Ndzi Dyondze Ndlela Leyi Vutomi Byi Nga Bya Nkoka Ha Yona

HI APRIL 16, 2007 NIMIXO, ndzi kase ndzi ya ekhonweni ya hofisi leyi nga exithezini xa vunharhu eHolweni ya Norris eYunivhesiti ya Sayense ni Thekinoloji ya le Virginia kumbe Kholichi ya Virginia. Ndzi tlhele ndzi tsundzuka ndlela leyi hi faneleke hi byi tlangela ha yona vutomi bya hina lebyi nga bya nkoka siku rin’wana ni rin’wana.

A ndzi ri ehofisini ndzi ri karhi ndzi tilulamisela ku ya exithezini xa vumbirhi leswaku ndzi ya teka mapapila ya mina. Hiloko ku ta profesa un’wana a ta ndzi kombela leswaku ndzi ya n’wi pfuna hi swin’wana eka khompyuta ehofisini yakwe. Loko hi ri karhi hi kongoma ehofisini yakwe, hi twe ku duvula ka swibamu exithezini xa vumbirhi. Leswi a hi nga swi tivi leswaku ku endleka yini, hi hatlise hi nghena ehofisini yakwe ivi hi ti gogela kona. Kutani hi rindze kwalaho hi karhatekile leswaku i yini leswi nga ta humelela hi vutomi bya hina. Ndzi tumbele ekhonweni kutani ndzi khongela hi mbilu hinkwayo eka Yehovha Xikwembu, ndzi kombela leswaku a ndzi pfuna ku langutana ni nchumu wihi ni wihi lowu a wu ta humelela.

Loko ha ha tumberile, ndzi tsundzuke xiendlakalo lexi endlekeke malembe ya 15 lama hundzeke. A ndzi ri makhanikhi endhawini yin’wana yo lunghisa timovha. Xithinana xa petirolo lexi a xi khomiwe hi mutirhi-kulorhi xi sungule ku pfurha. Hikwalaho ka leswi a khomiwe hi rhumbyana, u cukumete xithinana xexo exikandzeni xa mina handle ko swi xiya! Ndzi tshwe swinene ku sukela ekhwirini ku ya enhlokweni. Ndzi tekiwe hi xihaha-mpfhuka-phatsa ndzi yisiwa exibedlhele lexi tshungulaka vanhu lava tshweke kutani ndzi tshame kwalaho ku ringana tin’hweti tinharhu ni hafu naswona hi nkarhi wolowo a ku ri phulaphulani. Endzhaku ko tshunguriwa tin’hweti ta ntlhanu ni ku pfuniwa leswaku ndzi tlhela ndzi hanya vutomi lebyi tolovelekeke, ndzi tlhelele ekaya ndzi nkhensa leswi ndzi poneke ri ahlamile. Ntokoto wolowo wu ndzi dyondzise leswaku ndzi teka siku rin’wana ni rin’wana ri ri ra nkoka evuton’wini. Leswi ndzi nga Mbhoni ya Yehovha, wu tlhele wu tiyisa ku tiyimisela ka mina ku tirhisa vutomi lebyi a ndzi nyikeke byona leswaku ndzi n’wi tirhela.—Pisalema 90:12; Esaya 43:10.

Leswi a ndzi nga ha swi koti ku va makhanikhi hikwalaho ka leswi a ndzi lamarile, ndzi dyondze ku tirhisa tikhompyuta naswona ndzi thoriwe eKholichi ya Virginia. Hi swona leswi endleke leswaku ndzi va eHolweni ya Norris hi mixo wolowo.

Loko swibamu swi ri karhi swi duvuriwa, mina na profesa a hi nga swi xiyi leswaku vanhu a va ri karhi va yayarheriwa exithezini xa le hansi ka lexi a hi ri eka xona, ku nga ku dlayiwa ka vanhu loku nga si tshamaka ku endleka ematin’wini hinkwawo ya le Amerika. Ku dlayeteriwa koloko ka vanhu ku hele loko xigevenga xexo xi tiduvula endzhaku ka loko xi dlaye vanhu va 32 lava nga riki na nandzu. Endzhaku ka timinete ta 20 xiendlakalo lexi xi sungurile, hi twe maphorisa ephasejini. Hi ma huwelerile kutani ma hi teka ma hi yisa endhawini leyi hlayisekeke.

Xiendlakalo lexi lexi chavisaka xi ndzi dyondzise ndlela leyi vutomi byi komeke ha yona ni leswaku a hi swi tivi leswi nga ta humelela hi vutomi bya hina. (Yakobo 4:14) Hakunene i swa nkoka leswaku hi tshembela eka Munyiki wa vutomi, Yehovha Xikwembu, ni ku teka siku rin’wana ni rin’wana ra vutomi ku ri nyiko ya risima leyi humaka eka yena!—Pisalema 23:4; 91:2.

[Laha Xifaniso Xi Humaka Kona eka tluka 30]

AP Photo/The Roanoke Times, Alan Kim