Tshinela Eka Xikwembu

Muvumbi Loyi A Faneriwaka Hi Ku Va Hi N’wi Xixima

Nhlavutelo 4:11

XANA u tshame u tivutisa leswaku hi hanyela yini? Lava pfumelaka leswaku vutomi byi ve kona hikwalaho ka ku tiendlekela ka swilo va tsandzeka ku kuma nhlamulo ya xivutiso lexi. Kambe a swi tano hi lava pfumelaka eka ntiyiso lowu heleleke wa leswaku Yehovha Xikwembu hi yena Xihlovo xa vutomi. (Pisalema 36:9) Va swi tiva leswaku loko a hi tumbuluxa a a ri ni xikongomelo. Xikongomelo xexo xi hlamuseriwe eka Nhlavutelo 4:11. A hi kambisiseni ndlela leyi marito wolawo lama tsariweke hi muapostola Yohane ma swi kombisaka ha yona leswaku ha yini hi ri laha misaveni.

Yohane u tsale hi ntlawa wa swivumbiwa swa le tilweni leswi dzunisaka Xikwembu swi ku: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” Yehovha hi yena ntsena la faneriwaka hi ku xiximiwa koloko. Ha yini? Hikuva u “tumbuluxe swilo hinkwaswo.” Kutani i yini leswi swivumbiwa swa yena leswo tlhariha swi faneleke swi susumeteleka ku swi endla?

Ku vuriwa leswaku Yehovha u faneriwa hi ku “amukela” ku vangama, ku xiximiwa ni matimba. A swi kanakanisi leswaku u vangama swinene a tlhela a xiximeka naswona hi yena la nga ni matimba lamakulu evuakweni hinkwabyo. Hambiswiritano, vanhu vo tala a va pfumeli leswaku hi yena loyi a tumbuluxeke swilo hinkwaswo. Nilokoswiritano, va kona vanhu lava ti vonaka kahle “timfanelo ta xona leti nga vonakiki” hi ku langutisa swilo leswi xi swi tumbuluxeke. (Varhoma 1:20) Leswi timbilu ta vona ti taleke hi ku tlangela va susumeteleka ku vangamisa Yehovha ni ku n’wi xixima. Va byela vanhu hinkwavo lava nga ta vona vumbhoni lebyi hlamarisaka leswaku Yehovha hi yena la vumbeke swilo hinkwaswo hi ndlela yo saseka ni leswaku hikwalaho ka sweswo u faneriwa hi ku va hi n’wi xixima swinene.—Pisalema 19:1, 2; 139:14.

Kambe, Yehovha u ma amukela njhani matimba lama humaka eka vagandzeri vakwe? I ntiyiso leswaku ku hava xivumbiwa lexi nga nyikaka Muvumbi lonkulu matimba. (Esaya 40:25, 26) Kambe, leswi hi vumbiweke hi xifaniso xa Xikwembu, hi velekiwe hi ri ni timfanelo to karhi ta Xikwembu, leti yin’wana ya tona ku nga matimba. (Genesa 1:27) Loko hakunene hi tlangela leswi Muvumbi wa hina a hi endleleke swona, hi ta susumeteleka ku tirhisa matimba ya hina leswaku hi n’wi xixima ni ku n’wi vangamisa. Ematshan’weni yo tirhisa matimba ya hina eka swilo leswi vuyerisaka hina ntsena, hi xiya leswaku Yehovha Xikwembu u faneriwa hi ku kuma matimba ya hina hinkwawo loko hi ri karhi hi n’wi tirhela.—Marka 12:30.

Kutani, ha yini hi ri laha misaveni? Xiyenge xo hetelela xa Nhlavutelo 4:11 xa hlamula: “Hikwalaho ka ku rhandza ka wena [swilo hinkwaswo leswi tumbuluxiweke] swi ve kona, swi tumbuluxiwile.” A hi ti tumbuluxanga. Hi ve kona hikwalaho ka ku rhandza ka Xikwembu. Hikwalaho ka sweswo, ku hanyela ku ti enerisa ntsena a swi pfuni nchumu. Leswaku hi va ni ku rhula, ntsako ni ku eneriseka, hi fanele hi dyondza leswaku ku rhandza ka Xikwembu i yini kutani hi hanya hi ku pfumelelana na kona. Kutani hi kona hi nga ta tiva leswaku ha yini hi tumbuluxiwile.—Pisalema 40:8.

[Laha Xifaniso Xi Humaka Kona eka tluka 31]

NASA, ESA, and A. Nota (STScI)