Ku Rhamberiwa Ku Ta Valanga Hi Xikongomelo Lexinene

“XANA ku endliwa yini laha?” Vanhu vo tala lava hundzaka hi timovha etlhelo ka miako leyikulu ya Timbhoni ta Yehovha eDorobeni ra Mogale (Krugersdorp), ekusuhi ni le Johannesburg, eAfrika Dzonga, va tivutisa xivutiso xexo. Kutani Timbhoni ti hlele ku rhamba vanhu hinkwavo lava swi tsakelaka leswaku va ta valanga miako ya rhavi ra tona hi October 12 na 13, 2007. A ti ri ni swikongomelo swimbirhi—ku kombisa leswaku mhaka leyi ti hehliwaka ha yona i mavunwa ni ku komba vanhu leswi endliwaka erhavini ra tona ku pfuneta entirhweni lowu Yesu Kreste a leriseke leswaku wu endliwa.—Matewu 28:19, 20.

Lava tirhaka erhavini va veke tibodo letikulu leti a ti ri ni ni xirhambo egedeni naswona va fambe va nyika vanhu lava tshamaka ekusuhi ni rhavi rolero swirhambo swo hlawuleka. Rhavi ri rhambe van’wamabindzu lava tirhisanaka na rona swin’we ni swirho swa mindyangu ya vona. Xana va angule njhani? Vaendzi lava tlulaka 500 lava nga riki Timbhoni va tile va ta valanga miako ya rhavi.

Va kokiwe rinoko hi muchini wo gandlisa tibuku wa MAN Roland Lithoman lowu kotaka ku gandlisa timagazini ta 90 000 hi awara. Vaendzi va tlhele va hlamarisiwa hi ndhawu leyikulu laha ku pakiwaka kona mabokisi ya tibuku leti tlulaka tithani ta 14 hi siku swin’we ni ndhawu leyi ku nga ni muchini lowu hlanganisaka tibuku. Timbhoni leti tirhaka etindzawulweni to hambana-hambana ti lunghiselele swifaniso swo xonga, ku katsa ni lexi katsakanyaka matimu ya michini yo gandlisa tibuku, ku sukela eka muchini wa Gutenberg ku ya fika eka michini yo gandlisa leyi tirhisaka tipuleti. Xifaniso xin’wana xi kombisa ndlela leyi rhavi ri nga xi thyakisiki ha yona xibakabaka. Hi xikombiso, ku ni ndhawu yin’wana yo hlawuleka leyi cincaka tigasi ni risema leri nga ni khombo leri humaka exiphen’wini xa muchini lexi eka xona ku omisiwaka phepha, naswona ku ni tiphayiphi leti tswongaka ritshuri ra phepha leswaku ri ya lahliwa.

Phepha-hungu ra le ndhawini yoleyo ri humese xihloko lexi vuleke leswaku vatirhi va ku tirhandzela va 700 lava tshamaka kwalaho “i malandza lama tinyiketeleke eka Yehovha.” Ri tlhele ri vulavula hi ndlela leyi rhavi rolero ri “baseke swinene ha yona ni ndlela leyi swilo hinkwaswo swi tirhaka hi nkarhi lowu faneleke” endhawini yo gandlisa. Wanuna un’wana loyi a a nga ti rhandzi Timbhoni ta Yehovha u tile a ta valanga. Endzhakunyana ka kwalaho u tsale papila leri hlayekisaka xileswi: “Ndza mi nkhensisa swinene. A swi tolovelekanga ku va munhu a vona swilo swi endliwa hi ndlela leyinene swonghasi.”

Vaendzi vo tala va nkhense swinene hileswi va valangeke miako leyi naswona swi va hlamarisile ku tiva leswaku rhavi leri ri ni tibuku leti sekeriweke eBibeleni hi tindzimi ta 151 naswona ri gandlisela matiko ya 18 ya le dzongeni wa Afrika ni ya le Afrika xikarhi. Vanhu hinkwavo va nga valanga marhavi ya Timbhoni ta Yehovha emisaveni hinkwayo hi nkarhi wa ntirho. Ha yini u nga ri beli riqingho rhavi ra le tikweni ra ka n’wina u vutisa nkarhi lowu u nga yaka u ya valanga ha wona?

[Xifaniso lexi nga eka tluka 14]

Vaendzi va fika erhavini

[Xifaniso lexi nga eka tluka 14]

Xirhambo

 [Swifaniso leswi nga eka tluka 15]

Rhavi ra Afrika Dzonga eDorobeni ra Mogale

[Xifaniso lexi nga eka tluka 15]

Muchini wo gandlisa wa MAN Roland Lithoman

[Xifaniso lexi nga eka tluka 15]

Ndhawu leyi ku hlanganisiwaka tibuku eka yona

[Xifaniso lexi nga eka tluka 15]

Ndhawu leyi tibuku ti pakiwaka eka yona