byeleke Nowa ha rona leswaku ku ta va ni Ndhambi. Ku sukela loko vana vakwe va majaha va tswariwile, va kula va tlhela va teka, kumbexana a ka ha sele malembe ya 40 kumbe 50 leswaku ku fika Ndhambi. Kutani Yehovha u byele Nowa a ku: “Makumu ya nyama hinkwayo ma fikile emahlweni ka mina.” U tlhele a vula leswaku Nowa u fanele a aka ngalava leyikulu naswona a nghena eka yona ni ndyangu wakwe. (Gen. 6:13-18) Eka makume ya malembe lawa a ma ha sele, Nowa u ve xikombiso hi ku hanya hi ndlela leyi lulameke. U tlhele a va “muchumayeri wa leswo lulama” loyi a a fanele a twarisa xilemukiso lexi kongomeke—ku tiyimisela ka Xikwembu ku lovisa vanhu lava hi nkarhi wolowo a va nga hanyi hi milawu ya Xikwembu. Nowa a nga swi tivanga ka ha ri emahlweni leswaku sweswo a swi ta endleka rini, kambe a a swi tiva leswaku hakunene a swi ta endleka. Naswona na wena wa swi tiva leswaku swi endlekile.—2 Pet. 2:5.