Endla Leswaku Nkarhi Wo Dyondza Wu Va Lowu Tsakisaka Wu Tlhela Wu Vuyerisa

Hi nga swi endlisa ku yini leswaku ku dyondza Bibele swi va leswi tsakisaka swi tlhela swi vuyerisaka swinene? A hi kambisiseni hi ku komisa magoza manharhu ya nkoka lama nga ta hi pfuna leswaku hi vuyeriwa swinene eka dyondzo ya hina ya Bibele ya munhu hi yexe.

1 KHONGELA: Goza ro sungula leri hi nga ri tekaka i ku khongela. (Ps. 42:8) Ha yini? Hikuva hi fanele hi teka ku dyondza Rito ra Xikwembu tanihi xiphemu xa vugandzeri bya hina. Hikwalaho, hi fanele hi kombela Yehovha leswaku a hi pfula miehleketo ni ku hi nyika moya wakwe lowo kwetsima. (Luka 11:13) Barbara, murhumiwa un’wana wa khale, u ri: “Minkarhi hinkwayo ndza khongela ndzi nga si hlaya kumbe ku dyondza Bibele. Endzhaku ka sweswo, ndzi twa leswaku Yehovha u na mina nileswaku wa swi tsakela leswi ndzi swi endlaka.” Ku khongela emahlweni ko dyondza swi hi pfula miehleketo ni mbilu leswaku hi swi twisisa hi ku helela swilo leswi hi swi dyondzaka.

2 ANAKANYISISA: Leswi nkarhi wu nga riki kona, van’wana vo ri hlaya ntsena Rito ra Xikwembu. Kutani va kayeriwa hi vuyelo lebyi tsakisaka lebyi a va ta byi kuma loko a va ri dyondza hi vuenti. Carlos, loyi a nga ni malembe lama tlulaka 50 a tirhela Yehovha, u xiye leswaku ku va dyondzo yakwe yi n’wi vuyerisa, i swa nkoka ku vekela etlhelo nkarhi wo anakanyisisa. U ri: “Sweswi se ndzi hlaya matluka ma nga ri mangani ya Bibele—kwalomu ka matluka mambirhi hi siku. Kutani ndzi kota ku heta nkarhi wo tala ndzi anakanyisisa hi leswi ndzi swi hlayeke leswaku ndzi kuma tidyondzo ta nkoka.” (Ps. 77:12) Loko hi tinyika nkarhi wo anakanyisisa, hi endla leswaku ku rhandza ka Xikwembu hi ku tiva hi tlhela hi ku twisisa kahle.—Kol. 1:9-11.

3 SWI TIRHISE: Hi vuyeriwa ngopfu loko hi twisisa ndlela leyi ntirho wo karhi wu nga wa nkoka ha yona. Swi tano ni loko hi dyondza Bibele. Gabriel, makwerhu loyi a ha riki muntshwa loyi a dyondzaka Bibele nkarhi ni nkarhi, u te: “Ku dyondza swi ndzi pfuna ku hlula swiphiqo swa siku ni siku naswona swi ndzi hlomisela ku pfuna van’wana.” U tlhele a ku: “Ndzi ringeta ku tirhisa hinkwaswo leswi ndzi swi dyondzaka evuton’wini bya mina.” (Det. 11:18; Yox. 1:8) Hakunene ku ni vutivi byo tala lebyi humaka eka Xikwembu lebyi hi nga byi kumaka hi tlhela hi byi tirhisa.—Swiv. 2:1-5.

PFUXETA: Hakunene hi ni lunghelo lerikulu ro hakuta vutivi lebyi humaka eka Yehovha, Xihlovo xa vutivi hinkwabyo! (Rhom. 11:33) Hikokwalaho, loko u lava ku dyondza enkarhini lowu taka, tiyiseka leswaku u rhanga hi ku khongela eka Yehovha kutani u n’wi kombela leswaku a ku pfula miehleketo a tlhela a ku nyika moya wakwe lowo kwetsima. Kutani loko u ri karhi u hlaya, minkarhi yin’wana yima leswaku u anakanyisisa hi leswi u swi hlayaka. Nakambe swi tirhise evuton’wini bya wena swilo leswi u swi hlayaka. Loko wo tirhisa magoza lawa ya nkoka, u ta kuma leswaku dyondzo ya wena ya Bibele yi ta tsakisa yi tlhela yi vuyerisa.