Xana u yi hlaye hi vukheta minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

Xana swi fanerile leswaku Vakreste va hisa ntsumbu?

I xiboho xa munhu hi yexe leswaku ntsumbu wu ta hisiwa kumbe wu ta lahliwa kunene. Hambileswi Bibele yi nga vulavuriki hi ku kongoma hi ku hisa ntsumbu, i swa nkoka ku xiya leswaku ntsumbu wa Hosi Sawulo ni wa n’wana wakwe wa jaha Yonathani yi hisiwile kutani yi lahliwa. (1 Sam. 31:2, 8-13)—6/15, tluka 7.

Hi nga tiyiseka njhani leswaku Xikwembu a hi xona xi vangaka swilo swo biha?

Xikwembu xi lulamile etindleleni ta xona hinkwato. Xi lulamile, xa tshembeka naswona xi hava xisandzu. Nakambe Yehovha u ni xinakulobye lexikulu ni tintswalo. (Det. 32:4; Ps. 145:17; Yak. 5:11)—7/1, tluka 4.

Hi yihi mintlhontlho leyi lava rhurhelaka ematikweni man’wana leswaku va ya tirha laha ku nga ni xilaveko lexikulu va nga ha langutanaka na yona?

Yinharhu ya mintlhontlho yoleyo i (1) ku tolovela ku hanya vutomi byin’wana, (2) ku langutana ni ku tsundzuka ekaya ni (3) ku va ni xinghana ni vamakwerhu va kwalaho. Vo tala lava hluleke mintlhontlho leyi va katekisiwe swinene.—7/15, matluka 4-5.

Ha yini vamakwavo va Yosefa va n’wi vengile?

Yakobe a a n’wi rhandza swinene ku tlula vamakwavo naswona u n’wi nyike nguvu yo hlawuleka. Vamakwavo va Yosefa va ve ni mavondzo kutani va n’wi xavisa evuhlongeni.—8/1, matluka 11-13.

Ha yini swiphephana leswintshwa swi pfuna swi tlhela swi olova ku swi tirhisa?

Hinkwaswo ka swona swi endliwe hi ndlela leyi fanaka. Eka xiphephana ha xin’we hi fanele hi hlaya ndzimana ya Bibele hi tlhela hi vutisa n’wini wa muti xivutiso. Ku nga khathariseki leswaku u hlamula njhani, hi nga pfula endzeni ka xona ivi hi n’wi komba leswi Bibele yi swi vulaka. Hi nga tlhela hi n’wi komba xivutiso lexi hi nga ta xi hlamula loko hi endla riendzo ro vuyela.—8/15, matluka 13-14.

I yini Peshitta ya Xisiriya?

Xisiriya i rin’wana ra tindzimi leti humaka eka Xiaramu, leri sunguleke ku tirhisiwa etindhawini to tala hi lembe-xidzana ra vumbirhi kumbe ra vunharhu C.E. Swi tikomba onge Xisiriya a ku ri ririmi ro sungula leri swiyenge swa Matsalwa ya Vukreste ya Xigriki swi hundzuluxeriweke ha rona. Bibele ya Xisiriya a yi tiviwa tanihi Peshitta.—9/1, matluka 13-14.

I yini leswi vatswari lava nga Vakreste va nga swi endlaka leswaku va kongomisa vana va vona?

I swa nkoka ku yingisela vana leswaku u ta va tiva. Tikarhatele ku va wundla hi tlhelo ra moya. Va kongomise hi rirhandzu, hi xikombiso, loko va sungula ku kanakana tidyondzo leti va pfumelaka eka tona.—9/15, matluka 18-21.

Ehansi ka Mfumo wa Xikwembu, hi swihi swilo leswi swi nga ta va swi nga ha ri kona?

A ku nge he vi ni swiphiqo swa rihanyo, rifu, ku pfumaleka ka mintirho, nyimpi, ku pfumaleka ka swakudya ni vusweti.—10/1, matluka 6-7.

Hi wihi ntwanano wa le Bibeleni lowu endlaka leswaku van’wana va kota ku fuma na Kreste?

Endzhaku ka loko Yesu a dye Paseka yo hetelela ni vaapostola vakwe, u endle ntwanano ni vadyondzisiwa vakwe vo tshembeka, lowu vuriwaka ntwanano wa Mfumo. (Luka 22:28-30) Wu va tiyisekise leswaku va ta fuma na Yesu etilweni.—10/15, matluka 16-17.

Nyika swikombiso swimbirhi swa le Bibeleni leswi kombisaka leswaku Sathana i munhu wa xiviri.

Matsalwa ma vula leswaku Sathana u vulavule na Yesu hi xikongomelo xo n’wi ringa. Nakambe, enkarhini wa Yobo, Sathana u vulavule ni Xikwembu. Rungula leri ri kombisa leswaku Sathana i munhu wa xiviri.—11/1, matluka 4-5.

A a ku ri vamani “vanhu va vito ra xona” lava Yakobo a vulavuleke ha vona hilaha swi hlamuseriweke hakona eka Mintirho 15:14?

A ku ri Vayuda ni vapfumeri lava nga riki Vayuda lava Xikwembu xi va hlawuleke leswaku va va rixaka leri hlawuriweke leswaku va “twarisa hinkwako-nkwako vunene” bya Loyi a va vitaneke. (1 Pet. 2:9, 10)—11/15, matluka 24-25.

A wu ri kwihi muti wa Timgad naswona hi rihi langutelo leri vanhu van’wana va kwalaho a va ri na rona?

Timgad a ku ri muti lowukulu wa Varhoma eAfrika N’walungu (lowu namuntlha wu nga Algeria). Marito lama yimburiweke lama kombisaka leswi vanhu van’wana va kwalaho a va pfumela eka swona ma hlayeka hi ndlela leyi: “Ku Hlota, Ku Hlambela, Ku Tihungasa Ni Ku Hleka—Hi Byona Vutomi!” Langutelo leri ra fana ni leri hlamuseriweke eka 1 Vakorinto 15:32.—12/1, matluka 8-10.