Dyondzo Leyi Dumeke

“A ndzi hamba ndzi lorha milorho yo chavisa ndzi ri eku hisiweni etiheleni! A ndzi lorha ndzi lahleriwa endhawini leyi pfurhaka ndzilo lowukulu naswona a ndzi sisimuka ndzi ri karhi ndzi huwelela. Kutani ndzi ringete hi matimba leswaku ndzi nga dyohi.”—Arline.

XANA wa pfumela leswaku tihele i ndhawu leyi vadyohi va nga ta xanisiwa eka yona? Vanhu vo tala va pfumela. Hi xikombiso, hi 2005 xichudeni xin’wana lexi dyondzelaka timhaka ta vukhongeri eYunivhesiti ya St. Andrews etikweni ra Scotland xi kume leswaku vafundhisi va le Scotland lava endlaka tiphesente ta 30 va pfumela leswaku vanhu lava tihambanisaka ni Xikwembu va ta xanisiwa “emiehleketweni hilaha ku nga heriki etiheleni.” Kasi vafundhisi van’wana lava endlaka tiphesente ta 50 va pfumela leswaku vanhu lava nga etiheleni va ta xanisiwa enyameni.

Dyondzo ya leswaku tihele ti kona yi dume ngopfu ematikweni yo tala. Hi xikombiso, eka nkambisiso lowu endliweke eAmerika hi 2007 wa ku vutisa vanhu mavonelo ya vona hi mhaka ya tihele, ku kumiwe leswaku vanhu va kwalomu ka 70 wa tiphesente lava vutisiweke va pfumela leswaku tihele ti kona. Hambi ku ri ematikweni lawa vunyingi bya vaaki va kona va nga ngheniki kereke, va pfumela leswaku tihele ti kona. Kasi eka nkambisiso lowu fanaka lowu endliweke eCanada hi 2004, ku kumiwe leswaku vanhu lava endlaka tiphesente ta 42 va pfumela leswaku tihele ti kona. Naswona eGreat Britain vanhu lava endlaka tiphesente ta 32 va pfumela leswaku tihele ti kona.

Leswi Vafundhisi Va Swi Dyondzisaka

Vafundhisi vo tala va tshike ku dyondzisa leswaku tihele i ndhawu ya xiviri leyi vanhu va xanisiwaka eka yona. Kambe va dyondzisa mhaka leyi fanaka ni leyi tsariweke ebukwini ya kereke ya Khatoliki leyi kandziyisiweke hi 1994. (Catechism of the Catholic Church) Buku leyi yi ri: “Nxupulo lowukulu wa le tiheleni i ku hambanisiwa ka vanhu ni Xikwembu hilaha ku nga heriki.”

Hambiswiritano, vanhu vo tala va ha pfumela leswaku tihele i ndhawu leyi vanhu va nga ta xanisiwa eka yona emiehleketweni ni le nyameni. Lava dyondzisaka dyondzo leyi va vula leswaku dyondzo yoleyo yi sekeriwe eBibeleni. R. Albert Mohler, presidente wa Xikolo xo Dyondzela Vufundhisi xa Southern Baptist u te: “Dyondzo leyi yi huma eMatsalweni.”

Ha Yini U Fanele U Va Ni Mhaka Ni Leswi U Swi Pfumelaka?

Loko hakunene tihele ku ri ndhawu leyi vanhu va xanisiwaka eka yona, swi le rivaleni leswaku u fanele u ti chava. Hambiswiritano, loko dyondzo leyi yi nga ri ntiyiso, vafundhisi lava yi dyondzisaka va pfilunganya vanhu lava pfumelaka eka yona naswona va va endla va chava nchumu lowu nga riki kona. Nakambe va xi onha vito Xikwembu.

Xana Rito ra Xikwembu, ku nga Bibele, ri ri yini hi mhaka leyi? Eka swihloko leswi landzelaka hi ta kambisisa leswi Tibibele tin’wana ti swi vulaka leswaku hi hlamula swivutiso leswinharhu: (1) Kahle-kahle ku humelela yini loko munhu a fa? (2) I yini leswi Yesu a swi dyondziseke hi tihele? (3) Xana ku dyondza leswi nga ntiyiso hi tihele swi nga ku khumba njhani?