Mindyangu Ya Vakreste—“Tshamani Mi Lunghekile”

“Tshamani mi lunghekile, hikuva N’wana wa munhu u ta hi nkarhi lowu mi nga ehleketiki leswaku wu nga va wona.”—LUKA 12:40.

1, 2. Ha yini hi fanele hi xi tekela enhlokweni xitsundzuxo xa Yesu xa leswaku hi ‘tshama hi lunghekile’?

“LOKO N’wana wa munhu a fika hi ku vangama kakwe” naswona a hambanisa “vanhu van’wana eka van’wana,” ku ta humelela yini hi wena ni ndyangu wa wena? (Mat. 25:31, 32) Tanihi leswi swilo leswi swi nga ta humelela hi nkarhi lowu hi nga wu ehleketiki, i swa nkoka leswaku hi xi tekela enhlokweni xitsundzuxo xa Yesu xa leswaku hi ‘tshama hi lunghekile’!—Luka 12:40.

² Xihloko lexi hundzeke xi tlhuvutse ndlela leyi xirho ha xin’we endyangwini xi nga wu pfunaka ha yona ndyangu hinkwawo leswaku wu hiteka hi tlhelo ra moya hi ku va xi teka vutihlamuleri bya xona byi ri bya nkoka. A hi kambisiseni tindlela tin’wana leti hi nga hoxaka xandla ha tona leswaku ndyangu wa hina wu tshama wu hlayisekile hi tlhelo ra moya.

Vanani Ni Tihlo Ro “Olova”

3, 4. (a) I yini leswi mindyangu ya Vakreste yi faneleke yi tivonela eka swona? (b) Swi vula yini leswaku hi ni tihlo ro “olova”?

³ Leswaku mindyangu yi tshama yi lunghekele ku ta ka Kreste, yi fanele yi tivonela leswaku yi nga kavanyeteki etimhakeni leti khumbaka vugandzeri bya ntiyiso. Yi fanele yi tivonela eka swilo leswi nga yi kavanyetaka ku gandzela Yehovha ni leswi  nga endlaka leswaku yi tshama yi nga lunghekanga. Tanihi leswi ku hlongorisa rifuwo ku nga ntlhamu lowu phaseke vanhu vo tala, xiya leswi Yesu a swi vuleke malunghana ni ku va ni tihlo ro “olova.” (Hlaya Matewu 6:22, 23.) Tanihi leswi rivoni ri nga hi voningelaka ndlela leswaku hi nga khugunyeki hi wa, leswi hi swi nghenisaka ‘etimbilwini’ ta hina to fanekisela swi nga hi voningela swi tlhela swi hi pfuna leswaku hi nga weli exidyohweni.—Efe. 1:18.

⁴ Leswaku tihlo ra xiviri ri vona kahle, ri fanele ri tirha kahle naswona ri kota ku dzika eka leswi ri swi languteke. Hilaha ku fanaka, ku va ni tihlo ro olova ro fanekisela swi vula leswaku hi dzika eka xikongomelo xin’we. Ematshan’weni yo hanyela ku hlongorisa rifuwo ni ku vilela ku tlula mpimo hi swilaveko swa nyama swa ndyangu, hi dzikisa mahlo ya hina etimhakeni ta moya. (Mat. 6:33) Leswi swi vula leswaku ha eneriseka hi swilo swa hina swa nyama naswona hi rhangisa ntirho wa Xikwembu evuton’wini bya hina.—Hev. 13:5.

5. Nhwanyana un’wana u swi kombise njhani leswaku “tihlo” rakwe a ri dzike entirhweni wa Xikwembu?

⁵ Hakunene vana va nga vuyeriwa loko va leteriwa ku va ni tihlo ro olova! Xiya xikombiso xa nhwanyana un’wana wa le Etiyopiya. U pase kahle lerova loko a heta xikolo u nyikiwe bazari leswaku a ya eyunivhesiti. Hambiswiritano, leswi tihlo rakwe a ri dzike entirhweni wa Yehovha, u ale bazari yoleyo. Endzhaku ka sweswo, u nyikiwe ntirho lowu a wu ta n’wi holela mali leyi ringanaka 28 200 wa tirhandi hi n’hweti, ku nga muholo lowu tlakukeke swinene loko wu ringanisiwa ni miholo leyi tolovelekeke etikweni ra ka vona. Kambe “tihlo” ra yena a ri dzike eka vuphayona. A nga kalanga a vutisa vatswari vakwe loko a fanele a tshika ntirho wolowo. Vatswari vakwe va titwe njhani loko va twa leswi n’wana wa vona a swi endleke? Va tsake na yena naswona va n’wi byele leswaku va tinyungubyisa ha yena.

6, 7. Hi le ka khombo rihi laha hi faneleke hi ‘tshama hi pfule mahlo ya hina’?

⁶ Marito ya Yesu lama tsariweke eka Matewu 6:22, 23 i xilemukiso lexi vuriweke hi ndlela yo gega malunghana ni ku navela. Yesu a nga hambanisanga rito ku “olova” ni rito-fularha ra rona ku nga ku “rharhangana,” kambe u ri hambanise ni rito ‘homboloka.’ Rito ra Xigriki leri hundzuluxeriweke ri va ‘homboloka’ ri nga tlhela ri vula ku navela kumbe makwanga. (Mat. 6:23) I yini leswi Yehovha a swi vulaka malunghana ni ku navela kumbe makwanga? Bibele yi ri: “Vumbhisa ni thyaka ra muxaka wun’wana ni wun’wana kumbe makwanga [kumbe ku “navela”] swi nga vuriwi hambi ku ri ku vuriwa exikarhi ka n’wina.”—Efe. 5:3.

⁷ Hambileswi swi nga ha olovaka ku xiya leswaku van’wana va ni makwanga, kambe eka hina vini a swi olovi. Hikwalaho, i swinene ku yingisa ndzayo ya Yesu: “Tshamani mi pfule mahlo ya n’wina naswona mi tivonela eka muxaka wun’wana ni wun’wana wa ku navela.” (Luka 12:15) Ku endla sweswo swi lava leswaku hi tikambisisa ku vona leswi timbilu ta hina ti dzikeke eka swona. Mindyangu ya Vakreste yi fanele yi wu tekela enhlokweni nkarhi ni mali leyi yi yi tirhisaka eka vuhungasi ni le ku xaveni ka swilo leswi vonakaka.

8. Hi nga ‘tshama hi pfule mahlo ya hina’ hi ndlela yihi loko hi lava ku xava nchumu wo karhi?

⁸ Loko u nga si xava nchumu wo karhi, a wu fanelanga u ehleketa ntsena hileswaku u na yona mali leyi ringaneke yo wu xava. Ehleketa hi timhaka tin’wana to fana ni leti: ‘Xana ndzi ta va na wona nkarhi wo tirhisa nchumu wolowo nkarhi ni nkarhi ni ku wu khathalela? Swi ta ndzi tekela nkarhi wo tanihi kwihi ku dyondza ku wu tirhisa kahle?’ N’wina vantshwa, mi nga pfumeli hinkwaswo leswi vunavetisi byi swi vulaka malunghana ni switirhisiwa leswi xaviseriwaka vanhu kutani mi tikarhatela ku xava swiambalo swa mavito kumbe switirhisiwa swin’wana handle ko anakanya. Tikhomeni. Nakambe tivutiseni loko ku xava nchumu wolowo lowu mi wu lavaka swi ta pfuna mindyangu ya ka n’wina leswaku yi tshama yi lunghekile loko N’wana wa munhu a ta. Tshembani xitshembiso xa Yehovha lexi nge: “Ndzi nga ka ndzi nga ku tshiki naswona ndzi nga ka ndzi nga ku fularheli.”—Hev. 13:5.

Tikarhateleni Ku Fikelela Tipakani Ta Moya

9. Ku tikarhatela ku fikelela tipakani ta moya swi nga yi pfuna njhani mindyangu?

⁹ Ndlela yin’wana leyi ha yona swirho swa ndyangu swi nga tiyisaka ripfumelo ra swona ni ku hoxa xandla leswaku ndyangu hinkwawo wu tshama wu hlayisekile hi tlhelo ra moya, i ku va swi tivekela tipakani ta moya ni ku tikarhatela ku  ti fikelela. Ku endla tano swi nga pfuna mindyangu ku vona loko yi endla kahle entirhweni lowu yi wu endlelaka Yehovha ni ku hlawula mintirho leyi faneleke yi va ya nkoka evuton’wini bya yona.—Hlaya Vafilipiya 1:10.

10, 11. Hi tihi tipakani ta moya leti mi tikarhatelaka ku ti fikelela tanihi ndyangu naswona hi tihi tin’wana leti u nga tivekelaka tona enkarhini lowu taka?

¹⁰ Hambi ku ri ku tivekela tipakani letitsongo leti fikelelekaka leti xirho ha xin’we xa ndyangu xi nga kotaka ku ti fikelela, swi nga va ni vuyelo lebyinene. Hi xikombiso, ehleketa hi pakani yo dyondza ndzimana ya siku, siku ni siku. Tinhlamulo leti nyikeriwaka hi swirho swa ndyangu ti nga pfuna nhloko ya ndyangu ku xiya leswaku swi rhandza Yehovha ni ntiyiso ku fikela kwihi. Pakani ya ku hlaya Bibele nkarhi ni nkarhi tanihi ndyangu yi nyika vana nkarhi lowunene wo antswisa vutshila bya vona byo hlaya ni byo twisisa rungula ra le Bibeleni. (Ps. 1:1, 2) Naswona xana a hi fanelanga hi tivekela pakani yo antswisa swikhongelo swa hina? Pakani yin’wana leyinene leyi hi nga tivekelaka yona ku nga va ku hlakulela timfanelo ta moya lowo kwetsima. (Gal. 5:22, 23) Naswona ku vuriwa yini hi ku lava tindlela to va komba rirhandzu vanhu lava hi va kumaka ensin’wini? Ku tikarhatela ku endla sweswo tanihi ndyangu swi nga pfuna vana ku dyondza ku va ni tintswalo naswona va nga ha hlakulela ku navela ku va maphayona ya nkarhi hinkwawo kumbe ku va varhumiwa.

¹¹ Ha yini u nga kambisisi tipakani tin’wana leti wena ni ndyangu wa wena mi nga tikarhatelaka ku ti fikelela? Xana ndyangu wa wena wu nga tivekela pakani yo tirha nkarhi lowu engetelekeke ensin’wini? Xana u nga lwela ku hlula ku chava malunghana ni ku chumayela exitarateni, etindhawini ta mabindzu kumbe hi riqingho? Xana u nga ya u ya chumayela laha ku nga ni xilaveko lexikulu xa vahuweleri va Mfumo? Xana xirho xa  ndyangu xi nga dyondza ririmi rimbe leswaku xi chumayela vanhu lava humaka ematikweni mambe?

12. Tinhloko ta mindyangu ti nga endla yini leswaku ti pfuna mindyangu ya tona yi kula hi tlhelo ra moya?

¹² Tanihi nhloko ya ndyangu, kumisisa tindhawu leti ndyangu wa wena wu nga endlaka nhluvuko eka tona. Kutani veka tipakani to karhi leti nga ta endla leswaku ku endliwa nhluvuko wolowo. Tipakani leti mi tivekelaka tona tanihi ndyangu ti fanele ti ri leti fikelelekaka hi ku ya hi swiyimo ni vuswikoti bya n’wina. (Swiv. 13:12) Entiyisweni, ku lwela ku fikelela pakani ya nkoka swi teka nkarhi. Kutani tixavele nkarhi lowu u wu hetaka u ri eku hlaleleni ka thelevhixini kutani u wu tirhisela ku endla mintirho leyi fambisanaka ni vugandzeri bya hina. (Efe. 5:15, 16) Tikarhatele ku fikelela tipakani leti u ti vekeleke ndyangu wa wena. (Gal. 6:9) Ndyangu lowu tikarhatelaka ku fikelela tipakani ta moya wu ta endla leswaku nhluvuko wa wona wu “vonaka eka vanhu hinkwavo.”—1 Tim. 4:15.

Vanani Ni Vugandzeri Bya Ndyangu Bya Nimadyambu

13. Hi kwihi ku cinca loku sunguriweke eka xiyimiso xa minhlangano ya vandlha ya vhiki ni vhiki naswona hi swihi swivutiso leswi hi faneleke hi anakanyisisa ha swona?

¹³ Nchumu lowunene lowu pfunaka mindyangu leswaku yi ‘tshama yi lunghekele’ ku ta ka N’wana wa munhu i ku cinca ka nkoka eka xiyimiso xa minhlangano ya hina ya vhiki ni vhiki loku sunguleke hi January 1, 2009. A ka ha ri na siku leri hi hlanganaka ha rona evhikini leswaku hi khoma nhlangano lowu a wu vitaniwa Dyondzo ya Buku ya Vandlha. Nhlangano lowu, se wu hlanganisiwe ni Xikolo xa Vutirheli bya le Tilweni ni Nhlangano wa Ntirho. Ku cinca loku ku endleriwe ku nyika mindyangu ya Vakreste nkarhi wo tiyisa vuxaka bya yona na Yehovha hi ku veka madyambu man’wana evhikini leswaku yi va ni vugandzeri bya ndyangu. Leswi se ku hundzeke nkarhi ku sukela loko ku cinca loku ku sungurile, hi nga tivutisa: ‘Xana ndzi tirhisa nkarhi lowu nga kona leswaku ndzi va ni Vugandzeri bya Ndyangu kumbe dyondzo ya munhu hi yexe? Xana ndza swi kota ku fikelela xikongomelo xa lunghiselelo rero?’

14. (a) Hi xihi xikongomelo-nkulu xa ku vekela etlhelo madyambu yo va ni Vugandzeri bya Ndyangu kumbe dyondzo ya munhu hi yexe? (b) Ha yini ku vekela madyambu man’wana etlhelo leswaku hi dyondza Bibele swi ri swa nkoka?

¹⁴ Xikongomelo-nkulu xa ku va ni Vugandzeri bya Ndyangu bya nimadyambu kumbe nkarhi wa dyondzo ya munhu hi yexe i ku tshinela eka Xikwembu. (Yak. 4:8) Loko hi heta nkarhi hi dyondza Bibele nkarhi ni nkarhi naswona hi n’wi tiva swinene Muvumbi, vuxaka bya hina na yena bya tiya. Loko hi ya hi tshinela eka Yehovha, hi ta susumeteleka swinene ku n’wi rhandza ‘hi timbilu ta hina hinkwayo ni hi mimoya-xiviri ya hina hinkwawo ni hi mianakanyo ya hina hinkwayo ni hi ntamu wa hina hinkwawo.’ (Mar. 12:30) Entiyisweni, hi tiyimisele ku yingisa Xikwembu ni ku xi tekelela. (Efe. 5:1) Kutani ku va ni Vugandzeri bya Ndyangu bya nimadyambu nkarhi ni nkarhi i swa nkoka leswaku ku pfuniwa swirho hinkwaswo swa ndyangu wa hina swi ‘tshama swi lunghekile’ hi tlhelo ra moya tanihi leswi hi languteleke “nhlomulo lowukulu” lowu ku profetiweke ha wona. (Mat. 24:21) I swa nkoka leswaku hi pona nhlomulo wolowo.

15. Hi byihi vuyelo lebyi Vugandzeri bya Ndyangu bya nimadyambu byi vaka na byona eka ndlela leyi swirho swa ndyangu swi langutanaka ha yona?

¹⁵ Xikongomelo xin’wana xa lunghiselelo ra Vugandzeri bya Ndyangu i ku pfuna swirho swa ndyangu leswaku swona hi swoxe swi va ni vuxaka lebyikulu. Ku heta nkarhi swin’we tanihi ndyangu mi vulavula hi timhaka ta moya vhiki ni vhiki swi va ni vuyelo lebyinene eka ndlela leyi swirho swa ndyangu swi langutanaka ha yona. Vatekani va va ni vun’we swinene loko va tsakisiwa hi tidyondzo ta nkoka leti va ti kumeke swin’we loko va dyondza Bibele. (Hlaya Eklesiasta 4:12.) Vatswari ni vana lava gandzelaka Xikwembu swin’we, hakanyingi va hlanganisiwa hi rirhandzu, ku nga “xiboho lexi hetisekeke xa vun’we.”—Kol. 3:14.

16. Hlamusela ndlela leyi vamakwerhu vanharhu va xisati va vuyeriweke ha yona hi ku vekela madyambu man’wana etlhelo leswaku va dyondza Bibele.

¹⁶ Xiya ndlela leyi vamakwerhu vanharhu lava nga tinoni va vuyeriweke ha yona eka lunghiselelo ro vekela madyambu man’wana etlhelo leswaku va va ni dyondzo ya Bibele. Hambileswi va nga  riki maxaka, va tshama edorobeni rin’we naswona se i khale va ri vanghana lavakulu. Leswi a va lava ku hlangana minkarhi yo tala kasi hi nkarhi lowu fanaka a va lava ku bula hi swilo swa moya ematshan’weni yo bula ntsena hi timhaka tin’wana loko va hlanganile, va endle xiboho xo veka madyambu man’wana leswaku va hlangana va dyondza Bibele. Va sungule ku dyondza swin’we va tirhisa buku leyi nge ‘Chumayela Mfumo Wa Xikwembu Hi Rixaladza.’ Un’wana wa vona u te: “Ha yi tsakela swinene dyondzo ya hina lerova hakanyingi yi teka nkarhi lowu tlulaka awara. Hi ringeta ku swi vona hi mahlo ya mianakanyo swiyimo leswi vamakwerhu va lembe-xidzana ro sungula a va ri ehansi ka swona kutani hi vulavurisana hi leswi a hi ta swi endla loko a hi ri ehansi ka swiyimo leswi fanaka. Kutani hi ringeta ku ti tirhisa ensin’wini tinhla leti hi ti dyondzeke edyondzweni ya hina. Leswi swi endle leswaku ntirho wa hina wo chumayela hi Mfumo ni ku endla vadyondzisiwa wu tsakisa swinene wu tlhela wu tswala mihandzu ku tlula rini na rini.” Handle ko va dyondzisa tidyondzo ta Bibele, lunghiselelo leri ri tlhele ri endla leswaku vanghana lavanharhu va namarhelana swinene. Va ri: “Ha ri rhandza lunghiselelo leri.”

17. Hi swihi swilo leswi nga hoxaka xandla leswaku Vugandzeri bya Ndyangu bya nimadyambu byi vuyerisa?

¹⁷ Ku vuriwa yini ha wena? U vuyeriwe njhani eka madyambu lama vekeriweke vugandzeri bya ndyangu kumbe dyondzo ya munhu hi yexe? Lunghiselelo leri a ri nge vuyerisi loko ri tirhisiwa hi xiwelo. Xirho ha xin’we xa ndyangu xi fanele xi lunghekela ku dyondza hi nkarhi lowu vekiweke. Timhaka letitsongo a ti fanelanga ti pfumeleriwa ku kavanyeta madyambu wolawo. Ku tlula kwalaho, ku fanele ku hlawuriwa rungula leri nga ta endla leswaku dyondzo ya kona yi va leyi pfunaka eka ndyangu wa wena. U nga endla yini leswaku minkarhi ya dyondzo yoleyo yi va leyi tsakisaka? Tirhisa tindlela leti pfunaka to dyondzisa ni ku endla leswaku ku va ni moya wo rhula ni wa xichavo.—Yak. 3:18. *

‘Hitekani’ Naswona Mi ‘Tshama Mi Lunghekile’

18, 19. Ku tiva leswaku N’wana wa munhu u ta fika ku nga ri khale swi fanele swi ku khumba njhani wena ni ndyangu wa wena?

¹⁸ Ku nyanya ka swiyimo swa misava loku tinyikaka matimba enkarhini wa hina ku hi endla hi nga kanakani leswaku ku sukela hi 1914, misava yo homboloka ya Sathana yi nghene emasikwini ya yona yo hetelela. Armagedoni yi le kusuhi. Ku nga ri khale, ku ta fika nkarhi lowu N’wana wa munhu a nga ta ta leswaku a avanyisa vanhu lava nga xi xiximiki Xikwembu. (Ps. 37:10; Swiv. 2:21, 22) Xana ku tiva sweswo a swi fanelanga swi ku khumba wena ni ndyangu wa wena?

¹⁹ Xana wa yi yingisa ndzayo ya Yesu ya leswaku hi va ni tihlo ro “olova”? Hambileswi vanhu va misava leyi va nga ha hlongorisaka rifuwo, ndhuma kumbe swikhundlha, xana ndyangu wa wena wu tikarhatela ku fikelela tipakani ta moya? Xana wa ri tirhisa lunghiselelo ra Vugandzeri bya Ndyangu bya nimadyambu kumbe dyondzo ya munhu hi yexe? Xana wa vuyeriwa hi ku ya hi leswi ri kunguhateriweke swona? Hilaha swi tlhuvutsiweke hakona exihlokweni lexi hundzeke, xana u byarha vutihlamuleri bya wena bya Matsalwa tanihi wanuna, wansati kumbe n’wana, xisweswo u pfuna ndyangu hinkwawo leswaku wu ‘hiteka’? (1 Tes. 5:6) Loko swi ri tano, u ta ‘tshama u lunghekele’ ku ta ka N’wana wa munhu.

[Nhlamuselo ya le hansi]

Xana U Dyondze Yini?

• Hlamusela ndlela leyi ha yona mindyangu ya Vakreste yi nga ‘tshamaka yi lunghekile’ hi ku . . .

va ni tihlo ro “olova.”

tivekela tipakani ta moya ni ku ti fikelela.

va ni Vugandzeri bya Ndyangu bya nimadyambu.

[Swivutiso Swa Dyondzo]

[Xifaniso lexi nga eka tluka 13]

Ku va ni tihlo ro “olova’’ swi ta hi susumetela ku hlula swikavanyeto swa misava