Xana Timbhoni Ta Yehovha Ti Hahlula Mindyangu Ya Vanhu?

VANHU vo tala va ri: “Loko nkataku a cinca vukhongeri byakwe, vukati bya n’wina byi ta hahluka.” Minkarhi yin’wana marito wolowo ma byeriwa munhu loyi a ngheneleke vukati loyi a hlawulaka ku va Mbhoni ya Yehovha. Kambe, xana mhaka leyi i ntiyiso hakunene?

I ntiyiso leswaku loko munhu loyi a ngheneleke vukati a sungula ku tsakela vukhongeri byo karhi kumbe a tshika tidyondzo ta vukhongeri leti se ku nga khale a pfumela eka tona, swi nga ha n’wi tsema nhlana nkatakwe. Swi nga ha n’wi vilerisa, swi n’wi heta matimba hambi ku ri ku n’wi hlundzukisa.

Hakanyingi i wansati loyi a rhangaka a vona xilaveko xo lava ku cinca vukhongeri byakwe. Loko nsati wa wena a dyondza Bibele ni Timbhoni ta Yehovha, xana leswi swi nga byi khumba njhani vukati bya n’wina? Loko wena wansati u dyondza Bibele ni Timbhoni ta Yehovha, xana u nga endla yini leswaku nuna wa wena a nga vileli?

Leswi Wanuna Un’wana A A Swi Ehleketa

Mark, loyi a tshamaka eAustralia, a a ri ni malembe ya 12 a tekile loko nsati wakwe a sungula ku dyondza Bibele ni Timbhoni ta Yehovha. Mark u ri: “Mina ni nsati wa mina a hi tsakile naswona ntirho wa mina a wu ndzi enerisa swinene. Vutomi a byi tsakisa. Hiloko nsati wa mina a sungula ku dyondza Bibele ni Timbhoni ta Yehovha. Hi ku hatlisa ndzi xiye leswaku xiboho lexi tekiweke hi nsati wa mina a xi ta endla leswaku ndzi cinca mahanyelo ya mina. Eku sunguleni, a ndzi nga yi tsakeli mhaka ya leswaku nsati wa mina u sungule ku dyondza Bibele, kambe loko a ndzi byela leswaku u lava ku khuvuriwa a va Mbhoni ya Yehovha, ndzi sungule ku karhateka swinene.”

Mark u sungule ku tivutisa loko vukati bya vona byi ta hahluka hikwalaho ka vukhongeri lebyintshwa bya nsati wakwe. U ehlekete ku n’wi tshikisa ku dyondza Bibele ni ku nga ha n’wi pfumeleli ku ya eminhlanganweni ya Timbhoni. Kambe Mark a nga nambanga a n’wi tshikisa, u rhange a yimanyana a vona hi swona. Xana ku humelele yini hi vukati bya vona?

Mark u ri: “Lexi tsakisaka, sweswi vukati bya hina byi tiye swinene ku tlula leswi a byi ri xiswona eku sunguleni. Byi hambete byi tiya ku sukela loko nsati wa mina a khuvuriwile a va Mbhoni ya Yehovha eka malembe ya 15 lama landzeleke.” I  yini lexi endleke leswaku vukati bya vona byi va lebyi tsakisaka? Mark u ri: “Entiyisweni vukati bya hina byi ve lebyi tsakisaka hileswi ngopfu-ngopfu nsati wa mina a tirhiseke ndzayo leyinene leyi kumekaka eBibeleni. Minkarhi hinkwayo a a tikarhatela ku ndzi xixima.”

Switsundzuxo Swa Vavasati Lava Pfuneke Vanuna Va Vona

Loko wena wansati u dyondza Bibele ni Timbhoni ta Yehovha, xana u nga endla yini leswaku nuna wa wena a nga vileli? Xiya leswi vuriweke hi vavasati volavo lava humaka ematikweni yo hambana-hambana.

Sakiko wa le Japani u ri: “Ndzi ni malembe ya 31 ndzi tekiwile naswona ndzi ni vana vanharhu. Se ndzi ni malembe ya 22 ndzi ri Mbhoni ya Yehovha. Minkarhi yin’wana swa tika ku tshama ni nuna loyi a nga riki Mbhoni. Kambe ndzi tikarhatela ku tirhisa ndzayo ya Bibele leyi hi khutazaka ku va lava ‘hatlisaka emhakeni yo twa, hi nonoka emhakeni yo vulavula, ni ku nonoka emhakeni ya vukarhi.’ (Yakobo 1:19) Ndzi ringeta ku va ni musa eka nuna wa mina ni ku endla leswi a swi lavaka loko swi nga lwisani ni milawu ya Bibele. Leswi swi endle leswaku vukati bya hina byi tsakisa.”

Nadezhda wa le Rhaxiya u ri: “Ndzi ni malembe ya 28 ndzi tekiwile naswona ndzi ni malembe ya 16 ndzi ri Mbhoni. Loko ndzi nga si dyondza Bibele, a ndzi nga swi tivi leswaku nuna wa mina u fanele a va nhloko ya ndyangu. A ndzi rhandza ku tiendlela swiboho swo tala. Hambiswiritano, hakatsongo-tsongo ndzi vone leswaku ku tirhisa milawu ya Bibele swi endla leswaku endyangwini wa hina ku va ni ku rhula ni ntsako. (1 Vakorinto 11:3) Hakatsongo-tsongo swi sungule ku ndzi olovela ku titsongahata naswona nuna wa mina u ku xiyile ku cinca koloko.”

Marli wa le Brazil u ri: “Ndzi ni vana vambirhi naswona ndzi ni malembe ya 21 ndzi tekiwile. Ndzi ni malembe ya 16 ndzi ri Mbhoni ya Yehovha. Ndzi dyondze leswaku Yehovha Xikwembu u lava leswaku vatekani va tshama swin’we, va nga hambani. Kutani ndzi ringeta ku va nsati lonene, ndzi vulavula ni ku endla swilo hi ndlela leyi nga ta tsakisa Yehovha ni nuna wa mina.”

Larisa wa le Rhaxiya u ri: “Loko ndzi va Mbhoni ya Yehovha emalembeni ya kwalomu ka 19 lama hundzeke, ndzi xiye leswaku nchumu wa nkoka swinene lowu a ndzi fanele ndzi wu endla a ku ri ku cinca ndlela leyi a ndzi hanya ha yona. Nuna wa mina wa swi vona leswaku Bibele yi ndzi pfunile ku va nsati lonene naswona yi tlhele yi ndzi pfuna ku xiya leswaku nuna wa mina i munhu lonene. Eku sunguleni, a hi holova loko swi ta emhakeni yo kurisa vana, kambe hi swi tlhantlhile swiphiqo sweswo. Nuna wa mina wa pfumela leswaku ndzi famba ni vana va hina vambirhi eminhlanganweni ya Timbhoni ta Yehovha hikuva wa swi xiya leswaku va dyondzisiwa leswi nga ta va vuyerisa.”

Valquíria wa le Brazil u ri: “Ndzi ni n’wana wun’we wa mufana naswona ndzi ni malembe ya 19 ndzi tekiwile. Ndzi ni malembe ya 13 ndzi ri Mbhoni ya Yehovha. Eku sunguleni, nuna wa mina a a nga swi lavi leswaku ndzi ya eku chumayeleni. Kambe ndzi dyondze ku vulavula na yena hi ndlela yo rhula hi timhaka leti a ti n’wi karhata naswona ndzi n’wi pfune ku vona leswaku Bibele a yi ndzi pfuna ku va ni vumunhu lebyinene. Hakatsongo-tsongo nuna wa mina u yi twisisile ndlela leyi a swi ri swa nkoka ha yona eka mina ku va ndzi ya eku chumayeleni. Namuntlha u ndzi seketela swinene emintirhweni leyi fambisanaka ni vupfumeri bya mina. Loko ndzi fanele ndzi ya fambisa tidyondzo ta Bibele ematiko-xikaya, u ndzi heleketa hi movha a tlhela a ndzi yimela emovheni kukondza ndzi heta.”

Bibele Ya Pfuna

Loko nkataku a dyondza Bibele ni Timbhoni ta Yehovha, u nga chavi leswaku leswi swi ta dlaya vukati n’wina. Vavanuna ni vavasati vo tala ematikweni yo hambana-hambana va kume leswaku Bibele ya pfuna swinene evukatini.

Nuna un’wana loyi a nga riki Mbhoni ya Yehovha u vule marito lawa hi mbilu yakwe hinkwayo: “Eku sunguleni swi ndzi twise ku vava loko nsati wa mina a va Mbhoni ya Yehovha, kambe ku vava koloko ku hundzuke ntsako.” Nuna un’wana u vule leswi hi nsati wakwe: “Ku tshembeka ni ku tiyimisela ka nsati wa mina swi ndzi endle leswaku ndzi ti xixima swinene Timbhoni ta Yehovha. Tidyondzo ta vupfumeri byakwe ti hi pfune swinene evukatini bya hina. Ha anakanyelana naswona hi teka vukati bya hina byi ri xiboho xa vutomi hinkwabyo.”

 [Bokisi/Xifaniso lexi nga eka tluka 13]

Xana Timbhoni Ta Yehovha Ti Byi Teka Njhani Vukati?

Timbhoni ta Yehovha ti teka Bibele yi ri Rito ra Xikwembu leri huhuteriweke. Kutani ti swi tekela enhlokweni leswi yi swi vulaka hi vukati. Xiya leswi Bibele yi swi vulaka loko yi hlamula swivutiso leswi landzelaka:

▪ Xana Timbhoni ta Yehovha ti khutaza swirho swa tona ku tshika vanhu lava swi tekaneke na vona lava nga riki Timbhoni? Doo! Muapostola Pawulo u tsale a ku: “Loko makwerhu a ri ni nsati loyi a nga pfumelangiki, kambe yena a tiyimisele ku tshama na yena, a nga n’wi tshiki; ni wansati loyi a nga ni nuna loyi a nga pfumelangiki, kambe nuna loyi a tiyimisele ku tshama na yena, a nga n’wi tshiki nuna wa yena.” (1 Vakorinto 7:12, 13) Timbhoni ta Yehovha ti landzela xileriso lexi.

▪ Xana wansati loyi a nga Mbhoni ya Yehovha u khutaziwa ku honisa swilaveko swa nuna wakwe loyi a nga riki Mbhoni? Doo! Muapostola Petro u tsale a ku: “N’wina vavasati lava tekiweke, tivekeni ehansi ka vanuna va n’wina, leswaku, loko ku ri ni lava nga yingisiki rito, va ta kokiwa handle ka rito hi ku tikhoma ka vasati va vona, hikwalaho ka leswi va veke timbhoni leti ti ku voneke hi mahlo ku tikhoma ka n’wina loku tengeke swin’we ni xichavo lexi enteke.”—1 Petro 3:1, 2.

▪ Xana Timbhoni ta Yehovha ti dyondzisa leswaku nawu wun’wana ni wun’wana lowu vekiwaka hi nhloko ya ndyangu a wu fanelanga wu tluriwa? Doo! Muapostola Pawulo u te: “Ndzi lava mi tiva leswaku nhloko ya wanuna un’wana ni un’wana i Kreste; kasi nhloko ya wansati i wanuna; kasi nhloko ya Kreste i Xikwembu.” (1 Vakorinto 11:3) Nsati la nga Mukreste u ta xixima nuna wakwe tanihi nhloko ya ndyangu. Hambiswiritano, a hi milawu hinkwayo leyi vekiwaka hi wanuna leyi faneleke yi landzeriwa. Wanuna u ta tihlamulela eka Xikwembu na Kreste. Hikokwalaho, loko wanuna a lerisa nsati wakwe leswaku a tlula nawu wa Xikwembu, nsati la nga Mukreste u ta “yingisa Xikwembu tanihi mufumi ku tlula vanhu.”—Mintirho 5:29.

▪ Xana Timbhoni ta Yehovha ti dyondzisa leswaku ku dlaya vukati swi hoxile? Doo! Yesu Kreste u te: “Ndza mi byela leswaku mani na mani la tshikaka nsati wakwe, a teka un’wana, ku nga ri hi xivangelo xa vumbhisa [ku hlanganyela timhaka ta masangu], u endla vuoswi.” (Matewu 19:9) Hikokwalaho, Timbhoni ta Yehovha ti pfumelelana ni mhaka leyi vuriweke hi Yesu ya leswaku vuoswi hi xona ntsena xivangelo xo dlaya vukati. Kambe ti tlhela ti pfumela leswaku vukati a byi fanelanga byi dlayiwa hi swivangelo leswi nga nyawuriki. Ti khutaza swirho swa tona ku yingisa marito ya Yesu lama nge: “Wanuna u ta siya tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we. . . . Hikokwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka.”—Matewu 19:5, 6.